1 Pedro 1:12 - Dios Iwene

¹² Jejenö tjöwaisobö jö̧tja̧liökwe, Diosma jobadönö i̧sebinobe, tjiwȩyudi̧ma, damötjö ji̧nadö jawamaökö, ökwödö 'dö̧ibaji̧ möle ju̧kwadönö Dios pjaatakwa̧ weneda tjiwȩyudinobe jö̧ba̧lö. Jau chömöledö, ja̧ wenema, otiwa jawa wene Cristo dö̧jibinö pjaati̧ weneda, ja̧danö Dios iwene yöbawadöma ökwödönöbi ja̧ wene yötjawinobe chömöledö, a̧ja̧kwö kwösödaduwobö. Jau chömöledö, Diosma mölejȩbetjö iteda O̧'wo̧ Luwo̧nö weinobe, ja̧danö jo̧ba Dios O̧'wo̧ Luwo̧ ujulunö otiwa jawa wene yöbawadöma ja̧ wene ökwödönö yötjawinobe. Jau chömöledö, isabenö do̧'wo̧ ösöwanö Diosnö dösödobö jo̧be, isabenö otiwanö ökwödönö pjaatobetjö̧, ja̧danö isabenö otiwanö ökwödönö iyakwo̧obetjö̧. Jejenö isabenö otiwanö ökwödönö pjaatobetjö̧, ángelesdöbi edö, Ayö, Diosma dakwö iteda ömöledönö pjabato̧jö, jö̧ba̧lö tjöwaisobö jö̧ba̧ladö, ökwödönö pjaati̧ma yelösöda otiwanö pjaatobetjö̧.

1 Pedro 1:12 Iomraidhean Croise

Éxodo 25:20

Jobadöma idödada badekwakwanö tjö̧jinö, ja̧danö muchekwapikwö eda̧lö tjujukwinö tjotido. Ja̧danö, tjo̧wa̧ja̧piya kabeba̧lö ja̧nö muchekwapi̧ tjöbeba̧lö tjujukwinö tjotido.

Proverbios 1:23

Ju'wibi yöbawuju: —Ötjö jwebebö yötawi̧ma ¡a̧ja̧kwaduwi! Jelobekwö kwomukwataduwi̧ kabatibö ötjö jwebebö yötawi̧ma a̧ja̧kwaduwi. Jobekwö kwa̧ja̧kwaduwitjö̧ma isabenö cho̧’wo̧ luwo̧tjö chomukwati̧ ökwödönö labebö lobö yötawakwujusa, kwöwaisachibaduwinö —yöbawuju—.

Isaías 32:15

Jobekwö lekwe möle ja̧kobe chömöledö, mölejȩbetjö Diosma iteda O̧'wo Luwo̧nö ökwödökwö ö̧jobö weenanö baibanö. Ja̧danö, ja̧ möle otiwanö pjaatobetjö̧, jojodö deobe kököemi nijima, batjo otiwanö pokwayu baibakobe, ja̧danö batjo otiwanö pokwayuma, ajayitjö̧ bajalekwönönö otiwanö pokwakobe, tebodanö ichejekwenanö baibanö.

Isaías 53:1

Jau, Dios ömöayo̧nö yödawinajayonö, o̧bukwedöda yödawi̧ tjösödajabe, —Isabenö wene, —jö̧ba̧lö. Ja̧danö o̧bukwedöda Isabenö Jo̧ Dios inesö ujulu i̧sȩbobe tjedajabe.

