Apocalipsis 11:3 - Dios Iwene3 Ikenama Diosma ötjönö yöawijatö: —Jobadö sulabenö ja̧badöma sulabenö webö tjö̧jonö, ju'wedö du̧ju̧tajama, ötjö yötawi̧ yötjawobö wetawö̧ma yötjawakobe, jejenö yötjawobö chujulu iyö wetakobetjö̧. Ja̧danö, jobadöma lekwe, mil doscientos sesenta möle baledibanö, jobetjö yötjawakwedö, ju'wedö, jobe ju̧kwadöma yelösöda sulabenö ja̧tjonö. Jobadö du̧ju̧taja yötawi̧ yöbawadöma, kamijido̧ pjelewado̧, tjömöledö wotjaiawö̧ 'dutjawi̧danö 'dubawö tjö̧jakwedö—yöawijatö Diosma ötjönöma. Faic an caibideil |
Apocalipsis 11:3
43 Iomraidhean Croise
Ikenama Davidma Joabnöbi, okobe deinö ju'wedö jo̧bakwö ju̧kwadönöbi weinobe: —Abnernö o̧tjö̧ di̧'yonö, kwö̧ka̧mijido̧ kȩekwö, kamijido̧ epju̧yunö kalukaa̧do̧ 'dubawö, Abner iteba'o abönö kwebachö kwubudekwaduwo, —jö̧ba̧lö. Ja̧danö, Abnernö o̧tjö̧ tji̧'yena, Davidma iteba'o a̧ja̧pjo ökömanö kweachinobe, chömöledöso̧nö do̧tjo̧be jö̧ba̧lö.
Elias Dios yöawi̧ yöawiökwe, o̧'wo tjo̧ekwinobe Acabma. A̧ja̧kwajo̧, ökamiji̧do̧ kȩ'ekwö loinobe, ja̧danö kamiji̧do̧ epju̧yunö kalukaa̧do̧ 'dubawö, u̧kwa kwökönö ö̧tö̧chö ö̧jinobe. Yöte abenabi kamijido̧ epju̧yunö kalukaa̧do̧ 'dubawö abinobe, ja̧danö kweachenama, o̧'wo tjo̧achö kweachinobe, —Isabenö Dios öba a'otjö sulabenö ja̧binasa, —jö̧ba̧lö.
Ja̧danö, Jerusalennö ja̧nö, Davidma möakwö edinobe, ja̧danö Isabenö Jo̧ weökwe angelnö edinobe, mölejebi, bö̧jebi ö'wejenö jo̧nö. Angelma ömamunö kwölöte'o do̧ba̧lö, Jerusalen comunidad wame debatö ö̧jinobe, ja̧danö jobe ö̧ji̧ edö, Davidbi ju'wedö Jerusalen comunidad luwedöbi kamijido̧ epju̧yunö kalukaa̧do̧ 'dubawö, tjo̧'wo tjoachö tjöba nijakwö tjö̧bamatinobe.
—Inesö la'aka luwo̧, Isabenö Jo̧ Okobe Jwiinö Juluwo̧ Diosma sulabenö kwomukwataduwi̧ kabatibö, kwöbalewachaduwobö webo̧, ja̧danö o̧'wo tjo̧achö, kwubudekwaduwobö webo̧, ja̧danö kwuuduwi jwobawö, kamiji̧do̧ epju̧yunö kaluka̧ado̧ 'dukawaduwobö webo̧, –Dios öba a'ötjö sulabenö ja̧dinobetjö̧ o̧'wo tjo̧achadösa, –jö̧ba̧lö.
Abebö a̧ja̧kwökwe, ojwe wame jo̧ otiwado̧ dewado̧ 'dubawo̧ma, ömamiju kaebinobe mölejȩbekwö, ja̧danö yöa̧linobe: Ba̧kwȩlö̧jatebö Jo̧ Dios öba a'otjö ja̧nö, baikwö isabenö wene yötawakwö: Ja̧ jawama wa̧pötakwa o̧biya ja'ö baledibanö baledakobe. Jau, Dios ömöledö usula tjemawinö isabenö ja̧tja̧kobe Daniel, isabenö Dios ömöledö jejenö usula tjemawobö ja̧kobe, okobe jwiinö ja̧ yötawja̧ jawa baledenanö kabatö— jö̧ba̧lö atadinobe.
Ju'wibi jo̧bama sulabenö Diosnö yöa̧lakobe, ja̧danö Diosnö ösödadönö sulabenö ja̧akobe, usula tjemawinö. Ja̧danö Dios weina pjiesta jawa möle balewö loobö isakwakobe, ja̧danö Dios jojodönö wei̧bi balewö lobö wainö weobö isakwakobe. Ja̧danö Diosma weakobe, wa̧pötakwa o̧biabi, ju'wi o̧ba ja'öbi Diosnö ösödadönö ujuluwobö.
