1 Juan 4:4 - Dios Iwene

⁴ Chi̧tji̧mu, isabenö ökwödöma Dios i̧tji̧mubedöja. Ja̧danö, ökwödökwö dötewinö jo̧ma Diosda. Ja̧danö, Diosma jwiinö juluwo̧. Böjȩnö ju̧kwadötjö Diosnö öpöjödadö tjuluwo̧ Awetjatjö o̧penönö juluwo̧ Diosma. Chi̧tji̧mu, Diosma ökwödönö pjaatobetjö̧ omöna yöbawadö yötjawi̧ma kwöpöjödinaduwobe, Jweinö yöbawöködö, jö̧ba̧lö. Jejenö kwöpöjödaduwobetjö̧ jobadönö kwujuluwinaduwobe.

1 Juan 4:4 Iomraidhean Croise

Juan 12:31

Ida̧ökö Dios yöawi̧ möle badekwacha, jojodönö edö, otiwanö tjö̧jinojobö, sulabenö tjö̧jinojobö yöawi̧ mölema. Ja̧danö, Diosma, ujulu i̧sebö, böjȩnö ju̧kwadönö tjuluwo̧nö söbebö loi̧ möle badekwacha— yöawinobe Jesúsma—.

Juan 14:30

Tjo̧wi̧, babema yötawökö nöinöma. Ida̧ökö böjȩ la'aka luwo̧ Awetja weajawö̧ ötjönö do̧batö tjicha. Jo̧kwaijayonö jo̧ba Awetjama ötjönöma juluwö̧kö̧.

Juan 16:11

Ja̧danö, jo̧ba ichakwo̧ma öwaitjöda öba̧ja̧dakwo̧ jojodönö Dios lȩebakwa̧, tjöwaisachibanö. Ja̧danö ida̧ökö Diosma Awetja, böjȩtjö uluwo̧ baibanö jo̧nö lȩebi̧tjö weinobetjö̧ jojodö tjöwaisachibakobe, Jojodönöbi, suli̧ juna̧ladönöma, Dios lȩebakwawö̧, jö̧ba̧lö. Jejenö jojodö tjöwaisachibanö tjo̧'wo̧ luwo̧nö öba̧ja̧dakobe jo̧ba ichakwo̧, Dios O̧'wo̧ Luwo̧ma— jejenö yöawinobe Jesúsma öba̧ja̧di̧ waisachadönöma.

Juan 17:23

Chabe'do, ötjökwö ökwökwö dötewinö bakwaibedösa. Ja̧danö, ökwöma ötjö cho̧'wo̧ luwo̧ okwa kwö̧jobe. Ja̧danö, ötjöma jobadö tjo̧'wo̧ luwo̧ okwa jo̧sa. Ja̧danö, jobadö tjo̧'wo̧ luwo̧ okwa chö̧jobetjö̧ bakwaibedödanö omukwatö tjuju̧kwobe. Jejenö, bakwaibedödanö omukwatö tjö̧jiawö̧ böjȩnö ju̧kwadöma, jobadönö edö tjöwaisachibakobe, Aaa, Diosma bidönö ile niebobe. Itji̧ Jesús, böjȩkwö weinökwenö ile niebi̧danö isabenö ile niebobe bidönö, Jesúsnö ösödadönöma, jö̧ba̧lö— jejenö Jesúsma aebinobe Abe'donö.

Romanos 8:31

Chömöledö, biya̧ babeda yötawaja̧ omukwatö, ökwödönö suli̧ waedo̧ma bakwo̧bi deobe ichejekwa. Diosda ökwödönö pjabato̧obetjö̧, bakwo̧bi deobe ökwödönö suli̧ waedo̧ma chömöledö.

Romanos 8:37

Jau chömöledö, okobe jwiinö yötawaja̧ baleditjö̧böbi, woditjö̧böbi, ja̧ jawa okobe junibö, ida̧ökö abönö ichibinadösa ökwödöma chömöledö, Jesúsda ökwödönö pjaatinobetjö̧. Jo̧bama ökwödönö ile nibebö pjaatinobetjö̧, ida̧ökö abönö ichibinadösa chömöledö.

