1 Samuel 15:11 - Dios Iwene

¹¹ —Saulnö israel jojodö tjuluwo̧ baibanö omudawö chujunina omukwatö, cho̧'wo tjo̧achobe Samuel. Ajayinö Saulma otiwanö weti̧ a̧ja̧kwinobe, jo̧kwaijayonö ja̧ a̧ja̧kwö ö̧ji̧ kabatibö, weti̧ a̧ja̧kwökönö ja̧bö ö̧jobe, jo̧kwajabetjö̧ jo̧banö omudawö chujunina omukwatö cho̧'wo tjo̧achobe, —jö̧ba̧lö. Yöawökwe, Samuelma jwiinö o̧'wo tjo̧ekwinobe, ja̧danö yö̧te baledibanö budekwö aebinobe Isabenö Jo̧nö.

1 Samuel 15:11 Iomraidhean Croise

Génesis 6:6

Edinö omukwatijetö, tajawedö chotidinawö̧jö, la'akatjöda chotidinökötjö̧bö, jö̧ba̧lö. Jwiinö o̧'wo tjo̧bekwibö omukwatijetö, chotidinawö̧ma sulabedö babibinadöwe, jö̧ba̧lö.

Génesis 6:7

Jejenö o̧'wo̧ tjo̧bekwö omukwatö: —Böjȩtjö söbebö lotakwo̧sa ötjö chotidinawö̧nö, jojodönöma. Isabenö sulabeda omukwatö tjö̧jitjö̧ jwiinö cho̧'wo̧ tjo̧bekwo̧sa, sulabedöwe, la'akatjöda chotidinökötjö̧bö, jö̧ba̧lö. Ja̧danö, a̧ji̧kwakwawedönöbi, nijinö töbawadönöbi, mö köba̧lö ju̧kwadönöbi sobebö lotakwo̧sa, okobe deinö— jö̧ba̧lijetö Isabenö Jo̧ Diosma.

2 Samuel 24:16

Ja̧danö, weökwe kwabawö lobo̧ angel Jerusalenbe ichibö, jojodö tjö'wöchinö kwabawö loobö ichibenama, Isabenö Jo̧ma lȩlöinö edö, angel kaatakwawobö weinobe, —Tjo̧wita, kwabawö lobö kabatakwawi, —jö̧ba̧lö. Ja̧danö jejenö weenama, Isabenö Jo̧ weökwe angelma jebuseo jojo Arauna eju, trigo sula'wo chabö loawejunö ö̧jinobe.

1 Reyes 11:9

Jejenö ja̧iökwe, jwiinö ödameakwinobe Isabenö Jo̧ma, Salomonnöma. Damötjö Israel jojodö tjösödökwe Isabenö Jo̧ Diosma dötölatajanö öwawachö yöawinobe Salomonnö, ja̧danö jweinö jo̧banö weinobe, —Ju'wedö tjösödawö̧nö ösödökönö, jwaikwöda Diosnöda kwösödobö jo̧be, —jö̧ba̧lö. Jo̧kwaijayonö jejenö öwawachö weinajayonö, pöe baibenama, a̧ja̧kwökönö, Diosnö otiwanö ösödi̧ kaatibinobe Salomonma, jadanö kaatibiökwe, jwiinö ödameakwinobe Diosma.

1 Crónicas 10:13

Saul jobekwö ö'wö baibina, —Tajawedö ö'wö baibinajö, —jö̧ba̧lö labebö loawama baikwö laebobe: Otiwanö Isabenö Jo̧ wei̧ a̧ja̧kwö ö̧jo jö̧a̧linajayonö, Saulma a̧ja̧kwökönö sulabenö ja̧inobe. Ju'wibi, Isabenö Jo̧ Diosnöda abebö a̧ja̧kwo jö̧a̧linajayonö, filisteo jojodökwö ölakwabikwawakwa̧ jawa öwaisachibobö jö̧a̧lenama, Diosnö abebökönö, ö'wö babibajadökwö yöba̧lujunöda abebö a̧ja̧kwinobe, sulabenö. Ja̧danö, jobekwö sulabenö ja̧iökwe, ö'wö baibobö weinobe Isabenö Jo̧ma, ja̧danö Saul la'aka luwo̧ ö̧jinemi, balekwo̧ Isai itji̧ David mikwo̧nö ujuninobe, Davidda Israel jojodötjö inesö la'aka luwo̧ ö̧jakobetjö̧.

