1 Juan 5:20 - Dios Iwene

²⁰ Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.

1 Juan 5:20 Iomraidhean Croise

Isaías 44:6

Israel jojodötjö inesö la'aka luwo̧, Isabenö Jo̧, israel jojodönö tjöbeba̧lö pjabato̧, Okobe Jwiinö Juluwo̧ Isabenö Jo̧ Diosma baikwö yöa̧lobe: Ötjöma ju'wedötjö ajayinö ji̧nasa̧, ja̧danö ju'wedötjö ikena chö̧jakwo̧sa. Jelo̧ Diosbo̧ma deobe, ötjödasa isabenö Diosbo̧ma.

Isaías 54:5

Jau, ökwö kwilekwedanöbo̧ma, ökwönö otidina Isabenö Jo̧ Okobe Jwiinö Juluwo̧ Dios jö̧ba̧lö mikwo̧da. Ökwönö kwö̧ji̧binö pjabato̧ma, Israel jojodö tjösödökwe Suli̧ Jwibo̧ Dios, okobe deinö bö̧jȩnö ju̧kwadö tjuluwo̧ Dios jö̧ba̧lö ötjabökweda kwilekwedanöbo̧ma, jo̧kwajabetjö̧ tabakwö kwö̧jobö jwibujuja.

Isaías 9:6

Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.

Mateo 13:11

Jejenö atjebökwe, Jesúsma atadinobe: —Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwaijayonö ju'wedö jojodönö jejenö iyinokobetjö̧, wanedö yöbawöda yötawobe jobadönö.

Lucas 24:45

Ja̧danö, jejenö yöba̧lö, tjomukwati̧ po̧bebödanö okobe jwiinö ja̧ Dios iwene laebi̧ jawa tjöwaisachibobö pjabatö yöawinobe.

Juan 1:18

Ja̧danö, bakwo̧bi deobe, Diosnö edo̧ma, damötjöbi babebi. Jo̧kwaijayonö Dios iteakwo̧ itji̧ma Diosnö edo̧. Ja̧danö, jo̧ba, Dabe'do Dios ile niebökwema, ökwödönö Diosnö döwaisachibanö öba̧ja̧dinobe.

Juan 10:30

Ja̧danö, ötjö, ötjö Chabe'do bakwo̧dabedösa— yöbawijetö Jesúsma.

Juan 14:20

Ja̧ mölema, ötjönö yemidanö edö kwöwaisachibaduwakobe, Jesús, iteda abe'do Diosma bakwo̧da, jö̧ba̧lö. Ja̧danö, kwöwaisachibaduwakobe, Ökwödöbi Jesúskwö bakwo̧ iteba'odanö ja̧dösa, jö̧ba̧lö. Ja̧danö, kwöwaisachibaduwakobe, Jesúsma ökwödökwö, bakwo̧ iteba'odanö jo̧, jö̧ba̧lö.

Juan 14:23

—Ötjönö ile nibebö ju̧kwadöma ötjö weti̧ a̧ja̧kwö ja̧badö. Ja̧danö, Chabe'doma jobadönö ile nibebö jo̧. Ja̧danö, ötjö, Chabe'do, jobadönö ichö, jobadökwö dö̧jakwedösa.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 14:9

Jejenö jö̧a̧liökwe: —Felipe ¿ötjönö wajwiköbiji̧?— jö̧a̧linobe Jesúsma Felipenöma—. Ökwödökwö lekwe möle chö̧jijayonö ina kwöwaisachibaduwokobe ötjönöma. ¿Tajawedö yöka̧laduwa, Dabe'donö i̧sebi dedo, jö̧ba̧lö? Yötawaduwakwö. Ötjönö edo̧ma Dabe'do Diosnöbi edobe.

