1 Timoteo 1:4 - Dios Iwene

⁴ Ja̧danö, jobadönö weköbo Timoteo, nöinö tja'dödö yötjawina jawa yötjawoko jö̧ba̧lö. Ja̧danö, jobadönö weköbo jojodö tja'dödönö nöinö tjomukwatokobö, Aaa, ötjötjö ajayinö ji̧nadöma bidö, bidö, jö̧ba̧lö. Ja̧ jawama, sule jojodö jwöjwötjakwawoböda ji̧, mikwawö̧kö̧. Jau Timoteo, Diosnö ösödöda tjöda̧peachobe tjo̧'wo̧ luwo̧nö, ja̧ jawa omukwatömaökö. Jo̧kwajabetjö̧ webidönö ja̧ jawa katjatibobö.

1 Timoteo 1:4 Iomraidhean Croise

2 Corintios 1:12

Chömöledö, otiwanö ökwödönö ja̧bö dö̧jina wene yötawaduwakwö, ökwödönö sulabenöma ja̧binöködösa jö̧ba̧lö. Jau chömöledö, okobe jwiinö böjȩnö ja̧nö ja̧di̧ma, ja̧danö ökwödönö ja̧bö dö̧ji̧ma sulabenö ja̧bökönö dö̧jijatö, Dios pjaatonö jweinö ja̧bö dö̧jijatö chömöledö. Ja̧danö, ja̧bö dö̧jinama ökwödöda waisanö omukwatöma ja̧dijökötö chömöledö, Diosda lȩlö̧jinö edö ökwödönö pjaatobetjö̧, otiwanö ja̧bö dö̧jijatö chömöledö. Jejenö yötawaja̧ma, jweinö yötawa chömöledö, ja̧danö chomajadenö chöwaisa, isabenö yötawa jö̧ba̧lö.

Efesios 3:2

Dios ötjönö 'da̧batö ujuninama kwa̧ja̧kwinaduwobe ¿jö̧tö? Diosma ötjö chotidawa otiwanö iyö 'da̧batö ujuninobe, ökwödö judío jojodöböködönö pjatatobö.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

1 Timoteo 4:7

Ja̧danö, böjȩ jojodö tja'dödötjö tja̧ja̧kwina jawa, mikwawökö jawa yötjawi̧tjö 'da̧bachibö kwö̧jo, ja̧ jawa a̧ja̧kwö omukwatökönö. Jwaikwöda Dios ösödi̧ jawada isakwö kwö̧jo, ja̧da ja̧bö kwö̧jo.

1 Timoteo 6:11

Jau Timoteo, ökwöma Dios ömöledöso̧ja, jo̧kwajabetjö̧, biya̧ yötawaja̧ sulabenö ja̧awatjö döbibaji, sulabenö ja̧bökönö. Dios ömöledöso̧köbobetjö̧, ju'wida isakwö kwö̧jobö jo̧be, ja̧ma biya̧: Dios ösödi̧danö ja̧awa kwisakwo, ja̧danö Diosnö ösödö jo̧ba ösödi̧danö ja̧bö kwö̧jobö kwisakwo. Ja̧danö, kabatökönö Cristonö kwo̧'wo̧ wana̧lö kwö̧jobö kwisakwo, ja̧danö jwaikwöda kwömöledö Cristonö ösödadönö kwösödobö kwisakwo. Ja̧danö, wene baibenabi kwo̧'wo̧ 'dibachibö me'dawachibökönö Cristonö kwo̧'wo̧ kwöwana̧lobö kwisakwo, ja̧danö otiwanö dösölö̧jinö jojodönö ja̧köbobö kwisakwo Timoteo.

1 Timoteo 6:20

Jau Timoteo, baikwö wetakwö: Dios ökwönö ja̧köbobö iyinama, te'ada̧lönö ja̧bö kwö̧jo. Ja̧danö, jojodö omöna yötja̧li̧ma kwa̧ja̧kwoko, mikwa jwii̧ jawa yötja̧li̧, Diosnö öpöjödö yötja̧li̧ma. Jobadöma, Aaa, biya̧ yöda̧li̧ma waisakwawa ji̧, jö̧ba̧lö yötja̧lijayonö, waisakwawa jwii̧ Timoteo.

2 Timoteo 2:14

Biya̧ yötawaja̧ jawa okobe deinö tjomukwatibobö yökawodönö, ja̧danö Dios öba a'otjö webidönö, ölakwabikwawö jwöjwötjakwawi̧ma katjatibobö, jejenö ölabikwawö jwöjwötjakwawi̧ma mikwawokobetjö̧. Jau Timoteo, ju'wedöma jojodö tjiwȩyudina jawa jwöjwötjakwawobe, laebi̧ma baikwö jö̧ba̧lö laebena, wainö jö̧ba̧lö laebena jö̧ba̧lö. Jejenö jwöjwötjakwawi̧ma pjaatökö ji̧ Timoteo, suli̧ waedakwawa ji̧ jwöjwötjakwawi̧ a̧ja̧kwadönöma, jo̧kwajabetjö̧ jwöjwötjakwawi̧ katjatibobö webidönö.

