Apocalipsis 2:3 - Dios Iwene

³ Jau chömöledö, ökwödö Éfeso jojodönö edo̧sa. Chöwaisa, ötjönö ösödö yökawaduwobetjö̧ inia tjököbaduwinö baledawö̧ja. Jo̧kwaijayonö chedemi sulabe baledonöbi kwo̧'wo̧duwi 'dibachibö ja̧nö, me'dawachibökönö, otiwanö kwö̧jaduwobe.

Apocalipsis 2:3 Iomraidhean Croise

Marcos 15:21

Jobe 'ya̧nö ja'öma jelo̧nö badekwajijadötö, Simón mikwo̧nö, Cirene nijinö jo̧nö, tebobetjö comunidadbe ȩwa̧jo̧nö. Jo̧ba i̧tji̧muma mikwadö Alejandro, Rufo. Jo̧banö webijadötö guardiama, towisa'o e'ewobö, Jesúsnö bȩtjakwa'o, idökwöda e'ewö i̧'yobö.

Lucas 14:27

Ja̧danö chömöledö, bakwo̧ towisa'o, iteda woakwa'o kabeibö, ötjö chökömanö ichobö öpöjöditjö̧ma, isabenö chöba̧ja̧di̧ waisacho̧ ö̧joböma jwibo̧.

Lucas 18:1

Ju'wi möle Jesúsma iteda öba̧ja̧di̧ waisachadönö ba̧ja̧dö yöawinobe, me'dawachibökönö ba̧kwȩlö̧jatebö Diosnö atjebobö. Ja̧danö, ba̧ja̧dö, jobadönö wanedö yöawinobe baikwö:

Lucas 21:19

Jau chömöledö, kwo̧'wo̧ 'dibachibö ötjönö ösödö kwö̧jaduwobetjö̧, isabenö ja̧kwawa kwujuna̧laduwakwedöja— jö̧ba̧lö yöawinobe Jesúsma.

Lucas 5:5

Weökwe, Simónma atadinobe: —Chuluwo̧, ida̧ökö yö̧te baledibanö nöinö ba̧i̧ jwodijayonö, da̧bulewatö. Bakwo̧bi ö̧libökötö. Jo̧kwaijayonö ba̧i̧ jwotobö weköbitjö̧ma, yemidanö maya lobö jwotocha— jö̧ba̧lö.

Lucas 8:15

Ja̧danö niji otiwena meaja̧ ödebiya badekwachi̧ma, otiwanö a̧ja̧kwö, tjomajadenö 'diinö do̧ba̧ladönö badekwachobe. Jobadöma sule omöna yöba̧lödama chösöda jö̧ba̧lö yöba̧löködö, tjomajadenö otiwanö omukwatö isabenö ösödadö, ja̧danö wene baledijayonö, tjo̧'wo̧ 'dibachibö ja̧nö tjo̧'wo̧ luwo̧ wa̧ji̧ jawa otiwanö tjöwa̧jobe— jö̧ba̧lö. Jejenö yöbawö Jesúsma iteda öba̧ja̧di̧ waisachadönö labebö lobö yöawinobe jojodönö wanedö yöawaja̧ma.

Juan 15:21

Jau, ökwödöma ötjö chömöledököbaduwobetjö̧ ötjönö öpöjödadöma inia tjököbaduwinö ja̧tjakwedö ökwödönöma. Ja̧danö, jobadöma, ötjönö webinanö wajwitjobetjö̧ inia tjököbaduwinö ja̧tjakwedö— Jesúsma yöawinobe öba̧ja̧di̧ waisachadönöma.

Romanos 12:12

Diosnö kwo̧'wo̧ wana̧lö, kwo̧'wo̧ luwo̧ ösöwanö omukwata̧lö kwö̧jaduwo, Diosma jö̧a̧li̧danö ja̧akwo̧ jö̧ba̧lö. Ja̧danö, wene baibenama, me'dawachibökönö kwö̧jaduwo. Ja̧danö, kabatökönö Diosnö abebö kwö̧jaduwo chömöledö.

