Apocalipsis 11:15 - Dios Iwene

¹⁵ Jemi ikena trompeta pjubo̧, jelemutjö domulatajasanu pjubo̧ baibanö pjubo̧ pjuenama mölejȩbetjö labinö tjiwene yötja̧li̧ cha̧ja̧kwijatö, biya̧ tjiwenenö ökwöi̧: —Tjo̧wi̧ta. Böjȩma Duluwo̧ Dios La'aka Luwo̧ ö̧jena badekwachajabe. Ja̧danö, Dios weinökwe, jojodö tjö̧jibinö pjaatobö weinökwe La'aka Luwo̧ ö̧jenanö badekwachajabe. Jobadöma ba̧kwȩlö̧jatebö webö tjö̧jakwedö— jö̧ba̧lö, ökwöi̧ cha̧ja̧kwijatö.

Apocalipsis 11:15 Iomraidhean Croise

Éxodo 15:18

Isabenö Jo̧, ökwöma ba̧kwȩlö̧jatebö inesö la'aka luwo̧köbakwo̧ja— jejenö lo̧bijetö Moisésma.

Isaías 27:13

Jau, ja̧ möle badekwachenama, trompeta labinö ökwöakobe, ja̧danö israel jojodötjö jobe ju̧kwadöma tjitebobe israel nijibe tjetjachajakwedö. Jau, Dios lȩebajawö̧, ba̧jȩkwadö Asiria nijitjö tjile'dewakwedö israel jojodöma, ja̧danö ju'wedönö a'dewö loakobe, Egipto nijibe. Jo̧kwaijayonö ja̧ möle badekwachenama, ditebobe tjetjachajakwedö, ja̧danö tjebachajadö, Dios itea'o mösa'obe, Jerusalen comunidadbe tjichibakwedö, jobetjö Isabenö Jo̧ Diosnö tjösödakobetjö̧.

Isaías 44:23

Mölȩjȩbe ji̧bi, bö̧jȩ teebe ji̧bi, mösa'ijubi, tebobi, towibiyabi, o̧'wo ösöwachibanö jwöeba̧lobö jo̧be, Isabenö Jo̧ pjaatajobetjö̧. Jau, Isabenö Jo̧ma otiwanö tjöbeba̧lö pjabato̧ Jacob itji̧mu tupadanö jojodönö, ja̧danö Israel niji ba̧kwemeachibanö iteda dejatinö ujulu otiwanö i̧sȩbo̧.

Isaías 55:5

Ja̧danö, ökwödökwöbi bakobe dösölö̧jinö dö̧jakwa̧ wene yöbawö dujunitjö̧ma, jo̧banö chujuninadanö chujunakwawö̧ja. Ja̧danö ju'wedö tjitebo jojodönö jwököbaduwakwedöja, ajayinö kwa̧ja̧kwinaduwököwö̧ jojodönö jwököbaduwakwedöja. Ja̧danö, jwököbiawö̧, ajayinö ökwödönö wajwitjinajayonö, juluwanö kwö̧jaduwobekwö ö'ötakwakwedö. Jau chömöledö, ötjö kwuluwo̧duwi Isabenö Jo̧, israel jojodö tjösödökwe Suli̧ Jwibo̧ Diosma ökwödönö otiwanö tjomukwatobö chujunobetjö, jobekwö jwököbaduwiawö̧ juluwanö tjichakwedö, jö̧ba̧lö yöa̧lobe Diosma.

Isaías 9:7

Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.

Daniel 7:14

Ja̧danö Diosma jo̧banö iyobekwö chedatö, inesö la'aka luwo̧ baibobö. Dejatinö ujulu jo̧banö iyatö, ja̧danö yöbawö weakwa̧bi iyatö, okobe deinö böjȩ bakwameachibanö ju̧kwadö jo̧ba wei̧ tjotidobö, tjitebotenia ju̧kwadöbi, tjiwenetenia yöba̧ladöbi. Jo̧ba yöbawö wei̧ma, ba̧kwȩlö̧jatebö 'dö̧ibajökenanö yöbawö weakwo̧. Bakwo̧bi la'akatjöda söbebö loökakobe jo̧ba yöbawö wei̧ma, 'dö̧ibajökenanö kabatökönö yöbawö weakwo̧.

