1 Pedro 1:2 - Dios Iwene

² Jau chömöledö, Dabe'do Dios ajayitjöda ökwödönö öwaisinadanö, Dios O̧'wo̧ Luwo̧da ökwödönö 'da̧batö ujuninobe, Jesucristo wei̧ ja̧bö kwö̧jaduwakobetjö̧, ja̧danö Jesucristo ökwösobunö ökwödönö dichö loobö. Ökwödö Dios öwaisawö̧nö böja kwialusöja chiwȩyudobe ötjö Pedroma chömöledö. Böja wȩyudö jamatö, yötawaduwakwö chömöledö: Dios ajayitjö bajalekwönönö ökwödönö lȩlö̧jinö iyobö chösöda. Ja̧danö ajayitjö bajalekwönönö ökwödönö pjaatobö chösöda, kwo̧'wo̧ luwo̧ ösöwachibanö kwö̧jaduwobö.

1 Pedro 1:2 Iomraidhean Croise

Isaías 55:7

Sulabenö ja̧bö ju̧kwadöma, sulabenö ja̧bö tjö̧ji̧ma katjatibo, ja̧danö sulabedöma, sulabenö tjomukwati̧ katjatibo. Kabatibajadö, yemidanö dösödökwe Isabenö Jo̧ Dios ö̧jobekwö tjetjachajo, jobadönö lȩlöjinö edö, öpöjödökönö tjusula söbebö loakobetjö̧.

Isaías 65:22

Jau, ajayinö baledinadanö baledökakobe la'akatjöda. Jelobetjö ichajadöma mebibö tjejubiya tjönaukwökakwedö, ja̧danö tjöbatjiju tjönaukwökakwedö. Ja̧ möle chömöledöma isabenö lekwe möle tjö̧jakwedö, towibiya lekwe möle ji̧danö, isabenö lekwe möle tjö̧jakwedö. Jau, ja̧ möle omudawö chujuninawö̧ chömöledöma, idöda tjotidinejunö tjo̧'wo ösöwanö lekwe möle tjö̧jakwedö, ja̧danö tjotidaja̧ jawa, lekwe möle tjo̧'wo ösöwanö tjujuna̧lakwedö.

Isaías 65:9

Jacob itji̧mu tupadanö jojodö, Juda jojodötjö ji̧badönö tjetatakwo̧sa Juda nijibe, ja̧danö jobadönö chiyocha, ötjö chitea mösa'iju, Juda niji mösa'ijunö tjö̧jakobetjö̧. Ötjöda omudawö chujunajawö̧ma, ja̧ niji tjomudaibakwedö, ja̧danö ötjö chömöayedöma jobe tjö̧jakwedö.

Daniel 4:1

Ju'wi o̧ba, la'aka luwo̧ Nabucodonosorma jojodönö yöawinobe jo̧banö baledina wene, baikwö: —Ötjöma Nabucodonosor mikwo̧sa, ja̧danö okobe deinö jelesokwena jojodönö, ja̧danö tjitebotenia jojodönö, ja̧danö tjiwenetenia yöba̧ladönö yötawa baikwö: Wene jwiinö otiwanö kwö̧jaduwobö chösöda.

Daniel 6:25

Jemi ikenama Daríoma kwialusöja iwȩyudinobe okobe deinö jojodö iteda ömöayedönö, baikwö: —Ökwödö böjȩ bakwameachibanö ju̧kwadö kwiteboduwitenia ju̧kwadö, ja̧danö kwiweneduwitenia yöba̧ladönö chiwȩyudobe baikwö: Wene jwiinö otiwanö kwö̧jaduwobö chösöda.

Mateo 24:22

Jau chömöledö, ja̧ möle baledakwa̧ lekwe baleditjö̧ma, okobe deinö böjȩnö ju̧kwadö debö tji̧'yo jö̧tja̧lena, jo̧kwaijayonö iteda omudawö ujuninawö̧nö omukwatö lekwökönö ja̧akwo̧ Diosma.

Mateo 24:24

Jau chömöledö, isabenö Dios weakwo̧ jö̧a̧linökwesa jö̧ba̧lö omöna yöba̧ladöma yötjawakobe, ja̧danö Dios yöawi̧ yöbawadösa jö̧ba̧lö omöna yöba̧ladöbi yötjawakobe. Jobadöma jojodö edajitjökö jawa tji̧sebakobe, Dios omudawö ujuninawö̧bi jobadö yötjawi̧ tjösödobö, jo̧kwaijayonö Dios omudawö ujuninawö̧tjobetjö̧ tjösödökakobe.