Romanos 16:12

Duluwo̧ wei̧ jawa otidadö Trifenanöbi, Trifosanöbi dokwa ateba. Ja̧danö, chösödoko chömöledösuju Pérsidanö dokwa ateba, jobujuma nöinö otiduju Duluwo̧ wei̧ jawama.

Romanos 2:7

Bakwainö otiwanö ja̧badönöma, jwaikwöda Dios ösödi̧da ja̧badönöma, ba̧kwȩlö̧jatebö ja̧kwawa iyakwo̧ Diosma. Jobadöma jwaikwöda Dios ösödi̧ jawada ja̧badö, Diosma jobadönö jö̧a̧lakobetjö̧, Bidöma otiwadö, suli̧ jwibadö, jö̧ba̧lö. Ja̧danö, Dios ösödi̧ jawada ja̧bö ba̧kwȩlö̧jatebö ja̧kwawa isakwadö jobadöma. Ja̧danö, Dios ösödi̧ jawa ja̧bö ba̧kwȩlö̧jatebö ja̧kwawa tjisakwobetjö̧, ja̧da iyakobe Diosma, jwaikwöda tjisakwobetjö̧.

1 Corintios 13:7

Ja̧danö, usula emawenama, o̧'wo̧ 'dibachibö ji̧. Ja̧danö, jwaikwöda Dios yöawi̧ ösödö ji̧, jweinö yöbawo̧ jö̧ba̧lö. Ja̧danö, jwaikwöda Diosnö o̧'wo̧ wana̧lö ji̧, isabenö jö̧a̧li̧danö baledakobe jö̧ba̧lö. Ja̧danö, okobe jwiinö baledonö, me'dawachibökönö ji̧, jojodönö ösödabikwawö ja̧kwawama.

1 Corintios 16:16

Ja̧danö, baikwö atebaduwakwö chömöledö: Jobadönö kwösödaduwo kwuluwedöduwi jö̧ba̧lö, ja̧danö ju'wedö jobadöjayedö Dios ömöledönö pjatjatotö jö̧ba̧lö otidadönöbi jejenö kwösödaduwobö atebaduwakwö chömöledö.

2 Corintios 10:15

Jo̧kwaijayonö jelo̧ otidina jawama yöba̧löködösa chömöledö, sule isabenö dotidina jawada yöda̧lobe, otiwanö dotidinobe jö̧ba̧lö. Jau chömöledö, isabenö otiwanö ökwödökwö dotidinobe, ja̧danö tupakwö Dios yöawi̧ ösödö kwöda̧peachaduwobö dösöda chömöledö, jemi tupakwöbi kwöda̧peachaduwobö nöinö ökwödökwö otiwanö dotidakobetjö̧.

2 Corintios 11:23

Ja̧danö jobadöma yötja̧lobe, ökwödödasa Cristo ömöayedö otiwadö jö̧ba̧lö, ¿jö̧tö? Wame jawa omukwato̧ yöa̧li̧danö baikwö atadö yöta̧la, ötjöma jobadötjö bajalekwönönö Cristo ömöayo̧ otiwo̧sa, baikwö yöta̧la: Tjotidi̧tjö bajalekwönönö nöinö chotidobe, ka̧lena tjö̧bi̧tjö bajalekwönönö nöinö ka̧lena chö̧bobe, ja̧danö jobadötjö bajalekwönönö chöba̧ja̧dökenanö kwakwatjajökwe chö̧jobe, ja̧danö jobadötjö bajalekwönönö nöinö woto jö̧ta̧lobe.

2 Corintios 4:1

Jau chömöledö, Diosma lȩlö̧jinö edö ja̧ salöi̧ 'yayi̧ wene otiwa jawa wene yödawobö ujuninobe, ¿jö̧tö? Ja̧danö chömöledö, ja̧ wenema isabenö inesö salöi̧ weneobetjö̧, usula demawijayonö, do̧'wo̧ tjo̧bekwöma kadatibokobe chömöledö, isabenö jojodö tja̧ja̧kwobö jo̧be jö̧ba̧lö.