Daniel 7:18

jo̧kwaijayonö jemi ikenama bajalianö Mölejȩbe Jo̧ Diosma iteda ömöledönö iyakobe, böjȩtjö yöbawö wetjobö. Ja̧danö, Dios ömöledö yöbawö wetjakwa̧ma, ba̧kwȩlö̧jatebö 'dö̧ibajökenanö yöbawö wetjakobe— jö̧ba̧lö yöawinobe.

Daniel 7:22

Ja'yubenö lekwe Diosnö ösödadönö ujuluwinobe, bajaleapo Ajayitjö ji̧na Dios ichibö, itenöda ösödadönö pjabatö tebonö jo̧nö lȩebenanö kabatö. Ja̧danö bajalianö Diosnö ösödadö yöbawö webadö batjibobe chedatö. Jobekwö chedaja̧ma, ¿taji jö̧ba̧lö chedaja̧da? Labebö loköbobö chösöda— jö̧ba̧lö abebö cha̧ja̧kwatö.

Daniel 7:27

Jemi ikenama okobe deinö ajayinö ji̧nadö böjȩ luwedö tjujuluma, okobe jwiinö juluwo̧ Dios ömöledönö iyakobe. Ja̧danö ba̧kwȩlö̧jatebö yöbawö weakobe, ja̧danö okobe deinö böjȩnö tjitebotenia ju̧kwadöma jo̧ba wei̧ otidö tjö̧jakobe— jö̧ba̧lö yöawinobe.

Mateo 24:31

Ja̧danö asabikwawa jawa trompeta labinö ökwöakobe, ja̧danö chömöayedö ángelesdönö wetocha, böjȩ bakwameachibanö 'ya̧nö, omudawö chujuninawö̧nö ko̧ko̧dö tjichejebobö.

Mateo 6:13

Ja̧danö, sulabenö ja̧dakwojobö jö̧ba̧lö ja̧i̧ jawa döbaledenama, dujuluwachibanö pjabati, sulabenö ja̧dapji jö̧ba̧lö. Ja̧danö inesö sulabo̧ ujulutjö dö̧jibinö pjabati, Dabe'do jö̧ba̧lö akebaduwo Kwabe'doduwi Diosnöma— jö̧ba̧lö yöawinobe Jesúsma.

Lucas 1:33

Ja̧danö, ba̧kwȩlö̧jatebö Israel jojodö tjuluwo̧ ö̧jakwo̧, ja̧danö tjuluwo̧ ö̧jakwa̧ma la'akatjöda 'dö̧ibajökönö ö̧jakobe— jö̧ba̧lö yöawinobe Dios weökwe ángelma.

Lucas 15:10

Mölejȩbetjöbi ja̧danö, bakwo̧ sulabenö ja̧bö jo̧ sulabenö omukwati̧ kabatibö öbalewachenama, Diosma iteda ömöayedö ángelesdökwö o̧'wo̧ ösöwachibanö ö̧jobe— jö̧ba̧lö yöawinobe Jesúsma.

Lucas 15:6

Ja̧danö, ejube ichibenama, o̧'wo̧ ösöwanö ömöledönö jwöbö yöawena, Okobe deinö do̧'wo̧ ösöwachibanö dö̧jaduwo, chajwi le'dewajo̧nö chöbadekwajabetjö̧, jö̧ba̧lö o̧'wo̧ ösöwanö yöawena ömöledönö, ¿jö̧tö?

Hechos 4:26

Böjȩ la'aka luwedöma Duluwo̧nöbi, Duluwo̧ yöbawö ujuninökwenöbi tjujuluwotö jö̧ba̧lö ko̧ko̧kwa̧lö omukwata̧lijadötö, jö̧ba̧lö laebobe, Davidmine iwȩyudinama— jejenö abebijadötö Jesúsnö ösödadöma Diosnöma.

