Apocalipsis 11:17 - Dios Iwene

¹⁷ Ja̧danö, Diosnö ösödö yötja̧li̧ cha̧ja̧kwijatö, baikwö: —Duluwo̧ Dios ökwöma juluwo̧ja. Ökwöma babe jo̧bi, la'aka ji̧nabi jo̧ja. Ökwönöda dösöda, Otiwanö pjabato̧ja, jö̧ba̧lö. Ida̧ökö jwiinö kwujulu i̧sebö, böjȩnö webö kwö̧joböma badekwachajabe, kwujulu i̧sebö.

Apocalipsis 11:17 Iomraidhean Croise

Génesis 17:1

Ja̧danö, Abramma noventa y nueve a̧yo bo̧ ö̧jena Diosma jo̧banö öwawachö yöbawijetö: —Ötjöma Jwiinö Juluwo̧ Diossa. Abram, ötjö weti̧ a̧ja̧kwö, ja̧danö, sulabenö ja̧bökönö kwö̧jo.

Isaías 52:10

Tjitebotenia jojodö tjö̧ba a'otjö iteda ujulu öwaetjöda öwawinö i̧sȩbajabe, ja̧danö bö̧jȩ ba̧kwemeachibanö ju̧kwadöma edö tjöwaisakwedö, —Duluwo̧ Diosma iteda ömöledönö tjö̧jibinö pjaatajabe, —jö̧ba̧lö.

Daniel 2:23

Cha'dödö Tjuluwo̧ Dios, ökwönö ösödö yöta̧la, otiwo̧ja, otiwanö pjabato̧ja jö̧ba̧lö. Isabenö otiwanö pjakatajabe ötjönö, waisanö omukwato̧ batibobö, ja̧danö juluwo̧ batibobö. Jo̧kwaijayonö ja̧damaökö, jemi bajalekwönönö otiwanö pjakatajabe, ökwönö adebaja̧danö otiwanö kwi̧sebajabe, la'aka luwo̧ Nabucodonosor i̧'widikwina jawa otiwanö kwi̧sebajabe— jö̧ba̧lö yöa̧linobe Danielma, Diosnö ösödö.

Daniel 6:10

Danielma ja̧ weawa wȩyudö sello dobö ödina wene a̧ja̧kwinobe, ja̧danö a̧ja̧kwajo̧, ba̧kwȩlö̧jatebö abebajiadanö o̧do okwa tebachö Diosnö aebinobe. Jo̧bama ba̧kwȩlö̧jatebö mö̧sȩko̧ ventana po̧bebö, Jerusalénkwö edö Diosnö o̧'wo̧ wana̧lö abebiainobe, ja̧danö la'aka luwo̧ weaja̧ a̧ja̧kwajo̧, yayonö mösȩko̧nö uyu̧ko̧nö bamatö ventanasa'donö banö aebinobe, ju̧kwawökönö. Ba̧kwȩlö̧jatebö abebajiadanö, mölekwena wa̧pötakwanö jejenö Diosnö aebinobe, otiwanö pjabato̧ja jö̧ba̧lö.

Mateo 11:25

Ja̧ möle, Jesúsma Diosnö aebinobe baikwö: —Chabe'do, mölejȩbe ju̧kwadöbi, böjȩnö ju̧kwadöbi tjuluwo̧ja. Chabe'do, otiwanö biya̧ jawa kwotoja̧lajabe, waisadöbi, nöinö waisachadöbi tjöwaisapji jö̧ba̧lö, jo̧kwaijayonö jobadö wajwitjijayonö, waisachöködönö otiwanö kwi̧sebajabe, ja̧danö jejenö kwi̧sebobetjö̧, otiwanö i̧sebo̧ja jö̧ba̧lö yötawakwö Chabe'do.

Lucas 10:21

Jejenö yöa̧linobe Jesúsma setentabedönö. Jemi ikenama, Dios O̧'wo̧ Luwo̧ iteda o̧'wo̧ luwo̧nö ja̧nö, Jesúsma o̧'wo̧ ösöwanö aebinobe Abe'do Diosnö: —Chabe'do, mölejȩbe ju̧kwadöbi, böjȩnö ju̧kwadöbi tjuluwo̧ja. Chabe'do, otiwanö biya̧ isabenö wene jawa kwotoja̧lajabe, waisadöbi, nöinö waisachadöbi tjedapji jö̧ba̧lö, jo̧kwaijayonö jobadö wajwitjijayonö, waisachöködönö otiwanö kwi̧sebajabe, ja̧danö jejenö kwi̧sebobetjö̧, otiwanö i̧sebo̧ja jö̧ba̧lö yötawakwö, Chabe'do. Jau Chabe'do, ökwöda kwösödi̧danö ja̧bö jejenö i̧sebo̧ja— jö̧ba̧lö Diosnö aebinobe Jesúsma.

