2 Samuel 3:39 - Dios Iwene

³⁹ Tupakwö yöawinobe Davidma, —O̧te tobebö, la'aka luwo̧ baibanö tjujuninökwema ötjödasa, jo̧kwaijayonö babe mölȩma juluwo̧danömabö̧kö̧sa, me'dawo̧danöbo̧sa. Idö Sarvia ji̧tji̧mu Joabbi, Abisaibi isabenö labidö, ja̧danö jobadönö chödöyötobö juluwö̧kö̧sa. Isabenö Jo̧ Diosda jobadönö lȩebakwo̧, sulabenö Abnernö kwabö lotjiökwe, isabenö Diosda balekwa mikwa lȩebakwo̧, —jö̧ba̧lö yöa̧linobe Davidma.

2 Samuel 3:39 Iomraidhean Croise

2 Samuel 16:10

Jejenö yöa̧liökwe, la'aka luwo̧ Davidma atadinobe, —Bi̧ya baledi̧ma ökwödö Sarvia jitji̧mu jawamaökö Abisai. Jau, wajwida ökwödöma, Isabenö Jo̧ Diosda jo̧banö weajena, Davidnö sulabenö yöka̧lo jö̧ba̧lö, ja̧danö Jo̧bada jejenö weatjö̧ma, kabatibi jö̧ba̧lö wedoböma jwiobe.

2 Samuel 19:13

Ja̧danö Absalon ömöayedöbajadö tjuluwo̧ Amasanöbi yötja̧lobö weinobe, baikwö: —Davidma ökwönö yöa̧lobe, –Amasa, ökwöma isabenö yöne chömöledöso̧ja. Isabenö yötawakwö, bemi tupakwö Joab ö̧jemi, ökwöda chömöayedö ölakwabikwawa jojodö tjuluwo̧ bakibanö kwö̧jobö chujunocha. Jejenö ökwönö chujunakwa̧ wene yöbawö chujunakwö Amasa, ja̧danö yöta̧laja̧danö chujunökötjö̧ma, Dios ötjönö lȩebobö ja̧kobe, —jö̧ba̧lö Amasanö yötja̧lobö weinobe, Sadocnöbi, Abitarnöbi.

2 Samuel 19:22

Jo̧kwaijayonö jejenö yöa̧liökwe, Davidma atadinobe, —Bi̧ya ökwödö Sarvia jitji̧mu jawamaökö Abisai, jejenö kwabö lodonö jö̧ka̧li̧ma, chöpöjojo yöa̧li̧danö yöka̧lobe. Babe möle yemidanö israel jojodö la'aka tjuluwo̧ batibi̧ mölema, chöpöjojodöbinadönö lȩlöinö edawa möle, jo̧kwajabetjö̧ bakwo̧nöbi kwabö lotjobö wetökö, —jö̧ba̧lö.

2 Samuel 3:38

Ja̧danö Davidma iteda yöne ömöayedönö yöa̧linobe, —Kwomukwataduwökiji̧, babe mölȩ bakwo̧ la'aka luwo̧ma ö'wö baibajabe, isabenö israel jojodötjö bakwo̧ inesö juluwo̧ma ö'wö baibajabe, ja̧ kwomukwataduwobö jo̧be, —jö̧ba̧lö.

1 Reyes 2:32

Joab isabenö ö'wö baibobö jo̧be, baikwö yöta̧la: Chabe'do David wajwionö, Joabma damötjö̧ du̧ju̧tajanö ölakwabikwawa luwedönö kwabö loinobe, Israel jojodötjö ölakwabikwawa luwo̧ Abner mikwo̧nöbi, Judasaso jojodötjö ölakwabikwawa luwo̧ Amasa mikwo̧nöbi. Jobadöma Joabtjö bajalekwönönö otiwadö, wene jwibadö tjö̧jinobe, jo̧kwaijayonö yayonö sulabenö kwabö loinobe jobadönö. Ja̧danö, jejenö sulabenö kwabö loiökwe, Isabenö Jo̧ma jobadö tjökwösobö Joabnö baibanö tjeatobö chösöda.

