1 Timoteo 4:3 - Dios Iwene

³ 'Dö̧ibaji̧ möle sulabenö yöbawadöma baikwö wetjakwedö: Tji̧lȩkwa̧munö emawa sula, kwilekwonö emökönuwi, jö̧ba̧lö, ja̧danö, biya̧ kwakwawama kwökönuwi, Dios öpöjödi̧, jö̧ba̧lö. Jo̧kwaijayonö, jejenö webö̧kö̧ Diosma. Diosma ja̧ kwakwawabi otidö iyinobe, yötawi̧ ösödadö, isabenö wene waisadöma ötjönö ösödö tjukwakwedö, Diosma otiwanö iyajabe, jö̧ba̧lö.

1 Timoteo 4:3 Iomraidhean Croise

Génesis 9:3

Ja̧danö, babema baikwö weta: Okobe deinö böjȩnö 'yaba̧ladö tebonö ju̧kwadönöbi, mejenö ju̧kwadönöbi, mö köba̧lö ju̧kwadönöbi, nijinö töbawadönöbi, ojwenö ju̧kwadönöbi kukwaduwobö jo̧be, kukwaduwakwawö̧ batjibanö. Ajayinöma kwakwawama tebonö ji̧da chiyijatö. Jo̧kwaijayonö babema böjȩnö 'yaba̧ladönöbi chiya, kukwaduwakwawö̧, jö̧ba̧lö— jö̧ba̧lijetö Diosma—.

Daniel 11:37

Ja̧danö jo̧ba Siria luwo̧ma iteda ömöledö o̧'wo̧ jawa tjösödökwenöbi öpöjödakobe, ja̧danö ba̧jekwadö ya̧dö o̧'wo̧ jawa tjösödökwenöbi öpöjödakobe, ja̧danö okobe deinö jojodö tjösödawö̧nö öpöjödakobe, jobadötjö bajalekwönönö juluwo̧sa̧ jö̧ba̧lö.

Mateo 14:19

Ikenama Jesúsma jojodö meje'yenö tjöbamatobö weinobe, ja̧danö bakwamu jawa pan ö̧pji̧yabi, ba̧i̧ du̧ju̧tajanöbi emibö, mölejȩbe edö Diosnö aebinobe, otiwanö kwakwawa kwiyajabe jö̧ba̧lö. Ikenama pan 'delawö, iteda öba̧ja̧di̧ waisachadönö iyinobe, jobadöma jojodönö tjiyabobö.

Mateo 15:11

Isabenö yötawaduwakwö, jojodö tjaa okwa teachi̧ jawa tjukwi̧ma, suli̧ waedökö ji̧. Sule tjaatjö laebi̧ jawa, yötja̧li̧ jawada, suli̧ ja̧i̧— jö̧ba̧lö yöawinobe.

Mateo 15:36

ja̧danö jelemutjö döpja̧lataja pan ö̧pjiyabi, ba̧i̧bi emibö, Diosnö aebinobe, Otiwanö iyo̧ja, jö̧ba̧lö. Ikenama abebajo̧, 'delawö iteda öba̧ja̧di̧ waisachadönö iyinobe, jojodönö tjiyabobö.

Lucas 24:30

Ja̧danö, jobadökwö ukwobö mesasötenö tjö̧benama, Jesúsma pan emibö, Diosnö aebinobe, otiwanö kwiyajabe jö̧ba̧lö, ikenama 'delawö jobadönö iyinobe.

Juan 6:23

Jemi ikenama, tjukwajemi tjolanö yöne ju'wedöma tjichibinobe Tiberiastjö, isowikwena ichö. Jolama, pan tjukwakwa̧ abönö Duluwo̧ma iteda abe'donö aebi̧ tjukwinemi yöne tjola.

Hechos 27:35

Ikenama Pabloma pan emö, Diosnö yöba̧lö, Dios, otiwanö kwiyajabe, jö̧ba̧lö, ja'yubeda debatö ukwijatö.

Romanos 14:17

Jau chömöledö, Dios ömöayedö dö̧ji̧ma kwakwawa jawamaökö, owawa jawamaökö. Ju'wida chömöledö, Dios ömöayedö dö̧ji̧ma. Dios O̧'wo̧ Luwo̧ma ökwödönö ja̧inobe, sulabe jwibadö badibanö, ja̧danö tupakwöbi pjaatobe ökwödönöma. Jau chömöledö Cristonö ösödadö dömöledökwö wene jwiinö dö̧jobö, do̧'wo̧ ösöwanö wene jwiinö dömöledökwö dö̧jobö pjabato̧ Dios O̧'wo̧ Luwo̧ma. Ja̧da Dios ömöayedö ja̧kwawama chömöledö.

