2 Corintios 4:4 - Dios Iwene4 Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe. Faic an caibideil |
2 Corintios 4:4
42 Iomraidhean Croise
Jau Isaias, nöinö yöka̧lawö̧, tjomajadenö omukwatöködö batjibanö yökawakwo̧ja, ja̧danö tjölakiyu a̧ja̧kwöködö batjibanö yökawakwo̧ja, ja̧danö tjöbajale tjewawadö batjibanö kwi̧sȩbakwo̧ja. Jo̧kwajabetjö̧ otiwanö yökawijayonö, tjölakiyunö otiwanö tja̧ja̧kwökakwedö, ja̧danö tjöbajalenö otiwanö tjedökakwedö, ja̧danö tjomajade okwa söinö tjomukwatökakwedö. Jobekwö otiwanö ösödö tjomukwatitjö̧ma, sulabenö tjomukwati̧ tjöbalewacho jö̧tja̧lena, ja̧danö lȩtebi̧tjö̧ tjö̧jibo jö̧tja̧lena, —jö̧balö weinobe Isabenö Jo̧ma ötjönö.
Ja̧danö, sȩa'wonö meaja̧ ödebiya badekwachi̧ma, Dios la'aka luwo̧ ö̧jakwa̧ wene a̧ja̧kwö tjösödijayonö, böjȩ jawa nöinö omukwatadönö, ja̧danö balada tjemobö isakwadönö badekwachobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jokobe.
Ja̧danö, Dios Iwene Jo̧, jö̧ba̧lö, ötjabökwema jojo baibanö jeminökwe. Ja̧danö, jojo baibanö jeminökwema böjȩnö ökwödökwö ö̧jinobe. Ökwödöma jo̧banö edö, Jwiinö otiwo̧, jö̧ba̧lö, dösödijatö. Yelösöda, jo̧bama Dios Itji̧, iteakwo̧daobetjö̧ jwiinö otiwo̧. Ja̧danö, jo̧bama jwiinö lȩlö̧jino edöda pjabato̧. Ja̧danö, jweinöda yöba̧lo̧.
Jejenö abebö tja̧ja̧kwökwe wanedö yöawinobe: —Dewi̧ma lekwema dejatokobe, ökwödö kwö̧jaduwobema. Jo̧kwaobetjö̧ ina dejatobetjö̧ dewinö dejatobeda kwekachaduwo otiwanö kwi̧'yaduwobö. Jau, dewa'wo okwanönda kwekachaduwo, yȩa'wo okwa tekachibaduwapji jö̧ba̧lö. Yȩa'wo okwa kwebachadöma tji̧'yobema edökönö kwebachadö— jö̧a̧linobe Jesúsma, wanedö yöbawö—.
Diosma jobadö tjöbajale tjewawinö batjibanö ja̧inobe, tjöwaisachibökönö tjöpöjödobö. Ja̧danö, Diosma jobadö tjomajade 'ditjinö do̧tjatibökönö ja̧inobe, tjöpöjödobö. Jejenö ja̧inobe Diosma jobadönöma, itenöda tjichibokobö. Ja̧danö, jejenö ja̧inobe Diosma jobadönöma, sulabenö tjomukwati̧ tjöbalewachökönö, jö̧ba̧lö laebobe Dios iwenetjö, Isaías iwȩyudina wene.
Ja̧danö, jo̧ba ichakwo̧ma öwaitjöda öba̧ja̧dakwo̧ jojodönö Dios lȩebakwa̧, tjöwaisachibanö. Ja̧danö ida̧ökö Diosma Awetja, böjȩtjö uluwo̧ baibanö jo̧nö lȩebi̧tjö weinobetjö̧ jojodö tjöwaisachibakobe, Jojodönöbi, suli̧ juna̧ladönöma, Dios lȩebakwawö̧, jö̧ba̧lö. Jejenö jojodö tjöwaisachibanö tjo̧'wo̧ luwo̧nö öba̧ja̧dakobe jo̧ba ichakwo̧, Dios O̧'wo̧ Luwo̧ma— jejenö yöawinobe Jesúsma öba̧ja̧di̧ waisachadönöma.