2 Corintios 4:16

Babe wene döbaledi̧ma baikwö yötawa chömöledö: Nöinö usula demawijayonö, tupakwö dö̧jakwa̧ omukwatö ja'yubeda usula demawobe ichejekwa chömöledö, ja̧danö tupakwö ba̧kwȩlö̧jatebö otiwanö dö̧jakwa̧ma omukwatö, babe usula demawi̧ma lekwokobe ichejekwa. Ja̧danö chömöledö, usula demawi̧tjö Diosma inesö nöinö ba̧kwȩlö̧jatebö ji̧ salöinö ujulu iyakobe ökwödönö. Jau chömöledö, babe usula demawi̧tjö yelösöda bajalekwönönö, ja̧ salöinö ujulu dujuna̧lakwedösa, ja̧danö jejenöobetjö̧, do̧'wo̧ tjo̧bekwöma kadatibokobe. Jau chömöledö, diteba'o wamesa'o woijayonö, okwa luwo̧ do̧'wo̧ luwo̧ma la'akatjöda wobö̧kö̧, mölekwena kabatökönö tupakwö ujuluwachibanö jo̧ okwa luwo̧ do̧'wo̧ luwo̧ma.

2 Corintios 5:9

Jo̧kwajabetjö̧ ina bi'o diteba'onö dö̧jitjö̧böbi, jo̧bakwö dö̧jitjö̧böbi disakwi̧ma bakwainö 'ya̧ chömöledö, Duluwo̧ ösödi̧danö ja̧bö dö̧jobö.

2 Corintios 6:5

Jau chömöledö, ju'wedöma ökwödönö kwakwatjobe, ja̧danö ju'wibi ju'wedöma ökwödönö ka̧lena tjödobe, ja̧danö ju'wibi ba̧jekwadö labidö mebibö tjölabobe ökwödönö. Ja̧danö dime'dawachibenanö dotidobe, ja̧danö ju'wibi yö̧te baledibanö abökönö dö̧jobe, ja̧danö ju'wibi a̧wi̧chi̧ tjödobe.

Gálatas 6:2

Ja̧danö, wanedö yötawa: Kwömöledöduwi tjo̧'wo̧ luwo̧nö ömöki̧ tje'ewi̧ma, pjabatö kwe'ewaduwo chömöledö, bidönötjö o̧penönö jo̧sa ötjöma, bidönö pjatatökö jö̧ba̧löma omukwatökönö. Jau chömöledö, bakwo̧ jo̧kwadabo̧ma, Aaa, ju'wedönötjö o̧penönö jo̧sa jö̧ba̧lö omukwatitjö̧ma, jweinöma omukwatökena, isabenö jo̧kwadabo̧obetjö̧, ¿jö̧tö? Jo̧kwajabetjö̧, o̧penönö jo̧sa jö̧ba̧lö omukwatökönö, Cristo wei̧ ja̧bö kwömöledöduwinö pjabatö kwö̧jaduwo chömöledö.

Gálatas 6:9

Jo̧kwajabetjö̧, otiwanö ja̧bö dö̧ji̧ma döpöjödachibaduwoko chömöledö, isabenö yötawaduwakwö, do̧'wo̧ 'dibachibö dite'ada̧litjö̧ma, isabenö dotidina wa̧ji̧ demakwedösa chömöledö.

Filipenses 2:16

jobadönö ja̧kwawa wene i̧sebödanö yöbawö. Jejenö ja̧bö kwö̧jaduwitjö̧ma, Cristo ichakwa̧ möle badekwachenama, yöbawö chotidina chösödakwo̧sa, isabenö 'diinö otidö chö̧jina mikwawinobe jö̧ba̧lö. Jau chömöledö, chotidina mikwawi̧ kwi̧sebaduwobetjö̧, jejenö chösödakwo̧sa.

Filipenses 4:3

Ja̧danö, ökwönö weta chömöledöso̧, ökwöma otiwanö ötjökwö otido̧ja, jo̧kwajabetjö̧ jobadö ötjönö pjabatinadönö ya̧dönö pjakato, bakwainö omukwatö tjö̧jo jö̧ba̧lö. Jau chömöledöso̧, jobadö ya̧döma ötjökwöbi, Clemente mikwo̧kwöbi, ju'wedö ötjökwö otiwa jawa wene yöbawö otidinadökwöbi tjotidinobe. Ja̧danö, jobadö ötjökwö otidinadönö baikwö yötawa: Dios ujuna̧la'ye, ja̧kwawa juna̧ladö tjimibiya wȩyukwa'yenö Diosma jobadö tjimibiyabi wȩyudö ödinobe, Bidöma ja̧kwawa juna̧ladö, jö̧ba̧lö.

