Apocalipsis 11:12 - Dios Iwene

¹² Jemi ikenama, mölejȩbetjö iwene ökwi̧ma, Baikwö kabekwachajaduwi, jö̧ba̧lö, jwöobe. Ja̧danö, jobadönö öpöjödadö tjeda̧lonö mölejȩbekwö katjekwajobe ojwiyo'wonö.

Apocalipsis 11:12 Iomraidhean Croise

2 Reyes 2:1

Isabenö Jo̧ Diosma omudawö ujuninobe, ömöayo̧ yöawi̧ yöbawo̧ Eliasnö mölejebe jalawapjo jwa̧lȩ'epjonö e'ewobö. Ja̧danö, ja̧ baledakwa̧ möle badekwachenama, baikwö baledinobe. Ja̧ möle, Eliasbi, ömöayo̧ Eliseobi Guilgal comunidadtjö labebö kwetjachinobe.

2 Reyes 2:11

Ja̧danö, jemi ikena, jemi tupakwö kwebachö, yötja̧lakwawemi ja'ötjö, jobadönö 'da̧batö junö, juluwanö tjö'wejenö ökwöla, kabayudödanö, ja̧danö kolukadanö ichejekwöla baledinobe. Ja̧danö, jemi ikenama jwa̧le'epjo labinö jalawapjoma Eliasnö kabeibö e'ewinobe, mölejȩbe.

2 Reyes 2:5

Ja̧danö, Jerico comunidadbe tjichibenama, Dios yöawi̧ yöbawadö Jerico comunidadnö ju̧kwadöma tjichobekwö labebö, Eliseonö yötja̧linobe, —Eliseo, kwöwaisiji̧? Babe möle Isabenö Jo̧ma kwuluwo̧ Eliasnö kwö̧jelö emakobe, —jö̧ba̧lö. Yötja̧lökwe, —Jau, chöwaisa Eliasnö emakwa̧ma, wi̧inö ja̧duwi, —jö̧ba̧lö atadinobe.

2 Reyes 2:7

Ja̧danö, Jordan ojwebe kwebachö tji̧'yonö, Dios yöawi̧ yöbawadötjö cincuentabedöma ödökwönönö ja̧nö, eda̧lö kwetjachinobe, ja̧danö Eliasbi, Eliseobi ojwe ö'öbö tjö̧jonö, jobadöma ödökwönönö ja̧nö tjeda̧linobe.

Éxodo 14:25

Ja̧danö, 'dötjabajemi kolukiya jawa o'ijubiyanöbi lete'di pöawibanö webijetö Isabenö Jo̧ma, kolukabiya yö̧kö̧nö. Jejenö balediawö̧ jö̧ba̧lijadötö: —¡Ayö! Isabenö Jo̧ma Israel jojodönö tjö̧jibinö pjabatö ölakwabikwawö ujuluwijayonö ökwödönöma öpöjödö kwabö lobo̧. ¡Belöma dȩwa̧ja̧duwo— jö̧ba̧lijadötö.

Isaías 14:13

Ökwöma kwomajadenö yöba̧linaja: –Mölȩjȩbe katekwakwo̧sa, Dios ömöayedö si̧li̧'idö tjöwame batibenanö. Ja̧danö kabekwajo̧, chiteaka inesö la'aka luwo̧ ö̧bakama, mö chujunakwo̧sa. U'dakwö ja̧'o mösa'o, diosbedö ko̧ko̧kwö tjö̧ba̧ja̧'otjö, ötjöbi chöbamatakwo̧sa.

Isaías 40:31

Jo̧kwaijayonö Isabenö Jo̧nö tjo̧'wo wana̧ladöma, Dios pjaatawö̧ yemidanö tjujuluwachibakwedö. Wanedö yötawa, wiyuli möakwö kabekwö köi̧danö, tjujuluwachibanö katjekakwedö, ja̧danö ödö ö'ötjakwawijayonö, tji̧me'dawachibökakwedö, ja̧danö ödö kwetjachijayonö, 'dö̧tjachibökakwedö.

Isaías 60:8

Ju'wi baledakwa̧bi baikwö yötawa: Jwaibalawa lo̧bekwö edö, ojwiyo'wo pjolachö kweachi̧danö kwedaduwakwedöja, yunukudö ewa̧jö kötjobedanö ichejewi̧ma.

Lucas 16:23

Ja̧danö, ö'wö babibajadötjö sulabedö usula emawö tjö̧jena ja̧nö, jwiinö usula emawö jo̧ba balada luwo̧ma pöbamö edö, ödötjö Abrahamnö edinobe, ja̧danö Abraham ipjeanö jo̧nö Lazaronö edinobe.

Hechos 1:9

Ikenama jejenö yöbawajo̧nö Diosma mölejȩbe kaekwajinö ja̧bijetö Jesúsnöma, jojodö tjeda̧lonö. Kaekwajemi ojwiyo'wo tjöatibobetjö̧ jojodöma yainöma edijöködötö Jesúsnöma.

1 Tesalonicenses 4:17

Jemi ikenama ökwödö ina 'yaba̧ladöbi kadekwajachakobe, ja̧danö ja'ö ojwiyo'woelö jobadökwöbi, Duluwo̧kwöbi bakobe dediakwawakobe, ja̧danö jemi tupakwö ba̧kwȩlö̧jatebö Duluwo̧kwö dö̧jakwedösa.

Apocalipsis 12:5

Ja̧danö, metu'wo ju̧juma jemajökwe iso̧nö chedijatö. Jo̧ba jitji̧ma inesö la'aka luwo̧ baibakwo̧. Ja̧danö, okobe deinö böjȩnö ju̧kwadönö iteda weakwo̧, öpöjojodönö söbebö lobö. Toba'dadanöso̧ma, jemibajökwenö ukwotö jö̧ba̧lö ite'ada̧lijayonö omönanö Dios ö̧bobekwö kaekwajobe chedijatö, Dios tjemunö pjaatobetjö̧.

Apocalipsis 3:21

Chömöledö, bakwo̧ sulabetjö juluwinanöma chö̧jobekwö ichibena, ötjö la'aka luwo̧ webö chö̧bemi pjeanö ö̧bobö wetakwo̧. Ötjöma wobajaletjö chujuluwina ikena Chabe'do ö̧bemi pjeanö chöbamatijatö, ba̧kwȩlö̧jatebö jenada chö̧bobö. Ja̧danö, sulabetjö juluwinanöbi, chö̧jobekwö ichibena chipjeanö ö̧bobö, la'aka luwo̧ baibanö.

Apocalipsis 4:1

Ikenama, mölejȩbekwö chedemi apjude po̧ekwobe chedijatö. Jobekwö chedemi ötjönö ajayinö yöa̧li̧danö, trompeta pjutji̧danö labinö ökwöinö yöba̧lajo̧ma, ötjönö jwöi̧ cha̧ja̧kwijatö: —Baikwö mö ichi, ju'winö baledakwa̧ chi̧sebokwö—jö̧ba̧lö, jwöi̧ cha̧ja̧kwijatö.