Jo̧kwaijayonö ajayinö ina jelö labeibö tjȩwa̧ja̧pjii, Padan-aramnö ina tjö̧jena baikwö baledijetö: Raquelma jabe'do Labán, iteda a̧jwi̧mu o̧bȩja̧dö tjöwö'ye 'wibö i̧'yajabe okobe, jo̧ba ejube tebachibö naukwijotö jabe'do o̧'wo̧ öwa̧na̧lawö̧nö, tjotidinawö̧nöma. Ja̧danö, ju'wedö wajwitjonö naukwijotö, e'ewö jȩwa̧ja̧kwawö̧nö.
1 Samuel 15:23 - Dios Iwene23 Jau Saul, Dios edemi Dios wei̧ öpöjödakwawama, mea boawadanö bakwaiobe, ja̧danö Dios edemi, Dios wei̧ a̧ja̧kwökönö ja̧awama, sulabenö o̧'wo jawa ösödakwawadanö bakwaiobe. Jo̧kwajabetjö̧ baikwö yötawakwö Saul, Isabenö Jo̧ wei̧ kwa̧ja̧kwobö kwöpöjödiökwe, israel jojodö la'aka tjuluwo̧ kwö̧joböbi öpöjödachibajabe Isabenö Jo̧ma, —jö̧ba̧lö yöawinobe Samuelma Saulnö. Faic an caibideil |
1 Samuel 15:23
36 Iomraidhean Croise
Jo̧kwajabetjö̧, tajawedö ötjö Isabenö Jo̧ weti̧ kwöpöjödinada? Tajawedö sulabenö chöpöjödi̧ jawa ja̧köbinada? Isabenö chöpöjödinö ja̧köböbajabetija David, ilekwonö kwemotö jö̧ba̧lö, hitita jojo Uriasnö kwabö loköbijatö. Jau David, amonitas ölakwabikwawa jojodönötjö̧, ökwöda Uriasnö kwabö loköbijatö, ja̧danö kwabö lobajo̧, jo̧ba ilekwonö kwemijatö, kwilekwo bajibanö.
Jo̧kwaijayonö, jo̧banö jwebebö kwatijayonö, la'akatjöda le'dedö lötökakwo̧ kwitji̧nöma, damötjö Saulminenö le'dedö lotinadanöma, ba̧kwelöjatebö jo̧banö ösödabikwawö chö̧jakwo̧sa. Jau David, damötjö Saulnö le'dedö lobö, la'aka luwo̧ ö̧jemi 'dötebijatö, ökwöda ö̧jinemi kwö̧jobö, jo̧kwaijayonö la'akatjöda ja̧tökakwo̧sa kwitji̧nöma.
Saul jobekwö ö'wö baibina, —Tajawedö ö'wö baibinajö, —jö̧ba̧lö labebö loawama baikwö laebobe: Otiwanö Isabenö Jo̧ wei̧ a̧ja̧kwö ö̧jo jö̧a̧linajayonö, Saulma a̧ja̧kwökönö sulabenö ja̧inobe. Ju'wibi, Isabenö Jo̧ Diosnöda abebö a̧ja̧kwo jö̧a̧linajayonö, filisteo jojodökwö ölakwabikwawakwa̧ jawa öwaisachibobö jö̧a̧lenama, Diosnö abebökönö, ö'wö babibajadökwö yöba̧lujunöda abebö a̧ja̧kwinobe, sulabenö. Ja̧danö, jobekwö sulabenö ja̧iökwe, ö'wö baibobö weinobe Isabenö Jo̧ma, ja̧danö Saul la'aka luwo̧ ö̧jinemi, balekwo̧ Isai itji̧ David mikwo̧nö ujuninobe, Davidda Israel jojodötjö inesö la'aka luwo̧ ö̧jakobetjö̧.
Ja̧danö, ökwö chitji̧ Salomonnö baikwö yötawakwö: Ötjö kwabe'dö chösödökwe Diosnö otiwanö kwöwaisobö kwisakwo, ja̧danö jwaikwöda okobe jwiinö kwomajadenö, öpöjödökönö jo̧ba wei̧ ösödö a̧ja̧kwö kwö̧jo. Jau chitji̧, Isabenö Jo̧ma okobe deinö tjomajade okwanö tjomukwati̧ edö waiso̧, ja̧danö okobe jwiinö omukwatö tjujuni̧ jawama, öwawinö edö waiso̧. Ja̧danö, jo̧banö kwisakwitjö̧ma, kwöbadekwajobö weakwo̧ chitji̧, jo̧kwaijayonö jo̧batjö 'da̧bachibö kwi̧'yitjö̧ma, ökwönö kabatibö ikwö loakwo̧, ba̧kwelöjatebö loawa baibanö.
