1 Samuel 16:5 - Dios Iwene

⁵ Atjebökwe, —Jau, wene jwia, Isabenö Jo̧nö kwabö juwö chichajabe. Ökwödöbi Diosnö iyawa ba'ali kwanö kwichaduwo, jo̧kwajabetjö̧ Dios öba a'o tjichibakwedö tjidichawi̧danö otiwanö wame jawa kwusuladuwi dichawö loköbaduwo, otiwanö Dios öba a'otjö ba'ali kwukwaduwakobetjö̧, —jö̧ba̧lö atadinobe Samuelma. Ja̧danö Samuelma Isainöbi, i̧tji̧munöbi wame jawa tjusula dichö loinobe, ja̧danö Diosnö iyawa ba'ali tjukwobö a̧debinobe.

1 Samuel 16:5 Iomraidhean Croise

Génesis 35:2

Jejenö weökwe Jacobma ömöledönö, ja̧danö okobe deinö jo̧bakwö ȩwa̧jadönö yöbawijetö: —Ökwödöma Betelbe dȩwa̧ja̧kobe, Diosnö ösödö. Jo̧kwaobetjö̧ dȩwa̧ja̧kwa̧ abönö okobe jwiinö jelobetjö o̧'wo̧ jawa kwichejebinawö̧duwi̧nöma loköbaduwobö jo̧be. ¡Loköbaduwodönö! Loköbaja̧duwa ikena ojwe kwibaduwo Dios öba a'otjö otiwanö dewadöda kwö̧jaduwobö. Kwibaja̧duwa ikena kamijido̧ balekwa̧do, dewado̧ 'dukawaduwo. Jemi ikenama Betelbe dȩwa̧jaduwo. Jobe ichibö juwö iyawemi chotidocha, Diosnö ösödö juwö iyawemima. Jo̧bama ajayinöma ötjönö pjaatinobe jwiinö cho̧'wo tjo̧bekwö, yebabinö chö̧jena. Ja̧ möletjö̧ babe möle ichibenanö jo̧bama ötjökwö jo̧, okobe jwiinö kwetachobema— yöbawijetö Jacobma.

1 Reyes 2:13

Jemi ikenama, baikwö baledinobe: Adoniasma Solomon ojo'do Betsabenö yöa̧lobö ichinobe. Ichibioko, abebö ja̧ja̧kwinobe, —Kwichaja̧ma, wene jwöbebökönö kwichaji̧? —jö̧ba̧lö abebö ja̧ja̧kwökwe, —Jau, wene jwia, —jö̧a̧linobe.

1 Crónicas 12:18

Jobekwö yöa̧liökwe, Dios O̧'wo Luwo̧ma treintabedötjö luwo̧ Amasai mikwo̧kwö ichibinobe, ja̧danö Dios O̧'wo Luwo̧ weonö yöa̧linobe: —Duluwo̧ Isai itji̧ David, ökwödöma ökwöda kwömöledösa, isabenö ökwönö pjadatobö jö̧ba̧ladösa. Jau David kwuluwo̧ Diosma isabenö ökwökwö pjabatö jo̧, jo̧kwajabetjö ökwönöbi, okobe deinö ökwönö pjabatadönöbi Dios pjaatobö dösöda, —jö̧ba̧lö atadinobe Amasaima. Ja̧danö, jobekwö yöa̧liökwe, ösödinobe Davidma, ja̧danö jo̧bakwö batjibobö weinobe, ja̧danö jobadönö ujuninobe, iteda ömöayedö ölakwabikwawa jojodötjö luwedö batjibanö.

Diosnö ösödo̧ Job mikwo̧ usula emawina jawa 1:5

Jejenö ja̧biatjinobe Job itji̧muma, ja̧danö ba̧kwelöjatebö ba'ali tjujuni̧ mölebiya 'dö̧ibajenama, ikena möle ina yeayi a̧la̧ibinobe Jobma, ja̧danö itji̧mu bakwo̧nökwena tjusula dichö lootö jö̧ba̧lö, iyawa bakwonökwena kwabö juwö, jwiinö ubinö iyawa baibanö iyinobe Diosnö. Jobma omukwatinobe itedada, —Chitji̧muma Dios öpöjödi̧nö sulabenö ja̧tja̧jena, ja̧danö tjomajadenö sulabenö Diosnö tjomukwatajena, —jö̧ba̧lö omukwatinobe, ja̧danö jejenö omukwatö, iyawa kwabö juwö iyiainobe Diosnö, —Chitji̧munö tjusula söbebö loköbobö atebakwö, —jö̧ba̧lö.

Éxodo 19:10

Ikenama Isabenö Jo̧ma webijetö Moisésnö: —Yemidanö yutubaji̧ jojodönö pjakato babe mölebi itekwayibi otiwanö tjotikwo, ja̧danö tjö̧kamisibi tjidicha̧lo.

1 Corintios 11:28

Jo̧kwajabetjö̧, ökwödöma bakwo̧nökwena ökwödöda kwomukwataduwo, jweinö omukwatö kwukwojobö, kwowojobö jö̧ba̧lö. Jemi ikenama, ja̧ pan kwukwaduwo, ja̧danö kwowaduwo, Duluwo̧nö omukwatö.

Josué 3:5

Ja̧danö Josuema jojodönö weinobe, —Isabenö Jo̧ öba a'o tjichibakwedö tjidichawi̧danö, wame jawa kwusuladuwi babe dichawö loköbaduwo, itekwayi möle Isabenö Jo̧ma kwö'da̧deduwitjö kwöbajaleduwi jalaka baibanö iteda ujulu i̧sȩbakobetjö̧, —jö̧ba̧lö weinobe.

Josué 7:13

Jo̧kwajabetjö̧, a̧la̧ibö, chöba a'o tjichibakwedö tjidichawi̧danö, wame tjusula jojodö dichawö lotjobö webi. Jojodönö baikwö weköbo: –Ökwödö Dios öba a'o kwusuladuwi̧ dichawö loköbaduwobö jo̧be, itekwayi öba a'o kwichibaduwobö. Jau, baikwö yöawobe Isabenö Jo̧ Israel jojodö tjuluwo̧ Diosma: Dios söbebö loköbaduwobö weina jawama, ökwödö israel jojodö kwö̧'da̧deduwi ina jo̧be. Ja̧danö baikwö yötawaduwakwö ökwödö israel jojodönö, la'akatjöda kwöpöjojodönö kwujuluwaduwobö jwiakobe, söbebö lobaduwi jö̧ba̧lö wetina jawa, kwö̧'da̧deduwitjö söbebö loköbaduwenanö baibanö, –jö̧ba̧lö ökwödönö yöawobe Isabenö Jo̧ma.

1 Samuel 20:26

Jo̧kwaijayonö David deijayonö, ja̧ ajayi mölema abebö a̧ja̧kwinokobe Saulma, baikwö omukwatö: —Aaa, babe möle ju'wi otidajabetjö, usula yȩekwajena, Dios öba a'o ichibobö jwienanö. Itekwayi Dios öba a'o tjichibakwedö tjidichawi̧danö, wame jawa usula dichö loaja̧ ikenada ichena, —jö̧ba̧lö.