1 Crónicas 21:15

Ja̧danö, Diosma kwabawö lobo̧ angelnö weinobe Jerusalen comunidadbe i̧'yobö, Jerusalen comunidadnö ju̧kwadönöbi kwabawö loobö. Jo̧kwaijayonö, Jerusalenbe ichibö, jojodö tjö'wöchinö kwabawö loobö ichibenama, Isabenö Jo̧ma lȩlöinö edö, kwabawö lobo̧ angel kaatakwawobö weinobe, —Tjo̧wita, kwabawö lobö kabatakwawi, —jö̧ba̧lö. Ja̧danö jejenö weenama, Isabenö Jo̧ weökwe angelma jebuseo jojo Arauna eju, trigo sula'wo chabö loawejunö ö̧jinobe.

Diosnö ösödo̧ Job mikwo̧ usula emawina jawa 34:27

iteda wei̧ tja̧ja̧kwobö tjöpöjödobetjö̧. Jau, jobadönö weijayonö, mikwawökö ji̧ jö̧ba̧lö a̧ja̧kwö tjö̧jobö tjöpöjödinobe,

Éxodo 32:11

Jejenö yöawiökwe Moisésma Isabenö Jo̧nö, iteda ösödökwe Diosnö, budekwabinö abebijetö: —Isabenö Jo̧, ¿tajawedö kwo̧'wo sulinö kwedobeda kwömöledönö, Egiptotjö jwiinö kwujulunö latjebinö pjakatinawö̧nöma?

Éxodo 32:14

Ja̧danö, Isabenö Jo̧ma, iteda omukwati̧ kabatibö balewö lobijetö, ömöledönö söbebö lobökönö.

Mateo 24:13

Jo̧kwaijayonö chömöledö, jejenö sulabenö baledijayonö, tjo̧'wo̧ 'dibachibö baledadöma, isabenö tjö̧jibakobe.

Mateo 5:44

Jo̧kwaijayonö, baikwö yötawaduwakwö chömöledö: Kwöpöjojodönöbi kwösödaduwo, ja̧danö usula kwemawobö ja̧badönö Diosnö akebaduwo, jö̧ba̧lö yötawaduwakwö.

Lucas 6:12

Jemi ikenama ja'yubenö lekwajabetjö, Jesúsma mö'ösa'obe önöchinobe, jobetjö Diosnö aebobö, ja̧danö yö̧te baledibanö Diosnö aebinobe.

Hebreos 10:38

Ja̧danö ötjö chömöledö, Bidöma suli̧ jwibadö, jö̧ba̧lö, jö̧ta̧lawö̧ma ötjö yötawi̧ ösödö ja̧dö. Jo̧kwaijayonö jobadötjö ju'wedöma tjebachajö tji̧'yitjö̧ma cho̧'wo̧ tjo̧inö edö chö̧jena. Jejenö laebobe Dios iwenetjö.

Josué 22:16

—Okobe deinö ju'wedö Isabenö Jo̧ ömöledö Israel jojodöma baikwö adebaduwakwö, –Tajawedö sulabenö ökwödö israel jojodö dösödökwe Isabenö Jo̧ Dios wei̧ sulabenö kakatibinaduwa̧da? Bakwötetjöda jo̧banö diyobö weijayonö, tajawedö jelöte weököte sulabenö kwotidaduwinada? Jejenö ökwödö kwiyaduwakwöte otidö, sulabenö Isabenö Jo̧ wei̧ öpöjödadöja dömöledö.

1 Samuel 12:23

Tupakwö yöawinobe Samuelma, —Ja̧danö ötjöbi chömöledö, isabenö ökwödönö abebö katatoböma jwiobe, ökwödönö Diosnö abebö katatitjöma, isabenö sulabenö Isabenö Jo̧ öpöjödi̧nö katatena. Jo̧kwajabetjö̧ isabenö jwaikwöda Diosnö atebocha ökwödönö, ja̧danö ju'wibi kabatökönö ökwödönö ba̧ja̧dö chö̧jakwo̧sa, otiwanö jweinö ja̧kwawama.