Juan 15:4

Chömöledö, ubasa'ba opjiya dötewi̧danö ötjöma ökwödökwö dötewinö jo̧sa. Ja̧danö, wetaduwakwö. Ötjökwö dötewinö ja̧duwi. Ötjökwö dötewinö ja̧döma ubasa'ba otiwanö wa̧ja'ba wa̧ji̧danö otiwanö da̧peachö tji̧'yakwedö. Ja̧danö, ubasa'ba sopja wa̧jokopja, 'döbebö loawopjama ¿dakwö wa̧jobö? Wa̧jökö. Kököbachöda kököachopja. Jejenö kwi̧'yaduwobe ökwödöma, ötjökwö dötewinö. Ötjökwö dötewinö kwi̧'yaduwökötjö̧ma ¿dakwö da̧peachö kwi̧'yaduwobö? Ötjökwö dötewinö kwö̧jaduwobö jo̧be chömöledö.

Juan 17:14

Ja̧danö, bidö chöba̧ja̧di̧ waisachadönö ökwö yökawi̧ yötawi̧ma tjösödijatö, Jweinö yöbawo̧, jö̧ba̧lö. Ötjöma böjȩ jojodö tjomukwati̧danö omukwatö̧kö̧sa. Ja̧danö bidöbi, ötjödanö, böjȩ jojodö tjomukwati̧danöma omukwatöködö. Ja̧danö, bidöma böjȩnöma tjuju̧kwijayonö böjȩnöda ju̧kwöködö. Mölejȩbebi ju̧kwadö, ötjö chö̧ji̧danö. Jo̧kwaobetjö̧ böjȩ jojodöma yelösöda tjölabinobe bidönöma jobadödanö tjomukwatokobetjö̧—jö̧a̧linobe Jesúsma Abe'donö abebö.

Juan 17:25

Jweinöda Omukwato̧ Chabe'do, sule bö̧jȩda jojodöma ökwönö wajwibadö. Jo̧kwaijayonö ötjöma chöwaisa ökwönöma. Ja̧danö, böjȩ jojodöma wajwitjijayonö, bidö, chöba̧ja̧di̧ waisachadöma tjöwaisobe, Diosma Jesúsnö weinobe, jö̧ba̧lö.

Juan 17:3

Ja̧danö, ba̧kwȩlö̧jatebö ja̧kwawa juna̧ladöma, ökwönö waisö, Diosma Isabenö Jo̧, jö̧ba̧lö, ösödadö. Ja̧danö, ba̧kwȩlö̧jatebö ja̧kwawa juna̧ladöma ötjö, Jesucristonöbi waisö ösödadö, ökwö weköbinökwenöma— aebinobe—.

Juan 20:28

Jejenö jö̧a̧liökwe: —Ökwöma ötjö chuluwo̧ja. Isabenö ötjö cho̧'wo̧ chöwana̧lökwe Diosja— jö̧a̧linobe Tomásma.

Juan 8:42

—Dios ökwödö kwabe'doduwi ö̧jitjö̧ma, ötjönö kwösödaduwena, jo̧ba ö̧jobetjö böjȩkwö ichino̧chobetjö̧. Jo̧ba wei̧da a̧ja̧kwö chichijatö böjȩkwö. Ötjömaö̧kö̧, Jojodö tjujukwobekwö chi̧'yobö jö̧ta̧la, jö̧ba̧lö, omukwatinökösa. Jejenömaökö. Chabe'do Diosda weinökwesa ötjöma— Jesús yöawinobe.

Hechos 20:28

Ina yöbawijetö: —Ju'wi jawabi yötawa ökwödönö, te'ada̧lakwawa jojodönö. Kwö̧jaduwobema otiwanö kwite'ada̧laduwo, kwo̧'wo̧ luwo̧duwi juluwachibanö tupakwö kwi̧'yaduwobö Dioskwö. Ju'wibi yötawa. Ju'wedönöbi kwite'ada̧laduwo Diosnö ösödadönöma. Dios O̧'wo̧ Luwo̧ma ökwödönö 'da̧batö junijetö jobadönö kwite'ada̧laduwobö. Wanedö yötawa: O̧bȩja̧dönö te'ada̧lakwawa jojo a̧jwi̧mu tjöekwanö ite'ada̧li̧danö ökwödöma Jesúsnö ösödadönö kwite'ada̧laduwo. Kwite'ada̧laduwawö̧nöma ida̧ökö Dios ja̧inobe iteda i̧tji̧mu batjibinö. Diosma iteda itji̧ ökwösobu ebawö ö'wöchö imidawinobetjö̧, ida̧ökö Dios ja̧inobe jobadönöma iteda i̧tji̧mu batjibinö, iteda itji̧nö ösödadöma. Jobadönöma kwite'ada̧laduwo— yöbawijetö Pabloma.

