1 Samuel 11:1 - Dios Iwene

¹ Jemi ikenama, ja'yubenö lekwajabetjö, amonita jojodö la'aka luwo̧ Nahas mikwo̧ma iteda ömöayedö ölakwabikwawa jojodökwö israel niji̧be ichö, israel niji comunidad Jabes de Galaad jojodönö ujuluwobö ichinobe. Ichibö, comunidad tjötjösawibö tjö̧jinobe, ja̧danö tjötjösawiawö̧, Jabes jojodöma Nahasnö atjebinobe, —Isabenö ökwökwö wene jwiinö dö̧jakwa̧ wene yöbawö kwujunitjö̧ma, kwömöayedö badibanö weköbi̧ ja̧bö dö̧jakwedösa, —jö̧ba̧lö.

1 Samuel 11:1 Iomraidhean Croise

Génesis 26:28

—Ökwödöma jweinö dedobe, Isabenö Jo̧ Diosma ökwökwö ö̧jobe, jö̧ba̧lö. Jo̧kwaobetjö̧ domukwatijatö baikwö: Ökwökwö, ökwödökwö diwene yöba̧lakwawö dujuno, otiwanö dö̧jakwa̧ diwenema.

2 Samuel 10:1

Jemi ikena, ju'wi möle amonitas jojodötjö inesö la'aka luwo̧ Najas mikwo̧ma ö'wö baibinobe, ja̧danö jo̧ba ö̧binemi, itji̧ Janun mikwo̧ma amonitas jojodötjö la'aka tjuluwo̧ baibanö ö̧binobe.

2 Samuel 10:2

Ja̧danö, jejenö balediökwe, Davidma omukwatinobe, —Janun abe'do Najasma isabenö otiwanö chömöledöso̧danö ja̧nö, dösölöjinö pjaatinobe ötjönö, jo̧kwajabetjö̧ balekwa mikwa jo̧ba itji̧ Janunnö dösölö̧jinö pjatato, —jö̧ba̧lö. Jejenö omukwatö, Davidma ömöayedönö weinobe, Janun o̧'wo ösöwachibobö yöbawadönö, —Israel niji̧ la'aka luwo̧ Davidma ömöledöso̧ kwabe'donö omukwatö o̧'wo tjo̧achobe, —jö̧ba̧lö yötjawobö. Jo̧kwaijayonö, weawö̧ amonitas tjitebonö tjichibenama, wene baibinobe, baikwö:

2 Samuel 17:27

Davidma Majanayin comunidadbe i̧'yinobe, ja̧danö jobe ichibenama, ju'wedöma jo̧banö pjatjatinobe. Amonitas jojodö tjitebo comunidad Raba la'aka luwo̧, Najas itji̧ Sobima, itea ichejebinobe, ja̧danö Lo Debar comunidad jojo Amiel itji̧ Machirma itea ichejebinobe, ja̧danö galaadita jojo Roguelin comunidad jojo Barzilayma itea ichejebinobe, Davidnö pjabatö.

2 Samuel 2:5

Ja̧danö, a̧ja̧kwajo̧, Davidma yöbawadönö weinobe, Jabes jojodönö yötjawobö: Davidma ökwödönö yöawobe: —Chömöledö, Saulnö kwo̧tji̧naduwa wenama cha̧ja̧kwajabe, ja̧danö a̧ja̧kwajo̧ yötawaduwakwö, Isabenö otiwanö kwuluwo̧ Saulminenö ösödadöja, ja̧danö ja̧ kwösödaduwi̧ wene otiwanö kwi̧sebinaduwobe, jo̧banö otiwanö kwo̧tji̧naduwenama. Jejenö otiwanö kwi̧sebaduwiökwe, balekwa mikwa Isabenö Jo̧ Dios otiwanö ökwödönö pjaatobö chösöda.

1 Reyes 20:34

Jejenö lȩlöjinö ediökwe, Ben-adadma Acabnö yöa̧linobe, —Acab, chabe'do kwabe'dokwö ölakwabikwawö 'döebina comunidadbiyama, ökwönö tjetatakwo̧sa. Ja̧danö ju'wibi yötawakwö, damötjö chabe'doma ökwödö siria jojodö ditea iyawemi otidinobe, kwitebo comunidad Samariatjöma, jö̧tö? Ötjö chitebo comunidad Damascotjö ökwöbi kwotidobö wetena, jobetjö ökwödö israel jojodö kwiteaduwi mikwanö kwiyaduwakobetjö̧, —jö̧ba̧lö yöa̧linobe. Yöa̧liökwe, ösödinobe Acabma, ja̧danö bakobe pjabatakwawö tjö̧jakwa̧ wene yöbawö tjujuninobe, Acabbi, Ben-adadbi. Ikenama, Ben-adad ȩwa̧jobö webö loinobe, ja̧danö wene jwiinö itebobe ȩwa̧jinobe.

1 Crónicas 10:11

Jobekwö filisteo jojodö Saul iteba'o sulabenö ja̧tjiawö̧, Galaad niji comunidad Jabes jojodöma a̧ja̧kwö tjöpöjödinobe, —Duluwo̧ Saulnö sulabenö obadötö, —jö̧ba̧lö.

1 Crónicas 10:12

Ja̧danö, öpöjödö, jobe ömadötjö juluwadö yebaböködöma, a̧la̧ibö Saul iteba'obi, i̧tji̧mu tjteba'ijubi isakwö tji̧'yinobe. Ikenama, emajadö, e'ewö tjȩwa̧jinobe Jabesbe. Ja̧danö Jabes comunidadbe ichibajadö Jabes comunidadnö jo̧wi tamarisco towi teebe tjo̧tji̧nobe tjiwe'ijuma. Ja̧danö o̧tjajadö, tjuluwo̧ woina budekwö, jelemutjö̧ dötölataja möle tju̧kwa̧ ö̧töchö tjö̧jinobe.