Daniel 10:1

Ciro mikwo̧ Persia niji la'aka luwo̧ inesö la'aka luwo̧ ö̧benama, ida̧ökö wa̧pötakwa o̧biya yöbawö weenama, Diosma yemidanö Danielnö, ju'wi imi Beltsasarnö iteda yöawi̧ yöawinobe. Ja̧ Dios Danielnö yöawi̧ma, isabenö wene yöawinobe, jo̧kwaijayonö yelösöda waiyinobe ajayinö, Daniel öwaisachibanö a̧ja̧kwobö. Jo̧kwaijayonö, Dios yöawaja̧ a̧ja̧kwöbi, i̧'wi̧didanö edaja̧kwöbi bajalianö öwaisachibanö omukwatinobe Danielma. Baikwö laebobe Daniel ja̧ wene iwȩyudina jawama:

Daniel 12:13

Ja̧danö baikwö yöta̧lakwö Daniel, kwo̧'wo̧ ösöwanö kwö̧jo, 'dö̧ibaji̧ möle baibenanö kabatö. Ökwöma ö'wö babiböda, kwö'wachakwo̧ja, ja̧danö okobe jwiinö 'dö̧ibajenama, yemidanö woawatjö tjekachajakwo̧ja, Dios ökwönö iyakwa̧ otiwanö kwemobö— jö̧ba̧lö yöawinobe ángelma Danielnö, tupakwö baledakwa̧ jawama.

Daniel 12:9

Jejenö abebö cha̧ja̧kwökwe, atadinobe: —Ja̧ jawa omukwatöma kwo̧'wo̧ tjokekwa Daniel, abebö kwa̧ja̧kwaja̧ chatadobö jwiobe. Jau Daniel, 'dö̧ibaji̧ möle baibenanö kabatö ja̧ wene tojö ujunakobe Diosma, jo̧kwajabetjö̧ ja̧ omukwatöma kwo̧'wo̧ tjo̧kekwa.

Daniel 2:19

Ja̧danö, jejenö atjebiökwe, iya̧da yö̧te Diosma Danielnö i̧'wididanö i̧sebinobe Nabucodonosor i̧'wi̧dikwina jawabi, labebö loawabi. Ja̧danö jejenö i̧sebiökwe, Danielma Diosnö ösödinobe, isabenö otiwo̧ja jö̧ba̧lö,

Daniel 2:22

Jo̧bada okwa jawa, jojodö wajwitji̧ jawa i̧sebo̧ma, ja̧danö bakwainö dewinö ö̧jijayonö, okobe jwiinö yȩa'wo okwa ji̧ jawa waiso̧ma jo̧bada.

Daniel 2:47

Ja̧danö Nabucodonosorma Danielnö yöawinobe: —Chi̧'wi̧dikwina jawa jweinö yökawi̧tjö̧, chöwaisobe, isabenö kwuluwo̧ Diosda ju'wedö diosbedö tjuluwo̧ Diosma jö̧ba̧lö, ja̧danö jo̧bada la'aka luwedö inesö la'aka tjuluwo̧ma jö̧ba̧lö, ja̧danö isabenö jojodö wajwitji̧ jawa i̧sebo̧ kwuluwo̧ Diosma— jö̧ba̧lö.

Daniel 8:13

Ja̧danö ángelesdö yötja̧lakwawobe cha̧ja̧kwijatö, bakwo̧ jelo̧nö abebö a̧ja̧kwinobe: —Bite Diosnö tjiyobö webö̧kö̧ma, Dios wei̧ öpöjödö ölakwabikwawö jo̧ma, Diosnö iyawemi sulamachibanö ja̧bo̧ma, ¿dokwa lekwe ujuluwakwa̧da? ¿dokwa lekwe möletenia Diosnö iyawa iyökönö tjö̧jakwa̧da? Ja̧danö, ¿dokwa lekwe Dios ejubi, Dios ömöayedönöbi ujuluwakwa̧da?— jö̧ba̧lö abebö a̧ja̧kwobekwö cha̧ja̧kwijatö.

