Apocalipsis 13:7 - Dios Iwene

⁷ Ja̧danö, Dios ömöledö babibinadönö kwabawö lobö ujuluwobe chedijatö, Diosma jejenö badedö ujuninobetjö̧. Ja̧danö, juluwajo̧ma, okobe deinö böjȩnö ju̧kwadö tjuluwo̧ baibanö jo̧, wainökwena ji̧nadötjö tupadanö jojodöbi, jelobebi jelobe ju̧kwadöbi, wainökwena tjiwene yöba̧ladöbi tjuluwo̧.

Apocalipsis 13:7 Iomraidhean Croise

Éxodo 9:16

Jo̧kwaijayonö 'yaka̧laduwinöda wetijatö chujulu chi̧sebi̧ma kwedaduwobö, ja̧danö böjenö ju̧kwadöma, okobe jwiinö böjenö tjöwaisachibakobetjö̧, Isabenö Jo̧ma jwiinö juluwo̧, jö̧ba̧lö.

Isaías 10:15

—Jobekwö ötjö Diosnö omukwatökönö sulabenö yöa̧li̧tjö̧, baikwö yöta̧lanö Asiria la'aka luwo̧nö: Bakwo̧ o̧tomo'anö towibiya juenama, o̧tomo'a jö̧a̧lenaji̧, –Ötjö o̧tomo'ama ötjönö do̧ba̧lö jubo̧tjö bajalekwönönö juluwo̧sa, –jö̧ba̧lö jö̧a̧lenaji̧? Ja̧danö löawakama, –löbo̧tjö bajalekwönönö mikwakasa, –jö̧ba̧lö yöa̧lenaji̧? Kwöwaisaduwa, ja̧maökö, jö̧tö? Jojoda ö̧sö̧'a kabebo̧ kwabo̧ma, ö̧sö̧'ama la'akatjöda jojodönö kabebö kwaö̧kö̧'a, towitjö otikwö̧'a ö̧sö̧'ama la'akatjöda towitjö otikwöködönö kaebö̧kö̧'a, jö̧tö? Jo̧kwaijayonö, ite Asiria la'aka luwo̧ma, sule chitea ö̧sö̧'adanö ichejekwijayonö, ötjönö omukwatökönö, –Ötjöda juluwo̧sa, –jö̧ba̧lö sulabenö omukwato̧.

Isaías 37:26

Jobekwö yöka̧litjö̧, baikwö atadö yöta̧lakwö: Kwa̧ja̧kwinökiji̧, ötjö Diosda jobekwö kwujuluwobö webinasa. Damötjö ja̧ baledakwa̧ omukwatö chujunijatö, damötjö ajayinö ji̧nadö tjö̧jayi ida̧ökö baledakwa̧ omukwatö chujunijatö, ja̧danö babe omukwatö chujuninadanö badekwachinö baledobö wetobe. Jau, omukwatö chujunijatö tjöbebö tjotidina comunidad kwujuluwobö, ja̧danö pjolö lobö, mö japopo baibanö söbebö loköbobö.

Daniel 12:1

Tupakwö yöawinobe ángelma Danielnö: —Ja̧danö, ja̧ yötawaja̧ jawa baledaja̧ ikena, Miguel, inesö ökwödö Israel jojodönö te'ada̧lakwawa luwo̧ ángelso̧ma ichakobe. Isabenö yötawakwö ja̧ mölema nöinö usula tjemawakobe kwömöledö Israel jojodöma, la'akatjöda ja̧ jaye usula emawakwawa edajiböködö Israel jojodöma, ökwödötjö ajayinö ji̧nadö tjö̧jinatjö baikwö bajalenö, jwiinö nöinö usula tjemawakobe. Jo̧kwaijayonö, ja̧ möle ju'wibi baledakobe, Diosma kwialu'ye ujunalobe, bidöma ja̧kwawa juna̧ladö jö̧ba̧lö wȩyukwa'yema, ja̧danö okobe deinö ja'yenö tjimibiya wȩyudö lödawedönöma, tjö̧jibinö pjaatakobe Diosma.

Daniel 7:21

Ja̧danö chedemi, ja̧kama Diosnö ösödadökwö ölakwabikwawö jo̧bekwö chedatö, ja̧danö jobadönö juluwobekwö chedatö.

Daniel 7:25

Ju'wibi jo̧bama sulabenö Diosnö yöa̧lakobe, ja̧danö Diosnö ösödadönö sulabenö ja̧akobe, usula tjemawinö. Ja̧danö Dios weina pjiesta jawa möle balewö loobö isakwakobe, ja̧danö Dios jojodönö wei̧bi balewö lobö wainö weobö isakwakobe. Ja̧danö Diosma weakobe, wa̧pötakwa o̧biabi, ju'wi o̧ba ja'öbi Diosnö ösödadönö ujuluwobö.