Romanos 9:5

Ja̧danö, jobadö Israel jojodöma inesö ajayinö ji̧nadö, Diosnö ösödinadö tji̧tji̧mu tupadanö jojodö. Ja̧danö, jobadö tjömöledöso̧, Israelso̧ baibanö ichinobe Cristoma. Jo̧ba Cristoma okobe deinö tjuluwo̧ Dios, ja̧danö jo̧banöda böjȩ jojodö tjösödo ba̧kwȩlö̧jatebö. Jau chömöledö, jo̧banö tjösödobö chösöda.

1 Corintios 1:30

Ja̧danö, Diosma ökwödönö Cristo Jesúskwö bakobe bakibaduwanö ja̧inobe. Ja̧danö Diosma Cristonötjö iteda öwaisi̧ waisakwawa ji̧ma ökwödönö iyobe. Jau chömöledö, Cristoda sulabe jwibadö badibanö ja̧binama, ja̧danö Cristoda Dios ömöledö badibanö ja̧binama, ja̧danö Cristoda dö̧jibobö midawö wobinama.

2 Corintios 5:17

Jau chömöledö, Cristonö ösödadöma ida̧ökö jo̧bakwö wotjinobe, ja̧danö ida̧ökö jo̧bakwö tjetjachajinobe. Jo̧kwajabetjö̧, baikwö jo̧be chömöledö, bakwo̧ Cristokwö dötewanö ö̧jitjö̧ma, Dios 'yayinö otidajökwe baibanö jo̧ jo̧bama. Jau chömöledö, Cristokwö dötewadönöma, damö jawama ida̧ökö 'dö̧ibajinobe, ja̧danö babe dö̧ji̧ma, 'yayinö ja̧kwawa baibinobe. Jo̧kwajabetjö̧ chömöledö, damö jawa ida̧ökö 'dö̧ibajinobetjö̧, tupakwö ja̧ jawa domukwatoböma jwiobe, jwaikwöda 'yayinö ja̧kwawa jawada domukwatobö jo̧be.

Efesios 3:18

Ja̧danö, atebobe Diosnöma pjaatobö tupakwö ökwödönöbi okobe deinö Dios ömöledö babibinadönöbi Cristo ökwödönö jwiinö ile niebi̧ma kwöwaisachibaduwobö. Cristoma ¿dokwa nöinö ile niebobeda ökwödönöma? Chömöledö, Cristo ile niebi̧ma ba̧ja̧dakwawökenanö nöi̧.

Filipenses 3:9

Cristokwöda bakobe dötewinö chö̧jo jö̧ba̧lö. Ja̧danö, babema Moisés iwȩyudina ja̧bö, ötjöda chujulunö sulabe jwibo̧ batiboböma chisakwokobe chömöledö, babe sulabe jwibo̧ chö̧ji̧ma, Cristonö chösodiökwe Dios sulabe jwibo̧ batibanö ja̧i̧da chömöledö. Jau chömöledö, ja̧ sulabe jwibo̧ chö̧ji̧ma, ötjö ja̧ti̧maökö, yöawi̧ chösödiökwe Dios ja̧i̧da chömöledö.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

Tito 2:13

Jau Tito, ina böjȩnö dö̧jayi, do̧'wo̧ wana̧lö dite'ada̧lobe, isabenö Dios jö̧a̧lina möle badekwachakobe jö̧ba̧lö, inesö otiwa möle, ökwödö dö̧jibinö pjabato̧ la'aka Dios Jesucristoma iteda ujulu i̧sebenama.