—Egipto jojodö waisanö omukwatö tjujunaja̧ma waekwobö wetocha, ja̧danö waekwiawö̧, tjo̧'wo tjo̧bekwö tjö̧jakwedö, –Ayö, dakwö ja̧dakwajö, –jö̧ba̧lö. Ja̧tjakwa̧ tjöwaisachibotö jö̧ba̧lö, o̧'wo jawa tjösödawö̧nöbi atjebakwedö, jadanö ö'wö babibinadö tjo̧'wo luwo̧nö abebö tja̧ja̧kwotö jö̧ba̧lö, mea boawa otidadönöbi, ju'wedö ö'wö babibinadö tjo'wo luwo̧nö yöbaladönöbi abebö tja̧ja̧kwakwedö.
Ja̧danö chömöledö, wene baledi̧ edö, ju'wedöma ökwödönö wetjena: —Ö'wö babibinadö tjo̧'wo luwokwö yöa̧lakwawa jojodönöbi, ju'wedö debö 'yi̧nadökwö seboba̧lö yöa̧lakwawa jojodönöbi abebö kwa̧ja̧kwaduwo, tupakwö baledakwa̧ yötjawakobetjö̧, —jö̧ba̧lö. Jo̧kwaijayonö baikwö abebö cha̧ja̧kwaduwakwö, —Jojodöma idöda tjösödökwe Diosnö abebö tja̧ja̧kwobö jwienaji̧? Ja̧danö ina 'yaba̧ladö tjö̧ji̧ jawa tjöwaisakobetjö̧, isabenö 'debö 'yi̧nadönö abebö tja̧ja̧kwobö jȩnaji̧? Ja̧maökö chömöledö, tjösödökwe Diosnöda abebö tja̧ja̧kwobö jo̧be.
Ikenama ju'wi möle, Diosma kabatibijetö Saúlnöma, balekwo̧nö 'da̧batö junö, David mikwo̧nö. Ja̧danö, Diosma Davidnö ösödö jö̧ba̧lijetö: Bite David, Jesé itji̧ma, ötjö chösödinö omukwatö jo̧. Ötjö chösödi̧danö okobe jwiinö ja̧bö jo̧, jö̧ba̧lö laebobe Dios iwenetjö, Dios Davidminenö yöa̧lina— yöbawijetö Pabloma.
Diosnö ösödakwawejutjö, Diosböködö o̧'wo̧ jawa tjösödobö ¿Diosma weenaji̧? Kwöwaisaduwa chömöledö, jejenömaökö, ¿jö̧tö? Jau chömöledö, isabenö Cristonö öpöjödadökwö bakibaduwoko, ökwödö Cristonö ösödadöda 'yaba̧lo̧ Dios ejubedö dö̧jobetjö̧. Jau chömöledö, isabenö Dios eju babibinadösa, Dios iwene laebi̧danö. Baikwö laebobe Dios iwene chömöledö Dios yöawinama: Ötjöma ötjö chömöledö tjo̧'wo̧ luwo̧nö chö̧jakwo̧sa, ja̧danö jobadö tjö'da̧de kwetachocha, ja̧danö ötjöma jobadö tjuluwo̧ Dios chö̧jakwo̧sa, ja̧danö jobadöma ötjö chömöledö tjö̧jakwedö, jö̧ba̧lö laebobe.
Tupakwö yöawinobe Moisesma, israel jojodönö: —Jau chömöledö, isabenö kwuluwo̧duwi Isabenö Jo̧ Dios ödameakwobö sulabenö ja̧badöja. Kabatökönö Isabenö Jo̧ wei̧ öpöjödö ji̧nadöja, Egipto nijitjö lakebinaduwelö baikwö bemi nijibe dichibenanö kabatö. Ja̧ wene isabenö kwomukwataduwobö jo̧be chömöledö, kwo̧'wo jwibibö, –Aaa, otiwadösa, –jö̧ba̧lö kwomukwataduwapji jö̧ba̧lö.
Jo̧kwaijayonö jejenömaökö ju'wedönöma. Yebabinö, ¡Ayö! Diosnö chösöditjö̧ma inia tjötinö baledena, jö̧ba̧lö, yebabo̧danö yebabinadönöma otiwi̧ma chiyökakwo̧sa. Ja̧danö, Diosnö kabatibinadönöbi, ja̧danö, sulabedökwö pjabacha̧linadönöbi otiwa jawama chiyökakwo̧sa. Jobadönö ökwöla nöola okwa lotakwo̧sa. Ja̧danö, tji̧lȩkwa̧muböködökwö sulabenö ja̧binadönöbi, ja̧danö, jojodönö kwabö lobinadönöbi, ja̧danö, mea bobinadönöbi, ja̧danö, ju'wedö tjo̧'wo̧ tjöwana̧lobö tjotidinökwenö tjo̧'wo̧ wana̧linadönöbi, ja̧danö, bakwelajatebö omöna yöba̧linadönöbi, jobadönöma ökwöla nöola okwa lotakwo̧sa. Jobema jwiinö tubinö ubobe, azufre mikwi̧ tubi̧ma. Joola okwa lotji̧ma, 'dö̧ibaji̧ woawa mikwemi, jö̧ba̧lö weijatö Diosma ötjönöma, chiwȩyudobö.
