1 Pedro 1:5 - Dios Iwene

⁵ Jau chömöledö, Dios yöawi̧ kwösödaduwiökwe, Diosma ökwödönö tjöbeba̧lönö ite'ada̧lobe, ja̧danö jejenö ite'ada̧lakwo̧, 'dö̧ibaji̧ möle kwö̧jibinaduwa wene i̧sebenanö kabatö. Jau chömöledö, ja̧ möle baibenama, ökwödö iteda i̧tji̧munö otiwa jawa iyakobe, ja̧danö jejenö iyö, kwö̧jibinaduwa wene öwaetjöda i̧sebakobe.

1 Pedro 1:5 Iomraidhean Croise

Diosnö ösödo̧ Job mikwo̧ usula emawina jawa 19:25

—Chöwaisa ötjöma, isabenö chö̧ji̧binö pjaatakwo̧ ö̧jobe, jö̧ba̧lö. Chöwaisa, 'dö̧ibaji möle, juluwajo̧ chö̧jibinö pjaatakwo̧ma bö̧jenö öjamatakwo̧.

Proverbios 2:8

Ja̧danö, Isabenö Jo̧ma pjabatö te'ada̧lo̧ ju'wedökwö otiwanö ja̧nö, jweinöda omukwatö ja̧bö ju̧kwadönö. Jobadö tji̧'yobema tjöbeba̧lö öbibo̧ Isabenö Jo̧ma. Ja̧danö, Isabenö Jo̧ma jo̧banö ösödadönö tjöbeba̧lö te’ada̧lo̧.

Isaías 45:17

Jobekwö baledököwö̧ ökwö Diosnö ösödadönö. Ju'wedö tabakwö tjö̧jonö, ökwödö israel jojodönö dö̧jibinö pjabato̧ Diosma, 'dö̧ibajökö ji̧ ji̧kwawa baibanö dö̧jibinö pjabato̧. Ja̧danö jobekwö dö̧jibinö pjaatobetjö̧, la'akatjöda 'dö̧bibajökönö tabakwö dö̧jökakwedösa, la'akatjöda taba lö̧jawö̧ badibökakwedösa.

Isaías 51:6

Möakwö mölejebe kwedaduwo chömöledö, ja̧danö nijakwö bö̧je kwedaduwo. Babe ji̧danöma, lekwema jö̧köjȩ chömöledö, baikwö yötawa: Imiyu'wo juluwanö debi baibidanö, juluwanö debi baibakobe mölejȩma, ja̧danö kamijido̧ damö waekwö, suli̧ waekwi̧danö, bö̧jȩ suli̧ waekwakobe. Bö̧jȩnö ju̧kwadöbi ja̧danö, okobe deinö damö waekwö debö batjibakwedö. Jo̧kwaijayonö jejenömaökö ötjö chö̧ji̧ma, ötjö tjö̧ji̧binö pjatati̧ma, ba̧kwelöjatebö ji̧ jawa chömöledö, ja̧danö otiwanö webö chö̧ji̧ma, la'akatjöda 'dö̧ibökakobe.

Isaías 54:17

Ja̧danö, ötjö jobadönö otidinada ökwönö tjöbeba̧lo pjatatobetjö̧, okobe jwiinö ölakwabikwawa jawa tjotidi̧teniama, kwöba a'otjö suli̧ waekwakobe, ju'wi jawabi ökwönö suli̧ waedobö jwiakobe. Ja̧danö lȩekwa luwedö tjöba a'otjö, ju'wedö ökwönö wanedö yötja̧litjö̧ma, okobe deinö jobekwö wanedö yöba̧ladö yötja̧li̧ otiwanö i̧sȩbö kwatadakwujuja, —Omöna, lȩekwa yötjawobö jwia, —jö̧ba̧lö. Jobekwö pjabato̧sa ötjöda chömöayedönö Jerusalen, ja̧danö wene jwibadö tjö̧ji̧ i̧sȩkwama, ötjö tjuluwo̧ Isabenö Jo̧ Diostjö ichi̧, jö̧ba̧lö wanedö yöa̧lobe Diosma, Jerusalen comunidad jojodönö.