Hebreos 1:8

Ja̧danö, jejenö Diosma ömöayedö ángelesdönö yöawijayonö wainö yöawobe iteda Itji̧nöma. Baikwö laebobe Dios iteda Itji̧nö jö̧a̧lina: Isabenö ökwöma Diosja. Ja̧danö, ba̧kwȩlö̧jatebö jojodönö webö kwö̧jakwo̧ja. Isabenö jweinöda omukwatö webö kwö̧jakwo̧ja.

1 Juan 2:23

Chömöledö jejenö omukwato̧ma, Jesús Dios Itji̧bö̧kö̧, jö̧ba̧lö, Dioskwö dötewinö 'yö̧kö̧. Jo̧kwaijayonö Jesúsnö ösödo̧ma, Jesúsma Dios Itji̧, dö̧jibinö imidawobö weinökwe, jö̧ba̧lö, Dioskwö dötewinö 'yo̧.

1 Juan 2:24

Chö̧ja̧wo̧dö, kwomukwatuduwoko jobadö jelobekwö omukwatadö tjomukwati̧danö, Jesúsma Dios Itji̧bö̧kö̧, jö̧ba̧lö. Ökwödöma ajayinö isabenö ji̧ yötjawi̧ kwa̧ja̧kwinaduwada kwo̧'wo̧ luwo̧duwinö ösödö kwi̧'yaduwobö jo̧be chö̧ja̧wo̧dö, Jesúsnö do̧batö kwemaduwena yötjawinama. Ja̧danö, ja̧ isabenö ji̧ yötjawi̧ ösödö kwi̧'yaduwena Dioskwöbi Itji̧ Jesúskwöbi dötewinö kwi̧'yaduwobe.

1 Juan 4:14

Ja̧danö chö̧ja̧wo̧dö ju'wi jawabi, Dioskwö dötewinö 'ya̧dösa, jö̧ba̧lö, döwaisoböma. Ökwödö Jesucristonö edinadöma dedina yöbawadösa, Dabe'do Diosma iteda Itji̧nö weinobe böjȩnö ju̧kwadönö tjö̧jibinö pjabatö, jö̧ba̧lö.

1 Juan 4:16

Chö̧ja̧wo̧dö Diosma ökwödökwö dötewinö i̧'yobetjö̧, ja̧danö jo̧bakwö dötewinö di̧'yobetjö̧ isabenö döwaisachibijatö, Diosma jwiinö ile niebobe ökwödönöma, jö̧ba̧lö. Jejenö waisö jo̧banö do̧'wo̧ wana̧lö di̧'yobe, Diosma isabenö ökwödönöma jwiinö ile nibebo̧, jö̧ba̧lö. Chömöledö, Diosma ile nibeböda jo̧. Ja̧danö bakwo̧, ö̧ja̧wo̧dökwö ile nibebö jo̧ma Dioskwö dötewinö 'yo̧. Ja̧danö, Diosma jo̧bakwö dötewinö 'yo̧, ö̧ja̧wo̧dönö ile nibebö 'yo̧kwö.

1 Juan 4:2

Ja̧danö ¿dakwö kwöwaisaduwobö, Isabenö ite yöawi̧ma Dios O̧'wo̧ Luwo̧tjö̧ ichobe, jö̧ba̧lö? Biya̧ chömöledö: Baikwö jö̧ba̧lo̧ma, Jesucristoma Dios böjȩkwö weinökwe jojo baibanö ö̧jobö, jö̧ba̧lö, jweinö yöbawo̧, Dios O̧'wo̧ Luwo̧tjö laebi̧ma.

1 Juan 5:1

Chö̧ja̧wo̧dö, Jesúsnö ösödadöma, Jesúsma Dios weinökwe dö̧jibinö pjabato̧, jö̧ba̧lö, Dios i̧tji̧mu babibinadö. Diosma jobadönö tjo̧'wo̧ luwo̧nö 'yayi̧ ja̧kwawa iyawö̧. Ja̧danö, Dios i̧tji̧muma Diosnö ile nibebö ju̧kwadö. Ja̧danö, Diosnö isabenö ile nibebö tjuju̧kwobetjö̧ Dios ju'wedö tji̧tji̧mu̧nöbi ile nibebö tjö̧jobe.

