Ja̧danö, Isabenö Jo̧ Dios tebonö ju̧kwadö otidinawö̧tjö o̧penönö waisinama a̧ko'da. Jo̧ba a̧ko'dama omöna yöa̧lakwawa waisina, jojodö jo̧ba omöna yöa̧li̧ tjösadakobetjö̧. Ju'wi möle jo̧bama abebö a̧ja̧kwijetö isujunö: —Diosma isabenö batjo okobe jwiinö towibiyanö wa̧ji̧ma kukwaduwoko jö̧ba̧lö ¿weinaji̧?— abebö a̧ja̧kwoko:
Apocalipsis 12:9 - Dios Iwene9 Ikenama nöbo̧ toba'dadanöso̧nöma mölejȩbetjö böjȩkwö labinö jabö lotjobe chedijatö. Jo̧bama damötjö, a̧ko'da ji̧na, Awetja mikwo̧, böjȩnö ju̧kwadönö okobe deinö omöna yöba̧lo̧, jö̧ba̧lö, ötjabökwe. Ja̧danö, iteda ömöayedö, sulabedö ángelesdönöbi labinö jabö lotjinawö̧, mölejȩbetjö böjȩkwö. Faic an caibideil |
Apocalipsis 12:9
68 Iomraidhean Croise
Okobe jwiinö chitea'o mösa'o ba̧kwemeachibanö, otiwanö inia tjöbökönö tjö̧jakwedö, otiwanö söbebö lotjököwö̧ tjö̧jakwedö. Ja̧ möle, tebo awilidö lobo ötjabawö̧ma, bakobe obejadökwö dösölö̧jinö ja̧nö, tju̧kwa tjukwakwedö. Ja̧danö didibadöma, meje'ye tjukwakwedö, pakayadö tjukwi̧danö. Ja̧danö a̧ko̧'döma, laböködö ja̧nö, nijinö ba̧nö nijiso̧pja̧da tjukwakwedö. Jobekwö baledakwa̧ ötjö Isabenö Jo̧ yötawajabe, isabenö yötawaja̧danö baledakobe, jö̧ba̧lö yöawobe Diosma.
Jau chömöledö, isabenö Dios weakwo̧ jö̧a̧linökwesa jö̧ba̧lö omöna yöba̧ladöma yötjawakobe, ja̧danö Dios yöawi̧ yöbawadösa jö̧ba̧lö omöna yöba̧ladöbi yötjawakobe. Jobadöma jojodö edajitjökö jawa tji̧sebakobe, Dios omudawö ujuninawö̧bi jobadö yötjawi̧ tjösödobö, jo̧kwaijayonö Dios omudawö ujuninawö̧tjobetjö̧ tjösödökakobe.
Ja̧danö kwa̧jwi̧muduwinö jejenö otikwökö möle kwejataduwobö ji̧tjöma, bisu Abraham itjiju tupadanö jojosujunö ¿jö'wöchi̧tjö chejatobö jwienaji̧? Isabenö jo̧be. Bisuma Awetja nu'yö loiniokoda a̧li̧nösamu jelemutjö wa̧pötakwa o̧biya itukobuju usula jemawajabeta, ja̧danö kwa̧jwi̧munö otikwökö möle kwejataduwobö ji̧tjö̧ma, isabenö bisu kwa̧jwi̧muduwitjö bajalekwönönö mikwawujunö otikwökö möle chejatobö jo̧be— jö̧ba̧lö yöawinobe Jesúsma.
Ja̧danö, jo̧ba ichakwo̧ma öwaitjöda öba̧ja̧dakwo̧ jojodönö Dios lȩebakwa̧, tjöwaisachibanö. Ja̧danö ida̧ökö Diosma Awetja, böjȩtjö uluwo̧ baibanö jo̧nö lȩebi̧tjö weinobetjö̧ jojodö tjöwaisachibakobe, Jojodönöbi, suli̧ juna̧ladönöma, Dios lȩebakwawö̧, jö̧ba̧lö. Jejenö jojodö tjöwaisachibanö tjo̧'wo̧ luwo̧nö öba̧ja̧dakobe jo̧ba ichakwo̧, Dios O̧'wo̧ Luwo̧ma— jejenö yöawinobe Jesúsma öba̧ja̧di̧ waisachadönöma.