Juan 11:41

Ikenama inabama pjolatö tjujuninobe. Jemi ikenama Jesúsma mölejȩbekwö edö aebinobe Diosnö: —Chabe'do, ökwönö yöta̧la. Otiwanö a̧ja̧kwö pjakatajabe— aebinobe—.

2 Corintios 2:14

Jau chömöledö, ökwödönö cha̧ja̧kwokobetjö̧ cho̧'wo̧ tjo̧achijatö. Jo̧kwaijayonö, cho̧'wo̧ tjo̧achijayonö, Diosma otiwanö pjaatinobe chömöledö, ja̧danö jo̧banö chösödobe, ba̧kwȩlö̧jatebö ujuluwobetjö̧. Ja̧danö wanedö yötawa: Guardia la'aka luwo̧danö, Diosma ökwödönö öbibö Cristo jawa wene öpöjödadönö dujuluwobö pjabato̧, ja̧danö ökwödönötjö böjȩ bakwameachibanö jojodö Cristo jawa wene tjöwaisobö pjabato̧.

2 Corintios 9:15

Jau chömöledö, isabenö otiwanö pjabato̧ Diosma ökwödönö, Diosnö dösödaduwo, isabenö otiwanö iyinobetjö̧. Jau chömöledö, ja̧ Dios otiwanö iyina labebö lodobö jö̧da̧litjö̧ma waekwena, diwenenö ja̧jaye otiwi̧ yöda̧lobö waekwobetjö̧.

1 Timoteo 1:12

Duluwo̧ Cristo Jesúsma ujulu iyinobe ötjönöma, biya̧ chotidi̧ jawa chotidobö. Ja̧danö, Cristo Jesúsma ötjönö ösödö omukwatinobe, bitema weti̧ otiwanö ja̧akwo̧, jö̧ba̧lö. Ja̧danö, ötjönö 'da̧batö ujuninobe iteda wei̧ chotidobö. Ja̧danö, jejenö 'da̧batö ujuninobetjö̧, jo̧banö ösödö yöta̧la, otiwanö weköbinobe, jö̧ba̧lö.

Apocalipsis 1:4

Ötjö, Juan, böja kwialusöjama wȩyudö weta Asianö ju̧kwadönö, Jesúsnö ösödö ko̧ko̧kwa̧lö ba̧jadönöma, jelemutjö dötölatajanö ko̧ko̧kwa̧lö ba̧nö tjuju̧kwitenia. Chömöledö, Diosma ökwödönö lȩlö̧jino edobö chösöda. Ja̧danö, Diosma ökwödönö pjaatobö chösöda, kwo̧'wo̧ luwo̧duwi ösöwachibanö kwö̧jaduwobö. Jo̧bama babe jo̧bi, la'akatjöda ji̧nabi, 'dö̧ibajenanö baibanö ö̧jakwo̧bi. Ja̧danö chömöledö, Dios O̧'wo̧ Luwo̧ma ökwödönö lȩlö̧jino edobö chösöda. Jo̧bama, Dios ö̧bemi abönö bo̧. Ja̧danö, jo̧bama jelemutjö dötölataja ujulu jawa juna̧lo̧, Dios O̧'wo̧ Luwo̧ma.

Apocalipsis 1:8

Chömöledö, Duluwo̧ Diosma, jwiinö juluwo̧ma baikwö yöawobe: Ötjöma la'akatjöda ji̧nasa. Ja̧danö, 'dö̧ibajenanö baibanöbi chö̧jakwo̧sa, jö̧ba̧lö. Jejenö yöawobe Diosma, babe jo̧bi, la'akatjöda ji̧nabi, 'dö̧ibajenanö baibanöbi ö̧jakwo̧.

Apocalipsis 11:15

Jemi ikena trompeta pjubo̧, jelemutjö domulatajasanu pjubo̧ baibanö pjubo̧ pjuenama mölejȩbetjö labinö tjiwene yötja̧li̧ cha̧ja̧kwijatö, biya̧ tjiwenenö ökwöi̧: —Tjo̧wi̧ta. Böjȩma Duluwo̧ Dios La'aka Luwo̧ ö̧jena badekwachajabe. Ja̧danö, Dios weinökwe, jojodö tjö̧jibinö pjaatobö weinökwe La'aka Luwo̧ ö̧jenanö badekwachajabe. Jobadöma ba̧kwȩlö̧jatebö webö tjö̧jakwedö— jö̧ba̧lö, ökwöi̧ cha̧ja̧kwijatö.