Jo̧kwaijayonö ju'wedöma tetjachökakwedö. Jobadöma 'yayi̧ Jerusalén comunidad ö'öböda tjuju̧kwakwedö, sulabedöma. Jobadöma mea bobadöbi, tji̧lȩkwa̧muböködökwö sulabenö ja̧döbi, jojodönö kwabawö lobadöbi, jojodö tjotidina tjo̧'wo̧ jawa tjo̧'wo̧ wana̧ladöbi, omöna yöba̧lö ja̧döbi. Jobadöma tetjachökakwedö— jö̧a̧lijatö Jesúsma.
Jo̧kwaijayonö, a̧ja̧kwökönö kwö̧jiökwe, israel jojodö la'aka luwo̧ kwö̧ji̧ma, lekwema kwö̧jö̧kakobe. Isabenö Jo̧ma iteda omukwati̧danö omukwato̧nö isakwajabe, ja̧danö jo̧banö weajabe, ökwö kwö̧jo jö̧ka̧lemi jo̧bada iteda ömöledö israel jojodö tjuluwo̧ ö̧jobö. Ökwöma Dios wei̧ a̧ja̧kwökönö kwö̧jiökwe, Isabenö Jo̧ma balekwo̧nö kwö̧jemi ö̧jobö weobe, —jö̧ba̧lö yöawinobe Samuelma, Saulnö.
Jemi ikenama, ja'yubenö lekwajabetjö̧, Isabenö Jo̧ma Samuelnö yöa̧linobe: —Samuel, ida̧ökö Saulnö öpöjödö yöta̧lajabe, Saulma chömöledö israel jojodö tjuluwo̧ ö̧joböma chöpöjöda jö̧ba̧lö, ¿jö̧tö? Jo̧kwajabetjö̧, dokwa lekwe ina Saulnö o̧'wo tjo̧achö kwubudekwakwa̧da? Tjowi, budekwö kabati. O̧te tobebi i̧sa̧yunö, ja̧danö jayu e'ewö Belen jojo Isai ö̧jobekwö 'ya̧wi, jo̧ba itji̧mutjö bakwo̧nö omudawö chujunajobetjö̧, israel jojodö la'aka tjuluwo̧ baibobö, —jö̧ba̧lö.
Tupakwö yöawinobe Dios yöawi yöbawo̧ma Elinö: —Jo̧kwajabetjö̧, jejenö sulabenö ja̧köbaduwitjö̧, baikwö yöawobe Isabenö Jo̧, israel jojodö tjuluwo̧ Diosma, Isabenö yöbawö chujunijatö kwömöledönö, Aaronbi, i̧tji̧mu tupadanö jojodöbi ba̧kwelöjatebö chöba a'otjö weti̧ otidö tjö̧jakwedö jö̧ba̧lö, jo̧kwaijayonö baikwö yötawakwö, la'akatjöda ja̧ wene badekwachökakobe ökwödönö, baikwö yötawa: Ötjönö otiwanö omukwatö ju̧kwadönöma, ötjöbi balekwa mikwa otiwanö jobadönö omukwatö chö̧jocha, ja̧danö ötjönö öpöjödadönö, ötjöbi balekwa mikwa chöpöjödocha jö̧ba̧lö. Ja̧danö ökwödöma ötjönö otiwanö omukwatökönö kwöpöjödaduwobetjö̧, Aaronnö yöbawö chujuninama ökwödönö badekwachökakobe la'akatjöda.
Ja̧ mölema, tupakwö baledakwa̧ yöbawo̧ deinobe, Saul abebö a̧ja̧kwobö. Dios weinadanö, Saulma okobe deinö mea bobadönö israel nijitjö a'dewö loinobe, Dios öpöjödi̧nö ja̧badö jö̧ba̧lö, wobinadönö yöba̧ladö ötjabawö̧nöbi, tupakwö baledakwa̧ yöbawadö ötjabawö̧nöbi, Dios weinadanö a'dewö. Ja̧danö ju'wibi, ajayinö Saul otiwanö abebö a̧ja̧kwinökwe Dios yöawi̧ yöbawo̧ Samuel mikwo̧ma, ö'wö baibinobe, ja̧danö okobe deinö israel jojodöma ko̧ko̧kwö, Samuel itebo Ramanö tjo̧tjinobe Samuelnö. Jo̧kwajabetjö̧, Samuelnöbi abebö a̧ja̧kwobö jwiinobe, ida̧ökö ö'wö baibinobetjö̧.
Sanasan