Abebö a̧ja̧kwökwe, jelo̧ ángelma atadinobe: —Mil ciento cincuenta möle baledibanö jejenö ja̧kobe. Ja̧ mil ciento cincuenta mölebiyama, yȩayitenia Diosnö iyawabi, yi̧benatenia Diosnö iyawabi tjiyobö jwiakobe. Jemi ikenama, mil ciento cincuenta möle baledibajenama, yemidanö Dios eju otiwachibanö dichö lotjakobe— jö̧ba̧lö atadinobe.
Tupakwö yöawinobe Jesúsma, 'da̧batö ujunajawö̧nö: Ökwödö pjakataduwi̧ öpöjödadöma, Corazín comunidad jojodödanö, ja̧danö Betsaida comunidad jojodödanö, ja̧danö Capernaúm comunidad jojodödanöbedö chömöledö. Baikwö yötawa jobadönö: ¡Ayö, ökwödö Corazín comunidadnö ju̧kwadöwe, ja̧danö Betsaida comunidadnö ju̧kwadöwe! Ökwödönö chi̧sebina jawa sulabedö Tiro comunidadnö ju̧kwadöbi, Sidónnö ju̧kwadöbi tjedinatjö̧ma, jobadöma ida̧ökö sulabenö tjomukwati̧ kabatibö tjöbalewacho jö̧tja̧linobe, ja̧danö tjöbalewachaja̧ wene i̧sebö, tjo̧'wo̧ tjo̧achi̧ i̧sebado̧ 'dutjawo jö̧tja̧linobe, ja̧danö ökwölaso̧pja tjuunö tjöwanawo jö̧tja̧linobe, isabenö sulabenö domukwatajabetjö̧ o̧'wo̧ tjo̧achadösa, jö̧ba̧lö.
Jo̧kwaijayonö biya̧da, kwöwaisaduwobö yötawa. Ökwödöma Dios ujulu kwujuna̧laduwakobe, Dios O̧'wo̧ Luwo̧ ökwödö kwo̧'wo̧ luwo̧duwinö tebachibö öjamataja̧ ikena. Ja̧danö, ötjö yötawina wenema otiwanö yökawaduwakwedöja. Bemi Jerusalénnöbi, ju'wi okobe jwiinö Judea nijinöbi, Samaria nijinöbi yökawaduwakwedöja. Jelobe jelobebi böjȩ bakwameachibanö yökawaduwakwedöja— jö̧ba̧lijetö Jesúsma öba̧ja̧di̧ waisachadönöma.
Ja̧danö, okobe deinö iteda ömöledö, Cristo iteba'obedönö otidö ujuninobe Diosma, baikwö yötawa: Abönö Jesús webawedönö ujuninobe, ikenama Dios yöawi̧ yöbawadönö ujuninobe, ikenama Jesúsnö ösödadönö ba̧ja̧dadönö ujuninobe, ikenama jojodö edajitjökö jawa ja̧badönö ujuninobe. Ikenama jojodö tjö'wöchi̧ otidö lobadönöbi, ja̧danö jojodönö pjabatadönöbi, ja̧danö luwedö baibanö otidadönöbi, ja̧danö ju'wedö tjiwenenö yöba̧ladönöbi ujuninobe.
Jau chömöledö, babema yemidanö wa̧pötakwanö baibanö chi̧'yocha kwiteboduwibe, ja̧danö isabenö lȩtebocha ökwödötjö a̧ja̧kwökönö ina sulabenö ja̧badönö. Ja̧danö chömöledö, sulabenö ja̧badönö lȩtebenama, bakwo̧da jelo̧ ja̧ina yöawitjö̧ma juluwanö chösödökena, Dios damötjö weinadanö sule du̧ju̧tajaö̧kö̧, wa̧medukwaö̧kö̧ tjedina jawa jweinö yötjawitjö̧da lȩtebocha.
