1 Pedro 1:7 - Dios Iwene

⁷ ja̧ usula kwemawaduwi̧ baledibö isabenö Dios yöawi̧ kwösödaduwi̧ wenema otiwanö öwawakobetjö̧. Jau chömöledö, isabenö usula kwemawaduwobö jo̧be. Baikwö wanedö yötawa: Oro ökwölanö lödebö tjotidökötjö̧ma, bakwainö otiwi̧ma öwawökena, ¿jö̧tö? Sule ökwölanö lödebö tjotidaja̧ ikenada otiwanö öwawobe oro otiwi̧ma, ¿jö̧tö? Ökwödö Dios yöawi̧ kwösödaduwi̧bi ja̧danö chömöledö. Usula emawökönö kwö̧jaduwitjö̧ma, otiwanö Dios yöawi̧ kwösödaduwijayonö, kwösödaduwi̧ma otiwanö öwawökena, sule usula emawö kwöbaledaduwajenada otiwanö öwawena otiwanö kwösödaduwi̧ wenema. Jo̧kwajabetjö̧ isabenö usula kwemawaduwobö otiwobe chömöledö. Jau chömöledö, oroma mikwawijayonö, ja'yubeda mikwawobe, oroma tupakwö jwiakobetjö̧. Jo̧kwaijayonö ökwödö Dios yöawi̧ kwösödaduwi̧ma orotjö bajalekwönönö mikwawi̧ chömöledö, jo̧kwajabetjö̧ orotjö bajalekwönönö isabenö kwösödaduwi̧ wene otiwanö öwawobö jo̧be. Jau chömöledö, babe usula kwemawaduwi̧ma, ökwöladanö ichejekwa, bakwainö otiwanö kwösödaduwi̧ wenema öwawobö, ja̧danö ja̧ jawa usula emawö kwöbaledaduwenama, isabenö Dios yöawi̧ kwösödaduwi̧ wenema öwawakobe chömöledö. Ja̧danö chömöledö, jejenö öwawobetjö̧, 'dö̧ibaji̧ möle Jesucristo ichenama, Diosma otiwanö ösödadöja jö̧ba̧lö yöawakobe, ja̧danö dejatinö ujulu ökwödönö iyakobe, ja̧danö ökwödönö otiwanö omukwatakobe chömöledö. Jejenö jo̧be chömöledö, jo̧kwajabetjö̧ babe usula kwemawaduwijayonö, yayonö kwo̧'wo̧ ösöwachibanö ja̧döja, otiwa jö̧ba̧lö.

1 Pedro 1:7 Iomraidhean Croise

Diosnö ösödo̧ Job mikwo̧ usula emawina jawa 23:10

—Jo̧kwaijayonö Diosnö chedököjayonö, okobe jwiinö kwetachi̧tenia edö waiso̧ Diosma. Jo̧kwajabetjö̧, otiwanö ja̧bö chö̧jojobö, sulabenö ja̧bö chö̧jojobö jö̧ba̧lö ötjönö badedö editjö̧ma, bakwai̧ oro öwawi̧danö öwawena, isabenö Dios wei̧ a̧ja̧kwö jo̧sa̧, jö̧ba̧lö.

Diosnö ösödo̧ Job mikwo̧ usula emawina jawa 28:1

Tupakwö yöa̧linobe Jobma: —Isabenö nöinö otidö tjöbadekwajobö waisadö jojodöma baikwö yöta̧la: Niji okwa sobö tjotidobe, plata jawa niji okwatjö tjemobö, ja̧danö oro otikwemibi tjujuna̧lobe, bakwai̧ oloda baibanö tjotidobö.

Proverbios 16:16

Ja̧danö, ju'wibi yötawa: Chömöledö döwaisa, oroma nöinö mikwawi̧ jawa ¿jö̧tö̧? Isabenö yötawa: Oro mikwawi̧tjö bajalekwönönö mikwawobe jweinö omukwatö kwö̧jaduwi̧ma. Ja̧danö, döwaisa, platabi nöinö mikwawi̧ jawa ¿jö̧tö̧? Isabenö yötawa: Kwöwaisaduwi̧ma di̧ya sulojobö jö̧ba̧lö, di̧ya otiwojobö jö̧ba̧lö jwiinö mikwawobe, plata mikwawi̧tjö̧ bajalekwönönö.