Isaías 66:22

Tupakwö yöawobe Isabenö Jo̧ma: Chömöledö, mölejȩ 'yayöjȩbi, bö̧je 'yayöjȩbi chotidocha, ja̧danö chotidaja̧ma, ba̧kwelöjatebö 'dö̧bibajökönö chöba a'o ja̧kwö̧jȩ. Ja̧danö, ja̧ ba̧kwelöjatebö ji̧danö, baikwö yöbawö chujunaduwakwö, ökwödö kwi̧tji̧muduwibi ba̧kwelöjatebö chöba a'o tjö̧jakwedö, ja̧danö ba̧kwelöjatebö ökwödö israel jojodönö otiwanö tjomukwatakwedö.

Juan 12:48

Jo̧kwaijayonö ötjö weti̧ öpöjödö ja̧böködönö lȩebobö jo̧be. Jobadönöma ju'winö, okobe jwiinö 'dö̧ibaji̧ möle baibena, ötjö weti̧ öpöjödö ja̧tjinokobetjö̧ lȩekwama baledakwawö̧.

Juan 17:15

Ina aebinobe: —Chabe'do, ökwönö atebi̧ma, Bidönö kwite'ada̧lo, jö̧ba̧lö, babema mölejȩbe tjichoböma atebökö. Biya̧da ateba: Awetja, böjȩnö ja̧nö webo̧nö tjöbeba̧lö kwite'ada̧lo bidönö, ötjönö ösödadönöma.

Juan 4:14

Jo̧kwaijayonö ötjö chiyobu owo̧ma yemidanöma ojwiyo owoböma o̧ti̧lö̧jökökwe, jo̧ba o̧'wo̧ luwo̧ okwanö ojwese'dodanö okwobetjö̧, ba̧kwȩlö̧jatebö ja̧kwawa okwe'dodanö— yöawinobe Jesúsma.

Juan 5:24

Ina yöawinobe Jesúsma judío la'aka luwedönö: —Isabenö yötawa, ötjö yötawi̧ a̧ja̧kwadö, ötjönö webinanö ösödadöma, ba̧kwȩlö̧jatebö ja̧kwawa tjujuna̧lakwedö. Jobadöma lȩtebökakwawö̧. Wobajaletjö tjö̧jibanö babibö, ba̧kwȩlö̧jatebö tjuju̧kwakwedö— yöawinobe—.

Romanos 11:20

Chömöledö, isabenö jobadönö tjebö loinobe, ja̧danö ajayi tjö̧jinemitjö balekwedönö ökwödönö ujuninobe. Biya̧ yötawa chömöledö: Dios iwene tjöpöjödiökwe, jobadönö tjebö loinobe, ja̧danö Dios iwene kwösödaduwobetjö̧, tjö̧jinemi kwö̧jaduwobe. Ja̧danö, Aaa, otiwadösa, jö̧ba̧lö kwomukwataduwoko chömöledö. Wainö kwomukwataduwo chömöledö, Isabenö Diosma iteda iwene öpöjödadönöma lȩbebo̧, jö̧ba̧lö kwomukwataduwo chömöledö.

Romanos 8:18

Jau chömöledö, ina böjȩnö ja̧nö, usula demawobe. Jo̧kwaijayonö, ötjö chedemi, ökwödö usula demawi̧ma mikwawokobe yelösöda chömöledö. Mölejȩbe dichibenama, jwiinö otiwakobe. Ja̧danö, jobe ja̧nö, Dios dewinö dejatinö ujulubi dujuna̧lakwedösa ökwödöma. Ja̧danö, jwiinö otiwa jawa dujuna̧lakwa̧bi, otiwanö dö̧jakwa̧bi chomukwatenama, babema usula demawokobedanö jo̧be ötjönöma chömöledö.