Chömöledö, jo̧bama, mölejȩbe kabekwajinama, damötjö Dios iwenenö iwȩyudinökwe. Jo̧ba iwȩyudinökwe iyabinadanö, otiwa jawa iyabijetö. ¿Dakwö yöawobeda, otiwa jawa iyabijetö, jö̧ba̧löma? Biya̧ chömöledö: Cristoma jo̧banö ösödadönöma bakwo̧nökwena wainökwena jelo̧nö ju'wi, jelo̧nö ju'wi, tjo̧'wo̧ luwo̧ jawa tjotidawakwena iyabinobe, jojodönö pjabatö, Dios wei̧ tjotidobö. Jo̧banö ösödadötjö ju'wedönöma 'da̧batö ujuninobe iteda weawö̧ batjibinö ja̧bö. Ja̧danö, ju'wedönö 'da̧batö ujuninobe Dios iwene yötjawobö Jesúsnö ösödadönö. Ja̧danö, ju'wedönö ji̧bakwawa wene yötjawobö 'da̧batö ujuninobe. Ja̧danö, ju'wedönö Jesúsnö ösödadönö tjite'ada̧loböbi, tjöba̧ja̧doböbi 'da̧batö ujuninobe Cristoma.
—Jo̧kwaijayonö, isabenö kwa̧ja̧kwaduwaja̧danö sulabenö tjösödojobö kwisakwaduwenama, sule bakwo̧da sulabenö ja̧tjaja̧ wene yöawitjö̧ma, lȩkebaduwobö jwiena, baikwö yötawa: Du̧ju̧tajaö̧kö̧, wamedukwaö̧kö̧ jweinö tjedaja̧ yötjawitjö̧ma, –Isabenö bite, bisuju sulabenö ja̧aja̧ dedajabe, –jö̧ba̧lö yötjawitjö̧ma, jenada yötjawi̧ kwösödaduwobö ja̧kobe, ja̧danö sulabenö ja̧bo̧nö kwabö loköbaduwobö ja̧kobe. Jo̧kwaijayonö sule bakwo̧da yöawitjö̧ma yöawi̧ kwösödaduwobö jwiakobe, ja̧danö lȩkebaduwobö jwiakobe.
Tupakwö yöawinobe Moisesma: —Chömöledö, lȩekwa luwedö tjöba a'otjö jelo̧ sulabenö ja̧ina wene yötjawenama, sule bakwo̧da, –Bite sulabenö ja̧ina chedijatö, –jö̧ba̧lö yöawitjö̧ma, lȩekwa luwedö a̧ja̧kwö lȩtjebobö jwiena, sule bakwo̧da yöawajabetjö̧. Du̧ju̧tajaö̧kö̧, wamedukwaö̧kö̧ tjedaja̧ bakwainö yötjawitjö̧da yötjawi̧ tjösödobö ja̧kobe, ja̧danö yötjawi̧ ösödö, sulabenö ja̧binanö lȩekwa yötjawobö ja̧kobe.
Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.
Jejenö ba̧ja̧dö kwedobö wetijayonö cheju a̧petuma ba̧ja̧döma kwedoko. Jobema judío jojodöböködö sulabenö ja̧tjobö jo̧be. Jobadöma, ötjö 'da̧batö chujuninemi comunidadnö tebachö, tjujuluwakwedö. Ja̧danö, ja̧wo̧dö cuarenta y dosnö, jobetjöma, la'aka luwedödanö sulabenö webö tjö̧jakwedö— weijatö Diosma ötjönöma.
Jejenö jö̧a̧litjö̧, jo̧ba ö̧jemi badeibö mebibö, chösödo jö̧ta̧lökwe: —Kwösöda ötjönöma, Diosnöda ösödi. Ötjöma ökwödanö, kwömöledödanö bakwainö Dios ömöayo̧sa, okobe deinö Jesús yöawina ösödadödanö. Ja̧danö, Jesús isabenö yöawina do̧batibö kwösödaduwobetjö̧ jo̧ba yöawina yökawaduwobe. ¡Diosnö dösödaduwo!—jö̧a̧lijatö ángelma.
Ja̧danö, chedijatö ba̧kwawa ökiya, nöinö, la'aka luwedö tjö̧baji̧ ökiya. Ja̧ ökiyanö ba̧jadöma Dios lȩebakwa̧ jawa yötjawobö ba̧jadö. Ju'wedönöbi chedijatö, öwawöködönö. Jobadöma tjuubiya bulabinö lotjinawö̧, Dios iwenebi Jesús yöawinabi yötjawobetjö̧. Jobadöma ojwe okwatjö labebinanö, jo̧ba o̧'wo̧ jawabi öpöjödadö. Ja̧danö, jo̧ba imi número doawa, tjömamunöbi tjöbanöbi öpöjödadö. Jejenö tjöpöjödobetjö̧, tjuu bulatö lotjinawö̧. Ja̧danö, jobadöma wotjinajayonö yemidanö 'yabibajinadö, Cristokwö jojodönö webö tjö̧jobö, ja̧ mil imiamebiya jenanö.
Sanasan