1 Juan 4:1 - Dios Iwene

¹ Chö̧ja̧wo̧dö chösödawö̧, a̧ja̧kwaduwitjö. Okobe jwiinö yöawakwawa kwa̧ja̧kwaduwi̧ma juluwanö kwösödaduwoko, Jweinö yöbawo̧, jö̧ba̧lö. Isabenö, bakwo̧ yöawi̧ a̧ja̧kwö ö'wiawakwa̧lö̧jönö kwa̧ja̧kwa̧laduwobö jo̧be, ba̧jekwadö omöna yöbawadö tjö̧jobetjö̧. Jau chö̧ja̧wo̧dö, ö'wiawakwa̧lö̧jönö kwa̧ja̧kwa̧laduwo kwöwaisaduwobö, Ite yöbawo̧ma ¿Dios O̧'wo̧ Luwo̧ öibökweji̧? Ja̧danö, yöawi̧ma ¿Dios O̧'wo̧ Luwo̧tjö̧ ichobeji̧? jö̧ba̧lö.

1 Juan 4:1 Iomraidhean Croise

1 Reyes 13:18

Jejenö atadiökwe, pöema yöa̧linobe, —Ökwö Dios yöawi̧ yöbawo̧ kwö̧ji̧danö, ötjöbi bakwaibo̧sa, ja̧danö Isabenö Jo̧ weökwe angelma ötjönö weajabe, –Dios yöawi̧ yöbawo̧nö kwa̧debo, kwejube ichibö kwanöbi ukwobö, jadanö owöbi owobö, –jö̧ba̧lö Isabenö Jo̧ weökwe angelma ötjönö weajabe, —jö̧ba̧lö yöa̧linobe pöema. Jo̧kwaijayonö, jejenö yöa̧li̧jayonö, omöna yöa̧linobe pöema.

Proverbios 14:15

Ju'wibi yötawa: Jweinö omukwatö̧kö̧ma, okobe jwiinö jo̧banö yötja̧li̧ma a̧ja̧kwö ösödo̧, otiwa, jö̧ba̧lö. Jo̧banöma sulabenö yötja̧lijayonö, otiwa, jö̧ba̧lö omukwato̧, wajwiobetjö̧. Ja̧danö, jelo̧nöbi yötawa: Ö'wiyawakwawönö omukwato̧ma i̧'yakwa̧ abönö jweinö omukwato̧, jweinö i̧'yakobetjö̧.

Marcos 13:21

Ina yöbawijetö: —Ja̧ baledenama ju'wedöma yötja̧lakobe, Edaduwi, biteda, Dios weajökwema, jojodö tjö̧jibinö pjaatobö weajökwema, jö̧ba̧lö. Ja̧danö, jelo̧nöbi, Edaduwi, iteda Dios weajökwema, jojodö tjö̧jibinö pjaatobö weajökwema, jö̧ba̧lö. Jejenö jö̧tja̧litjö̧ma kwa̧ja̧kwaduwoko, omöna yötja̧lobetjö̧.

Lucas 12:57

Tupakwö yöawinobe Jesúsma: Ja̧danö, kwömöledökwö wene kwujuna̧laduwenama, ¿tajawedö ökwödöda yöba̧lakwawö otikwö loköbaduwokobeda? ¿Tajawedö ökwödöda yöba̧lakwawökönö lȩekwa luwo̧ öba a'o kwi̧'yaduwobeda?

Lucas 21:8

Abebö tja̧ja̧kwökwe, Jesúsma atadö yöawinobe baikwö: —Chömöledö, ö'wiakwawönö kwö̧jaduwo, jelo̧ ökwödönö omöna yöa̧li̧ kwösödaduwapji jö̧ba̧lö. Ba̧jekwadö chiminö ichö yötjawakwedö, ötjödasa Dios weakwo̧ jö̧a̧linökwema jö̧ba̧lö, ja̧danö ju'wedöbi yötjawakwedö, 'dö̧ibaji̧ möle tjo̧wi̧ juluwanö baiba jö̧ba̧lö, jo̧kwaijayonö yötja̧li̧ ösödökönaduwi, ja̧danö tjö̧kömanöma 'yö̧könaduwi.

Hechos 17:11

Ja̧danö, Bereanö ju̧kwadö judío jojodöma, Pablo yöawi̧ a̧ja̧kwö ösödö a̧ja̧kwijadötö. Jobadöma Tesalónicanö ju̧kwadö judío jojodötjö o̧penönö ösödö a̧ja̧kwijadötö. Jobadöma tjo̧'wo̧ ösöwanö, Da̧ja̧kwobö jö̧da̧la, jö̧ba̧lö, a̧ja̧kwijadötö Dios iwenema. Ju'wi möle jwiinö tja̧ja̧kwaja̧ ikenama, Dios iwene, damötjö tjiwȩyudina waisachö eda̧lijadötö, Pabloma Dios iwene yöawi̧da jweinö yöbawo̧, jö̧ba̧lö.