Proverbios 17:3

Ja̧danö, ju'wibi yötawa: Oro, platabi otidadöma ökwölanö jwiinö ubolanö tobadö, bakwai̧ oro jo̧ojobö jö̧ba̧lö, bakwai̧ platada jo̧ojobö, tjöwaisachibobö. Bakwemiinö Isabenö Jo̧ma jojodö tjo̧majade okwa edo̧, jweinö tjo̧mukwatojobö, ö'öbönö tjo̧mukwatojobö jö̧ba̧lö.

Proverbios 8:19

Ju'wibi yöbawuju: Ötjö jojodönö pjabatö chiyi̧ jawama jwiinö mikwawobe. Oro bakwai̧ ji̧tjö bajalekwönönö mikwawobe, ja̧danö plata bakwai̧ ji̧tjö bajalekwönönö mikwawobe ötjö jojodönö pjabatö chiyi̧ jawama.

Isaías 48:10

Jau chömöledö, sulabenö ja̧bö kwö̧jaduwitjö̧, ökwödönö iyö lotajabe, kwöpöjojodöduwi ökwödönö tjujuluwobö. Ja̧ ökwödönö iyö lotaja̧ma, plata jawa tjimidi̧tjö iyö lotijökötö chömöledö, sulabenö ja̧köbaduwi̧tjö̧ ökwödönö lȩbebö ökwödönö tjujuluwobö wetajabe, ja̧danö tjujuluwajawö̧, usula emawö, tubinö otikwaka ö'wejenö kwöbaledaduwobedanö ichejekwa. Ja̧danö ökwödönö lȩbebajo̧, babema usula kwemawaduwi̧tjö kwö̧jibaduwinö pjatatocha.

Mateo 19:28

Aebökwe, Jesúsma atadinobe: —Isabenö yötawaduwakwö chömöledö, okobe jwiinö 'yayinö Dios otidena, ja̧danö ötjö jojo baibanö jeminökwe salöinö dewaka teakanö, inesö la'aka luwo̧ iteakanö chö̧wenama, ökwödö chökömanö lubibajadöbi a̧li̧nösamutjö dökalatajanö kwö̧waduwakobe, Israel jojodötjö a̧li̧nösamutjö du̧ju̧tajasaso jojodö tjuluwedö bakibaduwanö.

Mateo 25:21

Jejenö yöawökwe, uluwo̧ma atadinobe: Otiwanö kwotidajabe, chömöayo̧ otiwo̧, ja̧danö kwotido jö̧ka̧li̧danö otido̧ja. Ja'yubeda ökwönö wetinama otiwanö kwotido jö̧ka̧li̧danö kwotidajabe, jo̧kwajabetjö̧ tupakwö nöi̧ jawa kwite'ada̧lobö chujunocha. Ötjökwö pjiesta junö tebachi, jö̧ba̧lö.

Mateo 25:23

Jejenö yöawökwe, uluwo̧ma atadinobe: Otiwanö kwotidajabe chömöayo̧, chömöayo̧ otiwo̧, ja̧danö kwotido jö̧ka̧li̧danö otido̧ja. Ja'yubeda ökwönö wetinama otiwanö kwotido jö̧ka̧li̧danö kwotidajabe, jo̧kwajabetjö̧ tupakwö nöi̧ jawa kwite'ada̧lobö chujunocha. Ötjökwö pjiesta junö tebachi, jö̧ba̧lö.

Lucas 12:33

Isabenö mikwawi̧ma böjȩ jawadamaökö chömöledö, mölejȩ jawada. Jo̧kwajabetjö̧ kwujuna̧laduwi̧ iyö lobö, jwibadönö kwiyaduwo, jejenö ja̧bö mölejȩbetjö kwujuna̧laduwakwa̧ ko̧ko̧dö kwödaduwakobetjö̧. Jau chömöledö, böjȩtjö baladasa'woma damö jawa jwöbachö suli̧ jwöachobe, ¿jö̧tö? Ja̧danö, böjȩ jawa nöinö mikwawi̧ma suli̧ jwöachobe, ¿jö̧tö? Ja̧danö naukwabidö tjö̧naukwobe, ja̧danö pjȩlȩbö̧ma suli̧ tjöwaedobe, ¿jö̧tö? Jo̧kwajabetjö̧ mölejȩbetjöda nöinö mikwawi̧ ko̧ko̧dö kwödaduwobö kwisakwaduwo chömöledö, mölejȩbe jawa baladasa'woma, damö jawa babibö suli̧ waekwokobetjö̧, ja̧danö jobe nöinö mikwawi̧ jawama, suli̧ waekwokobetjö̧, ja̧danö naukwabidö tetjachokobetjö̧, ja̧danö pjȩlȩbö suli̧ tjöwaedokobetjö̧.