1 Juan 5:18

Chö̧ja̧wo̧dö döwaisa. Dios i̧tji̧mu babibinadöma suli̧ jawa ja̧bö 'yö̧ködö. Ja̧danö, Dios Itji̧ Jesúsma jobadö Dios i̧tji̧mu babibinadönö Awetjatjö tjöbeba̧lö te'ada̧lo̧, Awetjama jobadönö jelobekwö tjomukwatobö öibökönö.

Apocalipsis 15:3

Ja̧danö, jobadöma jobe ja̧nö lo̧tjobe chedijatö. Ja̧ lo̧tji̧ma, Dios ömöayo̧ Moisésmine lo̧inabi, Obeja Itji̧danö Jo̧ lo̧inabi, ja̧ lo̧tji̧ma. Ja̧ lo̧tji̧ma baikwö laebobe: Duluwo̧ Dios, ökwöma jwiinö juluwo̧ja. Kwujulu i̧sebo̧ja. Kwujulu kwi̧sebobe edö, Ayö, jö̧ba̧lö, yebabinö dö̧jobe, döbajale jalaka baibanö. Kwujulu i̧sebö ja̧köbi̧ma jweinö omukwatö, otiwanö ja̧bo̧ja. Ökwöma ba̧kwȩlö̧jatebö inesö la'aka luwo̧ja.

Apocalipsis 19:11

Ikenama mölejȩbe chedemi apjude po̧ekwobe chedijatö. Ja̧danö, po̧ekwobe okwatjö kabayu dewo̧nö chedijatö. Jo̧ba kabayu wamenö bakwo̧ ö̧wo̧nö chedijatö. Jo̧ba imima, Jweinö Yöbawo̧ mikwo̧. Jo̧bama, jojodönö lȩbebö jweinö omukwatö webo̧. Ja̧danö, jweinö omukwatö öpöjojodönö ujuluwobö 'yo̧.

Apocalipsis 3:14

Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Laodicea jojodötjö ötjönö ko̧ko̧kwa̧lö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma Isabenö Yöbawo̧, jö̧ba̧lö, ötjabökwe yöawi̧. Ja̧danö, jo̧bama Dios iwene ba̧kwȩlö̧jatebö jweinö yöbawo̧. Ja̧danö, jo̧bada Dios ajayi otidi̧ baibobö ja̧binama. Jo̧bama baikwö yöawobe ökwödö Laodicea jojodönö, jo̧banö ösödadönöma:

Apocalipsis 3:7

Ja̧danö, chedökwema ina chiwȩyudobö weijatö: —Juan, biya̧ yötawi̧ma wȩyudi weköbo, Filadelfia jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, jobe ju̧kwadö ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma suli̧ jwibo̧ yöawi̧. Ja̧danö, jö̧a̧linadanö ja̧bo̧ yöawi̧, biya̧ chiwȩyudi̧ma. Ja̧danö, jo̧bama la'aka luwo̧ Davidmine u̧kwa yawepi̧ juna̧lo̧. Jo̧bada apjude po̧bebö tebato̧ma. Ja̧danö, jo̧bada apjude yö̧beböbi yö̧bebo̧. Jo̧bama baikwö yöawobe ökwödö Filadelfia jojodönö, jo̧banö ösödadönöma:

Apocalipsis 6:10

Ja̧danö, jobadö öwawöködöma labinö Diosnö atjeba̧li̧ cha̧ja̧kwijatö, baikwö: —Duluwo̧ Dios, ökwöma okobe jwiinö webo̧ja, suli̧ jwibo̧ja, jweinö yöba̧lo̧ja. ¿Dokwa lekwe kwite'ada̧lakwa̧da ökwödönö kwabö lobinadönö lȩkeboböma? ¿Dokwa lekwe kwite'ada̧lakwa̧da balekwa mikwa lȩbebö weköbakwa̧ma?—budekwabinö atjeba̧li̧ cha̧ja̧kwijatö.