1 Juan 2:29 - Dios Iwene

²⁹ Chö̧ja̧wo̧dö kwöwaisaduwa, Cristoma jweinöda omukwato̧, jö̧ba̧lö. Jo̧kwaobetjö̧ Cristo jweinö omukwati̧danö jweinö omukwatö ja̧döma tji̧sekwobe, Ökwödöma Dios i̧tji̧musa, jö̧ba̧lö. Jau chö̧ja̧wo̧dö, Dios i̧tji̧muma Cristo jweinö omukwati̧danö jweinö omukwatö ja̧dö. Jo̧kwaobetjö̧ jejenö kwö̧jaduwo chö̧ja̧wo̧dö, Dios i̧tji̧mu tjö̧jobö ji̧ma, jweinö omukwatö, ja̧danö Cristokwö dötewinö 'ya̧nö. Jejenö kwö̧jaduwobetjö̧ taba jwiinö kwedaduwakwedöja Cristonö, yemidanö ichenama.

1 Juan 2:29 Iomraidhean Croise

Juan 1:13

Dios i̧tji̧mu, jö̧ba̧löma, tjojo'do jobadönö jemi̧danömaökö. Dios i̧tji̧mu batjibi̧ma, tjabe'do, tjojo'do tjöbötjati̧danömaökö. Ja̧danö, tji̧lȩkwa̧mukwö tjö̧ji̧tjö baibanömaökö, Dios i̧tji̧mu batjibi̧ma. Wainö bötjachadö, Dios i̧tji̧muma. Jobadöma, Dios ajayinö omukwati̧danö iteda i̧tji̧mu babibö bötjachadö, Dios iteda omukwati̧tjöda.

Juan 7:18

Bakwo̧ iteda ösödi̧, iteda omukwati̧ yöbawo̧ma o̧'wo̧ luwo̧ okwa sulabenö omukwato̧, itedada ösödi̧ma. Jojodö itenöda ösödö, Bitema jwiinö waiso̧, jö̧ba̧lö, tjomukwatobö isakwo̧. Jo̧kwaijayonö bakwo̧, jo̧banö webo̧ ösödi̧da ja̧bo̧ma, o̧'wo̧ luwo̧ okwa otiwanö omukwato̧, jojodöma webo̧nöda tjösödobö isakwö. Jobama jweinöda yöbawo̧— yöawinobe—.

Hechos 10:35

Bakwo̧, jelobe jo̧bi jelobe jo̧bi, Diosnö yebabinö omukwato̧nö Diosma otiwanö edobe—yöbawijetö—.

Hechos 22:14

Jo̧bama ötjönöma yöawijatö, Saulo, da'dödömine tjuluwo̧ Diosma ökwönö 'da̧batö ujuninobe, jo̧ba ösödi̧ kwöwaisachibobö. Diosma ökwönö 'da̧batö ujuninobe iteda itji̧nö, iteda wei̧ ja̧bo̧nö, suli̧ jwibo̧nö waisachiböbi kwöwaisachibobö, iwene a̧ja̧kwöbi kwa̧ja̧kwobö.

Hechos 3:14

Jesúsnö, suli̧ jwibo̧nö, Dioskwö wene jwibo̧nö öpöjödö, laeboböma akebaduwijökötö, Jesúsnö labebökönuwi, jö̧ba̧lö. Jo̧banö laebo jö̧ba̧lö weköbaduwokonö jelo̧nö, sulabo̧nö, jojodönö kwabö lobinanöda weköbaduwijatö Pilato laeboböma.

2 Corintios 5:21

Jau chömöledö, otiwa jawa wenema baikwö laebobe: Cristoma la'akatjöda sulabenö ja̧inököjayonö, Diosma weinobe, ökwödö sulabenö ja̧di̧ma Cristonö baibobö, jo̧bada midawö woobö. Jejenö weinobe chömöledö, ökwödöma Cristokwö dötewanö ja̧nö, Cristonötjö Dios sulabe jwii̧ ökwödöbi dujuna̧lakobetjö̧.

