Apocalipsis 13:14 - Dios Iwene14 Ja̧danö, Diosma jejenö i̧sebobö kaatibokobetjö̧, jo̧ba, böjȩ teebetjö labebajo̧ma, ojwe okwatjö labebajo̧ öba a'o ja̧nö, ujulu i̧sebobe chedijatö. Jejenö ujulu i̧sebiawö̧ jo̧ba omöna yöa̧li̧ ösödö, jojodöma jo̧ba wei̧ a̧ja̧kwö ju̧kwadö. Ja̧danö, ojwe okwatjö labebajo̧ o̧'wo̧ jawa tjotidobö webo̧ kwölöte'onö dȩawatjö̧ woachibajökwe o̧'wo̧ jawama. Faic an caibideil |
Apocalipsis 13:14
29 Iomraidhean Croise
Ja̧danö, a̧ja̧kwajo̧, baikwö yötawakwö, inesö lȩtebakwa̧ma kwedökakwo̧ja. Jau Josias, inesö lȩtebakwa̧ badekwachakwa̧ abönö, ina wene jwiinö kwö̧jaduwonö, ö'wö bakibakwo̧ja, ja̧danö ö'wö babibajo̧nö kwa'dödökwö otiwanö tjo̧tja̧kwo̧ja. Jo̧kwajabetjö̧, inesö lȩtebakwa̧ badekwachobö ji̧jayonö, ökwönö baledobö wetökakwo̧sa, ökwöma ina wene jwiinö kwö̧jaduwonö ö'wö bakibakwo̧ja, —jö̧ba̧lö Isabenö Jo̧ yöawi̧ yötjawobö wejinobe Huldama. Ikenama, jobekwö yöjawawö̧, tjebachajö yötjawinobe la'aka luwo̧ Josiasnö.
Jau chömöledö, jobekwö omukwatö otido̧ma, wajwibö ja̧bo̧. Otiwi̧ kwakwawa kwökönö, ökwölaso̧pja̧da kwo̧ ichejekwa, ja̧danö sulabenö omukwati̧ma, jelobekwö ö'öbönö öibökwe. Jo̧bajayo̧ma la'akatjöda iteda ö̧jibinö ja̧oböma jwibo̧, ja̧danö iteda ösödökwe, ömamunö do̧'alökwe o̧'wo jawanö omukwatö̧kö̧, —Bite chösödökwema, diosbö̧kö̧, omöna jawa, —jö̧ba̧lö omukwatö̧kö̧.
Tupakwö yöawinobe ángelma: —Jo̧ba Siria la'aka luwo̧ma iteda ösödi̧danö ja̧akobe. Ja̧danö yöa̧lakobe, ötjöma okobe deinö diosbedötjö bajalekwönönö juluwo̧sa jö̧ba̧lö, ja̧danö jojodö tjöbajale jalaka baibanö Okobe Jwiinö Juluwo̧ Diosnöbi sulabenö yöa̧lakobe, mikwawö̧kö̧, ujulu jwibo̧ jö̧ba̧lö. Ja̧danö jejenö sulabenö ja̧ijayonö, ina iteda ösödi̧danö ja̧obö ja̧kobe, Dios jo̧banö lȩebobö badedö ujunina möle badekwachenanö kabatö, ja̧danö ja̧ mölema, Diosma jo̧banö dameakwö labinö lȩebakobe.
Ikenama, ojwe okwatjö sulabo̧ laebobe chedijatö. Jo̧bama uubiya jö̧kwe, jelemutjö doyulatajanö. Ja̧danö, ö'yekiyabi jö̧kwe, domulataja jawa ökiya. Ja̧danö, jo̧bama, bakwakakwena butjawa ökiya butjawo̧, la'aka luwo̧ ubutjawi̧danö butjawa ökiyama. Ja̧danö, uubiya bakwayukwena imibiya sulabenö wȩyukwo̧, Diosnöda ötjabi imibiya, Ötjöda Diossa, jö̧ba̧lö, imi wȩyukwo̧.