1 Corintios 1:21

Jau chömöledö, Diosma iteda waisanö omukwati̧ma i̧sebobe, baikwö yötawa. Böjȩ jojodö idöda waisanö tjomukwati̧ omukwatö Diosnö tjöwaisachibinokobe, ¿jö̧tö? Ja̧danö, böjȩ jojodö tjedemi, yödawi̧ wene Jesús midawö woina wenema waisakwawa jwii̧ wene jo̧be, ¿jö̧tö? Jo̧kwaijayonö Diosma waisanö omukwatö, ja̧ Jesús midawö woina wene ösödadönöda dö̧jibinö ja̧bo̧ chömöledö.

2 Corintios 1:24

Jejenö lȩtebapji jö̧ba̧lö chichijökötö jö̧ba̧lö yöta̧li̧ma, Aaa, kwuluwo̧duwisa, Jesúsnö kwösödaduwi̧ma, weti̧danöda ösödaduwi jö̧ba̧löma yöta̧lökö chömöledö. Ökwödö kwuluwo̧duwibö̧kö̧sa chömöledö, ökwödökwö bakobe otido̧sa, kwo̧'wo̧ luwo̧duwi ösöwachibanö kwö̧jaduwakobetjö̧, ja̧danö jwaikwöda waekwökönö Jesúsnö ösödö kwö̧jaduwakobetjö̧. Jau chömöledö, ökwödönö kwo̧'wo̧ tjo̧achinö ja̧tapji jö̧ba̧lö, juluwanöma ökwödönö edö chi̧'yijökötö, isabenö ökwödönö chösödobetjö̧.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Efesios 2:8

Isabenö chömöledö, Diosma lȩlö̧jino edobetjö̧, Jesúsnö kwösödaduwenama, Jesúsma dö̧jibanö pjabato̧, jö̧ba̧lö, ökwödöma ji̧bakwawanö kwö̧jibinaduwobe. Chömöledö ji̧bakwawanö kwö̧jibaduwoböma ¿ökwödöda ja̧köbakwawinaduwaji̧, kwujuluduwinö? Jejenöma ja̧awakwawinöködöja. Ja'yubebi ji̧bakwawanö kwö̧jibaduwobö ja̧köbakwawaduwoböma jwiobe. Diosda mikwa jwiinö otiwa jawa iyö kwö̧jibaduwinö pjaatinobe chömöledö, otiwanö ja̧bö kwö̧jaduwököjayonö.

Efesios 3:17

Ja̧danö, Diosnö atebobe, Cristo otiwanö ö̧jobö kwo̧'wo̧ luwo̧duwinö, jo̧banö kwösödinaduwobetjö̧. Ja̧danö Diosnö atebobe chömöledö, ökwödönö pjaatobö tupakwö, ba̧kwȩlö̧jatebö ösödabikwawö kwö̧jaduwobö ju'wedökwöbi Dioskwöbi.

Filipenses 1:6

Jau chömöledö, Diosda ökwödönö otiwa jawa kwo̧'wo̧ luwo̧duwi jawa jamatö otidinama, ¿jö̧tö? Ja̧danö chöwaisa, jamatö otidina jawama, Diosma okobe jwiinö otidö kaatakobe jö̧ba̧lö. Ja̧danö, Jesucristo yemidanö ichakwa̧ möle baibenama ja̧ okobe jwiinö kwo̧'wo̧ luwo̧duwinö otidi̧ma kaatakwawakobe chömöledö.

Filipenses 4:7

Jejenö akebaduwitjö̧ma, Diosma kwo̧'wo̧ luwo̧duwi ösöwachibanö pjaatakwo̧ chömöledö. Wanedö yötawa: Cristo Jesúskwö dötewanö kwö̧jaduwobetjö̧, Diosma kwomajadeduwibi, kwomukwataduwi̧bi tjöbeba̧lö ite'ada̧lakobe kwo̧'wo̧ tjo̧kekwaduwapji jö̧ba̧lö. Jejenö Dios iyi̧jaye tjo̧'wo̧ luwo̧ ösöwachibi̧ma jojodö wajwitjobe, dakwö jejenö tjo̧'wo̧ luwo̧ ösöwawö̧jö jö̧ba̧lö, Diostjöda ichobetjö̧.