Ökwödö kwabe'doduwima Awetjada. Ökwödö ösödö kwö̧jaduwi̧ma Awetja ösödi̧danö ösödö kwö̧jaduwobe. Jo̧bama jojodönö kwabö lobo̧, ajayitjöda babe baibanö. Ja̧danö, isabenö jawa yöbawö̧kö̧, omönada yöbawo̧. Jo̧ba omajade okwa sule omönada a̧jobetjö̧ omönada yöbawo̧. Ja̧danö, isabenö yöawakwawama öpöjödo̧. Jo̧bama ajayinö omöna yöbawina. Ja̧danö, jojodönö tjo̧'wo̧ luwo̧nö öibobe omönada yötjawobö.
Jobadöma tjöbajale tjewawadödanö tjuju̧kwobe, tjo̧'wo̧ luwo̧ jawama. Jobadönö, yȩa'wo okwa ju̧kwadönö yökawobö wetokwöcha, jobadöma yȩa'wo okwatjö labebö dewinö ju̧kwadö batjibobö. Jobadöma, Awetja ösödi̧ ja̧bö tjuju̧kwi̧tjö kabatibö Dios ösödi̧da ja̧bö tjuju̧kwobö wetokwöcha. Ja̧danö ötjönö tjösöditjö̧ma tjusuli̧ söbebö loakobe Diosma. Ja̧danö jobadöma suli̧ jwibadö batjibinö Dios ja̧inawö̧danö jobadöbi batjibakobe, suli̧ jwibadö batjibakwedöma. Jejenö jö̧ba̧lö iwene jwöi̧ma cha̧ja̧kwijatö, chuluwo̧—jö̧ba̧lijetö Pabloma la'aka luwo̧ Agripanöma.
Jau chömöledö, do̧'wo̧ luwo̧nö wene jwiinö dö̧jobö pjabato̧ma Diosda, ja̧danö juluwanö söbebö loakobe döpöjojo Awetja ujuluma. Jejenö söbebö loenama, Awetjanö kwömasapaduwinö kwöja̧taduwobedanö ja̧kobe chömöledö, ökwödönö ujuluwokobetjö̧. Ja̧danö, Duluwo̧ Jesús kabatökönö mikwa jwiinö otiwa jawa iyö ökwödökwö ja̧nö pjaatobö ateba Diosnö chömöledö.
Jau chömöledö, jobadöma tjuluwo̧ Awetja ja̧i̧danö bakwainö ja̧badö, baikwö labebö lobö yöta̧la: Awetjama Dios weökwe ángeldanö ichejekwo̧ baibanö ja̧bo̧, ¿jö̧tö? Jau chömöledö, bitema sulabo̧ jö̧ba̧lö tjöwaisapji jö̧ba̧lö, ángeldanö ichejekwo̧ baibanö ja̧bo̧ Awetjama. ¿Dakwö kwomukwataduwa chömöledö? Tjuluwo̧ Awetja jejenö ja̧itjö̧ma, Awetja ömöayedöbi ¿tjuluwo̧ ja̧i̧danö ja̧tjökenaji̧? Isabenö tjuluwo̧ ja̧i̧danö bakwainö ja̧badö chömöledö, Awetja ömöayedötjijayonö, waapjima yöbawöködö Awetja ömöayedösa jö̧ba̧lö. Jau chömöledö, tjuluwo̧ sulabenö ja̧i̧danö, jobadöbi sulabe jwibo̧ Duluwo̧ ömöayedödanö tjichejekwobö ja̧badö chömöledö, ökwödönö omöna yötja̧lobö. Isabenö jejenö Dios ömöayedödanö tjichejekwobö ja̧badö chömöledö, jo̧kwaijayonö Diosma jobadönö waiso̧, ja̧danö bajaliyanö ja̧tji̧ mikwa baibanö lȩebakwo̧ chömöledö.