Hebreos 1:8

Ja̧danö, jejenö Diosma ömöayedö ángelesdönö yöawijayonö wainö yöawobe iteda Itji̧nöma. Baikwö laebobe Dios iteda Itji̧nö jö̧a̧lina: Isabenö ökwöma Diosja. Ja̧danö, ba̧kwȩlö̧jatebö jojodönö webö kwö̧jakwo̧ja. Isabenö jweinöda omukwatö webö kwö̧jakwo̧ja.

Apocalipsis 10:7

Isabenö yötawa, jemi ikena trompeta pjubo̧ pjuenama, Dios ajayinö omukwatina badekwachakobe, ajayinö tojö ujuninama, damötjö iteda yöawi̧ yöbawadönö yöawinama— yöawijatö juluwo̧ ángelma.

Apocalipsis 12:10

Ikenama iwene labinö ökwöi̧ cha̧ja̧kwijatö mölejȩbetjö, baikwö: —Tjo̧wi̧ta, Awetjanö mölejȩbetjö böjȩkwö jabö lotjajabe. Jo̧bama mölebi, yö̧tebi Do̧'wo̧ Döwana̧lökwe Dios öba a'o ja̧nö jwöbeba̧lo̧ Diosnö, iteda ömöledö babibinadö sulabenö ja̧tji̧ma. Ja̧danö, bajaliyanö, Do̧'wo̧ Döwana̧lökwe Diosma, iteda ömöledö babibinadönö tjö̧jibinö pjaati̧tjö okobe jwiinö badekwachajabe. Bajaliyanö, Dios ömöledö babibinadönö, Awetja sulabenö ja̧biainatjö tjö̧jibi̧ma badekwachajabe. Isabenö, Do̧'wo̧ Döwana̧lökwe Diosma iteda ujulu i̧sebajabe. Ja̧danö, Awetjanö jabö lotjajabetjö̧, tjo̧wi̧ta, Dios La'aka Luwo̧ ö̧ji̧ möle badekwachajabe. Ja̧danö, Do̧'wo̧ Döwana̧lökwe Dios, iteda jojodö tjö̧jibinö pjabatö weinökwenö, kabebö ujuni̧ möle badekwachajabe böjȩ la'aka luwo̧ baibanö.

Apocalipsis 15:4

Duluwo̧ ¿tida ökwönö yebabö̧kö̧ma? Deobe. Sule ökwöda suli̧ jwibo̧köbobetjö̧ okobe deinö ökwönö omukwatö, Jwiinö otiwo̧, jö̧ba̧lö, jö̧tja̧lobe. Jelobebi jelobe ju̧kwadöma ichö tjösödakwedö ökwönöma, ökwö omukwatö weköbi̧ma jweinö webo̧ja, tjöwaisachibanö, jö̧ba̧lö lo̧tjobe cha̧ja̧kwijatö.

Apocalipsis 16:17

Ja̧danö, ikena luwo̧, ökömakwö sa̧bo̧ ángelma idȩja̧'do̧ do̧ba̧lö ja̧'do̧nö okwobu jwa̧lȩ'epjonö sa̧obe chedijatö. Sa̧emi iwene labinö ökwöobe cha̧ja̧kwijatö, Dios eju okwatjö, Dios ö̧belö, Tjo̧wi̧, 'dö̧ibaja̧ babema, jö̧ba̧lö.

Apocalipsis 17:14

Ja̧danö, jobadöma Obeja Itji̧danö Jo̧nö tjujuluwobö tji̧'yakwedö. Jo̧kwaijayonö waekwakwawö̧ yelösöda. Obeja Itji̧danö Jo̧ma jobadönö jwiinö ujuluwakwo̧. Jo̧bama inesö Duluwo̧obetjö̧, inesö La'aka Luwo̧obetjö̧ jobadönö jwiinö ujuluwakwo̧. Ja̧danö, Obeja Itji̧danö Jo̧kwö ja̧döma, jo̧ba jwöbö, omudawö ujuninawö̧ma, jo̧banö kabatibökönö tjo̧'wo̧ wana̧ladö— yöawijatö ángelma ötjönöma.