1 Reyes 2:9

Jo̧kwaijayonö ökwöma, isabenö jo̧ba sulabenö ja̧ina omukwatö jo̧banö lȩkebobö ja̧kobe Salomon. Ökwöma waisanö omukwato̧ja chitji̧, ja̧danö otiwanö jo̧banö lȩkebakwa̧ kwöwaisakwo̧ja. Baikwö wetakwö jo̧banö, wene jwiinö ö'wö baibobö weköboko, jelo̧ kwabö loajökwe, ökwösobu ku̧kwinö ebawö ö'wö baibobö weköbo, —jö̧ba̧lö yöa̧linobe Davidma, itji̧ Salomonnö.

1 Crónicas 22:5

Jobekwö 'da̧batö ujunina labebö loawama baikwö laebobe: Davidma omukwatö yöa̧linobe, —Isabenö Jo̧ eju otidakwo̧ chitji̧ Salomonma ina möayo̧, ja̧danö möayo̧obetjö, ina otiwanö ö̧jakwa̧ jawa waisachibö̧kö̧. Ja̧danö, Isabenö Jo̧ eju otidakwejuma, inesö otiweju, salöeju, tjitebokwena jojodö otiwanö omukwatö yötja̧lakweju otidobö jo̧be. Jo̧kwajabetjö̧, jobekwö otiwanö otidakobetjö̧, ja̧ otidakwa̧ jawa jamatö chotidakwo̧sa, —jö̧ba̧lö omukwatö yöa̧linobe. Ja̧danö jobekwö omukwatö yöba̧lajo̧, ö'wö baibakwa̧ abönö, nöinö o̧do otikwa jawa 'da̧batö ujuninobe, ja̧tjö Salomon otidakobetjö̧.

1 Crónicas 29:1

Jemi ikenama, la'aka luwo̧ Davidma ju'wedö jobe ko̧ko̧kwadö israel jojodönö yöawinobe: —Chömöledö, chitji̧ Salomonma Dios omudawö ujuninökwe, chö̧jaja̧ ikena Salomonda israel jojodötjö inesö la'aka luwo̧ ö̧jakobetjö̧. Ja̧danö, Dios omudawö ujuninökwe ö̧jijayonö, ina möayo̧ Salomonma, ja̧danö möayo̧obetjö, ina otiwanö ö̧jakwa̧ jawa waisachibö̧kö̧. Ja̧danö, otido jö̧a̧li̧ma, inesö nöobe chömöledö, baikwö yöta̧la: Otidakwejuma, bö̧je jojodö tjö̧jakwejumaökö, Isabenö Jo̧ Dios ejuda otidakwo̧ Salomonma.

Éxodo 21:12

Ina, Isabenö Jo̧ma webijetö Moisésnöma: — Bi̧ya weawa wene kwujuno ökwödönö, Israel jojodönö, a̧ja̧kwö kwö̧jaduwobö: Wanedö yötawa: Bakwo̧ jelo̧nö o̧'wo sulinö edö, kwabö lotonö, jö̧ba̧lö, omukwatö ujunobe. Ikenama, omukwatö ujuninökwenö kwabö loobe. Isabenö, jo̧ba kwabö lobo̧nö kwabö loköbaduwobö jo̧be, ajayinö jelo̧nö kwabö loobö omukwatö ujuninobetjö̧. Jo̧bama, ötjönö juwö iyawapjo jobekwö ö̧jibobö döibajatjö̧bi jo̧banö kwabö loköbaduwobö jo̧be. Jo̧kwaijayonö bakwo̧ la'akatjö omukwatö ujuninököjayonö ikenama jo̧kwada jelo̧nö o̧'wo sulinö edö kwabö loitjö̧ma jo̧ba kwabö lobo̧nö kwabö loköbaduwobö jwiobe. Jo̧ba döbibajö i̧'yakwemima 'da̧batö chujunijatö, jo̧beda ö̧jobö.