Diosnö ösödo̧ Job mikwo̧ usula emawina jawa 41:4

Kwujuluwajökwe, –Isabenö weköbi̧ chotidakwo̧sa, –jö̧ba̧lö yöbawö ujunenaji̧, ja̧danö yöbawö junajo̧, ina 'yaa̧layi, weköbi̧ otidenaji̧?

Éxodo 23:32

Ja̧danö, wetaduwakwö: Jobadökwö bakobe omukwatö yöba̧lö kwujunaduwoko. Ja̧danö jobadö tjösödawö̧kwöbi bakobe omukwatö yöba̧lö kwujunaduwoko.

Isaías 36:16

Jau, jobekwö yöawitjö̧ma, Ezequias yöawi̧ kwa̧ja̧kwaduwoko, omöna jawa yöawobetjö̧. Asiria la'aka luwo̧ yöawi̧da a̧ja̧kwö kwösödaduwo, baikwö yöawi̧ma: –Weti̧ öpöjödö kwö̧jaduwi̧ kabatibö, comunidadtjö labebö ötjönö kwiyawaduwitjö̧ma, lȩlöjinö chedocha. Ötjö chömöayedö bakibaduwanö kwiyawaduwitjö̧ma, ju'winö jelobekwö niji otiwobekwö ökwödönö ötibakwo̧sa, kwiteboduwidanö otiwi̧ niji̧nö kwö̧jaduwobö, trigo jawabi, uba jawabi otiwanö pokwö wa̧jobe nijibema. Ja̧danö, yemidanö ökwödönö emö chichibakwa̧ kwiteada̧laduwonö, ajayi kwiteboduwinö otiwanö wene jwiinö kwö̧jaduwobö wetocha, ja̧danö bakwo̧nökwena kwöbatjo uba waji̧bi, higo towi waji̧bi kwukwaduwakwedöja, ja̧danö bakwo̧nökwena kwitea ojwese'dotjö kwowaduwakwedöja.

Deuteronomio 23:3

—Ja̧danö ju'wibi wetaduwakwö, Amonitas jojodöbi, Moabitas jojodöbi la'akatjöda Isabenö Jo̧ öba a'o ko̧ko̧kwadökwö tjo̧ko̧kokwobö jwitjakobe. La'akatjöda jobadöbi, tji̧tji̧mu tupadanö jojodöbi Isabenö Jo̧ öba a'o ko̧ko̧kwadökwö tjo̧ko̧kokwobö jwitjakobe, idöda tjö'dö̧dö tjö̧'dödötjö tupadanösaso bajaliasaso baibenanö.

Jueces 10:7

Ja̧danö, jejenö sulabenö ja̧tji̧ökwe, Isabenö Jo̧ma ödameakwachibinobe israel jojodönö, ja̧danö jobadönö iyö loinobe, filisteo jojodöbi, amonitas jojodöbi jobadönö tjujuluwobö.

Jueces 11:4

Ja̧danö, lekwe möle jejenö Tob nijinö ö̧jajabema, Amonitas jojodöma israel jojodökwö tjölakwabikwawinobe.

Jueces 21:8

Ja̧danö, ajayinö, —Ichöködönö kwabö lodakwawö̧, —jö̧ba̧lö yöbawö tjujunina jawa omukwatö, abebö tja̧ja̧kwinobe, —Okobe deinö israel jojodö bakwasokwena jojodötjö, jelesotjö ju'wi comunidad jojodö deobeji̧? Baikwö tjicho jö̧tja̧linajayonö, ju'wi comunidad jojodö tjichinökiji̧? —jö̧ba̧lö yötja̧lakwawinobe. Yöba̧lakwawajadö, okobe deinö jobe ko̧ko̧kwadö ölakwabikwawa jojodönö tjö̧ba̧jadinobe, demi jojodö detjojobö jö̧ba̧lö, ja̧danö Jabes Galaad comunidadtjö bakwo̧bi deinobe. Jo̧kwajabetjö̧, tjöwaisachibinobe, —Okobe deinö tjichobö ji̧najayonö, Jabes de Galaad jojodöma ichinöködötö, —jö̧ba̧lö.

1 Samuel 12:12

Jo̧kwaijayonö, jejenö otiwanö pjabatiainajayonö, babe amonitas jojodö tjuluwo̧ Nahas mikwo̧ baikwö ichobe edö, inesö la'aka luwo̧ kwuluwo̧duwi Isabenö Jo̧ Diosnö omukwatökönö, ötjönö yöka̧linaduwobe, Diosda duluwo̧ ö̧jobömaökö, jojonö inesö la'aka duluwo̧nö kwujuno jö̧ba̧lö. Kwuluwo̧duwi Isabenö Jo̧ Diosda kwuluwo̧ ö̧jinajayonö, jo̧banö öpöjödö jojonö akebinaduwobe.

1 Samuel 14:47

Saul israel jojodö la'aka tjuluwo̧ baibaja̧ ikena, okobe deinö israel jojodö tjöpöjojodönö ölakwabikwawö ö̧jinobe, bakwachobebi, jelobekwöchobebi tjitebokwena jojodönö. Moab jojodönöbi ölakwabikwawö, ja̧danö Amon jojodönöbi ölakwabikwawö, Edom jojodönöbi ölakwabikwawö, Soba niji la'aka luwedönöbi ölakwabikwawö, filisteo jojodönöbi ölakwabikwawö ö̧jinobe. Ja̧danö, okobe jwiinö ölakwabikwawö ö̧jinama, israel jojodö tjöpöjojodönö ujuluwinobe.