1 Corintios 2:12

Ja̧danö, do̧'wo̧ luwo̧nö jo̧ Dios ökwödönö iyinökwema böjȩ jojo o̧'wo̧ luwo̧maökö, Diosma iteda O̧'wo̧ Luwo̧nöda ökwödönö iyinobe. Ja̧danö, Diosma iteda O̧'wo̧ Luwo̧nö ökwödönö iyinobetjö̧, Dios ökwödönö iyi̧ jawa döwaisobö jo̧be.

1 Corintios 6:13

Ja̧danö ju'wedö yötja̧lena, Aaa, kwakwawama dukwobö jo̧be, ja̧danö dukwa'woma, kwakwawa'woda jo̧be jö̧ba̧lö. Jau chömöledö, jejenö jo̧be, ja̧danö kwakwawabi, dukwa'wobi söbebö loakwo̧ Diosma. Jo̧kwaijayonö diteba'oma söbebö loökakwo̧ Diosma chömöledö. Duluwo̧ Jesús iteba'o woawatjö tjeachajinö ja̧inadanö, ökwödö diteba'obi woawatjö tjeachajinö ja̧akwo̧ Diosma iteda ujulunö. Ja̧danö, jejenöobetjö̧, omukwatökönaduwi, Aaa, putasujunö ja̧titjö̧ma chiteba'o jawadaobetjö̧ sulökena jö̧ba̧lö. Jau chömöledö, diteba'oma putabedönö ja̧do jö̧ba̧lö jö̧ka'o, Duluwo̧ ösödi̧danö ja̧do jö̧ba̧lö ja̧'o chömöledö, ja̧danö Duluwo̧ma diteba'o ite'ada̧lobe.

2 Corintios 4:4

Jau chömöledö, yödawi̧ma isabenö öwawinö yödawobe, jo̧kwaijayonö öpöjödadöma böjȩ jojodö tjösödökwe Awetja omöna yöa̧li̧ tjösödobetjö̧ yödawi̧ tjöpöjödobe chömöledö. Jau chömöledö, wanedö yötawa: Awetjama jobadönö ja̧obe, tjomukwati̧nö yȩa'wo okwa tjö̧ji̧danö tjomukwatobö, otiwa jawa wene dejati̧ tjedapji jö̧ba̧lö. Jau chömöledö, Duluwo̧ Cristoma iteda Abe'do Diosdanö bakwainö jo̧, ja̧danö jojodönö salöinö idejatobö ösödo̧, jo̧banö ösödö tjö̧jibakobetjö̧. Jo̧ba salöinö idejati̧ wene otiwa jawa weneda yödawobe jojodönö chömöledö, jo̧kwaijayonö ja̧ salöinö dejati̧ tjedapji jö̧ba̧lö, Awetjama öpöjödadönö omöna yöa̧lobe.

2 Corintios 6:16

Diosnö ösödakwawejutjö, Diosböködö o̧'wo̧ jawa tjösödobö ¿Diosma weenaji̧? Kwöwaisaduwa chömöledö, jejenömaökö, ¿jö̧tö? Jau chömöledö, isabenö Cristonö öpöjödadökwö bakibaduwoko, ökwödö Cristonö ösödadöda 'yaba̧lo̧ Dios ejubedö dö̧jobetjö̧. Jau chömöledö, isabenö Dios eju babibinadösa, Dios iwene laebi̧danö. Baikwö laebobe Dios iwene chömöledö Dios yöawinama: Ötjöma ötjö chömöledö tjo̧'wo̧ luwo̧nö chö̧jakwo̧sa, ja̧danö jobadö tjö'da̧de kwetachocha, ja̧danö ötjöma jobadö tjuluwo̧ Dios chö̧jakwo̧sa, ja̧danö jobadöma ötjö chömöledö tjö̧jakwedö, jö̧ba̧lö laebobe.

Efesios 2:2

Jejenö ja̧böda ju̧kwiaköbinaduwobe ökwödöma, Diosnö wajwibadö sulabenö ja̧tji̧danö ja̧bö. Ja̧danö, Awetja ösödi̧da ja̧bö ju̧kwiaköbinaduwobe. Jo̧bama iteda ömöayedönö, öwawöködönö webo̧. Ja̧danö, babema böjȩnö ju̧kwadönöbi webo̧, Dios wei̧ öpöjödadönö.