Daniel 9:24

Baikwö yöawinobe Gabrielma Danielnö: —Diosma omukwatö ujunajabe, kwömöledö Israel jojodönö tjö̧jibinö pjaatakwa̧ abönö, ina cuatrociento noventa o̧biya tjöbaledobö jo̧be jö̧ba̧lö. Ja̧danö, Dios badedö ujunina möle badekwachenama, tjusulatjö tjö̧jibinö pjaatakobe. Sulabenö ja̧tji̧ katjatibobö ja̧akobe, ja̧danö tjusula söbebö loakobe, okobe jwiinö suli̧ söbebö loakobe. Ja̧danö ja̧ mölema Diosda yöbawö weakobe, bakwainö otiwanö ba̧kwȩlö̧jatebö yöbawö weakobe. Ja̧ mölema Dios yöawi̧ yöbawo̧ Jeremías iwȩyudinadanö badekwachakobe, ja̧danö ökwö kwi̧'wi̧dinö kwedinadanö badekwachakobe, ja̧danö Jerusalénnö jȩju Dios ejuma, yemidanö isabenö Dios eju baibanö dichö loakobe.

Mateo 11:25

Ja̧ möle, Jesúsma Diosnö aebinobe baikwö: —Chabe'do, mölejȩbe ju̧kwadöbi, böjȩnö ju̧kwadöbi tjuluwo̧ja. Chabe'do, otiwanö biya̧ jawa kwotoja̧lajabe, waisadöbi, nöinö waisachadöbi tjöwaisapji jö̧ba̧lö, jo̧kwaijayonö jobadö wajwitjijayonö, waisachöködönö otiwanö kwi̧sebajabe, ja̧danö jejenö kwi̧sebobetjö̧, otiwanö i̧sebo̧ja jö̧ba̧lö yötawakwö Chabe'do.

Mateo 11:27

Jojodönö yöawinobe Jesúsma: —Chömöledö, chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö waisadöma, sule ötjö Dios itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe.

Mateo 16:17

Jejenö yöa̧lökwe Jesúsma Pedronö yöa̧linobe: —Isabenö kwo̧'wo̧ ösöwanö jo̧ja ökwö Jonás itji̧ Simón, Diosda ja̧ ökwönö öba̧ja̧dinobetjö̧. Jau chömöledöso̧, jojodödama ja̧ tjöba̧ja̧dinokobe ökwönö. Diosda ja̧ öba̧ja̧dinobe ökwönöma.

Marcos 16:15

Ikenama Jesúsma jö̧ba̧lijetö jobadönö: —Wetaduwakwö. Böjȩ okobe jwiinö 'ya̧duwi Dios otiwa jawa wene okobe deinö Dios otidinawö̧nö yökawaduwo.

Lucas 15:10

Mölejȩbetjöbi ja̧danö, bakwo̧ sulabenö ja̧bö jo̧ sulabenö omukwati̧ kabatibö öbalewachenama, Diosma iteda ömöayedö ángelesdökwö o̧'wo̧ ösöwachibanö ö̧jobe— jö̧ba̧lö yöawinobe Jesúsma.

Lucas 2:26

ja̧danö Simeonkwö ja̧nö, Dios O̧'wo̧ Luwo̧ma jo̧banö ba̧ja̧dö yöawinobe: —Duluwo̧ weakwo̧ jö̧a̧linökwenö isabenö kwedakwo̧ja Simeón. Kwedenanö kabatö ökwöma woköbökakwo̧ja— jö̧ba̧lö.

Lucas 9:6

Jejenö weinobe Jesúsma iteda webawedönö, ja̧danö jejenö weawö̧, weaja̧danö Israel niji bakwameachibanö comunidadtenia techaiabö kwetjachinobe, otiwa jawa wene yöbawö, ja̧danö jojodö tjö'wöchi̧ otidö lobö.

Juan 15:26

Jesúsma ina yöawinobe öba̧ja̧di̧ waisachadönö: —Ötjöma Pjabato̧nö wetakwo̧sa, Dios O̧'wo̧ Luwo̧nöma, ökwö kwö̧jaduwobekwö —yöawinobe—. Jo̧bama jweinöda yöbawo̧. Baikwö ichö ötjönö yöawakobe ökwödönöma.

Hechos 10:44

Ikenama Pedro ina yöawonö Dios O̧'wo̧ Luwo̧ma ichö tebachibö jamatijetö okobe deinö Pedro yöawobe a̧ja̧kwadönöma.

