Apocalipsis 14:13 - Dios Iwene

¹³ Ikenama iwene cha̧ja̧kwijatö mölejȩbetjö, baikwö: —Juan, biya̧ yötawi̧ wȩyudi. Babe möle, inia tjötji̧ baledi̧ möletjö tupakwö, Jesúsnö dötewinö ju̧kwadöma tjo̧'wo̧ ösöwanö tjö̧jakwedö— jejenö chiwȩyudobö wei̧ cha̧ja̧kwijatö. Ikenama Dios O̧'wo̧ Luwo̧ma jö̧a̧lijatö: —Jau, jweinö yöawa. Jobadöma, Jesúsnö dötewinö ju̧kwadöma tjo̧'wo̧ ösöwanö tjö̧jakwedö. Yelösöda, tjime'dawachibanö otidinadöma bajaliyanö tjö'wachibakwedö, otidökönö. Ja̧danö, jobadö mölejȩbenö ja̧nö böjȩnö otidiatjinama i̧sebakobe, Bidöma jweinö Jesúsnö o̧'wo̧ wa̧na̧lö 'yi̧nadö, jö̧ba̧lö— jö̧a̧lijatö Dios O̧'wo̧ Luwo̧ma.

Apocalipsis 14:13 Iomraidhean Croise

Isaías 35:10

Tjöpöjojodö tjujulutjwö Isabenö Jo̧ tjö̧jibinö pjaatinawö̧ jamabenö Sion mösa'obe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧bibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, Isabenö Jo̧ pjaatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö.

Daniel 12:13

Ja̧danö baikwö yöta̧lakwö Daniel, kwo̧'wo̧ ösöwanö kwö̧jo, 'dö̧ibaji̧ möle baibenanö kabatö. Ökwöma ö'wö babiböda, kwö'wachakwo̧ja, ja̧danö okobe jwiinö 'dö̧ibajenama, yemidanö woawatjö tjekachajakwo̧ja, Dios ökwönö iyakwa̧ otiwanö kwemobö— jö̧ba̧lö yöawinobe ángelma Danielnö, tupakwö baledakwa̧ jawama.

Mateo 3:17

Ja̧danö, mölejȩbetjö Dios iwene ökwöinobe, baikwö ökwöi̧ma: —Bitema ötjöda chösödökwe chitji̧. Cho̧'wo̧ ösöwanö chedökwe bitema— jö̧ba̧lö ökwöinobe.

Lucas 16:25

Aebökwe Abrahamma atadinobe: Chitji̧, ina böjȩnö kwö̧jayi kwö̧jina omukwatibi. Jenama, ökwöma otiwa jawa kwujuna̧lonö, bite Lázaroma usula emawö suli̧ jawada ujuna̧linobe, ¿jö̧tö? Babema ötjökwö o̧'wo̧ ösöwanö ö̧jonö, ökwöma usula emawö jo̧ja.

Lucas 16:9

Yöta̧lajökwe sulabenö otido̧ma laebaja̧ ikena ö̧jakwa̧ waisanö omukwatinobe, ja̧danö uluwo̧nö musidadönö iteda ömöledö batjibanö ja̧inobe, laebaja̧ ikena otiwanö jo̧banö tjite'ada̧lakobetjö̧, ¿jö̧tö? Ökwödöbi ja̧danö chömöledö, böjȩtjö lakebaja̧ ikena kwö̧ja̧duwakwa̧ waisanö kwomukwataduwo chömöledö. Jau chömöledö, sule böjȩnö otiwanö kwö̧jaduwakwa̧dama kwomukwataduwoko, mölejȩbe kwö̧jaduwakwa̧ omukwatö böjȩ jawa baladanö jojodönö pjakataduwo, mölejȩbetjö Dios otiwanö ökwödönö iyakobetjö̧. Baikwö wanedö yötawaduwakwö: Yöta̧lajökwe te'ada̧lakwawa luwo̧ laebaja̧ ikena ömöledönö isakwinadanö, böjȩnö kwö̧jaduwayi jojodönö pjabatö mölejȩbetjö kwömöledönö kwisakwaduwo, jobe kwichibaduwena mölejȩbe deju otiwanö tebachi jö̧ba̧lö tja̧debakobetjö̧— jö̧ba̧lö yöa̧linobe Jesúsma iteda öba̧ja̧di̧ waisachadönö.