Lucas 17:30

Jejenö badekwachakobe ötjö jojo baibanö jeminökwe yemidanö chichakwa̧ma, jojodö tjo̧'wo̧ söba̧lö, wene jwia jö̧ba̧lö omukwatö tjö̧jonö, öwaetjöda öwawinö lȩbebö chichakobe.

Juan 12:26

Ja̧danö, ötjö chöba̧ja̧di̧ waisachadö tjö̧jo jö̧ba̧ladöma ötjökwö tjichobö jo̧be. Jejenö, ötjö chö̧jobema chöba̧ja̧di̧ waisachadöbi tjö̧jakwedö. Ja̧danö, Chabe'do Diosma ötjö chöba̧ja̧di̧ waisachadönö edö, Bidöma jwiinö mikwawadö, jö̧ba̧lö, omukwatakwawö̧— yöawinobe Jesúsma.

Juan 5:44

Ja̧danö, ökwödöma ¿dakwö kwöwaisachibaduwobö ötjönöma? Ju'wi jawa kwisakwaduwobe. Jojodö ökwödönö tjösödi̧da, pjatjati̧da kwisakwaduwobe. Dios jawa, bakwo̧da Dios jwiinö otiwi̧ jawama kwisakwaduwokobe— yöawinobe Jesúsma judío jojodö la'aka luwedönöma.

Hechos 8:20

Jo̧kwaijayonö jejenö aebiökwe Pedroma jö̧ba̧lijetö: —Sulabenö kwomukwatajabetjö̧ kwu̧kwa baladakwö ökwöla ubobekwö 'ya̧wi. Diosma ujulu mikwa jwiinö iyijayonö ökwöma sulabenö omukwatö jö̧ka̧lajabe, Baladanö midö chemocha, jö̧ba̧lö.

Romanos 2:10

Ja̧danö, okobe deinö otiwa jawa ja̧badöma, otiwanö tjö̧jakwedö. Diosma jobadönöma, bidöma otiwadö, wene jwibadö, jö̧ba̧lö, yöa̧lakwo̧, judío jojodönöbi, judío jojodöböködönöbi.

Romanos 2:29

Isabenö judíoso̧ ö̧ji̧ Dios ömöledöso̧ ö̧ji̧ma, okwa jawada chömöledö, tji̧sȩdo̧ jawamaökö. Ja̧danö, isabenö Dios weinadanö 'wiekwama, tjomajade balewachinö ja̧awada, tji̧sȩdo̧ jawamaökö. Jau chömöledö, ja̧ tjomajade balewachinö ja̧awama, Dios O̧'wo̧ Luwo̧ ja̧i̧da, jojodö tji̧sȩdo̧ 'wiekwamaökö. Ja̧danö, isabenö judíoso̧ jo̧nöma, Diosda, Bitema otiwanö jo̧, jö̧ba̧lö yöawakwo̧. Jojodö yötjawökakobe chömöledö, Diosda yöawakwo̧.

Romanos 2:7

Bakwainö otiwanö ja̧badönöma, jwaikwöda Dios ösödi̧da ja̧badönöma, ba̧kwȩlö̧jatebö ja̧kwawa iyakwo̧ Diosma. Jobadöma jwaikwöda Dios ösödi̧ jawada ja̧badö, Diosma jobadönö jö̧a̧lakobetjö̧, Bidöma otiwadö, suli̧ jwibadö, jö̧ba̧lö. Ja̧danö, Dios ösödi̧ jawada ja̧bö ba̧kwȩlö̧jatebö ja̧kwawa isakwadö jobadöma. Ja̧danö, Dios ösödi̧ jawa ja̧bö ba̧kwȩlö̧jatebö ja̧kwawa tjisakwobetjö̧, ja̧da iyakobe Diosma, jwaikwöda tjisakwobetjö̧.

Romanos 8:19

Jau chömöledö, ju'winö Diosma ökwödönö kabebö i̧sebakobe, Bidöma ötjöda chi̧tji̧mu, jö̧ba̧lö. Jejenö i̧sebenama, jwiinö otiwakobe chömöledö. Ja̧danö, okobe jwiinö Dios otidina jawama, böjȩbi, böjȩ jawabi ösödinö omukwatö te'ada̧lobe ichejekwa, ja̧ möle badekwachobö.