Mateo 24:31

Ja̧danö asabikwawa jawa trompeta labinö ökwöakobe, ja̧danö chömöayedö ángelesdönö wetocha, böjȩ bakwameachibanö 'ya̧nö, omudawö chujuninawö̧nö ko̧ko̧dö tjichejebobö.

Marcos 13:20

Ja̧ baledenama lekwe, kabatökönö jejenö inia tjötjinö baleditjö̧ma okobe deinö debö tji̧'yena, bakwo̧bi ö̧jibökönö. Jo̧kwaijayonö Diosma pjabatö kaatakwawakobe inia tjötjinö baledi̧ma. Iteda i̧tji̧mu batjibanö 'da̧batö ujuninawö̧nöma ile nibebö inia tjötji̧ baledi̧ma kaatakwawakobe— jö̧ba̧lö yöbawijetö Jesúsma öba̧ja̧di̧ waisachadönö.

Marcos 13:22

Ba̧jekwadö, Ötjödasa jojodö tjö̧jibinö pjabatö Dios weajökwesa, jö̧ba̧lö, yöba̧ladöbi, ja̧danö, Ötjödasa Dios yöawi̧ yöbawo̧sa, jö̧ba̧lö, yöba̧ladöbi tjichakobe. Jobadö omöna yöbawö tjichonöbi kwa̧ja̧kwaduwoko. Jobadöma tjo̧'wo̧ sulinö omukwatö jojodö edajitjökö jawa i̧seböbi, juluwi̧ jawa i̧seböbi tji̧sebakobe jojodö tjösödo jö̧ba̧lö. Ja̧danö, jejenö tji̧sebakobe Dios i̧tji̧mu baibanö 'da̧batö ujuninawö̧bi tjösödo jö̧ba̧lö. Jejenö tji̧sebijayonö waekwakobe, Dios i̧tji̧muma tjösödökakobe omöna yöba̧ladönöma.

Marcos 13:27

Ja̧danö, chömöayedö ángelesdönö wetocha böjȩ okobe jwiinö kwetjachobö, Dios i̧tji̧mu batjibanö 'da̧batö ujuninawö̧nö bakobe tjoko̧ko̧dobö. Ja̧danö, Dios i̧tji̧mu batjibanö 'da̧batö ujuninawö̧nö a̧li̧tjöbi, u'datjöbi, ja̧wo̧ ichobekwötjöbi, ja̧wo̧ meajobekwötjöbi tjoko̧ko̧dobö wetocha chömöayedö ángelesdönö— jö̧ba̧lö yöbawijetö Jesúsma öba̧ja̧di̧ waisachadönö.

Lucas 18:7

¿Diosja? Sulabenö otido̧ bajalianö ajebi̧ a̧ja̧kwinatjö̧ma, Diosma ¿iteda ömöledö jo̧banö tjubudekwi̧ a̧ja̧kwökenaji̧? Dios omudawö ujuninawö̧ma yö̧tebi mölebi Diosnö budekwadö, ökwödönö pjabatö döpöjojodönö lȩkebo jö̧ba̧lö, ja̧danö lekwe möle atjebijayonö, Diosma juluwanöma pjaatokobedanö ichejekwa, ¿jö̧tö? ¿Dakwö kwomukwataduwa? ¿Isabenö pjaatökenaji̧? Isabenö pjaatakwo̧ chömöledö. Lekwe pjaatokobedanö ichejekwijayonö isabenö a̧ja̧kwo̧ chömöledö, ja̧danö isabenö pjaatakwo̧. Jau chömöledö, isabenö yötawaduwakwö, ajayinö a̧ja̧kwokobedanö ichejekwijayonö, isabenö juluwanö pjabatö tjöpöjojodönö lȩebakwo̧ chömöledö. Jo̧kwajabetjö̧ kabatibökönö Diosnö budekwö akebaduwo chömöledö, isabenö ökwödönö a̧ja̧kwo̧obetjö̧. Jau chömöledö, isabenö Dios lȩebakwa̧ lȩbebö ötjö jojo baibanö jȩminökwema ichö lȩtebocha. Ja̧ wene ösödö kwite'ada̧laduwobö jo̧be. Chöwaisa chömöledö, böjȩ jojodöma, juluwanö tjime'dawachibobe, jo̧kwajabetjö̧ chichibakwa̧ abönö ba̧jekwadö tjime'dawachibena, döpöjojodönö la'akatjöda lȩebökena jö̧ba̧lö. Jo̧kwaijayonö isabenö kwöpöjojodönö lȩbebö chichocha chömöledö, jo̧kwajabetjö̧ isabenö me'dawachibökönö kwite'ada̧laduwo chömöledö, Diosma isabenö a̧ja̧kwobetjö̧— jö̧ba̧lö yöawinobe Jesúsma.

