Apocalipsis 17:17 - Dios Iwene

¹⁷ Jejenö ja̧bö tjö̧jakwedö, Diosma jejenö tjomajade okwanö tjomukwatobö ja̧inobetjö̧. Ja̧danö, jobadö domulataja la'aka luwedöma, wajwitjijayonö, jobuju inia tjöjinö ja̧tjakwa̧ma, Dios ösödi̧da ja̧tjobö tjö̧jakwedö. Ja̧danö, Diosma jobadö tjomajade okwanö tjomukwatobö ja̧inobetjö̧, bakwainö omukwatö, sulabo̧ duwo̧nö kabebö tjö̧wanakwedö, Ökwöda webö kwö̧jo, jö̧ba̧lö. Ja̧danö, Ökwödöma ökwö kwömöayedöduwisa, la'aka luwedöböködösa, jö̧ba̧lö, sulabo̧ duwo̧nö kabebö tjö̧wanakwedö, Diosma jobadö jejenö tjomukwatobö ja̧inobetjö̧. Jejenö ja̧bö tjö̧jakwedö, Dios badedö ujunina möle badekwachenanö baibanö.

Apocalipsis 17:17 Iomraidhean Croise

Proverbios 19:21

Ja̧danö, ju'wibi yötawa: Isabenö, jojodöma idöda ja̧tjakwa̧ ju'wi jawabi ju'wi jawa tjo̧'wo̧ junö omukwatadö. Jobekwö tjo̧mukwatijayonö Isabenö Jo̧ma iteda baledobö ösödi̧danö baledakobe.

Proverbios 21:1

Ju'wi Salomón jwebebö yöawakwawa jawanö wanekwachi̧ jawa baikwö laebobe: ¿Tida ojwe isuwobö webo̧ma? Isabenö Jo̧da ojwe isuwobö webo̧ma, iteda isuwobö ösödi̧danö. Waiyökökwe, ojwe isuwobö ja̧i̧ma. Ja̧danö, bakwemiinö, Isabenö Jo̧ma inesö la'aka luwo̧nö omajade okwa omukwati̧ öiboböma waiyökökwe. Isabenö, iteda wei̧ a̧ja̧kwinö öbibo̧ Isabenö Jo̧ma inesö la'aka luwo̧nöma.

Isaías 45:17

Jobekwö baledököwö̧ ökwö Diosnö ösödadönö. Ju'wedö tabakwö tjö̧jonö, ökwödö israel jojodönö dö̧jibinö pjabato̧ Diosma, 'dö̧ibajökö ji̧ ji̧kwawa baibanö dö̧jibinö pjabato̧. Ja̧danö jobekwö dö̧jibinö pjaatobetjö̧, la'akatjöda 'dö̧bibajökönö tabakwö dö̧jökakwedösa, la'akatjöda taba lö̧jawö̧ badibökakwedösa.

Daniel 12:7

Abebö a̧ja̧kwökwe, ojwe wame jo̧ otiwado̧ dewado̧ 'dubawo̧ma, ömamiju kaebinobe mölejȩbekwö, ja̧danö yöa̧linobe: Ba̧kwȩlö̧jatebö Jo̧ Dios öba a'otjö ja̧nö, baikwö isabenö wene yötawakwö: Ja̧ jawama wa̧pötakwa o̧biya ja'ö baledibanö baledakobe. Jau, Dios ömöledö usula tjemawinö isabenö ja̧tja̧kobe Daniel, isabenö Dios ömöledö jejenö usula tjemawobö ja̧kobe, okobe jwiinö ja̧ yötawja̧ jawa baledenanö kabatö— jö̧ba̧lö atadinobe.

Lucas 22:22

Jo̧banö baikwö yötawa chömöledö: Damötjö Diosma midawö wotobö omukwatö ujuninobetjö̧, isabenö ötjö jojo baibanö jeminökwe ö'wö batibobö jo̧be. Jo̧kwaijayonö, Aaa, ö'wö baibobö ida̧ökö ji̧nobetjö̧ wene jwibo̧ Jesúsnö iyö lobo̧ma, jö̧ba̧lö omukwatokobe Diosma chömöledö, sulabenö ötjönö iyö loobetjö̧ isabenö jwiinö labinö lȩebakobe ötjönö iyö lobo̧nöma chömöledö— jö̧ba̧lö yöawinobe Jesúsma.

Lucas 22:3

Ja̧danö, jejenö omukwatö tjö̧jonö, Awetjama Jesús webawedö a̧li̧nösamutjö du̧ju̧tajabedötjö bakwo̧ Judas Iscariote mikwo̧ o̧'wo̧ luwo̧nö teachibinobe, ja̧danö teachibiökwe Judasma Jesúsnö öpöjödadönö pjaatobö omukwatinobe.

Lucas 22:37

Jau chömöledö, ja̧ jawa isabenö kwekataduwobö ja̧kobe babema, juluwanö damötjö ötjönö tjiwȩyudina jawa badekwachakobetjö̧. Jau chömöledö, Dios iwene damötjö tjiwȩyudinama baikwö laebobe: Ja̧danö, jo̧banö öpöjödö lȩtjebinobe, Bitebi sulabenö ja̧bo̧ ju'wedö sulabenö ja̧badödanö, jö̧ba̧lö, laebobe, ja̧danö ja̧ ötjönö tjiwȩyudinama badekwachakobe. Jau chömöledö, okobe jwiinö ötjönö tjiwȩyudinadanö badekwachakobe, ja̧danö ja̧ tjiwȩyudinabi badekwachakobe, jo̧kwajabetjö̧ babema yöta̧laja̧danö kwekataduwobö jo̧be— jö̧ba̧lö yöawinobe Jesúsma.