Ikenama, Jesúsma yemidanö yöawinobe jojodönö: —Wanedö yötawa: Ötjödasa dewinö jo̧ma. Ja̧danö, ötjödasa jojodönö öbibo̧ma, dewa'wo okwanö kwetjachobö. Ja̧danö, böjȩ jojodö tjo̧'wo̧ luwo̧ okwanö dewinö chidejatobe, tjo̧'wo̧ luwo̧ jawa tjöwaisachibanö. Ja̧danö, ötjökwö ichadöma yȩa'wo okwanö kwebachöködö, kwetjachobema dewinö chidejatobetjö̧. Ja̧danö, ötjökwö ichadönöma, tjo̧'wo̧ luwo̧ okwanö dewinö dejatö chi̧sebakwo̧sa, ba̧kwȩlö̧jatebö ja̧kwawa tjujuna̧lobö tjöwaisachibanö— yöawinobe Jesúsma.
Jobadöma tjöbajale tjewawadödanö tjuju̧kwobe, tjo̧'wo̧ luwo̧ jawama. Jobadönö, yȩa'wo okwa ju̧kwadönö yökawobö wetokwöcha, jobadöma yȩa'wo okwatjö labebö dewinö ju̧kwadö batjibobö. Jobadöma, Awetja ösödi̧ ja̧bö tjuju̧kwi̧tjö kabatibö Dios ösödi̧da ja̧bö tjuju̧kwobö wetokwöcha. Ja̧danö ötjönö tjösöditjö̧ma tjusuli̧ söbebö loakobe Diosma. Ja̧danö jobadöma suli̧ jwibadö batjibinö Dios ja̧inawö̧danö jobadöbi batjibakobe, suli̧ jwibadö batjibakwedöma. Jejenö jö̧ba̧lö iwene jwöi̧ma cha̧ja̧kwijatö, chuluwo̧—jö̧ba̧lijetö Pabloma la'aka luwo̧ Agripanöma.
Jobadöma ajayinö yöbawijadötö Dios jojodö tjö̧jibinö ja̧obö weakwo̧ usula emawajo̧ woakwa̧ma. Yöbawijadötö, Dios jojodö tjö̧jibinö pjaatobö weakwo̧ma, wobajo̧ Dios yemidanö tjeachajinö ja̧akwo̧, jö̧ba̧lö. Jejenö ja̧bö, jo̧bama abönö tjeachajinö ja̧ökwe baibakwo̧, jö̧ba̧lö, yöbawijadötö. Jejenö wȩyudö yöbawijadötö jo̧ba, abönö yemidanö teachajinö ja̧ökwe baibakwo̧ma, tjo̧'wo̧ luwo̧ okwa dewachibanö ji̧bakwawa wene yöawakwo̧, judío jojodönöbi, judío jojodöböködönöbi, jö̧ba̧lö, yöbawijadötö damötjö, Dios yöawi̧ yöbawinadöma. Chuluwo̧, ötjöma jobadö damötjö tjiwȩyudinadanö bakwainö yöbawo̧sa— yöbawijetö Pabloma Agripanö.
Baikwö yötawa: Diosnö öpöjödadö o̧'wo̧ jawa tjiyenama, Awetja ömöayedö sulabedö ángelesbedönöda iyadö, Diosnöma iyöködö chömöledö. Ja̧danö, o̧'wo̧ jawa iyawa kwakwawa kwukwaduwenama, jobadö sulabedö ángelesdönö ösödö bakobe kwukwaduwobe ichejekwa. Jobadökwö bakobe bakibaduwa jö̧ba̧lö, o̧'wo̧ jawa iyawa kwukwaduwa jö̧ba̧lö yötawobe chömöledö.