Hechos 15:18

Jejenö yöbawijetö Duluwo̧ma, ajayinö jojodö tjöwaisachibanö,

Hechos 2:23

Ina yöbawijetö: —Ökwödöma sulabedönö weköbaduwijatö ösötenö bȩtjobö Jesúsnöma, ö'wöchinö baibanö. Ja̧ weköbinaduwima Diosma la'akatjöda waisijetö. Diosma la'akatjöda Jesúsnö baledakwa̧ waisö, omukwatö junijetö Jesúsnöma.

Hechos 20:32

Ina yöbawijetö: —Tjo̧wi̧ yöta̧la chömöledö. Babema Diosnö ateba ökwödönö ite'ada̧lobö. Jo̧bama ökwödönö lȩlö̧jino edö pjabato̧. Ja̧danö, lȩlö̧jino edö ökwödö kwo̧'wo̧ luwo̧duwi ujuluwachibanö ja̧bo̧, itekwöda juluwachibanö tupakwö kwi̧'yaduwobö. Ja̧danö, lȩlö̧jino edö otiwa jawa iyo̧ Diosma, okobe deinö i̧tji̧munöma, jo̧ba suli̧ jwiinö batjibanö ja̧inawö̧nöma.

Romanos 1:5

Ja̧danö, ju'wibi yötawa, Diosma Jesucristonö weachinobe, Jesucristoda ötjö Pablonö 'da̧batö ujunobö, Jesucristo webawo̧ batibanö. Ja̧ Dios weinama jwiinö chösödobe chömöledö, Diosma otiwa jawa ötjönö weinobe, jö̧ba̧lö. Ja̧danö, inesö otiwa jawa wene böjȩ bakwameachibanö judío jojodöböködönö yötawobö weinobe ötjönöma, jobadöbi Jesucristonö tjösödo jö̧ba̧lö. Ja̧danö, jobadötjö ösödadöma, Jesucristo wei̧ ja̧tjo jö̧ba̧lö, yötawobö weinobe.

Romanos 11:2

Diosma iteda ömöledönöma kaatibinokobe, damötjö 'da̧batö ujuninawö̧nöma. ¿Ina Elías ö̧jina wene kwomukwataduwiji̧, Elías Diosnö yöawina wenema? Baikwö laebobe Dios iwene, Elías Diosnö yöawinama:

Romanos 11:28

Chömöledö, Israel jojodöma otiwa jawa wene tjöpöjödobetjö̧, Dios öpöjojodö tjuju̧kwobe. Ja̧danö öpöjojodö tjuju̧kwiökwe, lȩlö̧jinö edo̧ Diosma, ökwödö Israel jojodöböködönöma. Jo̧kwaijayonö ina ösödo̧ Diosma, Israel jojodönöma, jobadö tja'dödöminenö omudawö ujuninobetjö̧.

Romanos 16:19

Jau chömöledö, okobe deinö jojodöma ökwödönö tja̧ja̧kwobe, Roma jojodöma jwaikwöda otiwa jawa wene ösödadö, jö̧ba̧lö. Ja̧danö, ötjöma ja̧ wene a̧ja̧kwö chösöda chömöledö. Ja̧danö, otiwa jawa Dios ösödi̧ jawada waisadö kwö̧jaduwoböma chösöda, Dios öpöjödi̧ jawa ja̧bökönö.

Romanos 16:26

jo̧kwaijayonö babema wajuwanö i̧sekwobe, okobe deinö a̧ja̧kwö tjösödo jö̧ba̧lö, ba̧kwȩlö̧jatebö jo̧ Dios weinadanö. Damötjö Dios iwene wȩyudinadö tjiwȩyudinobe ja̧ wenema, ja̧danö babema wajuwanö i̧sekwobö weinobe Diosma, okobe deinö böjȩ ju̧kwadö ösödö, Dios wei̧ ja̧tjo jö̧ba̧lö.