Hechos 16:10

Jejenö i̧'wi̧dinö edajo̧ ötjö Lucasnö, Silasnö, Timoteonö yöawijatö edaja̧ma. Ötjö, Lucas, Pablokwö 'yi̧no̧sa. Pablo jejenö i̧'wi̧dinö editjö̧ ökwödöma döwaisachibijatö, Aaa, Diosma jweinö i̧sebajabe Macedoniabeda otiwa jawa wene yöbawö di̧'yobö wea, jö̧ba̧lö. Jo̧kwaobetjö̧ Macedoniabe di̧'yobö, te'ada̧lökönö di̧'yakwowima disakwijatö.

Hechos 2:33

Jo̧banöma mölejȩbe kaekwajinö ja̧bijetö Diosma, iteda öwaisobekwöchobe öbamatobö, la'aka inesö ö̧bena. Ikenama Diosma iyijetö iteda O̧'wo̧ Luwo̧nö Jesúsnöma, isabenö yöawinadanö. Jemi tupakwöma Jesúsma iyijetö Dios O̧'wo̧ Luwo̧nö ökwödönöma. Bena ju'wedö tjiwene wajwidijayonö yödawobe kwedaja̧duwabi, kwa̧ja̧kwaja̧duwabi Dios O̧'wo̧ Luwo̧, Jesús ökwödönö weajökwe ja̧aja̧— yöbawijetö Pedroma—.

Hechos 4:31

Ja̧danö, abebö katjatena jobadö tjoko̧ko̧kwejunöma tjö̧ebijetö. Ikenama bakwo̧nökwena, iteda o̧'wo̧ luwo̧ okwanö Dios O̧'wo̧ Luwo̧ öba̧ja̧da̧lonö tabada̧lökönö yöbawijadötö Dios yöawi̧ma.

Hechos 4:8

Jejenö atjeba̧lökwe Pedroma, iteda o̧'wo̧ luwo̧ okwanö Dios O̧'wo̧ Luwo̧ öba̧ja̧da̧lonö atadijetö: —Jojodö tjuluwedöbi, israel jojodötjö damöbi,

Hechos 8:25

Ikenama Pedro, Juan, Duluwo̧ Jesús yöawina wenebi, Jesús ina jobadökwö ö̧jayi baledinabi yöbawö kabatö Jerusalénbe ȩwa̧jijadötö. Ȩwa̧jö Samaria nijinö ju'wi comunidadbi ju'wi comunidadbi tebachö yöbawiabö ȩwa̧jijadötö, Dios jawa otiwa jawa wenema.

Romanos 1:15

Ja̧danö, ökwödönö Roma jojodönöbi otiwa jawa wene Dios iwene yötawobö jö̧ta̧la.

Romanos 1:17

Jau chömöledö, ja̧ wenema isabenö Dios ujulu ji̧ wene. Baikwö yötawa: Ja̧ wenema wajuwanö labebö lobö yöawobe, Dios jojodö suli̧ jwibadö batjibanö ja̧i̧ma, Dios iwene laebi̧danö. Baikwö laebobe Dios iwenema: Dios bidöma suli̧ jwibadö jö̧a̧lawö̧ma, Dios yöawi̧ tjösödobetjö̧da ja̧kwawa juna̧ladö, jö̧ba̧lö laebobe. Ja̧danö, la'akatjöda Dios yöawi̧ ösödadönöda suli̧ jwibadö batjibanö pjaatinobe Diosma, damötjö ju̧kwinadönöbi, babe ju̧kwadönöbi.

Romanos 10:15

Ja̧danö, ¿dakwö yöawobö yöbawo̧ma, jo̧banö, Yöbawaji, jö̧ba̧lö wetjokobema? Waekwena, ¿jö̧tö? Dios iwene baikwö laebobe Dios iwene yöbawadönöma: Otiwa jawa wene yötjawakwedö tjichi̧ma jwiinö otiwobe, jö̧ba̧lö laebobe.