Jau chömöledö, kwöwaisaduwa, Awetjama kabatökönö isakwobe, ökwödö Jesúsnö ösödadönö suli̧ öwaedobö, ¿jö̧tö? Jau chömöledö, jejenö isakwo̧, ja̧danö belö sulabenö baledinatjö ökwödönö suli̧ öwaedotö jö̧ba̧lö isakwinobe Awetjama chömöledö. Ja̧danö, jejenö suli̧ öwaedotö jö̧ba̧lö isakwi̧ chöwaisobetjö̧, waisanö ökwödönö wetijatö chömöledö, sulabenö ja̧binanö lȩkebaduwoböbi, lȩbebajadö yemidanö jo̧banö kwösödaduwoböbi. Jau chömöledö, okobe jwiinö ja̧ wetinama, Awetja ökwödönö ujuluwapji jö̧ba̧lö wetijatö.
Jau chömöledö, ajayi jawama, lekwema ujuninokobe Diosma, ja̧danö ajayinö salöinö dejatinajayonö, ja'yubeda lekwajabetjö salöinö dejati̧ma tjo̧'omanö tiibinobe. Jo̧kwaijayonö jejenömaökö 'yayi̧ wene Dios yöbawö ujunina wenema chömöledö, ba̧kwȩlö̧jatebö ja̧kobe. Ja̧danö, ajayi jawa salöinatjö̧ma, 'yayi̧ jawama ja̧tjö o̧penönö salöinö dejatena ba̧kwȩlö̧jatebö, ja'yubenöbi tibibökönö.
Jobadö Israel jojodönö kwöwaisaduwa chömöledö, Moisésma otiwanö Dios wei̧ jobadönö yöawijayonö, jwaikwöda sulabenö tjomukwatinobe, ¿jö̧tö? Jau chömöledö, baikwö wanedö yötawa: Moisés umuchekwinado̧ma jobadönö tjöekwado̧danö baibinobe ichejekwa, Moisés iwȩyudina tjedenama jweinö tjomukwatinokobetjö̧. Jau chömöledö, babebi ja̧ muchekwado̧ma Israel jojodö tjomukwati̧ tjöekwado̧danö ichejekwa, jweinö tjomukwatökönö, ja̧danö sule bakwo̧ Cristonö ösödenada, ja̧ tjöekwado̧ kalekwö loobedanö jo̧be.
Jo̧kwaijayonö okobe deinö ökwödö Jesúsnö ösödadöma tjöekwado̧ jwibadösa chömöledö, öwaetjöda Dios dejatinö ujulu edadösa. Jau chömöledö, Duluwo̧ salöinö ujulu edadösa, ja̧danö tjöbadekwawöte öwawinö i̧sebi̧danö ja̧ ujulu i̧sebadösa ju'wedönö, jobadöbi tjedakobetjö̧. Ja̧danö ju'wibi chömöledö, Duluwo̧ salöinö ujulu dedenama, Duluwo̧ Dios O̧'wo̧ Luwo̧ma, Duluwo̧danö ichejekwadö badibanö otido̧, jo̧ba salöinö dejatinö juluwo̧danö bakwainö dichejekwakobetjö̧. Jejenö jo̧be chömöledö, jo̧kwajabetjö̧ yödawi̧ wene 'yayi̧ wenema inesö mikwawi̧ jö̧ba̧lö, ja'yubebi salöi̧ dotojoböma omukwatöködösa. Jau chömöledö, jojodö ja̧ salöi̧ öwawinö tjedakobetjö̧, inesö mikwawi̧ wene 'yayi̧ wenema yöbawadösa.
Jojodö ajayinö wajwitjina wene Diosma iteda ömöledönö i̧sebobö jö̧a̧lobe, inesö otiwi̧ wenema. Ja̧danö ja̧ wenema sule judío jojodönöda i̧sebobömaökö, judío jojodöböködönöbi ja̧ ajayinö wajwitjina wene i̧sebobe chömöledö. Ja̧ wajwitjina wenema biya̧ chömöledö, Cristoma kwo̧'wo̧ luwo̧duwinö ö̧jobetjö̧, inesö otiwobe mölejȩbe kwö̧jaduwakwedöja jö̧ba̧lö.