Romanos 8:13

Jau chömöledö, suli̧ ömöayedödanö ju̧kwadöma, wotjakwedö chömöledö. Jo̧kwaijayonö, Dios O̧'wo̧ Luwo̧ ömöayedödanö ju̧kwadöma, wotjökakwedö. Jobadöma, Dios O̧'wo̧ Luwo̧ pjaatobetjö̧, sulabe tjösödi̧ma kabatibadö. Ja̧danö sulabe tjösödi̧ kabatibö, sulabenö tjösödi̧ma kwabö lotjobedanö jo̧be, sulabe tjösödi̧ jawa katjatibobetjö̧. Ja̧danö, jobadöma ba̧kwȩlöjateböda tjuju̧kwakwedö.

Romanos 8:33

Ja̧danö, ¿bakwo̧bi ö̧jobeji̧, ökwödö Dios omudawö ujuninawö̧nö wanedö yöawakwo̧ma? ¿Diosma ökwödönö wanedö yöawenaji̧, Bidöma sulabedö, jö̧ba̧lö? Yöbawö̧kö̧ chömöledö, Diosda ida̧ökö yöbawina, Bidöma sulabe jwibadö, jö̧ba̧lö.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

1 Corintios 6:11

Ökwödötjö ju'wedöma jejenöbedö kwö̧jinaduwobe ajayinöma chömöledö, jo̧kwaijayonö Duluwo̧ Jesucristo midawö woinobetjö̧, Dios O̧'wo̧ Luwo̧ma kwusuladuwi̧ dichö loinobe, ja̧danö Dios ömöledö bakibaduwanö ökwödönö 'da̧batö ujuninobe, ja̧danö sulabe jwibadö bakibaduwanö ja̧inobe.

2 Corintios 10:5

Jau chömöledö, waisanö omukwatadösa jö̧ba̧lö tjomukwati̧ma, ja̧danö otiwadösa jö̧ba̧lö tjomukwati̧ma, ja̧danö okobe jwiinö jejenö tjomukwati̧ma, tjöekwemidanö ichejekwa, Diosnö tjöwaisapji jö̧ba̧lö. Jo̧kwaijayonö Dios ujulu ji̧nö ja̧ tjöekwemidanö tjomukwati̧ söbebö lodobedanö ichejekwa, ja̧danö tjomukwati̧tjö dujuluwobedanö ichejekwa, otiwanö omukwatö Cristo wei̧danö ja̧tjakobetjö̧.

Deuteronomio 7:6

Ja̧ tjösödi̧ jawa söbebö lobö, wainö kwö̧jaduwobö jo̧be chömöledö, ökwödöma kwuluwo̧duwi Isabenö Jo̧ Dios ömöledököbaduwobetjö̧. Jau chömöledö, okobe deinö bö̧jȩ ba̧kwemeachibanö ju̧kwadötjö, kwuluwo̧duwi Isabenö Jo̧ Diosma ökwödö israel jojodönöda 'da̧batö ujuninobe, iteda ömöledö, ile niebawö̧ ömöledö bakibaduwobö, jo̧kwajabetjö̧ ju'wedö sulabenö tjösödi̧tjö wainö 'da̧bachibö kwö̧jaduwobö jo̧be.

Colosenses 3:12

Ökwödöma Dios ömöledöbedöja chömöledö, jo̧bama ökwödönö ösödö omudawö ujuninobe, iteda ömöledö bakibaduwanö. Jo̧kwajabetjö̧ wanedö yötawa: Lȩlö̧jinö edawabi, otiwanö pjabatö ja̧awabi, ju'wedönötjö o̧penönö jö̧kö̧sa jö̧ba̧lö omukwatakwawabi, dösölö̧jinö ja̧awabi, tjo̧'wo̧ 'dibachibö me'dawachibökönö ja̧awabi kamijido̧ 'dutjawi̧danö 'dukawaduwo chömöledö.

2 Tesalonicenses 2:13

Chömöledö kabatökönö Diosnö ösödö adebobö jo̧be, ökwödönö pjaatinobetjö̧. Jau chömöledö, ökwödöma Duluwo̧ ile niebawö̧ja, ja̧danö Diosma la'akatjöda ökwödönö omudawö ujuninobe, kwö̧jibaduwobö. Ja̧danö, Dios O̧'wo̧ Luwo̧ ujulunö ökwödönö 'da̧batö ujuninobe, iteda ömöledö bakibaduwanö, isabenö wene kwösödaduwobetjö̧.

