Ja̧danö baikwö yötawakwö, ba̧jekwadö tjo̧'wo̧ luwo̧ tjusula otiwanö dichö lotjakobe, okwanö bakwainö dewadö batjibanö, jo̧kwaijayonö sulabedöma ina tupakwönönö sulabenö ja̧bö tjö̧jakobe. Ja̧danö sulabedöma la'akatjöda ökwönö yötawaja̧ jawa tjöwaisachibökakobe, jo̧kwaijayonö waisanö omukwatadöma kwiwȩyudi̧ yöba̧lö edinö tjöwaisachibakobe.
Apocalipsis 13:18 - Dios Iwene18 Waiya, ja̧ númeronö wanekwachobema. Kwo̧'wo̧duwi̧ okwanö isakwaduwi kwöwaisachibaduwobö ojwe okwatjö labebajo̧ imi, númeronö wanekwachobema. Ja̧ imi númeroma, jo̧ba imi bi̧. Ja̧ númeroma seiscientos sesenta y seis. Faic an caibideil |
Apocalipsis 13:18
10 Iomraidhean Croise
Ja̧danö, ina yöbawijetö: —Jejenö baledonö jelo̧, jwiinö sulabenö ja̧bo̧ma Dios eju okwa tebachajo̧ tupakwö jojodö teachakwawökȩko̧nö tebachö ö̧bakobe, jojodö tetjachoböma jwiȩko̧nö. Ja̧ baledi̧ kwedaduwenama, kwöwaisaduwakobe, Tjo̧wi̧, sulabenö baledakobe, jö̧ba̧lö. Ja̧ mölema mö'ösa'okwö dökibajaduwo. Ja̧danö, biya̧ chiwȩyudi̧danö baledi̧ma kwedaduwena waisinö eda̧lö kwomukwataduwo— jö̧ba̧lö yöbawijetö—.
Chömöledö, Diosma sulabe jwibo̧, ¿jö̧tö? Ja̧danö, sulabe jwibo̧obetjö̧, sulabenö ja̧badönö lȩebobö jo̧be, ¿jö̧tö? Jejenö ji̧jayonö, jejenö omukwatöködö ju'wedö böjȩ jojodöma. Jobadöma wainö omukwatadö, Dios lȩeboböma jwia, jö̧ba̧lö omukwatadö. Ja'yubeda jobadö tjomukwati̧ma yötawa chömöledö. Baikwö tjomukwatobe: Böjȩ jojodöma okobe deinö bakwainö otiwa jawada ja̧bö tjö̧jitjö̧ma, jojodö tjomukwatökena Diosnöma, Jo̧bada inesö otiwanö ja̧bö jo̧, jö̧ba̧lö. Jo̧kwaijayonö, sulabenö ja̧bö tjö̧jobema, ju'wedö Diosnö tjomukwatobö jo̧be, Aaa, Diosda otiwanö ja̧bö jo̧ma, jö̧ba̧lö. Jejenö omukwatö, jemi tupakwöbi tjomukwatobe, Jojodö sulabenö ja̧bö tjö̧ji̧ma otiwobe, jö̧ba̧lö tjomukwatobe. Jojodö sulabenö ja̧bö tjö̧ji̧ma ju'wedö Diosnö tjösödobö ja̧obetjö̧, Diosnö pjabatadö sulabenö ja̧badöma, jö̧ba̧lö tjomukwatobe. Ja̧danö, jemi tupakwö ju'wibi tjomukwatobe. Diosma sulabenö ja̧badönö lȩeboböma jwia, jö̧ba̧lö tjomukwatobe. Sulabenö ja̧badöma Diosnö pjabatadö, jo̧kwajabetjö̧ jo̧banö pjabatadönö lȩeboböma jwibo̧ Diosma, jö̧ba̧lö omukwatadö. Jejenö omukwatadöma, ¿jweinö tjomukwatobeji̧ chömöledö? Jweinö omukwatöködö, ö'öbönöda omukwatadö chömöledö.
Ja̧danö, la'aka luwo̧ Ogma, ja̧ nijinö ju̧kwadö inesö ödöbaedö refaitas ötjabawö̧tjö bajaleapo ji̧na. Jo̧bama isabenö nöbo̧inobe, iteapjo camapjoma 'dii jawatjö otikwapjo ujuna̧linobe, ö'wejemu jawa metro jenanö ödöapjoma, ja̧danö jakwölakwö dötölajata metro jenanö ödöapjo. Ja̧ Og iteapjo camapjoma, ina amonitas jojodö tjitebo comunidad Rabanö jo̧be, ja̧pjo edö, isabenö nöbo̧ ö̧jina edö tjöwaisobö.
Chömöledö, biya̧ chiwȩyudi̧ma baledakwa̧ jawa. Ja̧danö, ja̧ baledakwa̧ma lekwokobe. Ja̧danö, biya̧ chiwȩyudi̧ eda̧lö ömöledönö yöbawadöma tjo̧'wo̧ ösöwanö tjö̧jakwedö. Ja̧danö, biya̧ chiwȩyudi̧ a̧ja̧kwadöbi tjo̧'wo̧ ösöwanö tjö̧jakwedö. Ja̧danö, biya̧ chiwȩyudi̧ weawa jawa a̧ja̧kwö ja̧badöbi tjo̧'wo̧ ösöwanö tjö̧jakobe. Jau, tjo̧'wo̧ ösöwanö tjö̧jakobe, biya̧ chiwȩyudi̧ baledakwa̧ma, Tjo̧wi̧ yöneawachobe, jö̧ba̧lö, waisö tjö̧jobetjö̧.
Ikenama ju'wi i̧sekwi̧ma chedijatö. Ja̧danö, ojwe nöödö chedijatö, isa̧yu̧ salöi̧danö salöödö. Jödönöma ökwölanö ubi̧danö lo̧be chedijatö. Jöödö ö'öböma jojodö tjö̧jobe chedijatö. Jobadöma ojwe okwatjö labebajo̧nö juluwadö. Jobadöma ojwe okwatjö labebajo̧nöbi, jo̧ba o̧'wo̧ jawabi tjo̧'wo̧ wana̧löködö. Ja̧danö, jo̧ba imi númerobi wȩyukwöködö. Jobadöma, bakwo̧nökwena, harpa pjeawa do̧ba̧lö tjö̧jobe chedijatö, Diosnö ösödö pjeawa harpama.
Ina ángelma yöawijatö: —Biya̧ waiyi̧ yötawi̧ma tjo̧'wo̧ luwo̧ jawa waisachibadöda tjöwaisachibakwedö. Juan, yötawi̧ a̧ja̧kwitjö, kwöwaisachibobö. Jo̧ba sulabo̧, duwo̧ uubiya, jelemutjö doyulataja uubiyama, mö'ösa'iju jelemutjö do'olatajanö wanekwachobe. Ja̧danö kwedajokoma, mö'ösa'ijunö wu̧junö kwedatö.
Sanasan