Isabenö chömöledö, ja̧ la'aka ba̧ja̧dakwawa yemidanöbi yemidanö döwaisachobö jwiobe, tjo̧wi̧ döwaisobetjö̧. Da̧peachobö di̧'yobö jo̧be. Jo̧kwaijayonö ökwödötjö ju'wedöma ajayinö la'aka ba̧ja̧dakwawa a̧ja̧kwö tjösödijayonö jemi ikenama tjöpöjödinobe, Jesúsnö kabatibö. Chömöledö, jobadöma ajayinö Jesúsnö do̧batö tjemena yȩa'wotjö labebö dewa'wonö kwebachadö babibinadö tjo̧'wo̧ luwo̧ okwanö. Ja̧danö, Dios iyinökwe Jesúsnö, tjö̧jibinö pjabato̧nö tjösödinobe. Jwiinö tjösödinobe jo̧banö, Diosma ökwödönö lȩlö̧jino edobetjö̧ ba̧kwȩlö̧jatebö mölejȩbe dö̧jakwedösa, jö̧ba̧lö. Ja̧danö, jobadöma Dios O̧'wo̧ Luwo̧ jobadö tjo̧'wo̧ luwo̧ okwanö tebachibö öjamatinawö̧. Ja̧danö Dios iwene, otiwa jawa wenema ösödinadö. Jobadöma Dios ujulu i̧sebi̧ edinadö, ju'wi möle, 'dö̧ibaji̧ möle jwiinö ujulu i̧sebakwa̧danö. Yelösöda jobadöma edöbi, waisöbi tjö̧jijayonö jelobekwö omukwatö Jesústjö 'da̧bachibö tji̧'yinobe. Jau chömöledö, jobadö dewa'wonö kwebachinadöma yemidanö yȩa'wo okwa söbibö tji̧'yobedanö 'ya̧dö. Ja̧danö chömöledö, jobadöma yemidanöbi yemidanö la'aka ba̧ja̧dakwawama ¿tja̧ja̧kwobö jo̧beji̧? Jejenömaökö ida̧ökö tjöwaisobetjö̧. Ja̧ la'aka ba̧ja̧dakwawa tjöwaisijayonö Jesúsnö öpöjödö kabatibadö. Chömöledö, Dios jobadö jelobekwö tjomukwati̧ tjöbalewachinö ¿pjaatobö jo̧beji̧, yemidanö Jesúsnö tjösödobö? Jejenömaökö chömöledö. Jobadö Jesúsnö jwiinö kabatibö jelobekwö omukwatö 'ya̧döma isabenö tjomukwati̧ tjöbalewachobö jwiobe. Chömöledö, jobadöma Jesúsnö towisa'onö bȩbö tjujunobö webinadödanö ja̧dö. Jesúsnö obinadödanö ja̧dö, jojodö tjöba a'o tjujunajökwenö edö obinadödanö. Jobadöma Jesúsnö jwiinö katjatibinobe, Sulabo̧, jö̧ba̧lö. Jo̧kwaobetjö̧ yelösöda, tjomukwati̧ balewachö yemidanö Jesúsnö ösödö tjetjachajobö waiyobe chömöledö.