Romanos 14:8

Ina 'yaba̧ladö dö̧jayi, Duluwo̧ ösödi̧da ja̧dobö ja̧dösa, ¿jö̧tö? Ja̧danö wodenama, Duluwo̧kwö ja̧nö duju̧kwakwedösa, ¿jö̧tö? Ja̧danö, dö̧jitjö̧bi, woditjö̧bi, duluwo̧ma bakwo̧da chömöledö.

1 Corintios 15:18

Ja̧danö, ju'wibi chömöledö, Cristo tjeachajinökötjö̧ma, jo̧banö ösödadö wobinadöma tjö̧jibinökena, ja̧danö Dios lȩebi̧tjö tjemena.

1 Corintios 15:20

Jo̧kwaijayonö, jobadöwe jö̧ba̧lö ökwödönö tjomukwatoböma jwia chömöledö, Cristoma isabenö woawatjö tjeachajinobetjö̧. Jau chömöledö, Diosma Cristonö tjeachajinö ja̧inobe, ja̧danö jejenö Cristonö tjeachajinö ja̧bö, wobinadö woawatjö tjetjachajakwa̧ wene yöbawö ujuninobe Diosma chömöledö.

1 Corintios 15:58

Jejenö jo̧be chösödawö̧ chömöledö, ja̧danö jejenöobetjö̧, 'diinö kwö̧jaduwo, pjolachibökönö. Ja̧danö jwaikwöda Duluwo̧ wei̧ ja̧bö kwö̧jaduwo kwöwaisaduwobetjö̧, Duluwo̧ wei̧ ja̧bö dö̧ji̧ma isabenö mikwa ji̧ jö̧ba̧lö.

2 Corintios 5:8

Ja̧danö, jejenö döwaisobetjö̧, do̧'wo̧ tjo̧ekwokobe, do̧'wo̧ ösöwanö dö̧jobe, isabenö Duluwo̧kwö dö̧jakwedösa jö̧ba̧lö. Jau chömöledö, inesö dösödi̧ma biya̧: Bi'otjö 'da̧bachibö ja̧nö, isabenö ditebobe mölejȩbe Duluwo̧kwö dö̧jo jö̧ba̧lö.

Filipenses 2:17

Jau chömöledö, jwiinö cho̧'wo̧ ösöwanö chö̧jobe ökwödö kwö̧jaduwi̧ omukwatö. Ja̧danö, wanedö yötawa chömöledö: Dios yöawi̧ kwösödaduwi̧ma, Diosnö iyawadanö jo̧be, ja̧danö ökwödönö pjatatemi ö'wö batibitjö̧ma, ja̧ iyawa wame ötjö chökwösobu ebawobedanö ichejekwena. Jo̧kwaijayonö, ö'wö batibitjö̧böbi, Dios yöawi̧ kwösödaduwobetjö̧ chösödena, ja̧danö ökwödökwö cho̧'wo̧ ösöwanö chö̧jena.

1 Tesalonicenses 4:16

Baikwö baledakwa̧ yötawa: Duluwo̧ma mölejȩbetjö jwiachakobe, ja̧danö labinö webö jwöakobe, ja̧danö ángelesdötjö la'aka ángelma yöa̧lakobe, ja̧danö Dios asabi̧ jawa trompeta ökwöakobe. Jejenö baledenama, Jesúsnö ösödadötjö wobinadöma dabönö 'yabibajö katjekwajachakobe.

1 Tesalonicenses 5:10

Jo̧ba Jesucristoma dö̧jibobö midawö woinobe, woditjö̧böbi, 'yada̧litjö̧böbi jo̧bakwö dö̧jakobetjö̧.

1 Timoteo 5:24

Ja̧danö ju'wibi yötawa. Jojodö sulabenö ja̧tjena, ju'wedökwena sulabenö ja̧tji̧ma wajuwanö öwawobe, ja̧danö Dios jobadönö lȩebakwa̧ abönö ida̧ökö waisadö ju'wedö jojodöma, sulabenö ja̧tjinobe jö̧ba̧lö. Ju'wedökwena sulabenö ja̧tjenama, sulabenö ja̧tji̧ma juluwanö öwawokobe, jo̧kwaijayonö juluwanö öwawököjayonö, tupakwö wajuwanö öwawakobe.