Colosenses 1:11

Ja̧danö Dios inesö ujulutjö jwiinö kwujuluwachibaduwobö dösöda, me'dawachibökönö kwo̧'wo̧ 'dibachibö kwo̧'wo̧ ösöwanö kwö̧jaduwakobetjö̧,

1 Tesalonicenses 2:9

Jau chömöledö, kwomukwataduwena ökwödökwö ja̧nö dotidinama. Ökwödönö Dios jawa otiwa jawa wene yöbawö dö̧jonö, ju'wibi ökwödöda du̧kwa kwakwawa demo jö̧ba̧lö dotidijatö chömöledö, usula emawö. Jau chömöledö, ökwödönö te'ada̧lakwawama ökwödö Tesalónica jojodönö baibapji jö̧ba̧lö, mölebi yö̧tebi dotidijatö.

1 Tesalonicenses 5:12

Chömöledö, yödawaduwakwö, ökwödö kwuluwedöduwinö otiwanö kwomukwataduwo. Jau chömöledö, jobadöma 'diinö tjotidobe ökwödönö pjabatö, jwebeböbi ökwödönö jwetjebobe, ja̧danö ba̧ja̧döbi tjöba̧ja̧dobe ökwödönö. Jo̧kwajabetjö̧ otiwanö kwomukwataduwodönö jobadö kwuluwedöduwinöma.

2 Tesalonicenses 3:13

Ja̧danö, ökwödö otiwanö ja̧bö ju̧kwadönö baikwö yötawa chömöledö, otiwanö ja̧bö ja̧kwawama kwöpöjödachibaduwa.

2 Tesalonicenses 3:5

Chömöledö, Duluwo̧ ökwödö kwomajadeduwinö öba̧ja̧dobö chösöda, Dios ökwödönö ile niebi̧ wene kwöwaisachibaduwobö, ja̧danö Cristo o̧'wo̧ 'dibachibö ö̧ji̧ wene kwöwaisachibaduwobö.

2 Tesalonicenses 3:8

Ja̧danö, bakwo̧ u̧kwabi dukwijökötö midökönöma, ¿jö̧tö? Jau chömöledö, yö̧tebi, mölebi dotidijatö, usula emawö dotidijatö, ökwödö Tesalónica jojodöda nöinö kwotidaduwapji jö̧ba̧lö, du̧kwa kwiyaduwobö.

1 Timoteo 4:10

Ja̧danö, Dios wei̧ jawa ja̧bö dotidobe, usula emawö dotidobe, ba̧kwȩlö̧jatebö jo̧ Diosnö do̧'wo̧ döwana̧lobetjö̧, isabenö dö̧jibinö ja̧akwo̧ jö̧ba̧lö. Jau, Diosma okobe deinö böjȩ jojodö tjö̧jibobö ja̧bo̧, ja̧danö isabenö dö̧jibinö ja̧bo̧, ökwödö Jesúsnö ösödadönöma.

1 Timoteo 5:17

Ja̧danö, Jesúsnö ösödadönö te'ada̧lakwawa luwedönö yötawa. Jesúsnö ösödadönö te'ada̧lakwawa luwedöma, otiwanö te'ada̧lö tjö̧jitjö̧ma, tjite'ada̧lawö̧ Jesúsnö ösödadöma jobadönö tjösödobö jo̧be, otiwanö jobadönö omukwatöbi, böjȩ tjö̧ji̧ jawa pjabatöbi. Ja̧danö, te'ada̧lakwawa luwedötjö nöinö Dios iwene yöbawö, nöinö Jesúsnö ösödadönö ba̧ja̧dö otidadönö isabenö tjösödobö jo̧be, otiwanö omukwatöbi, böjȩnö tjö̧ji̧ jawa pjabatöbi.