2 Timoteo 2:10

Ja̧danö, Dios iwene pje'datakwawokobetjö̧, usula chemawijayonö, Dios ösödawö̧ ömöledö batjibakwedönö omukwatö, öpöjödachibökönö usula chemawobe. Jau Timoteo, öpöjödachibökönö usula chemawobe, cho̧'wo̧ 'dibachibö usula chemawi̧tjö jobadöbi Cristo Jesúsnö ösödö tjö̧jibakobetjö̧, ja̧danö jo̧bakwö mölejȩbetjö ba̧kwȩlö̧jatebö tjö̧jakobetjö̧.

Tito 1:1

Tito, böja kwialusöjanö ötjö Pablo mikwo̧ma wȩyudö wetakwö. Ötjöma Dios ömöayo̧sa, ja̧danö Jesucristo webawo̧sa. Ötjöma Dios 'da̧batö ujuninökwesa, Dios omudawö ujuninawö̧nö pjabatö chöba̧ja̧do jö̧ba̧lö. Ja̧danö, jobadönö chöba̧ja̧dobe, jwaikwöda Dios yöawi̧ tjösödakobetjö̧. Ja̧danö, isabenö wene tjöwaisakobetjö̧ chöba̧ja̧dadönö. Ja̧danö, Dios ösödi̧danö ja̧bö tjö̧jakobetjö̧ chöba̧ja̧dadönö.

Hebreos 10:22

Jo̧kwaobetjö̧ Dios ö̧jobekwö tedachaduwo chömöledö, jo̧banö ösödö. Omukwataduwökönuwi, ¡Ayö! Ötjöma Dios öba a'otjö wene juna̧lo̧sa, jö̧ba̧lö. Dioskwö chichibobö jwibo̧sa, jö̧ba̧lö, omukwataduwökönuwi. Jejenö domukwatobö jwiobe chö̧ja̧wo̧dö. Tjo̧wi̧, ökwödöma ja̧ domukwati̧tjö dichö loinawö̧sa, Jesús ökwösobunö lilibö. Ja̧danö chö̧ja̧wo̧dö jwiinö salöobu ojwiyonö idichinawö̧sa, Dios öba a'otjö dewadöda badibinö. Jo̧kwaobetjö̧ Dios ö̧jobekwö tedachaduwo, okwa dichawedöda, Jesús imidawinanö jwiinö do̧'wo̧ wana̧lö.

Hebreos 11:28

Ja̧danö Moisésma Diosnö o̧'wo̧ öwana̧lobetjö̧ ömöledö Israel jojodönö weinobe o̧bȩja̧dö kwatjajawö̧ tjökwösobu dutjebobö apjudebiya jawa ö'diyanöbi, möakwochobe jawanöbi, Dios weökwe ángelma abönö damö ömadönö kwabö lookobö. Ja̧danö Dios weökwe ángelma, tjejubiya mönö baledö Israel jojodö tji̧tji̧mu abönö damö ömadönöma kwabö loinokobetjö̧ ja̧ baledina omukwatö ju'wi imiamekwena Israel jojodöma pjiesta junö Diosnö tjösödobe.

Hebreos 12:24

Ja̧danö, jobe ichibö kwuju̧kwaduwemima Jesúsbi ö̧jobe, ökwösobu ebawinö dumusidi̧ midawinama. Jo̧bama ökwösobu ebawinö imidawenama Dios 'yayi̧ balekwa yöbawö ujuni̧ma jamatö 'yi̧nobe, ökwödönö pjabatö. Chömöledö, Jesús ökwösobuma, Tjo̧wi̧ Diosma jojodö tjusuli̧ma söbebö loa, jö̧ba̧lö, otiwanö jwöeba̧lobedanö jwöeba̧linobe. Jo̧kwaijayonö damötjö Abel ökwösobu jwöeba̧linadanömaökö, Jesús ökwösobu jwöeba̧linama. Abel ökwösobu nijibe ebawajobuma Abel jwöobedanö jwöinobe Diosnöma, Balekwa mikwa lȩbebi, jö̧ba̧lö. Jo̧kwaijayonö Jesús ökwösobuma jejenömaökö. Otiwanö jwöeba̧lobedanö jwöeba̧linobe, Tjo̧wi̧ tjusuli̧ma söbebö loa, jö̧ba̧lö. Jejenö Jesús imidawinobetjö̧ Dios 'yayi̧ balekwa yöbawö ujuni̧ma jamatö 'yi̧nobe, ökwödö Dios ö̧jobekwö, suli̧ jwibadöda kwichibaduwinö.

