1 Samuel 19:18 - Dios Iwene

¹⁸ Ja̧danö, Saul ö̧jelö döbibajo̧, Davidma Saultjö ö̧jibinobe, ja̧danö Samuelnö edö i̧'yinobe Rama comunidadbe. Jobe ichibö, Samuelnö yöawinobe okobe jwiinö Saul jo̧banö ja̧aja̧ma. Ikenama Samuelbi, Davidbi Rama comunidadtjö Naiot ötjabobe ja̧nö tji̧'yinobe.

1 Samuel 19:18 Iomraidhean Croise

Santiago 5:16

Isabenö yötawaduwakwö. Jojodö atjebiökwe pjabato̧ Duluwo̧ma, ö'wöchadönö tjö̧bibajinö pjabatöbi, sulabenö ja̧tji̧ yöbawö lobadö tjusuli̧ söbebö loböbi. Jo̧kwaobetjö̧ chö̧ja̧wo̧dö suli̧ ja̧köbaduwi̧ma yökawakwawaduwo ökwödödada. Ja̧danö, ökwödödada Diosnö akebakwawaduwo kwö̧bibaduwinö pjaatobö. Isabenö, bakwo̧ Dios ösödi̧danö ja̧bö jo̧ma Diosnö aebena, Pjabati, jö̧ba̧lö, Diosma iteda ujulunö pjaatobe.

1 Samuel 1:19

Jemi ikena möle, Elcanabi ömöledöbi yȩayi ala̧ibö yemidanö Isabenö Jo̧ öba a'otjö bȩbachibö tjösödinobe, ja̧danö ösödajadö, tjitebo Ramabe tjȩwa̧jinobe. Ja̧danö, Elcanama ilekwo Anakwö ö̧jinobe, ja̧danö Isabenö Jo̧ma Ana ajebina omukwatö metu'wo jö̧jobö weinobe,

1 Samuel 15:34

Ikenama, Samuelma itebobe ȩwa̧jinobe, Rama comunidadbe, ja̧danö Saulbi itebobe ȩwa̧jinobe, Guibea comunidadbe, Saul itebo Guibea jö̧ba̧lö ötjabobe comunidadbe.

1 Samuel 19:19

Ja̧danö, ju'wedö Saulnö yötjawinobe, —Davidnö tjedajabe, jo̧bama Samuelkwö Rama comunidadnö ö̧jobe, Naiot ötjabobetjö, —jö̧ba̧lö.

1 Samuel 19:22

Jejenö balediökwe, bajalianö Saulda Ramabe i̧'yinobe, ja̧danö Ramabe 'ya̧nö, ojwese'do nöe'do Secu ötjabe'do ö'öbö ichibinobe. Jobe ichibajo̧, jemi ju̧kwadönö abebö a̧ja̧kwinobe, —Samuelbi, Davidbi dai tjö̧jobeda, —jö̧ba̧lö. Ja̧danö abebö a̧ja̧kwawö bakwo̧ atadinobe, —Yada tupakwö Rama comunidadtjö Naiotnö tjö̧jobe, —jö̧ba̧lö.

1 Samuel 19:23

Yöawökwe, Saulma jobe Rama comunidadtjö Naiotbe i̧'yinobe, ja̧danö i̧'yemi ja'ötjö, Dios O̧'wo Luwo̧ma jo̧banöbi ichibinobe, ja̧danö jo̧babi Dios yöawi̧ yöbawö kweachinobe, Rama comunidad Naiotbe ichibenanö baibanö.

1 Samuel 20:1

Jejenö Davidnö isakwö Saul ichibiökwe, Davidma Rama comunidad Naiot ötjabobetjö döibajinobe. Döbibajo̧, Jonatan ö̧jobekwö 'ya̧nö, Jonatannö abebö a̧ja̧kwinobe, —Taji ja̧tinada, kwabe'dö ötjönö öpöjödobö? Kwabe'doma ötjönö kwabö loobö isakwobe, jo̧banö sulabenö ja̧tinama di̧yada, jo̧banö sulabenö ja̧tinaji̧? —jö̧ba̧lö.

1 Samuel 21:11

Ja̧danö, jejenö ichibiawö̧, Aquis ömöayedöma tjöpöjödinobe, —Biteda ökwödönö kwawabö lobina, —jö̧ba̧lö. Ja̧danö tjuluwo̧ Aquisnö yötja̧linobe, —Bitema David mikwo̧, israel niji la'aka luwedötjö bakwo̧, ¿jö̧tö? Jo̧ba Davidnöda israel jojodö lo̧tjökwe, Saul milbedönö kwabawö lobo̧, ja̧danö Davidma diez milbenönö kwabawö lobo̧ jö̧ba̧lö ösödö, baile 'döbö lo̧tjökwe. Jo̧banö kwösödoko, kwömöayo̧ baibobö duluwo̧, —jö̧ba̧lö yötja̧linobe Aquisnö.

1 Samuel 28:3

Ja̧ mölema, tupakwö baledakwa̧ yöbawo̧ deinobe, Saul abebö a̧ja̧kwobö. Dios weinadanö, Saulma okobe deinö mea bobadönö israel nijitjö a'dewö loinobe, Dios öpöjödi̧nö ja̧badö jö̧ba̧lö, wobinadönö yöba̧ladö ötjabawö̧nöbi, tupakwö baledakwa̧ yöbawadö ötjabawö̧nöbi, Dios weinadanö a'dewö. Ja̧danö ju'wibi, ajayinö Saul otiwanö abebö a̧ja̧kwinökwe Dios yöawi̧ yöbawo̧ Samuel mikwo̧ma, ö'wö baibinobe, ja̧danö okobe deinö israel jojodöma ko̧ko̧kwö, Samuel itebo Ramanö tjo̧tjinobe Samuelnö. Jo̧kwajabetjö̧, Samuelnöbi abebö a̧ja̧kwobö jwiinobe, ida̧ökö ö'wö baibinobetjö̧.

1 Samuel 7:17

iteda ejube ȩwa̧jiainobe, Rama comunidadbe. Ja̧danö, jobe Ramatjöbi israel jojodönö jwebebö yöbawiainobe Samuelma, ja̧danö ju'wibi Ramatjö Isabenö Jo̧nö iyawöte mesasöte otidö ujuninobe Samuelma, jobe Ramatjö Diosnö kwabö juwö iyobö.