1 Timoteo 2:3 - Dios Iwene

³ Jejenö ja̧bö dö̧jobö otiwa, ja̧danö dö̧jibinö ja̧bo̧ Diosma jejenö ja̧bö dö̧jobö ösödo̧.

1 Timoteo 2:3 Iomraidhean Croise

Isaías 45:21

Jobekwö a̧ja̧kwö, jobadönö dösödi̧ma otiwa jö̧ba̧lö kwomukwataduwitjö̧ma, baikwö abebö cha̧jakwaduwakwö: Bakobe yöba̧lakwawö kwedaduwo, ökwödö kwösödaduwawö̧tjö dite babe baledakwa̧ yöawinojobö, jö̧ba̧lö. Ina baledapji, dite jweinö yöawinada, —Bejenö baledakobe, —jö̧ba̧lö? Kwösödaduwawö̧tjö bakwo̧bi yöawinokobe, jö̧tö? Ötjö Isabenö Jo̧ Diosda babe baledakwa̧ yöbawinama. Ötjödasa Diosbo̧ma, jelo̧ diosbo̧, ötjödajayo̧ma deobe yelösöda. Ötjöda bakwainö otiwanö ja̧bö jo̧sa, ötjöda tjö̧jibinö pjabato̧ma, jelo̧ma deobe.

Lucas 1:47

ja̧danö cho̧'wo̧ luwo̧ma chö̧jibinö pjabato̧ Diosnö omukwatö o̧'wo̧ ösöwachibanö ö̧jobe,

Romanos 14:18

Jau chömöledö, dö̧ja̧wo̧dö töbö metjapji jö̧ba̧lö te'ada̧lakwawö duju̧kwaduwo. Jejenö te'ada̧lakwawö ja̧nö Cristo wei̧ ja̧bö dö̧jitjö̧ma, Diosma ösödena, ja̧danö ju'wedöbi ökwödönö tjösödena, Otiwanö ja̧bö ju̧kwadö, jö̧ba̧lö.

Filipenses 4:18

Jau chömöledö, otiwanö balada kwiyinaduwobetjö̧, otiwanö chujuna̧lobe. Wanedö yötawa: Su̧'bȩ babibö welachibanö chujuna̧lobe ichejekwa. Epafroditoma ökwödö kwiyaduwaja̧ balada ichejebinobetjö̧, okobe jwiinö chujuna̧lobe babema. Ja̧danö, kwiyinaduwama, Diosnö iyawadanö ichejekwinobe chömöledö. Wanedö yötawa: Söinö 'dö̧ekwi̧ iyawadanö ichejekwinobe, ja̧danö ja̧ 'dö̧batö ösödinobe Diosma chömöledö.

Colosenses 1:10

Duluwo̧ ömöledö tjö̧jo jö̧tja̧li̧danö kwö̧jaduwo jö̧ba̧lö. Jau chömöledö, Duluwo̧ ösödi̧danö ja̧bö kwö̧jaduwobö dösöda, ja̧danö okobe jwiinö otiwanö ja̧awa jwaikwöda ja̧bö kwö̧jaduwobö dösöda, ja̧danö tupakwö Diosnö kwöwaisaduwobö dösöda.

1 Tesalonicenses 4:1

Chömöledö, belö ökwödönö yödawijatö, Dios ösödi̧danö ja̧kwawama, baikwö ja̧bö kwö̧jaduwo jö̧ba̧lö, ¿jö̧tö? Ja̧danö babema Duluwo̧ Jesús iminö budekwödanö wedaduwakwö, yödawinadanö ja̧bö kwö̧jaduwo jö̧ba̧lö. Isabenö jejenö ja̧bö ju̧kwadöja ida̧ökö chömöledö, jo̧kwaijayonö jemi tupakwöbi jejenö ja̧bö kwö̧jaduwo chömöledö.