Hebreos 5:9

Ikena Jesúsma, usula emawö okobe jwiinö Dios wei̧ a̧ja̧kwö kaatinobe, ja'yubebi junibökönö. Chömöledö, Jesús jejenö okobe jwiinö Dios wei̧ a̧ja̧kwö kaati̧ma i̧sebinobe, Tjo̧wi̧, Jesúsma okobe deinö jojodö, jo̧banö ösödadö tjö̧jibinö pjabato̧ baibajabe, jö̧ba̧lö.

1 Pedro 1:14

Ja̧danö, Kwabe'do Dios wei̧ ja̧bö ja̧nö, ajayinö kwösödinaduwa ja̧böma kwö̧jaduwoko chömöledö, ina wajwibadö kwö̧jaduwayi kwösödinaduwama.

1 Pedro 1:19

inesö mikwawi̧ jawanö, obeja sulabe jwibo̧danöbo̧ Cristo ökwösobunöda ökwödönö midö eminobe.

1 Pedro 1:20

Ina böjȩ otidapji, Diosma omukwatö ujuninobe Cristoda dö̧jibinö pjaatobö chömöledö, ja̧danö babe ökwödö 'dö̧ibaji̧ möle ju̧kwadönö i̧sebinobe, jo̧banö ösödö kwö̧jibaduwobö.

1 Pedro 1:22

Ja̧danö chömöledö, ökwödöma ida̧ökö isabenö wene ösödö kwidichawinaduwobetjö̧, kwömöledöduwi Jesúsnö ösödadönö ösödadöja, yöne dömöledö jö̧ba̧lö. Jo̧kwajabetjö̧ jwaikwöda tupakwönönö ösödabikwawö kwö̧jaduwo chömöledö,

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

2 Pedro 1:2

Böjatjö jamatö, wȩyudö yötawaduwakwö chömöledö, tupakwönönö Diosnöbi, Duluwo̧ Jesúsnöbi kwöwaisachibaduwonö, Dios ajayitjö bajalekwönönö ökwödönö lȩlö̧jinö iyobö chösöda. Ja̧danö ajayitjö bajalekwönönö ökwödönö pjaatobö chösöda, kwo̧'wo̧ luwo̧ ösöwachibanö kwö̧jaduwobö.

2 Juan 1:1

Jesústjö chö̧ja̧wo̧dö dokwa. Ötjöma Jesúsnö ösödadö tjuluwo̧sa, ja̧danö te'ada̧lakwawa jojosa. Ja̧danö, böjanö wȩyudö yötawa ökwödö Jesúsnö ösödadö ko̧ko̧kwa̧ladönö, Dios omudawö ujuninawö̧nöma. Ja̧danö, chö̧ja̧wo̧dö yötawaduwakwö. Ökwödönö ile nibebo̧sa bakwainö Dios yöawi̧, isabenö ji̧ iwenema dösödobetjö̧. Ja̧danö chö̧ja̧wo̧dö ötjödamaökö, okobe deinö Dios isabenö ji̧ yöawi̧ ösödadöma ökwödönö ile nitjebobe.

2 Juan 1:13

Bena Jesúsnö ösödö ko̧ko̧kwa̧ladö kwö̧ja̧wo̧döduwima debawö atjebobe, Dokwa, jö̧ba̧lö. Tjo̧wi̧ta biya̧da yöbawö chiwȩyuda.

Judas 1:2

Böjatjö jamatö wȩyudö yötawaduwakwö chömöledö, Dios ajayitjö bajalekwönönö ökwödönö lȩlö̧jinö iyobö chösöda, ja̧danö ajayitjö bajalekwönönö kwo̧'wo̧ luwo̧ ösöwachibanö kwö̧jaduwobö Dios pjaatobö chösöda, ja̧danö ajayitjö bajalekwönönö kwömöledönö ösödabikwawö kwö̧jaduwobö Dios pjaatobö chösöda.