Hechos 20:29

Ina yöbawijetö: Ja̧danö, jobadö Jesúsnö ösödadönöbi, ökwödödabi otiwanö eda̧lö kwite'ada̧laduwo ju'wedö omöna yötjawi̧ a̧ja̧kwö tjösödapji. Jweinö yötawa chömöledö, chi̧'yajabe okobetjöma ju'wedöma tjichakobe, omöna yöbawadöma. Jobadöma ichö, ökwödökwö ko̧ko̧kwö, omöna yötjawakobe. Jobadöma ökwödö kwite'ada̧laduwawö̧nö omöna yötjawakobe idöda omöna tjomukwati̧ tja̧ja̧kwobö. Jobadöma idöda jweökönö tjomukwati̧danö kwite'ada̧laduwawö̧bi jejenö tjomukwatobö yötjawakobe. Wanedö yötawa: Jobadö omöna yöbawö ichadöma, tebo luwo̧ awili, lobo mikwo̧, o̧bȩja̧dö tjuju̧kwobekwö sulabenö ukwotö jö̧ba̧lö ichi̧danö sulabenö yöbawö tjichakobe, kwite'ada̧laduwawö̧nö sulabenö yöbawö. Loboma, o̧bȩja̧dönö le jwiinö edo̧. Ja̧danö, omöna yöbawö tjichakwedöma le jwiinö edadö, ökwödönöma— yöbawijetö Pabloma.

1 Corintios 12:10

Dios O̧'wo̧ Luwo̧ma bakwo̧nö ujulu iyena, jojodö edajitjökö jawa i̧sebo jö̧ba̧lö. Ja̧danö, jelo̧nö iyena Dios yöawi̧ yöawo jö̧ba̧lö. Ja̧danö, jelo̧nö iyena ju'wedö yötjawi̧ a̧ja̧kwö Dios yöawi̧da yötjawojobö, jelo̧ yöawi̧da yötjawojobö öwaiso jö̧ba̧lö. Ja̧danö, jelo̧nö iyena, ju'wedö tjiwene wajwii̧ iwenenö waisachökönö yöawo jö̧ba̧lö. Ja̧danö, jelo̧nö iyena, wajwii̧ tjiwene yötja̧li̧ a̧ja̧kwö, jweinö labebö lobö yöawo jö̧ba̧lö.

1 Corintios 14:29

Ja̧danö, Dios yöawi̧ yöbawadöma bakwo̧nökwena yötjawo, du̧ju̧tajaena, wa̧medukwaena bakwo̧nökwena yötjawena. Ja̧danö yöbawo̧ yöawonö, ju'wedöma tja̧ja̧kwo, jweinö yöawojobö jö̧ba̧lö.

1 Tesalonicenses 5:20

Dios yöawi̧ yöawakwawama öpöjödökönaduwi.

1 Tesalonicenses 5:21

Jo̧kwaijayonö, okobe jwiinö kwa̧ja̧kwaduwi̧ma, otiwojobö jweojobö jö̧ba̧lö kwisakwaduwo, ja̧danö kwa̧ja̧kwaduwaja̧ otiwitjö̧ma 'diinö do̧ka̧laduwo.

2 Tesalonicenses 2:2

Ju'wedö, Aaa, Duluwo̧ ichi̧ möle ida̧ökö badekwachajabe, jö̧ba̧lö yötjawenama, wajwibö kwomukwataduwa, ja̧danö kwo̧'wo̧ tjo̧kekwaduwa chömöledö. Jejenö yötjawitjö̧böbi, Aaa, Dios O̧'wo̧ Luwo̧ma jejenö i̧sebajabe, jö̧ba̧lö yötjawitjö̧böbi, Aaa, Pabloma jejenö yöbawö iwȩyudajabe, jö̧ba̧lö yötjawitjö̧böbi, yötjawi̧ma kwösödaduwa chömöledö.

1 Timoteo 4:1

Timoteo, Dios O̧'wo̧ Luwo̧ma wajuwanö yöawobe, 'dö̧ibaji̧ möle, ju'wedöma Dios iwene, Jesús jawa wene junibö, Awetja ömöayedö ángelesdö omöna yötjawi̧da tja̧ja̧kwakwedö jö̧ba̧lö, jobadö yötjawi̧da ösödö.

2 Timoteo 3:13

Jau Timoteo, sulabedöbi, Jesúsnö ösödadösa jö̧ba̧lö omöna yöba̧ladöbi ida̧ökö sulabenö ja̧tjobe babema, jo̧kwaijayonö 'dö̧ibaji̧ mölema jemi bajalekwönönö jwiinö sulabenö ja̧tjakobe, jojodönö omöna yöba̧löbi, omöna yöa̧lakwawa ösödöbi.