2 Timoteo 2:22

Jejenö jo̧be Timoteo, jo̧kwajabetjö̧ baikwö wetakwö: Möayedö sulabenö tjösödi̧tjö 'da̧bachibö döbibaji, ja̧danö ju'wida isakwi, otiwi̧ jawada. Jau ju'wida isakwö kwö̧jobö jo̧be, sulabe jwiinö kwö̧jobö, ja̧danö Dios yöawi̧ kwösödobö, ja̧danö jojodönö kwösödobö, ja̧danö wene jwiinö kwö̧jobö. Tjomajadenö bakwainö otiwadöma jejenö tjö̧jobö isakwadö Timoteo, ja̧danö ökwöbi jejenö kwö̧jobö kwisakwo.

2 Timoteo 2:23

Ja̧danö kwöwaisa Timoteo, jojodö wajwibö omukwatökönö yötja̧lakwawi̧ma, Aaa, biya̧daena, ju'widaena, jö̧ba̧lö yötja̧lakwawi̧ma mikwawokobe, sule jojodö jwöjwötjakwawobö ja̧i̧ ji̧, ¿jö̧tö? Jo̧kwajabetjö̧ ja̧ jaye yöa̧lakwawama kwöpöjödo, jojodökwö jwöjwöbakwawö kwö̧japji jö̧ba̧lö.

2 Timoteo 4:4

Ja̧danö isabenö wene yöawakwawa a̧ja̧kwö kabatibö, böjȩ jojodö tja'dödöminetjö tja̧ja̧kwina jawada ösödö tjö̧jakobe.

Tito 1:1

Tito, böja kwialusöjanö ötjö Pablo mikwo̧ma wȩyudö wetakwö. Ötjöma Dios ömöayo̧sa, ja̧danö Jesucristo webawo̧sa. Ötjöma Dios 'da̧batö ujuninökwesa, Dios omudawö ujuninawö̧nö pjabatö chöba̧ja̧do jö̧ba̧lö. Ja̧danö, jobadönö chöba̧ja̧dobe, jwaikwöda Dios yöawi̧ tjösödakobetjö̧. Ja̧danö, isabenö wene tjöwaisakobetjö̧ chöba̧ja̧dadönö. Ja̧danö, Dios ösödi̧danö ja̧bö tjö̧jakobetjö̧ chöba̧ja̧dadönö.

Tito 1:14

Ja̧danö, judío jojodö tja'dödö yötjawina jawa mikwa jwii̧ jawama tja̧ja̧kwoko, ja̧danö isabenö wene öpöjödadö wetji̧ tja̧ja̧kwoko.

Tito 3:9

Ja̧ jawa yöbawi Tito, jo̧kwaijayonö ju'wedö mikwa jwii̧ jawa jwöjwötjakwawi̧ma jwöjwöbökönuwi. Ju'wedöma jwöjwöbakwawadö, Aaa, ötjötjö ajayinö ji̧nadöma bidö, bidö, jö̧ba̧lö. Ja̧danö, ju'wibi ölakwabikwawö jwöjwöbakwawadö Moisés iwȩyudina weawa jawama. Ja̧ jawa jwöjwötjakwawi̧ma mikwawa jwii̧, ja̧danö jojodönö pjaatakwawa jwii̧, jo̧kwajabetjö̧ jwöjwöbökönuwi ja̧ jawama.

Hebreos 13:9

Isabenö, chömöledö ajayinö Jesúsnö, bakwo̧danö yöbawinadö yötjawina kwomukwataduwo. Babe mölema ju'wedö ba̧jekwadö jelobekwö omukwatö yötjawi̧ma jo̧be, ju'wi jawabi, ju'wi jawabi. Ja̧danö, jelobekwö omukwatö yötjawobe, Moisésnö weina a̧ja̧kwö dö̧jobö jo̧be, dukwobö wei̧ma, jö̧ba̧lö. Ja̧danö, Moisésnö weina kwukwaduwobö a̧ja̧kwö kwö̧jaduwitjö̧ma juluwachibanö kwi̧'yaduwena kwo̧'wo̧ luwo̧duwinö, jö̧ba̧lö, jelobekwö omukwatö yötjawobe. Chömöledö, kwakwawamaökö ökwödönö do̧'wo̧ luwo̧nö juluwachibanö kwi̧'yaduwoböma, Dios jawada. Diosma ökwödönö pjabatö lȩlö̧jino edobetjö̧ do̧'wo̧ luwo̧nö juluwachibanö di̧'yobe. Chömöledö ju'wedö jelobe omukwatö yötjawi̧ma öpöjödaduwi. Ajayinö yöbawinadö Jesúsnö isabenö ji̧ yötjawinada omukwatö kwuju̧kwaduwo.

2 Pedro 1:16

Chömöledö, ökwödönö Duluwo̧ Jesucristo iteda ujulu i̧sebö ichakwa̧ wene yödawijatö, ¿jö̧tö? Jau chömöledö, Jesús yemidanö ichakwa̧ yödawijatö, ja̧danö jejenö yödawenama, jojodö omöna yötjawi̧dama yödawinokobe chömöledö. Jau chömöledö, isabenö duluwo̧ Jesucristo ujulu waisadösa, ja̧danö Jesucristo inesö ujulu döbajalenö edinadöda yödawijatö chömöledö.