Romanos 15:19

Ja̧danö Dios O̧'wo̧ Luwo̧ weitjö̧, Dios O̧'wo̧ Luwo̧ ujulunö jojodö edajitjökö jawa chi̧sebijatö, Dios ujulu chi̧sebijatö, edö Diosnö tjösödo jö̧ba̧lö, Dios wei̧ jobadöbi ja̧tjo jö̧ba̧lö. Ja̧danö, jejenö yötawiawö̧, judío jojodöböködöbi Diosnö tjösödinobe, jobadöbi Dios wei̧ ja̧bö. Jau chömöledö, nöinö yöbawö kwebachiachijatö, Jerusaléntjö jamatö, Ilírico niji baibanö. Jobe okobe jwiinö Cristo jawa otiwa jawa wene yöbawiachijatö.

1 Corintios 2:10

Jo̧kwaijayonö ökwödö Jesúsnö ösödadöma ja̧ jawa döwaisobe chömöledö, Diosma iteda O̧'wo̧ Luwo̧nötjö ja̧ jojodö wajwitjina jawa ökwödönö öba̧ja̧dinobetjö̧. Jau chömöledö, wanedö yötawa: Dios O̧'wo̧ Luwo̧ma okobe jwiinö isakwö edo̧ ichejekwa, ja̧danö Dios omukwati̧ jawabi isakwö edo̧ ichejekwa, ja̧bi öwaiso jö̧ba̧lö.

2 Corintios 1:22

Ja̧danö, iteda O̧'wo̧ Luwo̧ do̧'wo̧ luwo̧nö ö̧jobö weenama, ökwödönö seyu doinobedanö ichejekwa, bidöma ötjöda chömöledö jö̧ba̧lö. Ja̧danö, ja̧ iteda O̧'wo̧ Luwo̧nö iyinama öwaetjöda i̧sebobe, isabenö Dios ömöledösa jö̧ba̧lö. Isabenö okobe jwiinö jö̧a̧li̧danö ja̧bo̧ Duluwo̧ma chömöledö, jo̧kwajabetjö̧ jo̧ba webawo̧ ja̧nö, ötjöbi jweinö yötawobö jo̧be.

2 Corintios 6:6

Jejenö usula demawijayonö, sulabenö ja̧bökönö dö̧jobe, ja̧danö ju'wibi Dios iyi̧ waisakwawa di̧sebobe, ja̧danö ju'wibi do̧'wo̧ 'dibachibö dösölö̧jinö ja̧bö dö̧jobe chömöledö, isabenö Dios ömöayedösa jö̧ba̧lö. Ja̧danö ju'wibi, Dios O̧'wo̧ Luwo̧ do̧'wo̧ luwo̧nö ö̧ji̧ma i̧sebobe Dios ömöayedö dö̧ji̧ma, ja̧danö ju'wibi isabenö jojodönö ösödabikwawö ja̧nö di̧sebobe, isabenö Dios ömöayedösa jö̧ba̧lö.

Gálatas 1:12

Jau chömöledö, yötawi̧ wenema jojodötjö cha̧ja̧kwijökötö, ja̧danö ja̧ wenema jojodö la'akatjöda tjöba̧ja̧dinokobe ötjönöma. Jesucristoda ja̧ wene yöbawö i̧sebinobe ötjönöma chömöledö.

Gálatas 1:16

Ja̧danö, Dios ösödenama, iteda itji̧ Jesúsnö i̧sebinobe ötjönöma, judío jojodöböködönö Jesús jawa wene yötawo jö̧ba̧lö. Jejenö baibenama, jojodökwödama yöta̧lakwawijökötö, chotidakwa̧ chöwaiso jö̧ba̧löma,

Efesios 3:10

Ja̧danö, mölejȩnö ju̧kwadö juluwadö ángelesdöbi, ángelesdö tjuluwedöbi Jesúsnö ösödadönö edö jö̧tja̧lakobe, Aaa, judío jojodöma judío jojodöböködökwö babema bakwaso jojodödanö babibadö, jö̧ba̧lö. Ja̧danö, tjöwaisachibakwedö, Ayö, Diosma jwiinö waiso̧we, jö̧ba̧lö. Jobadöma jejenö edö tjöwaisachibobö ösödo̧, Diosma.