Juan 10:35

Ja̧danö, Diosma jweinöda yöbawo̧. Jweinöda yöawinobe, Ökwödöma ötjö jojodö tjuluwedö chö̧ji̧danö ja̧döja, ökwödöbi jojodö tjuluwedö ja̧dököbaduwobetjö̧, jö̧ba̧lö. Jo̧kwaobetjö̧ jejenö Dios iwenetjö laebitjö̧ma, Ökwödöma Diosdanö ja̧döja, jö̧ba̧lö,

Juan 13:18

Ja̧danö, ökwödötjö okobe deinöma yötawökö. 'Da̧batö chujuninawö̧nöma chöwaisawö̧. Jo̧kwaijayonö ökwödötjö bakwo̧ ötjönö iyö loakwo̧ma. Jo̧bama benada bo̧, Dios iwene damötjö yöawinadanö badekwachakobetjö̧. Baikwö yöawobe Dios iwenema: Bakwo̧ ötjökwö kwo̧ma ötjönö iyö loakwo̧, jö̧ba̧lö, yöawobe Dios iwenema, damötjö tjiwȩyudinama.

Juan 13:2

Ja̧danö, ja̧ yi̧bena Jesúsma öba̧ja̧di̧ waisachadökwö tjukwinobe. Ömöayedötjö bakwo̧, Simón itji̧ Judas Iscariote mikwo̧ma ida̧ökö Jesúsnö iyö loakwa̧ma omukwatinobe, Awetja jejenö o̧'wo̧ sulinö edobö weinökweobetjö̧.

Juan 19:24

Jo̧kwaobetjö̧ idödada yötja̧linobe: —Bido̧ma dikȩ'eboko. Inawiya ikwawö dalewo bido̧ emakwo̧nö döwaiso— yötja̧linobe. Jejenö yötja̧linama, Dios iwene laebi̧danö badekwachinö yötja̧linobe. Damötjö baikwö tjiwȩyudinobe: Jobadöma ötjö chökamisi tjemobö tjiyabikwawakwedö. Ja̧danö ötjö chökamisi emakwo̧nö tjöwaisobö inawiya ikwawö tjalewakwedö, jö̧ba̧lö laebobe Dios iwenema, damötjö tjiwȩyudinama.

Juan 19:28

Ja̧danö, Jesúsma, Tjo̧wi̧ Dios ötjönö weinama katatajabe, jö̧ba̧lö, omukwatinobe. Ikenama, Dios iwene laebi̧danö badekwachinö aebinobe: —Ojwiyo o̧ti̧lö̧jabi— jö̧ba̧lö.

2 Corintios 8:16

Chömöledö, Diosma isabenö otiwanö pjaatinobe Titonö, ökwödönö pjatatobö chösödi̧danö, Titobi bakwainö ökwödönö pjaatobö ösödo jö̧ba̧lö, ja̧danö jejenö pjaatinobetjö̧, Diosnö ösödö ateba, otiwa jö̧ba̧lö.

Apocalipsis 10:7

Isabenö yötawa, jemi ikena trompeta pjubo̧ pjuenama, Dios ajayinö omukwatina badekwachakobe, ajayinö tojö ujuninama, damötjö iteda yöawi̧ yöbawadönö yöawinama— yöawijatö juluwo̧ ángelma.

Apocalipsis 15:1

Ja̧danö, ju'wi i̧sekwi̧ma mölejȩtjö chedijatö. Edinö chöbajale jalaka babibö, ¡Ayö! jö̧ba̧lö, cheda̧lijatö. Ja̧danö, ángelesdönö, jelemutjö du̧ju̧tajanö chedijatö. Jobadöma ju'winö baledakwa̧ jawa juna̧ladö, jelemutjö dötölataja jawa, jojodönö inia tjötjinö baledakwa̧ jawama. Ja̧ inia tjötji̧ baledakwa̧, Dios ölabi̧ 'dö̧ibaji̧ jawama.

Apocalipsis 17:13

Ja̧danö, jobadö domulataja la'aka luwedöma, bakwainö omukwatö, Ökwödö webö dö̧ji̧ma bite duwo̧nö iyö dujuno, jo̧bada webö ö̧jobö, jö̧ba̧lö, tjomukwatakwedö. Ja̧danö, jobadöma, la'aka luwedöböködö babibö, sulabo̧ duwo̧ ömöayedöda batjibakwedö.

Apocalipsis 19:9

Ikenama ángelma weijatö ötjönöma, chiwȩyudobö: —Biya̧ yöta̧li̧ma wȩyudi. Obeja Itji̧danö Jo̧ ilekwonö emi̧ pjiesta jobe tjichobö a̧debajawö̧ma, tjo̧'wo̧ ösöwanö ichö tjedakwedö. Ja̧ yöta̧li̧ma Diosda yöawi̧, isabenö yöawi̧ma— jö̧a̧lijatö ángelma ötjönöma.

Apocalipsis 6:11

Jejenö atjeba̧lökwe Obeja Itji̧danö Jo̧ma, jobadönö kamijido̧ dewado̧ iyö, yöawijatö: —Ina ja'yubeda lekwa. Kwite'ada̧laduwo. Ina ju'wedönöbi kwabawö lotjakobe, kwömöledöduwinö, Dios weina ja̧badönöma. Ökwödönö kwabawö lotjinadanö jobadönöbi kwabawö lotjakobe. Tjo̧'omanö 'dö̧tjibanö kwabawö lotjaja ikena, balekwa mikwa lȩtebakwo̧sa—yöawijatö Obeja Itji̧danö Jo̧ma.