2 Timoteo 3:15

ja̧danö ju'wibi Dios iwene kwöwaisa, ina tjemu kwö̧jayi ökwönö tjöba̧ja̧dinobetjö̧. Ja̧danö, jejenö kwöwaisobetjö̧ 'diinö do̧ba̧lö kwösödobö jo̧be, chösödi̧ wenema isabenö wene jö̧ba̧lö. Jau Timoteo, ökwönö tjöba̧ja̧dina jawa Dios iwene jawama, waisanö kwomukwatobö ba̧ja̧dakwawa jawa tjöba̧ja̧dinobe, ¿jö̧tö? Ja̧danö, waisanö kwomukwatobö tjöba̧ja̧dinama, otiwa jawa wene waisanö kwomukwatobö pjaatinobe, Cristo Jesúsnö ösödö kwö̧jibobö, ¿jö̧tö? Jau Timoteo, jejenö waisanö kwomukwatobö pjaatinobe tjöba̧ja̧dinama, jo̧kwajabetjö̧ ja̧ laebi̧ kwöwaisachibinobetjö̧ isabenö wene 'diinö do̧ba̧lö kwö̧jobö jo̧be.

Tito 2:13

Jau Tito, ina böjȩnö dö̧jayi, do̧'wo̧ wana̧lö dite'ada̧lobe, isabenö Dios jö̧a̧lina möle badekwachakobe jö̧ba̧lö, inesö otiwa möle, ökwödö dö̧jibinö pjabato̧ la'aka Dios Jesucristoma iteda ujulu i̧sebenama.

Hebreos 6:12

Chömöledö, jejenö jwaikwöda kwi̧'yaduwobö chösöda, kwu'du̧wekwachibaduwapji jö̧ba̧lö, da̧peachökönö kwo̧'wo̧ luwo̧duwi̧nö. Ja̧danö, da'dödöminetjö ju'wedöma Diosnö tjo̧'wo̧ wana̧lö tjö̧jinobe. Jobadöma Diosnö tjo̧'wo̧ wana̧lö tjite'ada̧linobe jo̧ba iyakwa̧, Chiyakwo̧sa, jö̧ba̧lö, yöbawö ujunina iyakwa̧ma. Te'ada̧lö tjö̧jinobe, Isabenö Dios yöbawö ujuninadanö iyakobe, jö̧ba̧lö. Chömöledö ökwödö jejenö kwö̧jaduwobö chösöda, Diosnö kwo̧'wo̧duwi wana̧lö, jo̧ba yöbawö ujunina badekwachakwa̧ te'ada̧lö.

Hebreos 9:28

Ja̧danö, Cristobi bakwötanöda woinobe jojodö tjusula tjumusidi̧ midawö. Ja̧danö, ju'wi möle yemidanö ichenama jojodö dusula dumusidi̧ imidawobö ichökakwo̧. Yemidanö ichenama jo̧ba yemidanö ichakwa̧ te'ada̧ladönö mölejȩbekwö öibobö ichakwo̧. Jejenö okobe jwiinö dö̧jibinö pjaati̧ma tjo̧wi̧ kaatakobe.

1 Pedro 1:13

Ja̧ wenema isabenö wene chömöledö, ja̧danö ja̧ wene omukwatö kwö̧jaduwo, otiwanö ja̧bö kwö̧jaduwakobetjö̧. Ja̧danö jweinö omukwatö jwaikwöda ja̧ Dios ökwödönö iyakwa̧ jawa kwo̧'wo̧ kwöwana̧laduwo chömöledö, isabenö Jesucristo yemidanö ichenama, Dios otiwanö iyakwawö̧sa jö̧ba̧lö.

1 Pedro 4:13

Jau chömöledö, kwo̧'wo̧ tjo̧bekwökönö, kwo̧'wo̧ luwo̧ ösöwachibanö kwö̧jaduwobö jo̧be, Cristokwö bakobe usula emawadösa, jö̧ba̧lö. Jau chömöledö, jo̧bakwö bakobe usula emawadöja babema, tupakwö iteda ujulu öwawachibenama, kwo̧'wo̧ ösöwaduwachibanö kwö̧jaduwakobetjö̧.

