Apocalipsis 1:10 - Dios Iwene

¹⁰ Ja̧danö, belö bi'onö ja̧nö, domingo möle baledibajena, Dios O̧'wo̧ Luwo̧ma ötjö cho̧'wo̧ luwo̧ okwanö i̧sebö öba̧ja̧da̧lijatö. Ja̧danö, cha̧ja̧kwijatö labinö ökwöi̧, trompeta pjutji̧danö ökwöobe.

Apocalipsis 1:10 Iomraidhean Croise

Mateo 22:43

Tjatadökwe: —Dios weakwo̧ jö̧a̧linökwema David itji̧ tupadanö jojo ö̧jitjö̧ma, ¿tajawedö jo̧banö öabinada Davidma, chuluwo̧ jö̧ba̧lö? Jau, Dios O̧'wo̧ Luwo̧ David o̧'wo̧ luwo̧nö öba̧ja̧da̧lonö Davidma baikwö iwȩyudinobe:

Juan 20:19

Ikenama ja̧ möle, abönö möle ötjabi̧ möle yi̧bena, Jesús öba̧ja̧di̧ waisachadöma o̧do okwa tjö̧bajinobe. Jeju apjudebiya pje'datakwawibö tjö̧bajinobe, judío jojodönö yebabinö ja̧nö, tjöwaisapji jö̧ba̧lö. Ja̧danö, Jesús omönanö öwawachinobe o̧do okwa. Jobadökwö ja̧nö jö̧a̧linobe: —Kwo̧'wo̧duwi ösöwanö ja̧duwi— jö̧a̧linobe.

Juan 20:26

Jemi ikenama, jelemutjö wa̧pötakwa möle baibena, Jesús öba̧ja̧di̧ waisachadö yemidanö o̧do okwa tjö̧bajinobe, Tomásbi. Apjudebiyama pje'datakwawijayonö Jesúsma jobeda öjamatinobe jobadö tjö'da̧denö. Jobadökwö tjö̧bajena ja̧nö jö̧a̧linobe: —Kwo̧'wo̧duwi ösöwanö ja̧duwi— jö̧ba̧lö.

Hechos 20:7

Jobetjöma, domingo möle, ajayi möle mikwi̧ möle, yi̧bena, ökwödöma ju'wedö Jesúsnö ösödadökwö ko̧ko̧kwö döba̧jijatö. Ko̧ko̧kwö ba̧jöma Jesús woina omukwatö ubasobu owö, pan kwanö döba̧jijatö. Kwanö kadatena Pabloma yöawijatö jojodönö, lekwe, yö̧te ja'ö baibanö. Ju'wi dewachö yȩayi ȩwa̧jo jö̧a̧laja̧ma Pabloma lekwe yöawijatö ja̧ yö̧tema.

1 Corintios 12:3

Ja̧danö, yöbawadö yötjawi̧ a̧ja̧kwö, Dios O̧'wo̧ Luwo̧ ujulunö yötjawojobö yötjawokojobö jö̧ba̧lö kwöwaisaduwobö baikwö yötawa chömöledö: Dios O̧'wo̧ Luwo̧ ujulunö yöbawadöma, la'akatjöda yöbawöködö, Jesúsma sulabo̧, Dios lȩebakwo̧ Jesúsnöma jö̧ba̧lö. Ja̧danö, Jesúsma la'aka luwo̧ jö̧ba̧lö yöbawadöma, Dios O̧'wo̧ Luwo̧ pjaatawö̧da jejenö yöbawadö chömöledö.

1 Corintios 16:2

Semanatenia abönö möle baibenama, kwujuna̧laduwi̧tjö 'da̧batö kwujunaduwo baladama. Jau chömöledö, bakwo̧nökwena wainökwena kwiyaduwobö kwujuna̧laduwitjö̧ma, wainökwena 'da̧batö kwujunaduwo baladama. Ja̧danö, tjo̧'omanö ko̧ko̧dö 'da̧batö kwujunaduwo baladama chömöledö, ökwödökwö chichibena ida̧ökö kwujuna̧laduwakobetjö̧ jö̧ba̧lö, ja̧danö chichibi̧ mölȩda balada 'da̧batö kwujunaduwapji jö̧ba̧lö.

Apocalipsis 17:3

Ikenama, Dios O̧'wo̧ Luwo̧ma cho̧'wo̧ luwo̧nö i̧sebonö, ángelma ötjönö öibijatö jelobekwö, jojodö deobekwö. Jobetjöma isujunö chedijatö, sulabo̧ duwo̧ oma'a wame wu̧junö. Jo̧ba sulabo̧ma okobe jwiinö wȩyukwo̧, Diosnö waneda̧lö ötjabi imibiya, Ötjödasa Diosma, jö̧ba̧lö. Ja̧danö, uubiyabi jelemutjö doyulatajanö juna̧lo̧. Ja̧danö, ö'yekiyabi domulataja jawa ökiya juna̧lo̧.

Apocalipsis 21:10

Ikenama Dios O̧'wo̧ Luwo̧, ötjö cho̧'wo̧ luwo̧nö öba̧ja̧da̧lonö, jo̧ba ángelma ötjönö öbibö i̧'yijatö mö'ösa'o wa̧pekwa'obe. Jobe ja̧nö chedijatö 'yayi̧ Jerusalén, Dios 'da̧batö ujuninemima, Dios ö̧jobetjö böjȩkwö jwiachobe.