Apocalipsis 15:3

Ja̧danö, jobadöma jobe ja̧nö lo̧tjobe chedijatö. Ja̧ lo̧tji̧ma, Dios ömöayo̧ Moisésmine lo̧inabi, Obeja Itji̧danö Jo̧ lo̧inabi, ja̧ lo̧tji̧ma. Ja̧ lo̧tji̧ma baikwö laebobe: Duluwo̧ Dios, ökwöma jwiinö juluwo̧ja. Kwujulu i̧sebo̧ja. Kwujulu kwi̧sebobe edö, Ayö, jö̧ba̧lö, yebabinö dö̧jobe, döbajale jalaka baibanö. Kwujulu i̧sebö ja̧köbi̧ma jweinö omukwatö, otiwanö ja̧bo̧ja. Ökwöma ba̧kwȩlö̧jatebö inesö la'aka luwo̧ja.

Apocalipsis 16:14

Bidö sulabedö, tjaatjö labebajadöma, Awetja ömöayedö. Ja̧danö, Awetja ujulu i̧sebö ja̧badö. Ja̧danö, jobadöma, böjȩ bakwameachibanö tji̧'yobe chedijatö, okobe deinö böjȩ la'aka luwedönö, tjömöayedö guardiakwö bakobe ko̧ko̧kwibö ja̧tjobö. Ja̧danö, jobadö tjoko̧ko̧kwajawö̧ma bakobe ja̧nö tjite'ada̧lobe chedijatö, juluwo̧ Diosnö tjölakwabikwawobö latjebakwa̧ möle badekwachenanö baibanö, jwiinö yeabikwa mölema.

Apocalipsis 16:5

Ikenama jelo̧ ángel, ojwe te'ada̧lo̧ ángelma, Diosnö yöa̧lobema cha̧ja̧kwijatö, baikwö: —Ökwöma la'akatjöda ji̧naja. Ja̧danö, babebi jo̧ja. Ökwödaja suli̧ jwibo̧ma. Ja̧danö, ökwöma jweinö omukwatöda lȩbebo̧ja. Biya̧ inia tjötjinö baledobö lȩkebi̧ma, jweinö omukwatö lȩkebobe.

Apocalipsis 16:7

Ikenama juwö iyawelötjö tjiwene ökwöi̧ cha̧ja̧kwijatö, baikwö: —Duluwo̧ Dios, ökwödaja jwiinö juluwo̧ma. Lȩkebi̧ma otiwanö, jweinö omukwatö lȩbebo̧ja— ja̧ tjiwene cha̧ja̧kwijatö.

Apocalipsis 18:8

Jo̧kwaobetjö̧, jobadönö yelösöda lȩbebo̧sa, Ba̧kwȩlö̧jatebö, Otiwadösa, jö̧ba̧lö omukwatinadönöma. Ja̧danö, inia tjötjinö te'ada̧lökönö baledakobe jobadönöma. Yelösöda lȩbebo̧sa tjubudekwabinö. Ja̧danö a̧wi̧chi̧ tjötjinöbi baledakwedö. Yelösöda jobadönöma juwö lotjakwawö̧. Ötjö, Kwuluwo̧duwi Diosma juluwo̧chobetjö̧ jwiinö inia tjötjinö baledakobe jobadönöma. Ötjö, Kwuluwo̧duwi Dios jobadönö lȩbebö yöbawo̧ma.

Apocalipsis 19:11

Ikenama mölejȩbe chedemi apjude po̧ekwobe chedijatö. Ja̧danö, po̧ekwobe okwatjö kabayu dewo̧nö chedijatö. Jo̧ba kabayu wamenö bakwo̧ ö̧wo̧nö chedijatö. Jo̧ba imima, Jweinö Yöbawo̧ mikwo̧. Jo̧bama, jojodönö lȩbebö jweinö omukwatö webo̧. Ja̧danö, jweinö omukwatö öpöjojodönö ujuluwobö 'yo̧.

Apocalipsis 19:6

Ikenama labinö, ba̧jekwadö jwötjeba̧li̧danö ökwöi̧ cha̧ja̧kwijatö. Yelösöda, taya möaya doibobe labinö ökwöi̧danö cha̧ja̧kwijatö. Ja̧danö, böba labinö kwaawobedanö ökwöi̧ cha̧ja̧kwijatö, ba̧jekwadö jwötjeba̧li̧ ökwöi̧ma. Baikwö ösödö jwötjeba̧li̧ cha̧ja̧kwijatö: Duluwo̧ Diosma jwiinö juluwo̧. Jo̧bada La'aka Luwo̧ webö jo̧. Dösödaduwonö.