Lucas 4:6

ja̧danö Awetjama Jesúsnö yöa̧linobe: —Okobe deinö bidö tjotikwi̧ ökwönö chiyena, ja̧danö ökwöda inesö la'aka tjuluwo̧ bakibanö chiyena, ötjöda bidö tjuluwo̧chobetjö̧, ja̧danö ötjöda chösödi̧danö chiyobö jo̧be. Jau jobadö tjuluwo̧ batibobö iyinökwesa chösödi̧danö chiyo jö̧ba̧lö,

Juan 19:11

—Bakwo̧da webo̧ma, mölejȩbe jo̧da. Ökwömaökö. Diosma ökwönö weinobe böjȩ jojodö tjuluwo̧ bakibanö. Ja̧danö, ö'wö batibanö weköboböma Diosda weobe. Diosma jejenö weköbobö kaatokobetjö̧ jejenö weköbobe— jö̧a̧linobe—. Diosda ökwö weköbobö webo̧ma. Jo̧kwaobetjö̧ Pilato, ökwö weköbi̧, ö'wö batibanö sulabenö weköbi̧ma ökwö jawamaökö, Dios weköbobö kaatokobetjö̧. Ötjönö iyö lobadöda jawa. Jobadöma ökwö ja̧köbemitjö o̧penönö sulabenö ja̧badö. Jobadöda jawa, ötjö ö'wö batibanö weawama— jö̧a̧linobe Jesúsma Pilatonöma.

Apocalipsis 10:11

Ikenama juluwo̧ ángelma ötjönö yöawijatö: —Ökwöma Dios yöawi̧ yökawobö jo̧be, iteda ja̧akwa̧ma. Okobe deinö jojodönö, jelobebi, jelobe ju̧kwadönöbi, wainökwena tjiwene yöba̧ladönöbi, la'aka luwedönöbi yökawobö jo̧be, Juan— yöawijatö ötjönöma.

Apocalipsis 11:18

Ökwönö öpöjödadöma yelösöda, tjo̧'wo̧ sulinö edö yötja̧lobe, labinö lȩkebi̧ möle ichibiawö̧. Yökawi̧ möle ida̧ökö baibajabe, wobinadönö edö, otiwanö ja̧tjinojobö, sulabenö ja̧tjinojobö edö yökawi̧ mölema. Ja̧danö, otiwi̧ jawa kwiyi̧ möle baibajabe kwömöayedönöbi, yökawi̧ yöbawadönöbi, okobe deinö kwömöledö babibinadönöma. Ja̧danö, okobe deinö ökwönö yebabinö otiwanö omukwatadönö, la'aka luwedönöbi, jo̧kwadabedönöbi otiwi̧ jawa kwiyi̧ möle baibajabe. Ja̧danö, badekwachajabe lȩkebi̧ mölema, jojodö sulabenö ja̧nö, ju'wedönö inia tjötjinö ja̧bö ju̧kwadönö lȩbebö— jejenö Diosnö ösödö yötja̧li̧ma cha̧ja̧kwijatö.

Apocalipsis 11:7

Ja̧danö, jobadö yötjawi̧ 'dö̧ibajena, böjȩ teebe laju möajunö a̧jo̧ma, jajutjö labeibö jobadö tjö̧jobekwö i̧'yobe, jobadönö ujuluwobö. Jobe 'ya̧nö kwabawö loobe jobadönöma.

Apocalipsis 12:17

Jejenö baledobetjö̧ toba'dadanöso̧ma isujunö jwiinö ölabobe chedijatö. Jo̧kwaobetjö̧ jobuju ji̧tji̧munö, ajayinö jeminawö̧nö inia tjötjinö ja̧otö jö̧ba̧lö i̧'yobe chedijatö. Jobadöma, ajayinö jeminawö̧ ji̧tji̧muma, Dios weina a̧ja̧kwadö, Jesús jawa yöbawadö. Ja̧danö, toba'dadanöso̧ma so̧bi̧ya̧pu̧nö jamatö jo̧nö chedijatö, ojwe ö'öbö.

Apocalipsis 17:15

Ina yöawijatö ötjönöma: —Ojwebiya ba̧jekwi̧ ödö kwedaja̧, isuju jelo̧ jelo̧nö juju ö'öbönö jö̧bena ojwebiya kwedaja̧, jojodönöda wanekwachobe, böjȩ okobe jwiinö ju̧kwadö jojodö, jelobebi, jelobe ju̧kwadönö, wainökwena tjiwene yöba̧ladönö.

Apocalipsis 5:9

Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.