1 Juan 3:14 - Dios Iwene

¹⁴ Ja̧danö chömöledö, Cristotjö dö̧ja̧wo̧dökwö ösödabikwawö dö̧jenama di̧sekwobe, Do̧'wo̧ luwo̧nö balekwedö, 'yabayedöda dö̧jobe, jö̧ba̧lö. Jo̧kwaijayonö Cristotjö ö̧ja̧wo̧dönö ösödökönö, o̧'wo̧ sulinö edo̧ma ina o̧'wo̧ luwo̧nö wobinadanö ö̧jobe.

1 Juan 3:14 Iomraidhean Croise

Proverbios 21:16

Ja̧danö, ju'wibi yötawa: Bakwo̧ ajayinöma otiwanö omukwatö ji̧nama, otiwanö omukwati̧ kabatibö jelobekwö sulabenö omukwatitjö̧ma wobinadö tjö̧jobe ichibakwo̧.

Mateo 25:40

Atjebitjö̧, ötjö la'aka luwo̧ma chatadakwo̧sa: Isabenö yötawaduwakwö, bidö chömöledötjö ju'wedötjö nijakwönönö mikwawö̧kö̧nö jejenö pjakatinaduwenama, ötjönöda pjakatinaduwobe, jö̧ba̧lö.

Lucas 15:24

Bite chitji̧nö woinenaö̧kö̧ jö̧ba̧lö domukwatinajayonö, woawatjö tjeachajinobedanö ichejekwobetjö̧, ja̧danö ile'dewinajayonö, bajalianö yemidanö jo̧banö döbadekwajabetjö̧. Jo̧kwajabetjö̧ do̧'wo̧ ösöwanö pjiesta dukwaduwo, jö̧ba̧lö weinobe iteda ömöayedönö.

Lucas 15:32

Jo̧kwaijayonö jejenömaökö kwöjawo̧nöma, jo̧bama ökwödökwö ji̧nö̧kö̧. Jo̧bama woinobedanö ji̧nobe, ja̧danö ile'dewinobedanö ji̧nobe, cho̧'wo̧ tjo̧achinö. Jo̧kwaijayonö, jejenö ji̧najayonö, woawatjö tjeachajabedanö jo̧be, ja̧danö ile'dewinajayonö döbadekwajabedanö jo̧be. Jejenö baledajabema ¿pjiesta dujunökenaji̧? Isabenö do̧'wo̧ ösöwanö pjiesta dujunobö jo̧be, kwöjawo̧ otiwanö tjeachajabetjö̧, jö̧ba̧lö yöa̧linobe abe'doma—. Jesúsma jejenö wanedö yöawinobe, fariseo jojodönöbi, Moisés iwȩyudina ba̧ja̧dadönöbi. Jesúsma sulabedökwö sulabenö ukwobe jö̧ba̧lö tjo̧'wo̧ sulinö yötja̧liökwe, Jesúsma atadö wanedö yöawinobe, sulabedöma sulabenö tjomukwati̧ kabatibö tjöbalewachenama, Diosma isabenö o̧'wo̧ ösöwanö ösödobe jobadönö, jo̧kwajabetjö̧ jobadönö edöma kwödameakwaduwa jö̧ba̧lö.

Lucas 7:5

jo̧bama isabenö ökwödö judío jojodönö ösödobetjö̧. Jau Jesús, jo̧bama otiwanö pjabato̧ ökwödönö, jo̧bada ba̧nö da̧ja̧kwaleju otidinobe, jo̧kwajabetjö̧ isabenö mikwawo̧. Jo̧banö ¿pjakatakwa̧ji̧?— jö̧ba̧lö atjebinobe.

Juan 13:35

Jejenö kwö̧jaduwobe edö, okobe deinö jojodöma tjöwaisachibakobe, Bidöma Jesús öba̧ja̧di̧ waisachadö, jö̧ba̧lö— yöawinobe Jesúsma.

Juan 15:12

Ja̧danö, ökwödönö wetaduwakwö. Ötjö ökwödönö ile nitebi̧danö kwömöledöduwinö ile nibekwö kwö̧jaduwo.

Juan 15:17

Ja̧danö chömöledö, yemidanö wetaduwakwö. Ökwödödada ile nikekwaduwo— yöawinobe Jesúsma öba̧ja̧di̧ waisachadönöma.