1 Timoteo 1:1

Ötjö Pablo mikwo̧sa, Cristo Jesús webawo̧sa, iteda yöawi̧ yötawo jö̧ba̧lö. Do̧'wo̧ döwana̧lökwe Cristo Jesúsbi, ja̧danö dö̧jibinö pjabato̧ Diosbi wetjinobe, Cristo Jesús webawo̧ baibanö chö̧jobö.

1 Timoteo 4:10

Ja̧danö, Dios wei̧ jawa ja̧bö dotidobe, usula emawö dotidobe, ba̧kwȩlö̧jatebö jo̧ Diosnö do̧'wo̧ döwana̧lobetjö̧, isabenö dö̧jibinö ja̧akwo̧ jö̧ba̧lö. Jau, Diosma okobe deinö böjȩ jojodö tjö̧jibobö ja̧bo̧, ja̧danö isabenö dö̧jibinö ja̧bo̧, ökwödö Jesúsnö ösödadönöma.

1 Timoteo 5:4

Jo̧kwaijayonö, bakwuju jilekwenö wobekwinujuma ji̧tji̧mubi, jö̧'dö̧döbi tjuju̧kwitjö̧ma, jobadöda jobujunö tjite'ada̧lobö jo̧be, Dios wei̧danö. Jau Timoteo, ajayinöma tjabe'do tjojo'doma jobadönö tjite'ada̧linobe, ¿jö̧tö? Ja̧danö, babema balekwa mikwa tjojo'do jilekwenö wobekwinujunö ja̧danö tja̧'do̧ jilekwenö wobekwinujunö tjite'ada̧lobö jo̧be. Ja̧danö, jejenö te'ada̧lö tjö̧jobö ösödo̧ Diosma.

2 Timoteo 1:9

Jau Timoteo, Diosda ökwödönö dö̧jibinö pjabatinama, jo̧bada iteda ömöledö badibobö jwöbinama, jo̧kwajabetjö̧ usula emawö jwaikwöda otiwa jawa wene yöbawö kwö̧jo iteda ujulunö. Ja̧ Dios ökwödönö pjaatinama, otiwanö ja̧bö dö̧jiökwema pjaatinokobe, itedada la'akatjöda jejenö omukwatö ujuninobetjö̧ jejenö pjaatinobe. La'akatjöda Diosma omukwatö ujuninobe, Cristo Jesúsnötjö otiwa jawa mikwa jwiinö ökwödönö iyobö.

Hebreos 13:16

Ja̧danö ju'wibi yötawa. Babe möle Diosnö diyobedanö diyi̧ma, biya̧: Jojodönö ju'wi jawabi, ju'wi jawa pjadatobö jo̧be chömöledö. Ja̧ pjadati̧ma Diosnö diyobedanö diyi̧. Ja̧danö ju'wibi, ökwödö dujuna̧li̧tjö jwibadönö pjabatö diyaduwo chömöledö. Ja̧ pjadati̧bi Diosnö diyobedanö diyobe. Chömöledö, jejenö, jojodönö pjadatena Diosma jwiinö ösödobe, o̧'wo̧ ösöwanö edö.

1 Pedro 2:20

Jau chömöledö, kwöwaisaduwa, sulabenö ja̧bö kwö̧jaduwitjö̧ma Diosma otiwanö omukwatökena ökwödönö, ¿jö̧tö? Ja̧danö, sulabenö ja̧köbaduwiökwe kwuluwo̧ ökwödönö kwakwaitjö̧ma, kwo̧'wo̧ 'dibachibö kwöbaledaduwi̧ mikwawökena, Dios otiwanö ökwödönö omukwatobö. Jo̧kwaijayonö otiwanö ja̧bajadö usula emawö kwöbaledaduwenama, Diosma edö otiwanö omukwatobe ökwödönö chömöledö, chi̧tji̧muma weti̧danö ja̧bö tjö̧jobetjö̧ usula emawadö jö̧ba̧lö.