Efesios 3:17

Ja̧danö, Diosnö atebobe, Cristo otiwanö ö̧jobö kwo̧'wo̧ luwo̧duwinö, jo̧banö kwösödinaduwobetjö̧. Ja̧danö Diosnö atebobe chömöledö, ökwödönö pjaatobö tupakwö, ba̧kwȩlö̧jatebö ösödabikwawö kwö̧jaduwobö ju'wedökwöbi Dioskwöbi.

Efesios 6:10

Babema bajaleapo yöbawö chiwȩyuda, chömöledö. Duluwo̧ma jwiinö juluwo̧ ¿jö̧tö? Ja̧danö, iteda ujulunö pjaatobetjö̧ kwo̧'wo̧ luwo̧duwinö jemi tupakwö juluwachibanö kwi̧'yaduwo.

1 Juan 2:1

Chö̧ja̧wo̧dö chösödawö̧, böjanö yötawi̧ma, Sulabenö ja̧böma kwö̧jaduwoko, jö̧ba̧lö, yöbawö chiwȩyuda. Jo̧kwaijayonö sulabenö ja̧köbaduwena biya̧ yötawi̧ kwomukwataduwo. Jesucristoma Dios öba a'o jo̧. Jo̧bama jwiinö otiwo̧. Ja̧danö, jo̧bama ökwödönö pjabatö te'ada̧lo̧. Ja̧danö chö̧ja̧wo̧dö, sulabenö ja̧denama Jesucristoma Diosnö aebobe ja̧ sulabenö ja̧daja̧ma söbebö loobö. Ja̧danö, Jesucristoma Diosnö aebiökwe sulabenö ja̧köbaduwi̧ma söbebö loobe.

1 Juan 2:13

Ja̧danö, ökwödöma kwo̧'wo̧ luwo̧duwinö kwöda̧peachaduwobe chö̧ja̧wo̧dö. Ja̧danö, ökwödö da̧peachadönö yötawa, Isabenö ökwödöma Jesús, la'akatjöda ji̧nanö waisadöja, jö̧ba̧lö. Ja̧danö, ökwödö möayedö tjujuluwi̧danö kwo̧'wo̧ luwo̧duwi okwanö kwujuluwaduwobe chö̧ja̧wo̧dö. Ja̧danö, ökwödö möayedö tjujuluwi̧danö juluwadönö yötawa, Sulabo̧ Awetjanö juluwinadöja, jö̧ba̧lö. Isabenö böjanö wȩyudö yötawa chi̧tji̧mu, Dabe'do Diosnö waisadöja, jö̧ba̧lö.

1 Juan 3:24

Ja̧ Dios dötölataja jawa wei̧ a̧ja̧kwo̧ma Dioskwö dötewinö 'yo̧. Ja̧danö, Diosma jo̧bakwö ö̧jobe. Ja̧danö chö̧ja̧wo̧dö, Dios O̧'wo̧ Luwo̧, do̧'wo̧ luwo̧ okwanö ö̧jobö Dios weinökwema döwaisachibanö pjabato̧, Diosma ökwödökwö jo̧, jö̧ba̧lö. Jau chö̧ja̧wo̧dö, Diosma iteda wei̧ a̧ja̧kwadökwö jo̧, jo̧bakwö dötewinö 'ya̧dökwö.

1 Juan 4:13

Chö̧ja̧wo̧dö, isabenö döwaisa, Dioskwö dötewinö ju̧kwadösa, ja̧danö Diosma ökwödökwö dötewinö jo̧, jö̧ba̧lö. Ja̧ma ¿dakwö döwaisobeda chömöledö? Dios O̧'wo̧ Luwo̧, Dios ökwödönö iyinökwema ökwödönö wajuwanö döwaisachibanö yöawobe. Jo̧bama do̧'wo̧ luwo̧nö pjabatö, Ökwödöma Dioskwö dötewinö 'ya̧döja, jö̧ba̧lö, yöawobe. Ja̧danö, Diosma ökwödökwö dötewinö jo̧, jö̧ba̧lö, pjabatö yöawobe Dios O̧'wo̧ Luwo̧ma ökwödönöma, do̧'wo̧ luwo̧nö.

