Apocalipsis 21:4 - Dios Iwene

⁴ Diosma, ömöledönö otiwanö ite'ada̧lakobe. Jobadöma belöma budekwabinö tjuju̧kwinajayonö, tjo̧wi̧, babema budekwaböködö. Ja̧danö, yemidanö wotjökakwedö. Ajayi suli̧ baledinama, la'akatjöda yemidanöma suli̧ma baledökakwawö̧. Ja̧danö, tjo̧'wo̧ tjo̧ebi̧bi yemidanöma baledökakwawö̧. Budekwöbi, nii̧bi niökakwawö̧ ajayinö baledinadanö— jö̧ba̧lö cha̧ja̧kwijatö.

Apocalipsis 21:4 Iomraidhean Croise

Isaías 25:8

Ö'wö baibakwawabi söbebö loakobe duluwo̧ Isabenö Jo̧ma, ja̧ möle tupakwö, la'akatjöda ö'wö batjibökakobetjö̧. Ja̧danö o̧'wo tjo̧achö tjubudesobuma, okobe deinö tjöbajaletjö 'do̧bebö loakobe. Ja̧danö, ökwödö israel jojodö, iteda ömöledö tabakwö dö̧ji̧bi söbebö loakobe, jemi tupakwö la'akatjöda tabakwö dö̧jökakobetjö̧. Jobekwö yöawajabe Isabenö Jo̧ma, ja̧danö isabenö yöawaja̧danö badekwachinö baledakobe.

Isaías 30:19

Yadakwö isabenö Sion mösa'onö tjö̧jakwedö jojodöma, ja̧danö Jerusalennö ju̧kwadöma budekwö katjatibakwedö. Kwo'woduwi tjo̧bekwö pjaatobö jwökeba̧laduwiökwe, a̧ja̧kwakwo̧ Diosma, jadanö a̧ja̧kwajo̧, isabenö lȩlöjinö edö pjaatakwo̧. Jau, a̧ja̧kwenama, isabenö juluwanö atadö pjaatakwo̧.

Isaías 35:10

Tjöpöjojodö tjujulutjwö Isabenö Jo̧ tjö̧jibinö pjaatinawö̧ jamabenö Sion mösa'obe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧bibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, Isabenö Jo̧ pjaatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö.

Isaías 51:11

Jobekwö pjakatakwo̧ja duluwo̧ Isabenö Jo̧, ja̧danö tjö̧jibinö pjakatajawö̧ma tjitebobe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧ibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, pjakatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö, jö̧ba̧lö adebakwö duluwo̧ Isabenö Jo̧.

Isaías 60:20

Jobekwö ötjöda dejatö chö̧jobetjö̧, möle jawo̧ la'akatjöda meajokobedanö ichejekwakobe, ja̧danö yöte jawo̧ dewi̧ma, la'akatjöda 'dö̧ibajöködanö ichekwakobe. Jau chömöledö, ötjöda tibibökönö, ba̧kwelöjatebö dejatö chöjakwo̧sa. Budekwö kwö̧jaduwi̧ma 'dö̧ibakobe,

Isaías 61:3

Jau, okobe deinö Jerusalen comunidadtjö budekwadönö, ökwölaso̧pja tjuunö tjöwanajelö, balekwaka o̧bubiyatjö otikwaka butjawaka tjubutjawobö chiyobö weökwesa, ja̧danö tjubudesobu ji̧nemi, balekwobu o̧'wo ösöwachibakwawa o̧te chiyobö weinökwesa, ja̧danö budekwadö 'dutjawa̧do̧ 'dutjawajemi, balekwa̧do̧ tjo̧'wo ösöwachibanö Diosnö ösödadö 'dutjawa̧do̧ chiyobö weinökwesa. Ja̧ möle 'diinö ja̧nö Dios wei̧ a̧ja̧kwö tjö̧jobetjö̧, —Isabenö Jo̧ wei̧ a̧ja̧kwi̧owi encina towibiya, —jö̧ba̧lö ötjabikwawö̧. Jobekwö 'diinö tjö̧jobö ujunakwo̧ Diosma, jobadönö edö, jo̧banö otiwanö omukwatö tjösödakobetjö̧.

Mateo 24:35

Jau chömöledö, isabenö yötawi̧danö baledakobe. Baikwö yötawa: Böjȩbi, mölejȩbi isabenö 'dö̧ibajakobe, jo̧kwaijayonö ötjö yötawi̧ma ba̧kwȩlö̧jatebö ja̧kobe— jö̧ba̧lö yöawinobe Jesúsma.

1 Corintios 15:26

Ja̧danö, wanedö yötawa: Woawama Cristo öpöjojodanö ji̧ ichejekwa, ja̧danö bajaleapo Cristoma woawatjöbi ujuluwakobe.

1 Corintios 7:31

Ja̧danö böjȩ jawa otidadöma, böjȩ jawa otidöködödanö ichejekwadö tjö̧jo, böjȩ jawa chotidi̧ma nöinö mikwawökö jö̧ba̧lö. Jau chömöledö, böjȩbi, okobe jwiinö böjȩ jawabi juluwanö 'dö̧ibakobe, jo̧kwajabetjö̧ jwaikwöda böjȩ jawa omukwatöködö kwö̧jaduwo,

2 Corintios 5:17

Jau chömöledö, Cristonö ösödadöma ida̧ökö jo̧bakwö wotjinobe, ja̧danö ida̧ökö jo̧bakwö tjetjachajinobe. Jo̧kwajabetjö̧, baikwö jo̧be chömöledö, bakwo̧ Cristokwö dötewanö ö̧jitjö̧ma, Dios 'yayinö otidajökwe baibanö jo̧ jo̧bama. Jau chömöledö, Cristokwö dötewadönöma, damö jawama ida̧ökö 'dö̧ibajinobe, ja̧danö babe dö̧ji̧ma, 'yayinö ja̧kwawa baibinobe. Jo̧kwajabetjö̧ chömöledö, damö jawa ida̧ökö 'dö̧ibajinobetjö̧, tupakwö ja̧ jawa domukwatoböma jwiobe, jwaikwöda 'yayinö ja̧kwawa jawada domukwatobö jo̧be.