Ja̧danö, böjȩ teebetjö labebajo̧, ujulu iyajökwema, ojwe okwatjö labebajo̧ o̧'wo̧ jawa otikwama 'yaa̧linö ja̧obe chedijatö. Ikenama, jojodönö ja̧ o̧'wo̧ jawa otikwa tjösödobö weobe chedijatö. Jo̧kwaijayonö ju'wedönö chedijatö, Jo̧banöma dösödökökwe, jö̧ba̧lö, öpöjödadönö. Jejenö jö̧tja̧liökwe, jobadönö kwabawö lotjobö weobe chedijatö, böjȩ teebetjö labebajo̧ma.
Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.
Ikenama jelo̧ ángelma, ajayinö ichajadö tjökömanö köbö icho̧ma labinö jwöeba̧lobe cha̧ja̧kwijatö: —Ojwe okwatjö labebajo̧nö, jo̧ba o̧'wo̧ jawabi ösödadönö, jo̧ba imi döbö wȩyudakwawedönöma, tjöbanö, tjömamunö dobö wȩyudakwawedönöma yelösöda Dios jwiinö ölabikwawö̧, jobadönö lȩbebö. Yelösöda, Dios ölabi̧ma wiwodabökönö ölabikobe, bakwai̧ ölabi̧da ölabikobe. O̧'do̧bu bakwai̧sobu, ojwiyokwö pjatakwawokobu bakwai̧sobudanö, Diosma jwiinö, ölabi̧da ölabikobe ojwe okwatjö labebajo̧nö ösödadönöma. Ja̧danö, jobadöma usula tjemawakwedö, Dios jejenö usula tjemawinö ja̧obetjö̧. Yelösöda, ökwöla tiibokola ubolanö ja̧nö, jwiinö tubinö, azufretjö ubolanö, ba̧kwȩlö̧jatebö tjö̧jakwedö. Ja̧danö, Obeja Itji̧danö Jo̧bi, suli̧ jwibadö ángelesdöbi tjeda̧lonö jobadöma ökwölanö ja̧nö usula tjemawakobe.
Ikenama ju'wi i̧sekwi̧ma chedijatö. Ja̧danö, ojwe nöödö chedijatö, isa̧yu̧ salöi̧danö salöödö. Jödönöma ökwölanö ubi̧danö lo̧be chedijatö. Jöödö ö'öböma jojodö tjö̧jobe chedijatö. Jobadöma ojwe okwatjö labebajo̧nö juluwadö. Jobadöma ojwe okwatjö labebajo̧nöbi, jo̧ba o̧'wo̧ jawabi tjo̧'wo̧ wana̧löködö. Ja̧danö, jo̧ba imi númerobi wȩyukwöködö. Jobadöma, bakwo̧nökwena, harpa pjeawa do̧ba̧lö tjö̧jobe chedijatö, Diosnö ösödö pjeawa harpama.
Ikenama chedijatö wa̧medukwa isapjobedönö, sulabedönö, puledanö ichejekwadönö. Jobadötjö bakwo̧ toba'dadanöso̧ aa okwatjö labebo̧. Ja̧danö, jelo̧, ojwe okwatjö labebina aa okwatjö labebo̧. Ja̧danö, jelo̧, böjȩ okwatjö labebina, Ötjöma Dios yöawi̧ yöbawo̧sa, jö̧ba̧lö, omöna yöba̧lo̧ aa okwatjö labebo̧.
Jejenö weökwe ajayinö luwo̧ ángelma böjȩnö ichö, idȩja̧'do̧ do̧ba̧lö, ja̧'do̧ okwobuma nijinö sa̧obe chedijatö. Sa̧emi tutiyubiya saduwaibobe chedijatö, ojwe okwatjö labebinanö ösödadönö, jo̧ba imi dobawedönö, jo̧ba o̧'wo̧ jawabi ösödadönöma. Yelösöda, tutiyubiya sulabenö 'dö̧ekwi̧ tutiyubiyama jobadönö saduwaibawö̧da babibadönö chedijatö, ajayinö luwo̧ ángel idȩja̧'do̧nö okwobu sa̧emima.