Proverbios 20:8

Ja̧danö, ju'wibi yötawa, wanedö: Inesö la'aka luwo̧ma, wa̧kwawaka̧nö wa̧nö, jojodönö lȩbebö yöawi̧bi, jojodönö ji̧bakwawa yöawi̧bi yöbawo̧. Ja̧danö, jo̧banö yötjawi̧ omukwata̧lö, sulabenö ja̧inojobö, sulabenö ja̧inokojobö jö̧ba̧lö öwawinö öwaisaCHIBAkwo̧. Ja̧danö, jobekwö öwawinö waisö yöawakwo̧ sulabenö ja̧binanö lȩbebö, sulabenö ja̧binö̧kö̧nö ö̧jibinö pjabatö.

Proverbios 25:5

Ja̧ ji̧danö, inesö la'aka luwo̧ma iteda yö̧ne ömöayedötjö sulabenö ja̧badönö a'dewö loitjö̧ma otiwanö yöbawö webo̧ ö̧jena. Jao, sulabenö ja̧badö deobetjö̧ inesö la'aka luwo̧ma otiwanö yöbawö webo̧.

Isaías 3:11

Jejenömaökö sulabedöma, jobadöwe. Sulabenö Dios wei̧ a̧ja̧kwöködöma, isabenö sulabenö baledakwawö̧, baikwö yötawa: Jobadöbi ja̧bö tjö̧jina mikwa baibanö tjemawakwedö, tjemo jö̧tja̧li̧danö Dios lȩebakwa̧ tjemawakwedö, jobadöwe!

Isaías 7:4

Acaznö badekwajo̧, yökawonö: –Teada̧lönö ja̧nö, yebabökönui. Kwomajadenö tjö̧bawökönö, idö juluwöködö la'aka luwedönö yebabökönö kwö̧jo. Jau Acaz, jobadö siria niji la'aka luwo̧ Rezinbi, israel la'aka luwo̧ Pekabi jwiinö tjö̧dameakwijayonö, juluwöködö, sule ökwöla ubö̧'a, juluwanö tiibö̧'adanö ichejekwadö. Isabenö jobadöma ökwönö suli̧ tjöwaedotö jö̧ba̧lö omukwatö tjujunajabe,

Daniel 6:16

Yötja̧liökwe, la'aka luwo̧ Daríoma weinobe Danielnö ikwö lotjobö, ja̧danö ikwö lotjakwa̧ abönö Danielnö yöa̧linobe: —Daniel, ba̧kwȩlö̧jatebö kwuluwo̧ Dios wei̧ a̧ja̧kwö jo̧ja, ja̧danö kwösödökwe Dios kwö̧jibinö pjaatobö chösödakwö— jö̧ba̧lö.

Romanos 13:4

Jau chömöledö, Diosma luwedönö ujuninobe, ökwödönö pjatjato jö̧ba̧lö. Ja̧danö, otiwanö ja̧bö kwö̧jaduwitjö̧ma, luwedönö yekabiduwoböma jwia. Jo̧kwaijayonö, sulabenö ja̧bö kwö̧jaduwitjö̧ma, yekabiduwoböma jo̧be, isabenö lȩtjebobö juluwadötjobetjö̧. Jau chömöledö, Diosma luwedönö ujuninobe iteda ömöayedö batjibanö, sulabenö ja̧badönö lȩtjebo jö̧ba̧lö.

2 Timoteo 4:14

'Dii̧ jawa cobretjö otido̧ Alejandro mikwo̧ma nöinö suli̧ öwaedinobe ötjönö, ja̧danö jejenö sulabenö ja̧iökwe Duluwo̧ma isabenö balekwa mikwa jo̧banö lȩebakobe.

Jueces 9:57

Ju'wibi Diosma Siquen comunidad jojodö sulabenö ja̧tji̧na lȩebinobe, sulabenö ja̧tjina tjebachajö bakwainö jobadönöbi baledobö lȩebinobe. Ja̧ Abimelecnöbi, Siquen jojodönöbi baledinama, Gedeon itji̧ Jotan yöawinadanö baledinobe, —Bejenö ökwödönö baledobö jo̧be, —jö̧ba̧lö wanedö yöawinadanö