2 Corintios 6:17

Jo̧kwajabetjö̧ Dios wei̧danö ja̧dobö jo̧be chömöledö, baikwö laebobe Dios iwene: Duluwo̧ wei̧ma baikwö laebobe: ötjönö öpöjödadö tjö'da̧detjö labebaduwi, ja̧danö jobadötjö 'da̧bachibaduwi. Jobadö tjujuna̧li̧ suli̧ jawa mabökönaduwi, ja̧danö ökwödönö chösödocha,

Hebreos 12:27

Chömöledö, ja̧ yöbawö ujuninama baikwö wanekwachobe: Böjȩnö ju̧kwi̧bi, mölejȩnö ju̧kwi̧bi, Dios otidinama, ju'winö jwiakobe. Ja̧ ju̧kwi̧ma ba̧kwȩlö̧jatebö ji̧ jawaokobetjö̧ söbebö loakobe, jwiinö baibanö. Ba̧kwȩlö̧jatebö ji̧ jawada ji̧bakobe, Dioskwö, iteda ba̧kwȩlö̧jatebö webö ö̧jobema. Ja̧danö chömöledö, jobekwö, Dios ba̧kwȩlö̧jatebö webö ö̧jobekwöda dichibakwedösa. Isabenö jobema, böjȩnö dö̧jeminötjö o̧penönö otiwemima.

2 Pedro 3:10

Jo̧kwaijayonö Duluwo̧ma lekwe ite'ada̧lijayonö, isabenö yemidanö ichakwo̧ chömöledö. Ja̧danö wanedö yötawa, naukwabo̧ ju'wedö tjomukwatokonö tebachö önaukwi̧danö, jojodö jo̧ba ichakwa̧ tjomukwatokonö ja̧ inesö lȩebakwa̧ möle baibakobe chömöledö. Ja̧danö, ja̧ baibenama, labinö ökwöobetjö mölejȩma jwiinö baibakobe, ja̧danö mölejȩnö la̧jadöma ökwölanö ubö jwiinö baibakobe, ja̧danö böjȩbi, okobe jwiinö böjȩnö ji̧bi ubö jwiinö baibakobe. Jau chömöledö, obadö ichökena jö̧ba̧lö otjijayonö, isabenö ichakwo̧ Duluwo̧ma.

1 Juan 2:17

Ja̧danö chö̧ja̧wo̧dö, jobadö Diosnö öpöjödadö sulabenö omukwatö tjö̧ji̧ma 'dö̧ibaji̧ ja̧kwawada. Ba̧kwȩlö̧jatebö ja̧kwawamaökö jejenö sulabenö omukwatö tjö̧ji̧ma. Jo̧kwaijayonö Dios wei̧ a̧ja̧kwö tjö̧ji̧ma ba̧kwȩlö̧jatebö ja̧kwawa, 'dö̧ibajökönö. Ja̧danö, Dios wei̧ a̧ja̧kwö ja̧döma ba̧kwȩlö̧jatebö tjö̧jakwedö.

Apocalipsis 20:14

Jemi ikenama, wobajalema ökwöla nöola okwa töbebö lotji̧danö baibobe chedijatö, wobajale jwiinö baibanö. Ja̧danö, wobinadö tjuju̧kwemibi ökwöla nöola okwa töbebö lotji̧danö baibobe chedijatö, jwiinö baibanö. Jejenöma woawama yemidanö jojodönö baledökakobe, 'dö̧ibaji̧ woawa mikwi̧ma.

Apocalipsis 21:1

Ikenama chedemi mölejȩ 'yayinö baibajöjȩ chedijatö. Ja̧danö, böjȩbi 'yayinö baibajöjȩ chedijatö. Ajayinö otidina mölejȩbi, böjȩbi, tjo̧wi̧ 'dö̧ibajobe chedijatö. Ja̧danö, chedemi ojwe nöödöbi jwiobe.

Apocalipsis 22:3

Jobe 'yayi̧ Jerusalénbema Dios öpöjödi̧ma teatakwawokobe. Otiwi̧ jawada teatakwawobe 'yayi̧ Jerusalénbema. Ja̧danö, jobe 'yayi̧ Jerusalénnöma Dios ö̧bakabi jo̧be. Ja̧danö, Obeja Itji̧danö Jo̧ ö̧bakabi jo̧be. Ja̧danö, jobadö tjömöayedöma, jobe ja̧nö jobadönö tjösödobe.

Apocalipsis 7:17

Ja̧danö, Obeja Itji̧danö Jo̧ma otiwanö ite'ada̧lobetjö̧ inia tjötjinö baledököwö̧. Ja̧danö, jobadönö otiwanö öbibö 'yo̧ ojwese'do jo̧bekwö, ba̧kwȩlö̧jatebö ja̧kwawa okwe'dokwö. Ja̧danö, jobadöma belöma budekwabinö tjuju̧kwinajayonö, tjo̧wi̧, babema budekwaböködö. Otiwanö ju̧kwadö, Diosma pjaatinobetjö̧— damö la'aka luwedötjö bakwo̧ma jö̧a̧lijatö ötjönöma.