Juan 5:24

Ina yöawinobe Jesúsma judío la'aka luwedönö: —Isabenö yötawa, ötjö yötawi̧ a̧ja̧kwadö, ötjönö webinanö ösödadöma, ba̧kwȩlö̧jatebö ja̧kwawa tjujuna̧lakwedö. Jobadöma lȩtebökakwawö̧. Wobajaletjö tjö̧jibanö babibö, ba̧kwȩlö̧jatebö tjuju̧kwakwedö— yöawinobe—.

2 Corintios 5:1

Jau chömöledö, döwaisa, babe diteba'oma lekwe jö̧kö'o, baikwö wanedö yötawa: Babe diteba'oma, sule löwötedanö ichejekwa, jo̧kwaijayonö ja̧'o woenama, balekwa'o ba̧kwȩlö̧jatebö ja̧kwa'o dujuna̧lakwedösa ökwödö Jesúsnö ösödadöma. Ja̧danö ja'oma, Diosda otidö iyakwa'o, chömöledö, ja̧danö jojodö tjotidöte löwötedanö ichejekwökakobe, Diosda inesö otiweju otidinejudanö ichejekwakwa'o chömöledö.

Gálatas 5:22

Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,

Efesios 1:15

Chömöledö, Duluwo̧ Jesúsnö kwösödaduwi̧bi, ju'wedö Dios ömöledö babibinadökwö ösödabikwawö kwö̧jaduwi̧bi yötjawi̧ cha̧ja̧kwinobetjö̧ ba̧kwȩlö̧jatebö Diosnö ösödö yöta̧lobe, Chabe'do otiwanö pjakatinobe, jö̧ba̧lö. Ja̧danö, Diosnö atebena ba̧kwȩlö̧jatebö ökwödönö pjaatobö atebobe.

Efesios 2:1

Chömöledö, Diosma ökwödö wobinadödanö ju̧kwadönöma yemidanö 'yakibajaduwinö ja̧inobe, kwo̧'wo̧ luwo̧duwinöma. Jau chömöledö, ökwödöma ajayinöma Dios wei̧ öpöjödö, sulabe kwösödaduwi̧da ja̧bö kwuju̧kwaduwobetjö̧ wobinadödanö kwuju̧kwinaduwobe, kwo̧'wo̧ luwo̧duwinöma.

Efesios 2:5

sulabenö ja̧bö dö̧jijayonö pjaatinobe Diosma. Ökwödöma do̧'wo̧ luwo̧nöma wobinadödanö dö̧jijayonö Diosma, do̧'wo̧ luwo̧nö 'yadibajinö ja̧inobe, Cristokwöda dö̧jobö. Chömöledö Diosma mikwa jwiinö otiwa jawa iyö dö̧jibanö pjaatinawö̧sa.

1 Tesalonicenses 4:9

Chömöledö, Diosma ida̧ökö ökwödönö öba̧ja̧dobe, kwömöledöduwi Jesúsnö ösödadönö ösödabikwawö kwö̧jaduwobö. Ja̧danö, jo̧ba öba̧ja̧di̧danö isabenö okobe deinö kwömöledöduwi kwiteboduwi Macedonia nijinö ju̧kwadönö ösödadöja. Jo̧kwajabetjö̧, Aaa, ja̧ jawa ba̧ja̧dö chiwȩyudo jö̧ba̧löma chomukwatökö chömöledö, ida̧ökö jejenö ja̧bö kwö̧jaduwobetjö̧. Jo̧kwaijayonö, yayonö ökwödönö budekwödanö wedobe chömöledö, jemi tupakwönönö ösödabikwawö kwö̧jaduwo jö̧ba̧lö.

Hebreos 13:1

Chömöledö yötawaduwakwö. Babe kwö̧ja̧wo̧döduwinö ösödabikwawö kwö̧jaduwi̧danö jemi tupakwöbi jwaikwöda ösödabikwawö kwi̧'yaduwo.