1 Corintios 4:5

Ja̧danö, Duluwo̧da yöawakwo̧obetjö̧, Duluwo̧ yöawakwa̧ abönöma, ju'wedönö yöbawökönaduwi, Aaa, Duluwo̧ wei̧ otiwanö ja̧badö, sulabenö ja̧badö jö̧ba̧lö. Jau chömöledö, Duluwo̧ ichakwa̧ möle badekwachenama, jo̧bada yöawakobe. Baikwö wanedö yötawa: Okobe jwiinö yȩa'wo okwa jawa Duluwo̧ma idejatakobe, otiwanö öwawinö baibanö, ja̧danö, jojodö tjomajadenö tjomukwati̧ i̧sebakobe Duluwo̧ma. Ja̧danö, iya̧da möleda Diosma jojodönö bakwo̧nökwena yöawakwo̧ otiwanö tjotidinama.

Santiago 1:12

Chö̧ja̧wo̧dö, wene baledena tjo̧'wo̧ 'dibachibö, jwaikwöda, Diosnö tjo̧'wo̧ wana̧lö 'ya̧döma, Dios pjaatawö̧. Ja̧danö, jwaikwöda tji̧'yi̧ma tji̧sekwobe, Diosnöda do̧'wo̧ wana̧lö ja̧dösa, jö̧ba̧lö. Ja̧danö chö̧ja̧wo̧dö, jobadöma Dios yöbawö ujunina tjemakwedö, ba̧kwȩlö̧jatebö ja̧kwawama. Jau chö̧ja̧wo̧dö, Diosma yöbawö ujuninobe, Ötjönö ösödadönö ba̧kwȩlöjatebo ja̧kwawa chiyakwo̧sa, jö̧ba̧lö.

1 Pedro 1:13

Ja̧ wenema isabenö wene chömöledö, ja̧danö ja̧ wene omukwatö kwö̧jaduwo, otiwanö ja̧bö kwö̧jaduwakobetjö̧. Ja̧danö jweinö omukwatö jwaikwöda ja̧ Dios ökwödönö iyakwa̧ jawa kwo̧'wo̧ kwöwana̧laduwo chömöledö, isabenö Jesucristo yemidanö ichenama, Dios otiwanö iyakwawö̧sa jö̧ba̧lö.

1 Pedro 1:5

Jau chömöledö, Dios yöawi̧ kwösödaduwiökwe, Diosma ökwödönö tjöbeba̧lönö ite'ada̧lobe, ja̧danö jejenö ite'ada̧lakwo̧, 'dö̧ibaji̧ möle kwö̧jibinaduwa wene i̧sebenanö kabatö. Jau chömöledö, ja̧ möle baibenama, ökwödö iteda i̧tji̧munö otiwa jawa iyakobe, ja̧danö jejenö iyö, kwö̧jibinaduwa wene öwaetjöda i̧sebakobe.

1 Pedro 2:4

Jau chömöledö, isabenö duluwo̧nö waisachinadösa, lȩlö̧jinö pjabato̧ jö̧ba̧lö. Ökwödö Jesúsnö ösödadönö baikwö wanedö yötawa: Ökwödöma Dios eju inawiyadanö ichejekwadösa, ja̧danö Duluwo̧ Jesúsma Dios ejutjö inesö la'aka lödawawa inawadanöbo̧. Ja̧danö, ökwödö Jesúsnö ösödadöma, jo̧banö ösödö ichadösa, Diosma ökwödötjö iteda eju otidakobetjö̧. Jau chömöledö, Jesúsma isabenö ökwödö Dios ejubedötjö la'akadanöbo̧, Dios iwene laebi̧danö. Baikwö laebobe Dios iwene Jesúsnöma: Inawa nöinö mikwawawa omudawajo̧, Jerusalénnö chödobe, o̧dotjö inesö la'aka lödawawa baibanö, ja̧danö bakwo̧ jo̧ba inawadanöbo̧nö ösöditjö̧ma, waekwökena, jö̧ba̧lö laebobe Jesúsnöma. Jau chömöledö, kwöwaisaduwa, böjȩ jojodöma Jesúsnö öpöjödadö, mikwawö̧kö̧ jö̧ba̧lö, jo̧kwaijayonö jobadö tjöpöjödijayonö, Diosma Jesúsnöda omudawö ujuninobe, ökwödö iteda ejubedötjö la'aka ajayinö lödawawa inawadanö ö̧jobö. Jau chömöledö, Dios edemi isabenö mikwawo̧ Jesúsma, ja̧danö ökwödö Jesúsnö ösödadöbi jo̧banö jweinö domukwatobe, isabenö mikwawo̧ jö̧ba̧lö. Jau chömöledö, ökwödö Jesúsnö ösödadöma Dios ejubedösa, jo̧kwaijayonö ja̧damaökö, ju'wibi Diosma ökwödönö 'da̧batö ujuninobe, iteda wei̧ otidadö badibanö chömöledö. Jau chömöledö, Jesucristo ökwödönö pjaatinobetjö̧, babema Dios ösödi̧ iyawa jo̧banö iyadösa, do̧'wo̧ luwo̧ jawa iyawama.