Apocalipsis 19:1

Ikenama mölejȩbetjö labinö ökwöi̧ cha̧ja̧kwijatö, ba̧jekwadö jwötjeba̧li̧ ökwöi̧, baikwö: Do̧'wo̧ Döwana̧lökwe Diosnö dösödaduwo. Jo̧bada dö̧jibinö iyo̧. Jo̧bada jwiinö otiwo̧, jweinö lȩbebo̧. Jo̧bada jwiinö juluwo̧. Dösödaduwonö.

Apocalipsis 19:6

Ikenama labinö, ba̧jekwadö jwötjeba̧li̧danö ökwöi̧ cha̧ja̧kwijatö. Yelösöda, taya möaya doibobe labinö ökwöi̧danö cha̧ja̧kwijatö. Ja̧danö, böba labinö kwaawobedanö ökwöi̧ cha̧ja̧kwijatö, ba̧jekwadö jwötjeba̧li̧ ökwöi̧ma. Baikwö ösödö jwötjeba̧li̧ cha̧ja̧kwijatö: Duluwo̧ Diosma jwiinö juluwo̧. Jo̧bada La'aka Luwo̧ webö jo̧. Dösödaduwonö.

Apocalipsis 20:4

Ja̧danö, chedijatö ba̧kwawa ökiya, nöinö, la'aka luwedö tjö̧baji̧ ökiya. Ja̧ ökiyanö ba̧jadöma Dios lȩebakwa̧ jawa yötjawobö ba̧jadö. Ju'wedönöbi chedijatö, öwawöködönö. Jobadöma tjuubiya bulabinö lotjinawö̧, Dios iwenebi Jesús yöawinabi yötjawobetjö̧. Jobadöma ojwe okwatjö labebinanö, jo̧ba o̧'wo̧ jawabi öpöjödadö. Ja̧danö, jo̧ba imi número doawa, tjömamunöbi tjöbanöbi öpöjödadö. Jejenö tjöpöjödobetjö̧, tjuu bulatö lotjinawö̧. Ja̧danö, jobadöma wotjinajayonö yemidanö 'yabibajinadö, Cristokwö jojodönö webö tjö̧jobö, ja̧ mil imiamebiya jenanö.

Apocalipsis 8:12

Jemi ikena pjubo̧ pjuenama möle ja̧wo̧tjöbi, yö̧te ja̧wo̧tjöbi, ö'wedöda, si̧li̧'i̧dötjöbi ö'wedöda suli̧ tjöwaekwibobe chedijatö, juluwanöda dejatadö baibanö. Ja̧danö, möle ja̧wo̧ma, möle ja'ö baibenama yȩatibobe chedijatö, dejatökönö baibanö. Ja̧danö, yö̧te jawo̧bi, si̧li̧'i̧döbi, yö̧te ja'ö baibenama yȩtjatibobe chedijatö, tjidejatökönö.

Apocalipsis 9:1

Jemi ikena trompeta pjubo̧, bakwamusanu pjubo̧ baibanö pjuenama sili'idanö ichejekwo̧, mölejȩbetjö nijakwö mebo̧nö chedijatö. Ja̧danö, jo̧banö Dios iyobe chedijatö, yawepi̧, böjȩ teebe laju apjude po̧ekwapi̧ma. Jajuma yelösöda jwiinö möaju, okwabi öwawökönö möaju.

Apocalipsis 9:13

Ja̧danö, jemi ikena ángel trompeta pjubo̧, jelemutjö bakwanusanu pjubo̧ baibanö pjuenama iwene ökwi̧ cha̧ja̧kwijatö. Ja̧ iwenema, Dios ö̧bemi badeibö, söinö nöekwi̧ jawa juwö iyawapjo, orotjö otikwapjotjö ökwöi̧ cha̧ja̧kwijatö, ö'wejemu jawa ö'ibiya ju̧kwa 'do̧'do̧kwetenia.