1 Pedro 1:22

Ja̧danö chömöledö, ökwödöma ida̧ökö isabenö wene ösödö kwidichawinaduwobetjö̧, kwömöledöduwi Jesúsnö ösödadönö ösödadöja, yöne dömöledö jö̧ba̧lö. Jo̧kwajabetjö̧ jwaikwöda tupakwönönö ösödabikwawö kwö̧jaduwo chömöledö,

1 Pedro 3:8

Ja̧danö, bajaleapo okobe deinö ökwödönö baikwö yötawa chömöledö: Bakwainö omukwatö, lȩlö̧jinö kwomukwatakwawaduwo. Jau chömöledö, kwömöledöduwinö ösödabikwawö kwö̧jaduwo, ja̧danö, Aaa, otiwo̧sa, jö̧ba̧lö omukwatökönö, dösölö̧jinö ja̧bö kwö̧jaduwo kwömöledöduwinö.

2 Pedro 1:7

Ja̧danö jemi tupakwö kwömöledöduwinö ösödabikwawö kwö̧jaduwobö kwisakwaduwo, Ja̧danö jemi tupakwö okobe deinö jojodönö isabenö kwösödaduwobö kwisakwaduwo chömöledö.

1 Juan 2:3

Chö̧ja̧wo̧dö ¿dakwö ja̧nö di̧sekwobeda döwaisobö, Isabenö ökwödöma Diosnö waisadösa, jo̧bakwö dötewinö 'ya̧jadösa, jö̧ba̧lö? Biya̧ chö̧ja̧wo̧dö: Dios wei̧ a̧ja̧kwö dö̧jobö jo̧be. Jejenö, jo̧ba wei̧ a̧ja̧kwö dö̧jena döwaisa, Isabenö ökwödöma Diosnö waisadösa, jö̧ba̧lö.

1 Juan 3:23

Ja̧danö, Dios wei̧ma dötölataja jawa. Abönö jawa biya̧: Jesucristonö dösödobö weobe, Jesucristoma Dios Itji̧, jwiinö inesö jo̧, jö̧ba̧lö. Ikenama jawa, Dios wei̧ma biya̧: Ökwödöda ösödabikwawö dö̧jobö weobe.

1 Juan 4:12

Chö̧ja̧wo̧dö, Diosma edawö̧kö̧. Bakwo̧bi deobe Diosnö edo̧ma. Edawö̧kö̧jayonö ökwödöma dö̧ja̧wo̧dönö ile nibebö dö̧jenama di̧sekwobe, Diosnöma edö ja̧dösa, jö̧ba̧lö. Jau chö̧ja̧wo̧dö, Dioskwö ja̧nö, jo̧banö edö dö̧jobedanö jo̧be, jo̧ba ile nibebö ö̧ji̧danö dö̧jobetjö̧. Ja̧danö chö̧ja̧wo̧dö, dö̧ja̧wo̧dönö ile nibebö dö̧jena Diosma ökwödökwö dötewinö i̧'yobe. Jejenö Dioskwö 'ya̧nö ökwödö do̧'wo̧ luwo̧nö pjabatö öibobe Diosma, dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, Diosma jejenö ösödo̧, jo̧ba ökwödönö ile niebi̧danö ökwödöma dö̧ja̧wo̧dönö ile nibebö dö̧jobö.

1 Juan 5:13

Ja̧danö chö̧ja̧wo̧dö, ökwödönö chöwaisa. Ökwödöma Jesúsnö ösödadöja, Jesúsma Dios Itji̧, inesö jo̧, jö̧ba̧lö. Ja̧danö, ökwödönö yöbawö chiwȩyudaduwakwö kwomajadeduwinö isabenö kwöwaisaduwobö, Ökwödöma ba̧kwȩlö̧jatebö duju̧kwakwedösa, jö̧ba̧lö. Isabenö chö̧ja̧wo̧dö, Jesúsnö kwösödaduwobetjö̧ ba̧kwȩlö̧jatebö kwö̧jaduwakobe.

1 Juan 5:2

Ja̧danö chö̧ja̧wo̧dö ¿dakwö di̧sekwobeda, Isabenö ökwödöma Dios i̧tji̧munö ile nibebö ja̧dösa, jö̧ba̧lö? Biya̧: Diosnö ile nibebö, ja̧danö jo̧ba wei̧ da̧ja̧kwobö jo̧be. Jejenö, Dios wei̧ a̧ja̧kwö ja̧nö di̧sekwobe Diosnöbi, Dios i̧tji̧munöbi ile nibebadösa, jö̧ba̧lö.