Hebreos 10:36

Chömöledö, me'dawachibökönö kwi̧'yaduwobö jo̧be. Ja̧danö Jesúsnö kabatibökönö, Diosnö kwo̧'wo̧duwi wana̧lö tupakwö kwi̧'yaduwo, iteda wei̧ a̧ja̧kwö ja̧nö. Jejenöma Dios iyakwa̧, iteda yöbawö junö, Chiyocha, jö̧ba̧lö, iyakwa̧ma kwemaduwakwedöja.

Hebreos 12:1

Jo̧kwaobetjö̧ chömöledö, jobadö da'dödömine Diosnöda tjo̧'wo̧ wana̧lö tjö̧jina edö domukwatobö jo̧be, Ökwödöbi jejenö Diosnöda do̧'wo̧ wana̧lö di̧'yaduwo, jö̧ba̧lö. Ja̧danö, babe ökwödö dö̧ji̧ma jobadöma ba̧jekwadö ökwödö böjȩnö dö̧jobekwö tjeda̧lobe, böjȩnö Dioskwö di̧'yobe eda̧lö. Wanedö yötawaduwakwö, ö'öa̧lakwawa jawanö wanedö: Ökwödö böjȩnö di̧'yi̧ma ö'öa̧lakwawadanö wanekwachobe. Ja̧danö da'dödöminema, ba̧jekwadö, ö'öba̧ladönö ösödö eda̧lö tjö̧bi̧danö, ökwödö böjȩnö ö'öda̧lobe eda̧ladö, Otiwanö ö'ököba̧laduwi, jö̧ba̧lö. Jo̧kwaobetjö̧ chömöledö, otiwanö di̧'yaduwo, da'dödömine Diosnö omukwata̧lö tji̧'yinadanö. Döwaisa. Ö'öba̧ladöma ömöki̧ jawama kalekwö lobadö, juluwanö, jwaikwöda ö'ötjakwawobö. Ja̧danö, ökwödöbi ö'öba̧ladö ömöki̧ jawa kalekwö lotji̧danö lodaduwo pjaatökö jawa, ökwödö jwaikwöda di̧'yobö. Ja̧danö, suli̧ ja̧awatjö 'da̧bachibö jwaikwöda di̧'yobö jo̧be chömöledö. Jwibö, ejeinö ö'ötja̧li̧danö jwaikwöda di̧'yaduwo chömöledö, me'dawachibökönö, Diosnö omukwata̧lö.

Hebreos 13:13

Jo̧kwaobetjö̧ chömöledö, ajayinö domukwatina, Dios ajayi wei̧ da̧ja̧kwinama kadatakwawaduwo. Ja̧ domukwati̧ junibö kabatakwawö tupakwö di̧'yaduwo Jesúsnö do̧'wo̧ wana̧lö, jojodö tjö̧jemi tupakwö usula emawö wobinanö. Chömöledö, jwaikwöda di̧'yaduwo, do̧'wo̧ juluwachibanö jojodö ökwödönö öpöjödö otjenabi Jesúsnö dösödobetjö̧.

Hebreos 6:10

Chömöledö ja̧ baledakwa̧ma chöwaisa, Dios, jweinö omukwato̧ma, ökwödö otiwanö jo̧banö ösödö kwuju̧kwaduwi̧ omukwato̧obetjö̧. Chömöledö, jo̧banö kwösödaduwi̧ma wajuwanö kwi̧sebaduwobe ju'wedö jo̧ba i̧tji̧mu babibinadönö pjakataduwobetjö̧. Ajayitjö Jesúsnö do̧batö kweminaduwa baikwö kwö̧ja̧wo̧dönö dösölö̧jinö pjakataduwobe, jo̧ba i̧tji̧mu babibinadönöma.