1 Pedro 2:7

Jau chömöledö, ökwödö Jesúsnö ösödadöma jweinö domukwatobe Duluwo̧nö, isabenö mikwawo̧ jö̧ba̧lö. Ja̧danö, jo̧banö dösödobetjö̧, isabenö ökwödönö pjabato̧ chömöledö. Jo̧kwaijayonö, öpöjödadöbi tjuju̧kwobe chömöledö, ja̧danö tjöpöjödiökwe, pjabatö̧kö̧ jobadönöma. Jau chömöledö, jobadönö baikwö laebobe Dios iwene: O̧do otidadö biwama sulabawa, mikwawököwa jö̧tja̧linawa inawama, la'aka lödawawa, ju'wi inawatjö bajalekwönönö mikwawawada baibinobe, jö̧ba̧lö laebobe.

1 Pedro 4:12

Chösödawö̧ chömöledö, kwöwaisaduwa, babe inia tjöbö usula kwemawaduwi̧ma, dakwö ja̧köbaduwojobö jö̧ba̧lö baledobe, ¿jö̧tö? Jau chömöledö, kwöwaisaduwa, isabenö Jesúsnö ösödadö usula demawobö jo̧be jö̧ba̧lö, jo̧kwajabetjö̧ jejenö baledenama, Ayö, biya̧ma ¿tajawedö baledobejö? jö̧ba̧lö omukwatöma kwo̧'wo̧ tjo̧kekwaduwa chömöledö.

1 Pedro 4:13

Jau chömöledö, kwo̧'wo̧ tjo̧bekwökönö, kwo̧'wo̧ luwo̧ ösöwachibanö kwö̧jaduwobö jo̧be, Cristokwö bakobe usula emawadösa, jö̧ba̧lö. Jau chömöledö, jo̧bakwö bakobe usula emawadöja babema, tupakwö iteda ujulu öwawachibenama, kwo̧'wo̧ ösöwaduwachibanö kwö̧jaduwakobetjö̧.

1 Pedro 5:1

Ja̧danö, ökwödönö baledi̧ jawa omukwatö, ökwödötjö Jesúsnö ösödadönö te'ada̧lakwawa luwedönö baikwö yötawa: Jesúsnö ösödadönö otiwanö kwite'ada̧laduwo chömöledö. Jau chömöledö, ötjö Pedroma bakobe ökwödökwö Jesúsnö ösödadönö te'ada̧lakwawa luwo̧sa chömöledö, ja̧danö ökwödönö yötawi̧ma isabenö waisanö yötawobe. Ötjöma Cristokwö ja̧nö jo̧ba usula emawina chedijatö chömöledö. Ja̧danö ju'wibi chöwaisa, Cristoma iteda dejatinö ujulu i̧sebenama, ötjöbi ja̧ ujulu chujuna̧lakobe jö̧ba̧lö.

2 Pedro 1:1

Dokwa chömöledö, Ötjöma Simón Pedrosa, ja̧danö Jesucristo webawo̧sa, ja̧danö ju'wibi jo̧ba ömöayo̧sa. Ötjöma böja kwialusöja wȩyudö wetaduwakwö, ökwödö Cristonö chösödi̧danö bakwainö ösödadönö. Jau chömöledö, dö̧jibinö pjabato̧ Dios Jesucristoma bakweminö jojodönö edo̧obetjö̧, ötjönö pjaatinadanö ökwödönöbi pjaatinobe, Cristonö chösödi̧danö ökwödöbi bakwainö kwösödaduwobö. Ja̧danö, ökwödö bakwainö ösödadönö böja kwialusöja wȩyudö wetaduwakwö.