Jau chömöledö, kwöwaisaduwa, Awetjama kabatökönö isakwobe, ökwödö Jesúsnö ösödadönö suli̧ öwaedobö, ¿jö̧tö? Jau chömöledö, jejenö isakwo̧, ja̧danö belö sulabenö baledinatjö ökwödönö suli̧ öwaedotö jö̧ba̧lö isakwinobe Awetjama chömöledö. Ja̧danö, jejenö suli̧ öwaedotö jö̧ba̧lö isakwi̧ chöwaisobetjö̧, waisanö ökwödönö wetijatö chömöledö, sulabenö ja̧binanö lȩkebaduwoböbi, lȩbebajadö yemidanö jo̧banö kwösödaduwoböbi. Jau chömöledö, okobe jwiinö ja̧ wetinama, Awetja ökwödönö ujuluwapji jö̧ba̧lö wetijatö.
Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe.
Jejenö da̧peachadö badibenama, ökwödöma tjemu wajwibadödanö dö̧jökena, Dios iwenema. Ja̧danö, waisanö ja̧nö, ju'wedö wainö omukwatö yötjawi̧ma da̧ja̧kwökena. Wanedö yötawa chömöledö: Isowi, tjolanö nubökönö nönawowi, jwa̧lȩ'epjo ichobe balawa loobö jwa̧lȩ'epjo e'ewibobekwö 'yo̧wi. Ökwödöma jejenö dö̧jaduwoko. Jowi isowi balawa loobö jwa̧lȩ'epjo e'ewibidanöma e'ewibököwö̧sa, do̧'wo̧ luwo̧nö da̧peachö dö̧jenama. Ja̧danö ju'wedökwöma, ökwödönö tjo̧'wo̧ sulinö edö, sulabenö doma'a o̧pekwönö ja̧badöma tje'ewibököwö̧sa, isowi tjolanö nubökönö nönawowidanöma.
Jejenö omöna yötja̧li̧ma ja'yubebi ösödökönaduwi chömöledö, baikwö yötawa: 'Dö̧ibaji̧ möle okobe deinö böjȩ jojodöma Diosnö tjöpöjödakobe, jo̧ba wei̧ da̧ja̧kwökö jö̧ba̧lö. Jesúsma yemidanö ichökakobe ja̧ möle baibenanö kabatö, ja̧danö inesö sulabo̧ Awetja ömöayo̧, Dios ökwöla nöolanö ikwö loakwo̧ma öwawachenanö kabatö.
Ja̧danö chömöledö, ökwödö Dios ju'wedö i̧tji̧mu ötjabiwö̧ma jojodödasa. Diteba'obi dökwösobubi juna̧ladösa. Ja̧danö, woba jojodösa. Jo̧kwaobetjö̧ Jesúsbi, ökwödönö pjaatobö jojoda baibanö öbötjachinobe ökwödö woba jojodödanö. Isabenö Dios Itji̧ma jojoda öbötjachinobe woobö ökwödö dusula dumusidi̧ midawö. Ja̧danö, jo̧bama dumusidi̧ midawö woenama Awetjanö ujuluwinobe. Jo̧ba Awetjama yelösöda juluwo̧ jojodönö Diostjö 'da̧bachibö wotjobö öibobö. Jo̧kwaijayonö Jesúsma jo̧banö ujuluwinobetjö̧ Dios i̧tji̧mu babibinadönö Diostjö 'da̧bachibö wotjobö öbibökö. Chömöledö jo̧ba Awetjama ujulu jwibo̧ ökwödö Jesúsnö do̧batö eminadönö öibobö, Diostjö 'da̧bachibö wodoböma.
Jweinö omukwatö eda̧lö kwö̧jaduwo chömöledö, kwöpöjojo Awetjama, ökwödönö suli̧ öwaedobö isakwobetjö̧. Kwöpöjojonö baikwö wanedö yötawa chömöledö: Didiba nöbo̧ma tulubö kwebacho̧, ukwakwo̧nö isakwö, ¿jö̧tö? Ja̧danö, Awetjama ökwödönö suli̧ öwaedobö isakwo̧ chömöledö, jo̧kwajabetjö̧ jweinö omukwatö eda̧lö kwö̧jaduwobö jo̧be.