1 Timoteo 5:25

Jojodö otiwanö ja̧tji̧bi ja̧danö. Ju'wedökwena otiwanö ja̧tjenama, juluwanö öwawobe, okobe deinö edö tjöwaisobö, otiwanö ja̧tjinobe jö̧ba̧lö. Ja̧danö ju'wedökwena otiwanö ja̧tjenama, juluwanö öwawokobe otiwanö ja̧tji̧ma, jo̧kwaijayonö juluwanö öwawököjayonö, tupakwö öwawakobe otiwanö ja̧tjinobe jö̧ba̧lö.

Apocalipsis 1:11

Ja̧ ökwöi̧ma jojo yöa̧li̧da cha̧ja̧kwijatö. Ja̧danö, baikwö jö̧a̧lijatö ötjönöma: —Juan, biya̧ kwedi̧ma wȩyudi weköbo jelemutjö dötölatajanö tjuju̧kwitenia ju̧kwadönö, ötjönö ösödö ko̧ko̧kwa̧ladönöma. Biya̧ comunidadesnö ju̧kwadönö, Éfesonö, Esmirnanö, Pérgamonö, Tiatiranö, Sardisnö, Filadelfianö, Laodiceanö ju̧kwadönö wȩyudi weköbo, ötjönö ösödö ko̧ko̧kwa̧ladönöma— jejenö weijatö ötjönöma, trompeta pjutji̧danö ökwöinö yöba̧lo̧ma.

Apocalipsis 10:4

Jobadö tjökwödi̧ma, Chiwȩyudo, jö̧ta̧lemi, mölejȩbetjö iwene ökwöi̧ cha̧ja̧kwijatö: —Ja̧ tjökwödi̧ wanekwachi̧ma jojodö tjöwaisoböma jwiobe. Wȩyudökönuwi— ökwöi̧ cha̧ja̧kwijatö.

Apocalipsis 11:15

Jemi ikena trompeta pjubo̧, jelemutjö domulatajasanu pjubo̧ baibanö pjubo̧ pjuenama mölejȩbetjö labinö tjiwene yötja̧li̧ cha̧ja̧kwijatö, biya̧ tjiwenenö ökwöi̧: —Tjo̧wi̧ta. Böjȩma Duluwo̧ Dios La'aka Luwo̧ ö̧jena badekwachajabe. Ja̧danö, Dios weinökwe, jojodö tjö̧jibinö pjaatobö weinökwe La'aka Luwo̧ ö̧jenanö badekwachajabe. Jobadöma ba̧kwȩlö̧jatebö webö tjö̧jakwedö— jö̧ba̧lö, ökwöi̧ cha̧ja̧kwijatö.

Apocalipsis 11:19

Ikenama mölejȩbetjö Dios eju apjude po̧ibobe chedijatö. Jejenö po̧ibobe chedemi okwa isapjo chedijatö, Dios u̧kwapjo, domulataja weina jawa a̧japjoma. Ikenama, böba ölabi̧ a̧ja̧kwö, ja̧danö, nekakanö dejö baledobe chedijatö. Tjiwenebi, böba labinö ökwödi̧bi ökwöi̧ma cha̧ja̧kwijatö. Ja̧danö, niji tjö̧bebö li̧leibobe chedijatö. Ikenama ojwiyo o̧bi̧danö, inawiyadanö ichejekwi̧ labinö mölejȩbetjö nijakwö tjoduwobe chedijatö.

Apocalipsis 16:17

Ja̧danö, ikena luwo̧, ökömakwö sa̧bo̧ ángelma idȩja̧'do̧ do̧ba̧lö ja̧'do̧nö okwobu jwa̧lȩ'epjonö sa̧obe chedijatö. Sa̧emi iwene labinö ökwöobe cha̧ja̧kwijatö, Dios eju okwatjö, Dios ö̧belö, Tjo̧wi̧, 'dö̧ibaja̧ babema, jö̧ba̧lö.

Apocalipsis 19:9

Ikenama ángelma weijatö ötjönöma, chiwȩyudobö: —Biya̧ yöta̧li̧ma wȩyudi. Obeja Itji̧danö Jo̧ ilekwonö emi̧ pjiesta jobe tjichobö a̧debajawö̧ma, tjo̧'wo̧ ösöwanö ichö tjedakwedö. Ja̧ yöta̧li̧ma Diosda yöawi̧, isabenö yöawi̧ma— jö̧a̧lijatö ángelma ötjönöma.