2 Pedro 1:4

Jau chömöledö, Duluwo̧ma dejatinö juluwo̧obetjö̧, ja̧danö jwiinö otiwo̧obetjö̧, inesö mikwawi̧ wene ökwödönö yöbawö ujunajabe, yöawi̧ ösödö, suli̧tjö dö̧jibobö, ja̧danö iteda otiwi̧ ökwödöbi dujuna̧lobö. Jau chömöledö, kwöwaisaduwa, böjȩ jojodö sulabenö tjösödi̧tjö böjȩma suli̧ jwöachobe, ¿jö̧tö? Jo̧kwaijayonö ja̧ suli̧ jwöachi̧tjö dö̧jibanö pjabato̧ Duluwo̧ma, ja̧danö böjȩ suli̧ jwöachijayonö, ökwödöma Duluwo̧ inesö otiwi̧ dujuna̧lakwedö dö̧jobe.

2 Pedro 3:14

Jau chömöledö, Dios 'yayöjȩ otidobö te'ada̧ladösa ökwödöma. Jo̧kwajabetjö̧ ja̧ baledakwa̧ möle baibobö dite'ada̧lonö, jwaikwöda wene jwiinö kwö̧jaduwobö kwisakwaduwo, ökwödönö edö, bakwainö sulabenö ja̧böködönöda Duluwo̧ edakobetjö̧.

Judas 1:24

Okobe deinö Diosnö dösödaduwo chömöledö, jo̧bada meköbaduwapji jö̧ba̧lö pjabato̧ma, ja̧danö jo̧bada iteda inesö dewinö salöinö öba a'o wene jwiinö kwö̧jaduwobö pjabato̧ma, kwo̧'wo̧duwi jwiinö ösödachibanö.

Apocalipsis 1:7

A̧ja̧kwaduwitjö, Jesucristo yemidanö ichakwa̧ wenema: Jesucristoma yemidanö ichakobe ojwiyo'wonö, okobe deinö tjedinö. Okobe deinö jo̧banö inia tjöinö tibatinadöma, jo̧ba ichobema tjedakwedö. Ja̧danö, böjȩ bakwameachibanö, okobe deinö bakwasokwena ju̧kwadö, Jesúsnö öpöjödadöma, jo̧ba ichobe edö yebabinö tjubudekwakwedö, jo̧ba lȩebakwa̧ omukwatö, jö̧ba̧lö laebobe Dios iwenetjö. Jau, chömöledö, biya̧ Dios iwenetjö yötawi̧ma isabenö baledakobe, Jesús yemidanö ichenama.

Apocalipsis 2:10

Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.

Apocalipsis 3:10

Chömöledö, yötawaduwakwö. Ökwödönö wetijatö, Sulabenö baledonöbi kwo̧'wo̧ luwo̧duwi 'dibachibö te'ada̧lö kwö̧jaduwo, jö̧ba̧lö. Ja̧ wetinama otiwanö a̧ja̧kwö kwö̧jinaduwobe. Jejenö otiwanö a̧ja̧kwö kwö̧jinaduwobetjö̧ pjatatakwo̧sa ökwödönöma. Ju'wedö böjȩnö ju̧kwadönö lȩbebö weti̧ baledonö, böjȩtjö jwiinö inia tjötjinö baledonöma, ökwödönö te'ada̧lö pjatatakwo̧sa, ja̧ inia tjötji̧tjö baledökönö.

Apocalipsis 3:18

Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.

1 Samuel 2:30

Tupakwö yöawinobe Dios yöawi yöbawo̧ma Elinö: —Jo̧kwajabetjö̧, jejenö sulabenö ja̧köbaduwitjö̧, baikwö yöawobe Isabenö Jo̧, israel jojodö tjuluwo̧ Diosma, Isabenö yöbawö chujunijatö kwömöledönö, Aaronbi, i̧tji̧mu tupadanö jojodöbi ba̧kwelöjatebö chöba a'otjö weti̧ otidö tjö̧jakwedö jö̧ba̧lö, jo̧kwaijayonö baikwö yötawakwö, la'akatjöda ja̧ wene badekwachökakobe ökwödönö, baikwö yötawa: Ötjönö otiwanö omukwatö ju̧kwadönöma, ötjöbi balekwa mikwa otiwanö jobadönö omukwatö chö̧jocha, ja̧danö ötjönö öpöjödadönö, ötjöbi balekwa mikwa chöpöjödocha jö̧ba̧lö. Ja̧danö ökwödöma ötjönö otiwanö omukwatökönö kwöpöjödaduwobetjö̧, Aaronnö yöbawö chujuninama ökwödönö badekwachökakobe la'akatjöda.