1 Juan 4:16

Chö̧ja̧wo̧dö Diosma ökwödökwö dötewinö i̧'yobetjö̧, ja̧danö jo̧bakwö dötewinö di̧'yobetjö̧ isabenö döwaisachibijatö, Diosma jwiinö ile niebobe ökwödönöma, jö̧ba̧lö. Jejenö waisö jo̧banö do̧'wo̧ wana̧lö di̧'yobe, Diosma isabenö ökwödönöma jwiinö ile nibebo̧, jö̧ba̧lö. Chömöledö, Diosma ile nibeböda jo̧. Ja̧danö bakwo̧, ö̧ja̧wo̧dökwö ile nibebö jo̧ma Dioskwö dötewinö 'yo̧. Ja̧danö, Diosma jo̧bakwö dötewinö 'yo̧, ö̧ja̧wo̧dönö ile nibebö 'yo̧kwö.

1 Juan 4:6

Jo̧kwaijayonö ökwödö Jesús webawedö yödawi̧ma tjöpöjödobe, böjȩ jawa yödawokobetjö̧. Ökwödöma Dios i̧tji̧mubedösa, ja̧danö, Dios jawada yöbawadösa. Jo̧kwaobetjö̧ Diosnö waisadöma ökwödö yödawi̧ tjösödobe. Isabenö yötawa chö̧ja̧wo̧dö, Diosnö öpöjödadöma böjȩ jawa yötjawi̧ ösödadö. Ja̧danö, Diosnö ösödadöma ökwödö yödawi̧ ösödadö, yödawi̧ma Dios O̧'wo̧ Luwo̧tjö ichobetjö̧. Chö̧ja̧wo̧dö jejenö öwawobe ti o̧'wo̧ luwo̧ öibawö̧ tjö̧jojobö, jö̧ba̧lö. Yödawi̧ tjösöditjö̧ma Dios O̧'wo̧ Luwo̧ öibawö̧. Jo̧kwaijayonö yödawi̧ tjöpöjöditjö̧ma jelo̧ o̧'wo̧ luwo̧ öibawö̧, Cristo öpöjojo o̧'wo̧ luwo̧da.

1 Juan 5:19

Ja̧danö chö̧ja̧wo̧dö döwaisa, Ökwödöma Dios i̧tji̧mu babibinadösa, jö̧ba̧lö. Ja̧danö, böjȩnö ju̧kwadö Jesúsnö öpöjödadöma Dios i̧tji̧muböködö. Jobadöma sulabo̧ Awetja sulabenö ja̧tjobö öibawö̧, jo̧ba i̧tji̧mubedö.

1 Juan 5:4

Ja̧danö chö̧ja̧wo̧dö döwaisa, böjȩnö ju̧kwadö sulabedö, Diosnö öpöjödadöma tjuju̧kwobe ökwödönö jelobekwö domukwatobö ötjibotö jö̧ba̧lö. Jo̧kwaijayonö ökwödöma jweinö jö̧ba̧ladösa, Jesúsnö ösödadösa, Jesúsma Dios Itji̧, jö̧ba̧lö. Jo̧kwaobetjö̧ ökwödö Dios i̧tji̧mu babibinadöma Dios ujulunö böjȩnö sulabedönö juluwadösa, jobadö wetji̧ a̧ja̧kwökönö. Jau chö̧ja̧wo̧dö, böjȩnö sulabedönö juluwadö ju̧kwadösa, Dios wei̧da a̧ja̧kwö ja̧nö.

Apocalipsis 12:11

Dios ömöledö babibinadö wobinadöma Awetja weelö ji̧binadö, Obeja Itji̧danö Jo̧ ökwösobutjö tjidichawobetjö̧. Ja̧danö, Dios iwene yötjawinobetjö̧ Awetjanö juluwinadö. Jobadöma tjo̧'wo̧ 'dibachibö ja̧nö yöbawinadö, jobadönö kwabö lotjenabi.