Romanos 14:3

Chömöledö, okobe jwiinö kwadöma, kwöködönö tjomukwatoko, Bidöma wajwibadö, mikwawöködö, jö̧ba̧lö. Ja̧danö kwöködöma, kwadönö tjomukwatoko, Bidöma sulabedö, Dios öpöjödinö kwadö, jö̧ba̧lö. Jau chömöledö, Diosma ida̧ökö ökwödö Jesúsnö ösödadönö bakwo̧nökwena ida̧ökö yöawinobe, Bitema chösödökwe, bisuma chösödoko, jö̧ba̧lö. Jo̧kwajabetjö̧ ökwödö bidöma sulabedö, mikwawöködö kwomukwataduwoböma jwia yelösöda chömöledö, Diosda jobadönö ösödobetjö̧.

Romanos 14:6

Jau chömöledö, bakwöta möle wainö 'da̧batö juno̧ma, Duluwo̧nö ösödotö jö̧ba̧lö wainö 'da̧batö juno̧. Ja̧danö, okobe jwiinö kwakwawa kwo̧ma, Diosda otiwanö chukwobö iyajabe, jö̧ba̧lö, duluwo̧nö ösödö kwo̧. Kwö̧kö̧bi ja̧danö chömöledö. Ju'wi jawa chukwobö webö̧kö̧, batjo jawada chukwobö otiwanö iyajabe Diosma, jö̧ba̧lö, Duluwo̧nö ösödö batjo jawada kwo̧. Bakwainö ösödadö Duluwo̧nöma, möle wainö 'da̧batö junadöbi, 'da̧batö junöködöbi, okobe jwiinö kwadöbi, okobe jwiinö kwöködöbi.

1 Corintios 6:13

Ja̧danö ju'wedö yötja̧lena, Aaa, kwakwawama dukwobö jo̧be, ja̧danö dukwa'woma, kwakwawa'woda jo̧be jö̧ba̧lö. Jau chömöledö, jejenö jo̧be, ja̧danö kwakwawabi, dukwa'wobi söbebö loakwo̧ Diosma. Jo̧kwaijayonö diteba'oma söbebö loökakwo̧ Diosma chömöledö. Duluwo̧ Jesús iteba'o woawatjö tjeachajinö ja̧inadanö, ökwödö diteba'obi woawatjö tjeachajinö ja̧akwo̧ Diosma iteda ujulunö. Ja̧danö, jejenöobetjö̧, omukwatökönaduwi, Aaa, putasujunö ja̧titjö̧ma chiteba'o jawadaobetjö̧ sulökena jö̧ba̧lö. Jau chömöledö, diteba'oma putabedönö ja̧do jö̧ba̧lö jö̧ka'o, Duluwo̧ ösödi̧danö ja̧do jö̧ba̧lö ja̧'o chömöledö, ja̧danö Duluwo̧ma diteba'o ite'ada̧lobe.

1 Corintios 7:28

Jejenö yöta̧li̧ma, kwilekwonö kwemobö sula, Dios öpöjödi̧ jö̧ba̧lö yöta̧lökö. Ja̧danö, kwilekwonö kwemitjö̧ma, ja̧danö jilekwe debujuma jilekwenö jemitjö̧ma, sulökö, Dios öpöjödökö. Yöta̧laja̧ma baikwö yötawa: Babe baledi̧ jawa baledobetjö̧, tji̧lȩkwa̧munö juna̧ladöma böjȩnö ja̧nö nöinö wene tjujuna̧lakwedö. Ja̧danö jejenö wene baledapji jö̧ba̧lö, kwilekwonö emökönö kwö̧jitjö̧ma otiwena jö̧ba̧lö yötawa.

Colosenses 2:16

Jo̧kwajabetjö̧ ju'wedö kwakwawa jawa ja̧danö owawa jawa wetji̧ma, a̧ja̧kwökönaduwi, ja̧ jawa mikwawokobetjö̧. Ja̧danö wainö ji̧ möle pjiesta jawa wetji̧ma a̧ja̧kwökönaduwi, ja̧danö yö̧te jawo̧ pjiesta jawa wetji̧ a̧ja̧kwökönaduwi, ja̧danö otikwökö möle jawa wetji̧ma a̧ja̧kwökönaduwi.