Apocalipsis 2:1

Ja̧danö, chedökwema ina weijatö ötjönöma: —Juan, biya̧ yötawi̧ma wȩyudi weköbo, Éfeso jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ yöawi̧. Jo̧ba, biya̧ chiwȩyudi̧ yöawo̧ma, jelemutjö do'do̧latajanö la̧pa̧la̧yu̧bi̧ya junawa o'di̧ju, orotjö otikwa o'di̧ju, 'da̧denö kwebachö jo̧.

Apocalipsis 2:7

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönö. Biya̧ yöawobe Dios O̧'wo̧ Luwo̧ma: Ju'winö, sulabetjö juluwinadöma ötjö chö̧jobekwö tjichibakwedönö otiwanö wetakwo̧sa towi wa̧ji̧tjö, ja̧kwawa iyawowi wa̧ji̧tjö, 'Döbebö kwaduwi, jö̧ba̧lö. Jau, jobadönö wetakwo̧sa, Dios jwiinö otiwi̧ batjo junawowi wa̧ji̧tjö, 'Döbebö kwaduwi, jö̧ba̧lö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ma, jelemutjö do'do̧latajanö la̧pa̧la̧yu̧bi̧ya junawa o'di̧ju, orotjö otikwa o'di̧ju, 'da̧denö kwebachö jo̧ ökwödönöma— jejenö jö̧ba̧lö weijatö chedökwema ötjönöma, iteda yöawi̧ wȩyudö wetobö Éfeso jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.

Apocalipsis 20:6

Yelösöda, wobinadötjö ajayinö tjebachajinadöma, tjo̧'wo̧ ösöwanö ja̧dö, Dios wei̧ a̧ja̧kwö, Cristokwö. Jobadöma nöola ubolanö okwa loawatjö ji̧badö. Ja̧danö, Dioskwö Cristokwö lekwe, mil imiamebiya jenanö, Diostjö jojodötjö ö'weje pjabatadödanö tjotidakwedö. Dioskwö, Cristokwö mil imiamebiya jenanö tjotidakwedö.

Apocalipsis 21:5

Jemi ikenama, inesö ba̧kwawakanö bo̧ma yöawijatö: —A̧ja̧kwaduwitjö. Ötjöma okobe jwiinö ajayi jawama 'yayinö baibanö ja̧bo̧sa— yöawijatö. Ja̧danö, ötjönö weijatö: —Juan, ötjö yötawi̧ma wȩyudi. Yötawi̧ma jweinö yötawa, isabenö ji̧ wene. Biya̧, yötawi̧ma wȩyudi:

Apocalipsis 22:17

Ikenama Dios O̧'wo̧ Luwo̧ma, Obeja Itji̧danö Jo̧ ilekwo baibanö emakwujukwö Jesúsnö jwötjobe cha̧ja̧kwijatö, Baikwö ichi, jö̧ba̧lö. Ja̧danö, jojodönöbi jwöobe cha̧ja̧kwijatö, Ökwödöbi bi'ye yöawi̧ a̧ja̧kwadöma, Jesúsnö jwöbaduwi, Ichi, jö̧ba̧lö. Jejenö cha̧ja̧kwijatö. Ja̧danö, Dios O̧'wo̧ Luwo̧ma yöawijatö: —Bakwo̧ ojwiyo o̧tinö jo̧nö ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoma— yöawijatö, Dios O̧'wo̧ Luwo̧ma.

Apocalipsis 6:11

Jejenö atjeba̧lökwe Obeja Itji̧danö Jo̧ma, jobadönö kamijido̧ dewado̧ iyö, yöawijatö: —Ina ja'yubeda lekwa. Kwite'ada̧laduwo. Ina ju'wedönöbi kwabawö lotjakobe, kwömöledöduwinö, Dios weina ja̧badönöma. Ökwödönö kwabawö lotjinadanö jobadönöbi kwabawö lotjakobe. Tjo̧'omanö 'dö̧tjibanö kwabawö lotjaja ikena, balekwa mikwa lȩtebakwo̧sa—yöawijatö Obeja Itji̧danö Jo̧ma.