1 Tesalonicenses 2:9

Jau chömöledö, kwomukwataduwena ökwödökwö ja̧nö dotidinama. Ökwödönö Dios jawa otiwa jawa wene yöbawö dö̧jonö, ju'wibi ökwödöda du̧kwa kwakwawa demo jö̧ba̧lö dotidijatö chömöledö, usula emawö. Jau chömöledö, ökwödönö te'ada̧lakwawama ökwödö Tesalónica jojodönö baibapji jö̧ba̧lö, mölebi yö̧tebi dotidijatö.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

Hebreos 11:13

Ja̧danö Abrahambi, iteda ömöledöbi, Diosnö tjo̧'wo̧ wana̧lö tjö̧jinobe, wotjenanö baibanö. Idöda tjiteboökena ju'wedö tjitebonö ja̧nö, Dios yöbawö ujunina iyemima ina tjeminokobe, idöda tjiteboma. Yayonö tjo̧'wo̧ ösöwanö tjuju̧kwinobe, Diosnö tjo̧'wo̧ wana̧lö, Ökwödö ba̧kwȩlö̧jatebö dö̧jakwemi ditebo, Dios iyakwemima, ju'wi möle iyakobe, jö̧ba̧lö. Chömöledö, jobadöma tjöwaisinobe, Böjȩnö ja̧nö Dios yöbawö ujunina iyakwemi demököma otiwa, jö̧ba̧lö. Ja̧danö tjöwaisinobe, Ökwödö ba̧kwȩlö̧jatebö ditebo dö̧jakwemima böjȩnömaökena, jö̧ba̧lö. Jobadöma jweinö omukwatö, Ökwödöma jelobeda jojodösa, ina ditebonöma ichiböködösa, jö̧ba̧lö, tjo̧'wo̧ ösöwanö tjuju̧kwinobe, Diosnö tjo̧'wo̧ wana̧lö.

Hebreos 2:4

Ja̧danö, Diosma iteda ujulu i̧sebinobe jobadönötjö jojodö tjöwaisachibobö, Bidö yötjawi̧ma isabenö ji̧ jawa wene, jö̧ba̧lö. Yelösöda jojodö la'akatjöda edajitjökö jawabi i̧sebinobe Diosma, iteda ujulu, jobadö Jesús yöawina yöbawadö yötjawonö. Isabenö, Jesús yöawina yötjawonö Diosma iteda ujulu i̧sebinobe, ju'wi jawabi, ju'wi jawabi i̧sebö, iteda jwiinö ujuluma, jobadö yöbawadönötjö. Ja̧danö, Diosma jobadö Jesús yöawina yöbawadönöma iteda O̧'wo̧ Luwo̧ ujulutjö iyabinobe jobadö yöbawadönö, bakwo̧nökwena jojodönö pjatjatobö. Ja̧danö, okobe jwiinö Dios iteda ujulu i̧sebi̧ma iteda ösödi̧danöda baledinobe jojodö tjöwaisachibobö, Bidö yötjawi̧ma isabenö ji̧ wene, jö̧ba̧lö. Chömöledö, Diosma iteda ujulu i̧sebobetjö̧, Jesús yöawina isabenö ji̧ wene, jö̧ba̧lö, Jesús yöawina tjöbeba̧lö̧jönö omukwatö di̧'yobö jo̧be. Jo̧ba yöawina wenema jwiinö otiwa jawa wene, dö̧jibinö pjaati̧ wene. Jo̧kwaobetjö̧ ja̧ yöawinama, do̧'wo̧ luwo̧ okwanö do̧tjati̧danö do̧batö di̧'yobö jo̧be jelobekwö omukwatö di̧'yapji jö̧ba̧lö, Jesús yöawina öpöjödö. Chömöledö jelobekwö omukwatö 'ya̧dönöma, Dios lȩebakwawö̧.