1 Samuel 13:13

Jejenö atadökwe, Samuelma yöawinobe, —Isabenö omukwatö̧kö̧ omukwati̧danö sulabenö ja̧köbajabe Saul, Kwuluwo̧ Isabenö Jo̧ Dios weöködanö, a̧ja̧kwökönö sulabenö ja̧köbajabe. Ökwönö jweinö wei̧jayonö, a̧ja̧kwökönö ja̧köbajabe. Isabenö yötawakwö, isabenö jo̧ba wei̧ kwa̧ja̧kwatjö̧ma, ökwöda kwitji̧mu tupadanö jojodöma ba̧kwelöjatebö israel jojodö tjuluwedö tjö̧jobö weo jö̧a̧linobe Isabenö Jo̧ma.

1 Samuel 15:10

Jejenö Dios weinöködanö Saul ja̧iökwe, Isabenö Jo̧ma Samuelnö yöawinobe:

1 Samuel 15:3

Jo̧kwajabetjö̧ baikwö wetakwö, kwömöayedö ölakwabikwawa jojodökwö jobadö amalecita jojodönö kwabawö loköbaduwonö, jobadötjö bakwo̧bi ö̧ji̧bökönö. Okobe deinö amalecita jojodönö kwabö loköbo, ömadönöbi, ya̧dönöbi, tjemunöbi, i̧ya̧nö tjemajawö̧nöbi. Ja̧danö ju'wibi okobe deinö tjajwimunöbi kwabawö loköbo, pa̧ka̧yadönöbi, obejadönöbi, kameyudönöbi, bu̧lö̧dönöbi, jwaikwöda okobe deinö amalecita jojodönöbi tja̧jwi̧munöbi kwabawö loköbo, bakwo̧bi ö̧ji̧bökönö, —jö̧ba̧lö Dios wei̧ yöawinobe Samuelma Saulnö.

1 Samuel 15:35

Ja̧danö, jemi tupakwö Samuelma Saulnö edinokobe, ö'wö baibenanö kabatö. Ja̧danö, Saulnö edököjayonö, Saulnö omukwatö o̧'wo tjoachö ubudekwinobe Samuelma. Ja̧danö Isabenö Jo̧ma o̧'wo tjo̧achinobe, israel jojodö la'aka tjuluwo̧ baibanö Saulnö omudawö ujunina omukwatö.

1 Samuel 15:9

Ju'wedö jojodönö kwabawö lotjinajayonö, Saulbi, ömöayedö ölakwabikwawa jojodöbi la'aka luwo̧ Agag mikwo̧nö kwabö lotjinokobe, ja̧danö ju'wibi, tjajwimutjö otiwadönö kwabawö lotjoböma tjöpöjödinobe. Amalecita jojodö tjajwimu 'dalukadönö, ja̧danö ju'wedö tjöpöjödawö̧nö kwabawö lotjinobe, jo̧kwaijayonö tjajwimutjö inesö otiwadö, obejadönöbi, pa̧kayadönöbi, o̧tewadö ja̧danö ju'wedö tjösödawö̧nöbi kwabawö lobökönö, idöda tjajwimu batjibanö tjeminobe.

1 Samuel 16:1

Jemi ikenama, ja'yubenö lekwajabetjö̧, Isabenö Jo̧ma Samuelnö yöa̧linobe: —Samuel, ida̧ökö Saulnö öpöjödö yöta̧lajabe, Saulma chömöledö israel jojodö tjuluwo̧ ö̧joböma chöpöjöda jö̧ba̧lö, ¿jö̧tö? Jo̧kwajabetjö̧, dokwa lekwe ina Saulnö o̧'wo tjo̧achö kwubudekwakwa̧da? Tjowi, budekwö kabati. O̧te tobebi i̧sa̧yunö, ja̧danö jayu e'ewö Belen jojo Isai ö̧jobekwö 'ya̧wi, jo̧ba itji̧mutjö bakwo̧nö omudawö chujunajobetjö̧, israel jojodö la'aka tjuluwo̧ baibobö, —jö̧ba̧lö.

1 Samuel 8:6

Atjebökwe, Samuel öpöjödinobe, —Inesö la'aka duluwo̧nö kwujuno, jo̧bada jwebebö yöawobö, —jö̧ba̧lö atjebaja̧ma. Jo̧kwajabetjö̧, Samuelma Isabenö Jo̧nö abebö a̧ja̧kwinobe, dakwö weojobö jö̧ba̧lö.