1 Pedro 5:1

Ja̧danö, ökwödönö baledi̧ jawa omukwatö, ökwödötjö Jesúsnö ösödadönö te'ada̧lakwawa luwedönö baikwö yötawa: Jesúsnö ösödadönö otiwanö kwite'ada̧laduwo chömöledö. Jau chömöledö, ötjö Pedroma bakobe ökwödökwö Jesúsnö ösödadönö te'ada̧lakwawa luwo̧sa chömöledö, ja̧danö ökwödönö yötawi̧ma isabenö waisanö yötawobe. Ötjöma Cristokwö ja̧nö jo̧ba usula emawina chedijatö chömöledö. Ja̧danö ju'wibi chöwaisa, Cristoma iteda dejatinö ujulu i̧sebenama, ötjöbi ja̧ ujulu chujuna̧lakobe jö̧ba̧lö.

2 Pedro 1:3

Chömöledö, Duluwo̧ma Diosdaobetjö̧, okobe jwiinö juluwo̧, ¿jö̧tö? Jau chömöledö, okobe jwiinö juluwo̧ duluwo̧ma, ja̧danö, ju'wibi, iteda ujulu ökwödönö iyobe, jo̧ba ujulunö Dios ösödi̧danö ja̧bö dö̧jobö. Jau chömöledö, Duluwo̧ma ökwödönö jwöinobe, iteda dejatinö ujulu ökwödöbi dujuna̧lobö, ja̧danö iteda inesö otiwi̧ ökwödöbi dujuna̧lobö. Ja̧danö chömöledö, jo̧banö waisadö dö̧jobetjö̧, iteda ujulu ökwödönö iyobe, jo̧kwajabetjö̧ ina böjȩnö dö̧jayi, okobe jwiinö juna̧ladösa, böjȩnö ina dö̧jayi Dios ösödi̧danö ja̧bö dö̧jakobetjö̧.

1 Juan 3:2

Chö̧ja̧wo̧dö chösödawö̧, yötawaduwakwö. Isabenö, ökwödöma Dios i̧tji̧musa. Jo̧kwaijayonö Diosma ökwödönö ina öwawinö i̧sebokobe mölejȩbe ichibö balewachibö dö̧jakwa̧ma. Ina waiya. Wajwidobe ¿dakwö dichejekwakwa̧jö, jö̧ba̧lö? Ja̧danö, domajadenö ¿dakwö omukwatö dö̧jakwa̧jö? jö̧ba̧lö, ina waiya. Jo̧kwaijayonö ja'yubeda döwaisa, biya̧: Cristo yemidanö ichena ökwödöma jo̧badanö babibö dö̧jakwedösa. Ja̧ mölema Cristoma ökwödönö wajuwanö öwawachobetjö̧ jo̧badanö ichejekwadö dö̧jakwedösa.

Judas 1:1

Ötjö böja wȩyudö webo̧ma, Judassa, Jesucristo ömöayo̧sa, ja̧danö ju'wibi Jacobo öjawo̧sa. Ja̧danö, böjanö wȩyudö wetawö̧ma bidö, Dios jwöinawö̧nö, ju'wibi Dabe'do Dios ösödawö̧nö, ju'wibi Jesucristo tjöbeba̧lö ite'ada̧lawö̧nö.

Judas 1:24

Okobe deinö Diosnö dösödaduwo chömöledö, jo̧bada meköbaduwapji jö̧ba̧lö pjabato̧ma, ja̧danö jo̧bada iteda inesö dewinö salöinö öba a'o wene jwiinö kwö̧jaduwobö pjabato̧ma, kwo̧'wo̧duwi jwiinö ösödachibanö.

1 Samuel 2:9

Isabenö Jo̧ma isabenö tjöeba̧lakwo̧ jo̧banö tjo̧'wo wana̧ladönöma, jo̧kwaijayonö sulabedönö yȩa'wo okwa debö tji̧'yobö weakwo̧. Jau, isabenö idöda tjujulunö tjujuluwökakwedö bö̧jȩ jojodöma, Isabenö Jo̧da ujuluwakwo̧ma.