Ja̧danö, jojodöma la̧pa̧la̧yu̧bi̧yama tjönötedökakobe. Yȩakobe, jojodö deobetjö̧. Ja̧danö, bakwo̧ ilekwonö emi̧ tjösödi̧ pjiesta tjujuni̧ma jwiakobe, jojodö deobetjö̧. Jobe tea iyabidöbi, balada nöinö juna̧ladöma sulabenö tjomukwatinobetjö̧, yelösöda sulabenö baibakobe jobetjöma. Jobadöma, Ökwödödasa böjȩnö iyawedötjö iyawa juluwadöma, jö̧ba̧lö, tjomukwatinobetjö̧ sulabenö baibakobe jobetjöma. Ja̧danö, mea boawa jojodöbi jobetjö okobe deinö böjȩnö ju̧kwadönö bobiatjinobetjö̧ sulabenö baibakobe jemi, Babiloniatjöma, jö̧ba̧lö ángel yöa̧lobe cha̧ja̧kwijatö.
Jo̧kwaijayonö kabayu dewo̧ wamenö wo̧ma, iteda ömöayedökwö ojwe okwatjö labebinanö do̧a̧lobe chedijatö. Ja̧danö, böjȩ teebetjö labebinanö, Dios iwene yöbawo̧sa, jö̧ba̧lö, omöna yöba̧lo̧nöbi do̧a̧lobe chedijatö. Ja̧danö, jo̧ba böjȩ teebetjö labebinama, ujulu i̧sebö jojodönö jelobekwö tjomukwatinö öbibo̧, ojwe okwatjö labebinanöbi, jo̧ba o̧'wo̧ jawabi tjösödinö. Ja̧danö, jo̧bama, jojodönö jelobekwö tjomukwatinö, tjöbanöbi, tjömamiju tjöwaisobekwöchobesamunöbi ojwe okwatjö labebina imi seyu do̧bö wȩyukwa tjösödobö öbibo̧. Ja̧danö, kabayu dewo̧ wamenö wo̧ma, jobadö du̧ju̧tajanöma, ina 'yaba̧ladönöma, ökwöla nöola okwa loobe chedijatö, jwiinö tubinö azufre mikwi̧ ubolanö.
Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.
Ikenama Diosma Awetjanö, jojodönö ba̧kwȩlö̧jatebö suli̧ waedö yöba̧lo̧nöma, do̧batö töbebö loobe chedijatö, ökwöla nöola okwa. Jobema, ju'wedö du̧ju̧tajanö ajayinö töbebö loinemi. Ojwe okwatjö labebinanöbi ajayinö töbebö loinemi jemima. Ja̧danö, omöna yöba̧linanöbi, Ötjöma Dios yöawi̧ yöbawo̧sa, jö̧ba̧lö, yöba̧linanöbi, ajayinö töbebö loinemi jemima, ökwöla ubola okwama. Jobema tiibökönö, tubinö yelösöda ubobe, azufre mikwi̧ ubi̧ tubi̧ma. Ja̧danö, jobadö wa̧medukwama, ba̧kwȩlö̧jatebö labebökönö, mölebi yö̧tebi inia tjötjinö baledawö̧.
Chömöledö, yötawaduwakwö. Ökwödönö wetijatö, Sulabenö baledonöbi kwo̧'wo̧ luwo̧duwi 'dibachibö te'ada̧lö kwö̧jaduwo, jö̧ba̧lö. Ja̧ wetinama otiwanö a̧ja̧kwö kwö̧jinaduwobe. Jejenö otiwanö a̧ja̧kwö kwö̧jinaduwobetjö̧ pjatatakwo̧sa ökwödönöma. Ju'wedö böjȩnö ju̧kwadönö lȩbebö weti̧ baledonö, böjȩtjö jwiinö inia tjötjinö baledonöma, ökwödönö te'ada̧lö pjatatakwo̧sa, ja̧ inia tjötji̧tjö baledökönö.
Sanasan