2 Pedro 2:1

Jau chömöledö, Dios yöawi̧ yöbawadöma Dios O̧'wo̧ Luwo̧ yöawi̧da yötjawinobe, jo̧kwaijayonö, jobadö otiwanö yötjawonö, Dios yöawi̧ yöbawöködöbi yötjawinobe. Jobadöma Dios yöawi̧ yötjawököjayonö, Dios yöawi̧ yöbawadösa, jö̧ba̧lö omöna yötja̧linobe. Ja̧danö chömöledö, ökwödö kwö'da̧deduwitjö jobadöjayedö omöna yöbawadö tjö̧jakobe chömöledö, Dios iwene yöbawadösa, jö̧ba̧lö omöna yöba̧ladöma. Jobadöma isa̧ökö wene yötjawakobe, suli̧ tjöwaedotö jö̧ba̧lö. Ja̧danö ju'wibi, Duluwo̧nö, jobadö tjö̧jibobö midawinanö tjöpöjödakobe, la'aka luwo̧bö̧kö̧ jö̧ba̧lö. Jejenö suli̧ waedadöma, Dios juluwanö jobadönö lȩebobö ja̧badö chömöledö.

1 Juan 2:18

Chö̧ja̧wo̧dö chösödawö̧, chi̧tji̧mu ötabiwö̧ ökwödönö yötawa. Ida̧ökö 'dö̧ibaji̧ möle baiba. Ja̧danö, belö ja̧ möle yötjawi̧ kwa̧ja̧kwinaduwobe, 'dö̧jibaji̧ möle baibena jojo, Cristo öpöjojo ötjabökwema ichakobe, jö̧ba̧lö. Chö̧ja̧wo̧dö yötawaduwakwö. Ida̧ökö, ba̧jekwadö Cristo öpöjojodöma tjö̧jobe. Jobadönö edö döwaisa, Ida̧ökö 'dö̧jibaji̧ möle baiba, jö̧ba̧lö.

1 Juan 2:7

Chö̧ja̧wo̧dö chösödawö̧, tupakwö yötawobö jö̧ta̧la ökwödöda ösödabikwawö dö̧ji̧ma. Diosma weobe jejenö dö̧ja̧wo̧dökwö dö̧jobö, ösödabikwawö. Ja̧ Dios wei̧ma ida̧ökö kwa̧ja̧kwinaduwobe. Belö Jesúsnö do̧batö kwemaduwinemitjö baikwö, ja̧ Dios wei̧, Ökwödöda ösödabikwawö kwö̧jaduwo, jö̧ba̧lö, kwa̧ja̧kwinaduwobe.

2 Juan 1:7

Ja̧danö chö̧ja̧wo̧dö, ba̧jekwadö tjö̧jobe ökwödötjö labebö kwebachadö, ökwödönö jelobekwö kwomukwataduwobö ötjibotö jö̧ba̧lö yöbawadöma. Jobadöma omöna yöbawadö, Jesúsma Dios weinökwemaökö, jö̧ba̧lö. Ja̧danö, Jesúsma jojo babibinö̧kö̧, jö̧ba̧lö, omöna yöbawadö. Ja̧danö, Jojodö tjö̧jibinö pjabatö̧kö̧, jö̧ba̧lö, yelösöda omöna yöbawadö. Jejenö yöbawadöma jojodönö jelobekwö tjomukwatobö ötjibotö jö̧ba̧lö yötjawobe. Jobadöma jelo̧ jojo, Cristo öpöjojo ötjabökwe omöna yöawi̧danö omöna yöbawadö.

3 Juan 1:11

Gayo, chöjawo̧ chösödökwe, yötawakwö. Suli̧ jawa ja̧badö tjö̧ji̧danö kwö̧joko. Otiwi̧ jawa ja̧badö tjö̧ji̧danöda kwö̧jo. Otiwi̧ jawa ja̧bö ja̧döma tji̧sekwobe, Ökwödöma Dios i̧tji̧mu babibinadösa, jö̧ba̧lö. Jo̧kwaijayonö suli̧ jawa ja̧bö ja̧döma wainö tji̧sekwobe, Ökwödöma Diosnö wajwibadösa, jö̧ba̧lö. Gayo, otiwi̧ ja̧wa ja̧bö kwö̧jo, dö̧ja̧wo̧dönö pjabatö.

Apocalipsis 2:2

Jo̧bama baikwö yöawobe ökwödö Éfesonö ju̧kwadönö, jo̧banö ösödadönöma: Ökwödö kwö̧jaduwi̧ma okobe jwiinö chöwaisa. Ja̧danö, otiwanö kwö̧jaduwi̧ma chöwaisa. Chedemi otiwanö, ötjö weti̧ a̧ja̧kwö kwö̧jaduwobe. Ja̧danö, sulabenö baledonöbi ökwödöma kwo̧'wo̧duwi 'dibachibö kwö̧jaduwobe. Ja̧danö, chedemi sulabenö omukwatadö yötjawi̧ma yelösöda kwa̧ja̧kwaduwokobe. Ja̧danö, jelobe omukwatö yöba̧linadönöma kwöwaisachibinaduwobe, Omöna yöba̧ladö, jö̧ba̧lö. Jobadöma, Ökwödöma Jesús webawedösa, jö̧ba̧lö, yötja̧lijayonö ökwödöma, otiwanö omukwatö kwisakwinaduwobe, jweinö yötja̧lojobö, omöna yötja̧lojobö, edö. Jejenöma otiwanö kwöwaisachibinaduwobe, Jobadöma omöna yöba̧ladö, Jesús webawöködö, jö̧ba̧lö.