Hebreos 6:12

Chömöledö, jejenö jwaikwöda kwi̧'yaduwobö chösöda, kwu'du̧wekwachibaduwapji jö̧ba̧lö, da̧peachökönö kwo̧'wo̧ luwo̧duwi̧nö. Ja̧danö, da'dödöminetjö ju'wedöma Diosnö tjo̧'wo̧ wana̧lö tjö̧jinobe. Jobadöma Diosnö tjo̧'wo̧ wana̧lö tjite'ada̧linobe jo̧ba iyakwa̧, Chiyakwo̧sa, jö̧ba̧lö, yöbawö ujunina iyakwa̧ma. Te'ada̧lö tjö̧jinobe, Isabenö Dios yöbawö ujuninadanö iyakobe, jö̧ba̧lö. Chömöledö ökwödö jejenö kwö̧jaduwobö chösöda, Diosnö kwo̧'wo̧duwi wana̧lö, jo̧ba yöbawö ujunina badekwachakwa̧ te'ada̧lö.

Hebreos 6:15

Ja̧danö Abrahamma, Diosnö o̧'wo̧ wana̧lö, te'ada̧löda ite'ada̧linobe, Dios jö̧a̧lina badekwachenanö kabatö. Ime'dawachibinokobe, Tjo̧wi̧, chite'ada̧lökö. Chedemi Dios yöbawö ujuninama badekwachökena, jö̧ba̧lö. Jejenömaökö chömöledö. Abrahamma te'ada̧löda ite'ada̧linobe, 'du̧wekwachibökönö. Ja̧danö Diosma jweinöda yöbawö junö jö̧a̧linobetjö̧, Abraham, te'ada̧lo̧ma Dios yöbawö ujunina iyi̧ eminobe. Isabenö chömöledö, Abraham ite'ada̧linama ökwödönö i̧sebobe, Dios yöbawö junö jö̧a̧li̧danö isabenö badekwachakobe, jö̧ba̧lö.

2 Pedro 1:6

Ja̧danö jemi tupakwö sulabenö kwösödaduwi̧ ja̧bökönö kwö̧jaduwobö kwisakwaduwo. Ja̧danö jemi tupakwö kwo̧'wo̧ 'dibachibö kwö̧jaduwobö kwisakwaduwo. Ja̧danö jemi tupakwö jwaikwöda Dios ösödi̧da ja̧bö kwö̧jaduwobö kwisakwaduwo.

Apocalipsis 1:9

Chömöledö, ötjöma ökwödö kwömöledöduwiso̧sa. Ökwödöma bakweminö Jesúskwö dötewinö babibinadösa. Ja̧danö, Jesúsnö dösödobetjö̧ ökwödönöbi, ja̧danö, ötjönöbi inia tjödinö baledobe. Ja̧danö, ju'winö, bakweminö Jesúskwö dö̧jakwedösa, iteda La'aka Luwo̧ ö̧jakwa̧ möle baledena. Ja̧danö, ökwödöma ja̧ möle baledakwa̧ bakweminö te'ada̧ladösa, Jesús La'aka Luwo̧ ö̧jakwa̧ möle baledakwa̧ma. Ja̧danö, labi̧ jawa baledenabi, do̧'wo̧ 'dibachibö ja̧nö ju̧kwadösa, bakweminö. Ja̧danö, chömöledö, ökwödönö yötawobö jö̧ta̧la ötjönö baledina, kwöwaisaduwobö. Ötjöma, Dios iwenebi, Jesús ö̧jina wenebi yötawobetjö̧ ötjönö do̧batö, e'ewö lotjijatö bi'o o'wejesa'onö, Patmos mikwa'onö le'dedö. Jau, le'dedö lotjinökwesa ötjöma, bi'onöda chö̧jobö.

Apocalipsis 3:10

Chömöledö, yötawaduwakwö. Ökwödönö wetijatö, Sulabenö baledonöbi kwo̧'wo̧ luwo̧duwi 'dibachibö te'ada̧lö kwö̧jaduwo, jö̧ba̧lö. Ja̧ wetinama otiwanö a̧ja̧kwö kwö̧jinaduwobe. Jejenö otiwanö a̧ja̧kwö kwö̧jinaduwobetjö̧ pjatatakwo̧sa ökwödönöma. Ju'wedö böjȩnö ju̧kwadönö lȩbebö weti̧ baledonö, böjȩtjö jwiinö inia tjötjinö baledonöma, ökwödönö te'ada̧lö pjatatakwo̧sa, ja̧ inia tjötji̧tjö baledökönö.