Hebreos 4:2

Isabenö chömöledö, Dios damötjö yöbawö ujuninama, Ötjönö ösödadöma tjo̧'wo̧ luwo̧ okwa ötjökwö ö'wachö tjöbamatobö jo̧be, jö̧ba̧lö, ökwödönöbi yöbawö ujuninobe. Ökwödöbi Dios iwene, otiwi̧ jawa wene a̧ja̧kwadödobetjö̧, ja̧ yöbawö ujunina wenema ökwödönöbi yöbawö ujuninobe chömöledö. Da'dödömine Dios iwene tja̧ja̧kwinadanö ökwödöbi da̧ja̧kwijatö. Ja̧danö, ja̧ wene a̧ja̧kwö dösödijatö, Isabenö ja̧ wenema otiwi̧ jwei̧ wene, jö̧ba̧lö. Jo̧kwaijayonö da'dödöminema Dios iwene tjöpöjödinobe, otiwi̧ jawa wene yöawinama. Tjöpöjödobetjö̧ ja̧ otiwi̧ jawa wene yöawi̧ma pjaatinokobe jobadönöma, tjo̧'wo̧ luwo̧ okwanöma. Jo̧kwaobetjö̧ Dioskwö ö'wachö bamatinöködö.

1 Pedro 1:25

jo̧kwaijayonö Duluwo̧ yöawi̧ma ba̧kwȩlöjateböda ja̧kobe, jö̧ba̧lö laebobe. Ja̧danö chömöledö, ja̧ ba̧kwȩlö̧jatebö ji̧ Duluwo̧ yöawi̧ma, otiwa jawa wene kwa̧ja̧kwinaduwa wene. Jau chömöledö, ja̧ wene ösödö Diosda i̧tji̧mu baibanö kwöbötjachinaduwobe. Jo̧kwajabetjö̧, bakwo̧da i̧tji̧mu ja̧nö, jwaikwöda kwömöledönö ösödabikwawö ja̧nö kwö̧jaduwo.

1 Pedro 4:6

Jau chömöledö, Diosma okobe deinö jojodönö yöawakwo̧ ja̧tjina otiwojobö sulojobö jö̧ba̧lö, ida̧ökö wobinadönöbi, ina yaba̧ladönöbi. Ja̧danö, jejenö yöawakwo̧obetjö̧, jojodö otiwa jawa wene tja̧ja̧kwobö ösödo̧, ja̧ wene a̧ja̧kwö ösödö tjö̧jibobö. Jo̧kwajabetjö̧ wobinadöbi damötjö otiwa jawa wene yötjawi̧ tja̧ja̧kwinobe chömöledö, jobadöbi ja̧ wene ösödö, tjiteba'otjö okobe deinö böjȩ jojodö Dios lȩebi̧tjö wotji̧danö wotjijayonö, tjo̧'wo̧ luwo̧nöda Dios ö̧ji̧danö tjö̧jakobetjö̧. Jau chömöledö, Diosda ja̧bö dö̧ji̧ otiwojobö sulojobö jö̧ba̧lö yöbawo̧ma, jo̧kwajabetjö̧ jo̧ba ösödi̧danöda ja̧bö dö̧jobö jo̧be.

Apocalipsis 5:11

Jemi ikenama cha̧ja̧kwijatö ángelesdö lo̧tji̧, yelösöda ba̧jekwadö ángelesdöma, ba̧ja̧dakwawökenanö ba̧jekwadö lo̧tji̧ma. Jobadö ángelesdöma inesö ba̧kwawakanö ö̧bena i̧sȩko̧nö ja̧nö lo̧tjijatö, tjöbajalebiya a̧tja̧bayedöda ju̧kwawö̧ tjö̧bajenabi, damö la'aka luwedö tjö̧bajenabi i̧sȩko̧nö ja̧nö.