Mölejȩbe jo̧ inesö juluwo̧ ángelso̧ Miguel mikwo̧ma jobadötjö bajalekwönönö juluwo̧ chömöledö, jo̧kwaijayonö Miguelbi ötjöda lȩtebakwö jö̧ba̧lö Awetjanö yöa̧lobö öpöjödinobe. Jau chömöledö, Miguelma Moisésmine iteba'o emö i̧'yinobe, ja̧danö emö i̧'yenama, Awetjama jo̧banö ölakwabikwawö ö̧jinobe. Jo̧kwaijayonö jejenö ölakwabikwawö ö̧jiökwe, sulabo̧ja, ötjöda lȩtebakwö jö̧ba̧löma yöa̧linokobe Miguelma, wainö yöa̧linobe, Duluwo̧ wei̧ kwöpöjödobetjö̧, jo̧bada lȩebakwo̧ja jö̧ba̧lö waisanö yöa̧linobe Miguelma.
Ja̧danö, Awetjanö tjujuluwinobetjö̧ ökwödö mölejȩnö ju̧kwadöma, otiwanö, kwo̧'wo̧duwi ösöwanö ju̧kwaduwi, jobema deobe Awetjama. Jo̧kwaijayonö jejenömaökö böjȩnö ju̧kwadöma. Yelösöda kwo̧'wo̧duwi ösöwanöma kwö̧jaduwokobe. Böjȩkwö jatjajökwema, yelösöda ölakwabikwawobe ökwödönöma. Jo̧bama öwaisa, Tjo̧wi̧, chö̧ji̧ma 'dö̧ibaja, lekwökö, jö̧ba̧lö. Jo̧kwaobetjö̧ ökwödönö labinö, inia tjököbaduwinö ja̧obö omukwato̧— jejenö mölejȩbetjö iwene yöawi̧ cha̧ja̧kwijatö.
Ikenama ju'wi i̧sebi̧ma mölejȩbetjö öwawachobe chedijatö. Jobetjö toba'dadanöso̧nö chedijatö, jwiinö nöbo̧nö, duwo̧nö. Jo̧bama uubiya jö̧kwe, jelemutjö doyulatajanö. Ja̧danö, ö'yekiyabi juna̧lo̧, domulataja jawa ökiya. Ja̧danö, inesö la'aka luwedö tjubutjawi̧danö, butjawa ökiya butjawo̧, uubiya bakwayukwena bakwakakwena.
Ja̧danö, Diosma jejenö i̧sebobö kaatibokobetjö̧, jo̧ba, böjȩ teebetjö labebajo̧ma, ojwe okwatjö labebajo̧ öba a'o ja̧nö, ujulu i̧sebobe chedijatö. Jejenö ujulu i̧sebiawö̧ jo̧ba omöna yöa̧li̧ ösödö, jojodöma jo̧ba wei̧ a̧ja̧kwö ju̧kwadö. Ja̧danö, ojwe okwatjö labebajo̧ o̧'wo̧ jawa tjotidobö webo̧ kwölöte'onö dȩawatjö̧ woachibajökwe o̧'wo̧ jawama.
Bidö sulabedö, tjaatjö labebajadöma, Awetja ömöayedö. Ja̧danö, Awetja ujulu i̧sebö ja̧badö. Ja̧danö, jobadöma, böjȩ bakwameachibanö tji̧'yobe chedijatö, okobe deinö böjȩ la'aka luwedönö, tjömöayedö guardiakwö bakobe ko̧ko̧kwibö ja̧tjobö. Ja̧danö, jobadö tjoko̧ko̧kwajawö̧ma bakobe ja̧nö tjite'ada̧lobe chedijatö, juluwo̧ Diosnö tjölakwabikwawobö latjebakwa̧ möle badekwachenanö baibanö, jwiinö yeabikwa mölema.