Colosenses 3:17

Jau chömöledö, okobe jwiinö yöka̧laduwi̧ma, Duluwo̧ Jesús jawa i̧sebö yöka̧laduwo, ja̧danö okobe jwiinö ja̧köbaduwi̧ma, Duluwo̧ Jesús jawa i̧sebö ja̧köbaduwo. Ja̧danö, Jesús pjaatinobetjö̧, ba̧kwȩlö̧jatebö Dabe'do Diosnö kwösödaduwo, Otiwanö pjabato̧ja, jö̧ba̧lö.

1 Timoteo 2:4

Jau Timoteo, Diosma jejenö ja̧bö dö̧jobö ösödo̧ okobe deinö böjȩnö ju̧kwadö tjö̧jibobö ösödobetjö̧, ja̧danö okobe deinö isabenö wene tjöwaisachibobö ösödobetjö̧.

1 Timoteo 4:4

Jau Timoteo, okobe jwiinö Dios otidinama otiwa, döpöjödoböma jwia. Ja̧danö, Diosnö ösödö, otiwanö kwiyajabe jö̧ba̧lö dukwobö jo̧be.

1 Timoteo 5:14

Jo̧kwajabetjö̧, baikwö yötawa: Ina sesenta o̧biya ichiböködö ya̧dö tji̧lȩkwa̧munö wobekwinadöma, yemidanö tji̧lȩkwa̧munö tjemobö jo̧be, ja̧danö tji̧tji̧munö 'yabebö bötjatö, tjeju jawa otidö tjö̧jo, Jesúsnö ösödadönö öpöjödadöma ökwödönö sulabenö yötja̧lapji jö̧ba̧lö.

Hebreos 13:4

Ja̧danö chömöledö, ju'wibi yötawaduwakwö. Ökwödötjö kwilekwonö kwemobö, ja̧danö kwilekwenö kwemobö omukwatadönö yötawa. Yebabinö omukwatö kwemaduwo kwilekwonö, ja̧danö kwilekwenö. Ja̧danö, eminadönöbi yötawa. Yebabinö omukwatö kwuju̧kwaduwo kwilekwokwö, ja̧danö kwilekwekwö. Ja̧danö, okobe deinö yötawaduwakwö. Emökönöma kwalewaduwa, Diosma emökönö alewadönö lȩebakobetjö̧. Ja̧danö, Diosma jeluju jilekwenö alewujunö, jelo̧ ilekwonö alewo̧nö lȩebakwo̧.

Hebreos 13:9

Isabenö, chömöledö ajayinö Jesúsnö, bakwo̧danö yöbawinadö yötjawina kwomukwataduwo. Babe mölema ju'wedö ba̧jekwadö jelobekwö omukwatö yötjawi̧ma jo̧be, ju'wi jawabi, ju'wi jawabi. Ja̧danö, jelobekwö omukwatö yötjawobe, Moisésnö weina a̧ja̧kwö dö̧jobö jo̧be, dukwobö wei̧ma, jö̧ba̧lö. Ja̧danö, Moisésnö weina kwukwaduwobö a̧ja̧kwö kwö̧jaduwitjö̧ma juluwachibanö kwi̧'yaduwena kwo̧'wo̧ luwo̧duwinö, jö̧ba̧lö, jelobekwö omukwatö yötjawobe. Chömöledö, kwakwawamaökö ökwödönö do̧'wo̧ luwo̧nö juluwachibanö kwi̧'yaduwoböma, Dios jawada. Diosma ökwödönö pjabatö lȩlö̧jino edobetjö̧ do̧'wo̧ luwo̧nö juluwachibanö di̧'yobe. Chömöledö ju'wedö jelobe omukwatö yötjawi̧ma öpöjödaduwi. Ajayinö yöbawinadö Jesúsnö isabenö ji̧ yötjawinada omukwatö kwuju̧kwaduwo.

1 Samuel 9:13

Juluwanö comunidad apjude tekachaduwitjö̧ma, jo̧banö kwöbadekwajaduwena, möemi Diosnö iyawemibe kwanö önöchapji. Jobe Diosnö iyajadö, ba'ali tjukwakobe, jo̧kwaijayonö jo̧ba ichibakwa̧ tjiteada̧lobe, Diosnö tjiyakwa̧ abönö Diosnö iyawa jo̧bada Diosnö aebakobetjö̧. Ja̧danö, jemi ikenama, jobe tjukwobö tja̧debajawö̧ma jobetjö ba'ali tjukwakwedö. Jo̧kwajabetjö̧ juluwanö jo̧banö edö 'ya̧duwi, juluwanö jo̧banö kwöbadekwaduwakobetjö̧, —jö̧ba̧lö yötjawinobe möayedöma, Saulnöbi, ömöayo̧nöbi.