Ja̧danö jejenö dedinobetjö̧, ajayitjö bajalekwönönö isabenö döwaisobe chömöledö, Duluwo̧ma isabenö iteda ujulu i̧sebö yemidanö ichakwo̧ jö̧ba̧lö. Jau chömöledö, Dios yöawi̧ yöbawadöma tjiwȩyudinobe, Duluwo̧ 'dö̧ibaji̧ möle yemidanö ichakwa̧ wenema, ja̧danö ida̧ökö jobadö tjiwȩyudi̧ dösödinobe. Ja̧danö, jemi ikenama ökwödöma jo̧ba ujulu i̧sebina dedijatö chömöledö. Ja̧danö jejenö dedinobetjö̧, ajayitjö o̧penönö döwaisobe, Dios yöawi̧ yöbawinadö tjiwȩyudinadanö iteda ujulu i̧sebö ichakobe jö̧ba̧lö. Isabenö jweinö tjiwȩyudinobe chömöledö, jo̧kwajabetjö̧ jobadö tjiwȩyudina otiwanö omukwatö kwösödaduwo chömöledö, jweinö kwomukwataduwakobetjö̧. Jau chömöledö, jobadö tjiwȩyudinama isabenö otiwanö domukwatobö pjaati̧, wanedö yötawa: Jobadö tjiwȩyudinama dejewa'yu̧ ubö dejati̧danö jo̧be, ichakwo̧nö jweinö kwomukwataduwobö, ja̧danö jejenö dejatakobe, inesö möle Cristo yemidanö ichakwa̧ möle dewachena kabatö. Ja̧danö ja̧ möle salöinö dejato̧ Cristoda ichö kwomajadeduwinö idejatakobe chömöledö, damötjö tjiwȩyudinadanö.
Jo̧kwaijayonö öjawo̧nö jwiinö öpöjödo̧ma yȩa'wo okwada kwebacho̧, suli̧ wanekwacha'wonö. Ja̧danö, ja'wonö kwebachö, sulabenö omukwatakwawada waiso̧ yȩa'wo okwada ö̧jobetjö̧, otiwanö omukwatökönö. Jo̧bama öbajale tjewawo̧danö jo̧, Dioskwö, otiwanö omukwatö, dewa'wonö kwebachö 'ya̧kwawama wajwibö. Chö̧ja̧wo̧dö, jo̧ba yȩa'wo okwa kwebachö i̧'yi̧danö kwi̧'yaduwoko. Okwödöma dewa'wo okwada kwi̧'yaduwobö jo̧be, Dioskwö dötewinö, kwö̧ja̧wo̧döduwikwö ösödabikwawö ja̧nö.
Jo̧kwaobetjö̧ ja̧ wei̧ma 'yayi̧ wei̧maökö. Ida̧ökö belö kwa̧ja̧kwinaduwobe. Jo̧kwaijayonö ja̧ wei̧ma babe wei̧danö ji̧. Döpöe Jesucristobi ja̧ wei̧ a̧ja̧kwö ö̧jinobe. Ja̧danö, döpöe Jesucristoma ja̧ wei̧ a̧ja̧kwö ö̧jinobetjö̧ ökwödö babe dö̧jobö i̧sebinobe. Jejenö babe dö̧jobö i̧sebinobetjö̧ yötawaduwakwö biya̧: Ja̧ wei̧ma babebi ökwödönö webö ji̧. Ja̧danö chö̧ja̧wo̧dö, ökwödöma ja̧ wei̧ a̧ja̧kwö kwö̧jaduwobe, kwö̧ja̧wo̧döduwikwö ösödabikwawö. Jejenö ja̧ wei̧ a̧ja̧kwö kwö̧jaduwobetjö̧ ja̧ wei̧ma babe wei̧danö ji̧. Chö̧ja̧wo̧dö, wanedö yötawa: Jejenö, ökwödöma ösödabikwawö kwö̧jaduwena Dios isabenö ji̧ yöawi̧ma dewinö dejatobe yȩa'wo okwatjö öwawinö. Jejenö dewinö dejatobetjö̧ suli̧ wanekwacha'woma tjo̧'omanö söbawö, Dios dewinö idejati̧da öwawobe ja'wotjö. Jejenö jö̧ba̧lö biya̧ wanekwachobe: Ökwödö ajayinö sulabenö omukwatö kwö̧jinaduwatjö tjo̧wi̧ balewö lobö, Dios otiwanö omukwati̧danö ja̧döja.
Sanasan