Jamatajo̧ma labinö jwöeba̧lobe cha̧ja̧kwijatö, baikwö: Tjo̧wi̧ pjolachaiba Babilonia comunidad, inesö la'akasemi comunidadma. Babema Awetja ömöayedö tjuju̧kwemida baiba. Yelösöda, okobe deinö jwiinö sulabedö, öwawöködö tjuju̧kwemi baiba. Ja̧danö, okobe deinö sulabedö pji̧yu̧bi, matjoböbi weököwö̧ pji̧yu̧ tjuju̧kwemi baiba, Babiloniama.
Ja̧danö, jojodöma la̧pa̧la̧yu̧bi̧yama tjönötedökakobe. Yȩakobe, jojodö deobetjö̧. Ja̧danö, bakwo̧ ilekwonö emi̧ tjösödi̧ pjiesta tjujuni̧ma jwiakobe, jojodö deobetjö̧. Jobe tea iyabidöbi, balada nöinö juna̧ladöma sulabenö tjomukwatinobetjö̧, yelösöda sulabenö baibakobe jobetjöma. Jobadöma, Ökwödödasa böjȩnö iyawedötjö iyawa juluwadöma, jö̧ba̧lö, tjomukwatinobetjö̧ sulabenö baibakobe jobetjöma. Ja̧danö, mea boawa jojodöbi jobetjö okobe deinö böjȩnö ju̧kwadönö bobiatjinobetjö̧ sulabenö baibakobe jemi, Babiloniatjöma, jö̧ba̧lö ángel yöa̧lobe cha̧ja̧kwijatö.
Jo̧kwaijayonö kabayu dewo̧ wamenö wo̧ma, iteda ömöayedökwö ojwe okwatjö labebinanö do̧a̧lobe chedijatö. Ja̧danö, böjȩ teebetjö labebinanö, Dios iwene yöbawo̧sa, jö̧ba̧lö, omöna yöba̧lo̧nöbi do̧a̧lobe chedijatö. Ja̧danö, jo̧ba böjȩ teebetjö labebinama, ujulu i̧sebö jojodönö jelobekwö tjomukwatinö öbibo̧, ojwe okwatjö labebinanöbi, jo̧ba o̧'wo̧ jawabi tjösödinö. Ja̧danö, jo̧bama, jojodönö jelobekwö tjomukwatinö, tjöbanöbi, tjömamiju tjöwaisobekwöchobesamunöbi ojwe okwatjö labebina imi seyu do̧bö wȩyukwa tjösödobö öbibo̧. Ja̧danö, kabayu dewo̧ wamenö wo̧ma, jobadö du̧ju̧tajanöma, ina 'yaba̧ladönöma, ökwöla nöola okwa loobe chedijatö, jwiinö tubinö azufre mikwi̧ ubolanö.
Jo̧bama baikwö yöawobe ökwödö Pérgamo jojodönö, jo̧banö ösödadönöma: Ötjöma chöwaisa, jobe kwiteboduwima Awetja ba̧nö wei̧danö jo̧be. Jo̧kwaijayonö chedemi ökwödöma jweinö omukwatö, otiwanö kwö̧jaduwobe, Jesúsnöda ösödadösa, jö̧ba̧lö. Ja̧danö, bakwo̧, ötjönö ba̧kwȩlö̧jatebö yöbawo̧, Antipas mikwo̧nö, kwabö lotjenabi ökwödöma kwo̧'wo̧duwi 'dibachibö kakatibinaduwokobe ötjönöma.
Jau ökwödötjö ju'wedö, Awetja omukwati̧danö omukwatadöma jobuju yöjawi̧ a̧ja̧kwö, Bisu yöjawi̧ma Awetja okwanö omukwati̧ yöjawobe, jö̧ba̧lö, ösödadö. Jo̧kwaijayonö, ökwödö Tiatira jojodötjö ju'wedöma jobuju sulabuju jomukwati̧danö omukwatöködöja. Ja̧danö, jobujunö öpöjödö, yöjawi̧ kwa̧ja̧kwaduwokobe. Jo̧kwaobetjö̧, ökwödönöma, tjo̧wi̧ta, ju'wi jawa wetokobe.
Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.
Ikenama Diosma Awetjanö, jojodönö ba̧kwȩlö̧jatebö suli̧ waedö yöba̧lo̧nöma, do̧batö töbebö loobe chedijatö, ökwöla nöola okwa. Jobema, ju'wedö du̧ju̧tajanö ajayinö töbebö loinemi. Ojwe okwatjö labebinanöbi ajayinö töbebö loinemi jemima. Ja̧danö, omöna yöba̧linanöbi, Ötjöma Dios yöawi̧ yöbawo̧sa, jö̧ba̧lö, yöba̧linanöbi, ajayinö töbebö loinemi jemima, ökwöla ubola okwama. Jobema tiibökönö, tubinö yelösöda ubobe, azufre mikwi̧ ubi̧ tubi̧ma. Ja̧danö, jobadö wa̧medukwama, ba̧kwȩlö̧jatebö labebökönö, mölebi yö̧tebi inia tjötjinö baledawö̧.
Ja̧danö, jo̧bama, böjȩ okobe jwiinö kwebachö, okobe deinö böjȩnö ju̧kwadönö suli̧ waedö yöba̧lö, tjoko̧ko̧kwobö weakobe, Awetjama. Ja̧danö, Gogo comunidad jojodönöbi, Magogo comunidad jojodönöbi suli̧ waedö yöba̧lö tjoko̧ko̧kwobö weakwo̧. Gogo jojodöbi, Magogo jojodöbi böjȩnö okobe deinö ju̧kwadönö wanekwachobe. Ja̧danö, Awetjama, ko̧ko̧kwajadönö weakobe ölakwabikwawö tji̧'yobö. Yelösöda, jobadöma ba̧jekwadö, so̧bi̧ya̧pu̧danö ba̧jekwadö, ölakwabikwawö tji̧'yakwedöma.
A̧ja̧kwaduwitjö. Kwo̧'wo̧ tjo̧kekwaduwa ökwödönö inia tjököbaduwinö ja̧badönö, judío jojodönöma. Jobadö tjo̧'wo̧ luwo̧ okwanö chöwaisawö̧. Jobadöma judío jojodö tjöbötjachinajayonö, judío jojodöböködödanö babibinadö tjo̧'wo̧ luwo̧nöma, Dios ömöledö batjibinokobetjö̧. Awetja ömöayedöda babibinadö, jo̧ba wei̧ a̧ja̧kwö. Chömöledö, ju'winö ökwödö kwöba a'oduwi ichö, tju̧yu̧ju̧ki̧junö bamatö, tjuu nijakwö bȩbachibö tjubudekwobö ja̧takwo̧sa jobadönöma. Ja̧ mölema jobadöma, ökwödönö edö waisachibö tjubudekwakobe,¡Ayö! Isabenö bidöma Dios ile niebawö̧, jö̧ba̧lö.
Ina i̧sebi̧ chedijatö. Yelösöda, ka̧ba̧yu̧döma inia tjötjinö ba̧jekwadö wotjawinö ja̧tjobe chedijatö. Jejenö ji̧jayonö, ju'wedö woböködöma, ina sulabenö omukwatö ju̧kwadönö chedijatö. Tjomukwati̧ tjöbalewacho jö̧tja̧laja̧ma balewachökönö ju̧kwadönö chedijatö. Ina jobadöma Awetja ömöayedönö ösödöbi, o̧'wo̧ jawa ösödöbi, sulabenö tjomukwati̧ kabatibökönö ju̧kwadö. Ja̧ o̧'wo̧ jawa tjösödi̧ma, orotjö platatjö broncetjö towitjö otikwa o̧'wo̧ jawama 'yaa̧lökö. Edöbi edökö. A̧ja̧kwöbi a̧ja̧kwökö. Kwebachöbi kweachökö o̧'wo̧ jawama. Yayonö jobadöma sulabenö tjomukwati̧ kabatibökönö ja̧ jawa ösödö ju̧kwadönö chedijatö.
Sanasan