Hebreos 7:26

Jo̧kwaobetjö̧ chömöledö, Jesúsda Dios 'da̧batö ujuninökwema Diostjö jojodötjö la'aka pjabato̧ baibanö, ökwödö jojodönö pjaatobö. Ja̧danö, jo̧bama la'akatjöda jojodönö o̧'wo̧ sulinö edö̧kö̧. Ja̧danö chömöledö, jo̧bama la'akatjöda taba̧lö̧ji̧ jawa ja̧bö̧kö̧. Ja̧danö, jo̧bama sulabedökwö pjabacha̧löma jö̧kö̧. Ja̧danö chömöledö, jo̧bama Dios öwaisachobekwöchobe ö̧bemi, inesö la'aka luwo̧ ö̧bena bo̧, mölejȩbe.

Santiago 1:18

Jau chö̧ja̧wo̧dö, Diosma otiwanöda iyo̧. Ja̧danö, jo̧ba otiwanöda iyo̧ma ökwödönö otiwanö pjabatö weinobe iteda iwene, isabenö ji̧ wenema. Ja̧ iwenema ökwödö dö̧jibinö pjaati̧ wene, chö̧ja̧wo̧dö. Ja̧danö, ja̧ wene a̧ja̧kwö dösödinobetjö̧ yemidanö döbötjachijatö do̧'wo̧ luwo̧nö, iteda i̧tji̧mu, jwiinö mikwawadö babibö. Jejenö ösödinobe Diosma, iteda isabenö iwene a̧ja̧kwö dösödobö, iteda i̧tji̧mu babibö. Yelösöda Diosma otiwanö pjaatinobe ökwödönö, jo̧ba otidinatjö o̧penönö mikwawadö badibinö. Ja̧danö, Diosma iteda okobe jwiinö otidinatjö ökwödönö edö yöa̧lobe, Bidö chi̧tji̧muma jwiinö mikwawadö, jö̧ba̧lö. Isabenö chö̧ja̧wo̧dö, okobe jwiinö Diostjö ichi̧ma otiwobe.

1 Pedro 1:23

bakwo̧da i̧tji̧muköbaduwobetjö̧. Jau chömöledö, Dios iwenema yaba̧lö ji̧, ja̧danö 'dö̧ibajökö ji̧, ja̧danö ja̧ wene ösödö, 'yayinö kwöbötjachinaduwobe chömöledö. Ja̧danö chömöledö, 'yayinö kwöbötjachinaduwenama, woba jojodö tji̧tji̧mu baibanöma kwöbötjachinaduwokobe, wobö̧kö̧ jo̧ Dios i̧tji̧muda bötjachinadöja.

1 Pedro 1:3

Dösödaduwo Diosnö, Duluwo̧ Jesucristo Abe'donö chömöledö, jo̧bama isabenö lȩlö̧jinö edö ökwödönö pjaatinobetjö̧. Jau chömöledö, Jesucristo wobajaletjö tjeachajinobetjö̧, ökwödönö 'yayinö bötjachibadö badibanö pjaatinobe. Jo̧kwajabetjö̧, babema isabenö inesö ja̧kwawa jawa do̧'wo̧ wana̧lö te'ada̧ladösa,

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.

2 Pedro 1:4

Jau chömöledö, Duluwo̧ma dejatinö juluwo̧obetjö̧, ja̧danö jwiinö otiwo̧obetjö̧, inesö mikwawi̧ wene ökwödönö yöbawö ujunajabe, yöawi̧ ösödö, suli̧tjö dö̧jibobö, ja̧danö iteda otiwi̧ ökwödöbi dujuna̧lobö. Jau chömöledö, kwöwaisaduwa, böjȩ jojodö sulabenö tjösödi̧tjö böjȩma suli̧ jwöachobe, ¿jö̧tö? Jo̧kwaijayonö ja̧ suli̧ jwöachi̧tjö dö̧jibanö pjabato̧ Duluwo̧ma, ja̧danö böjȩ suli̧ jwöachijayonö, ökwödöma Duluwo̧ inesö otiwi̧ dujuna̧lakwedö dö̧jobe.

1 Juan 2:1

Chö̧ja̧wo̧dö chösödawö̧, böjanö yötawi̧ma, Sulabenö ja̧böma kwö̧jaduwoko, jö̧ba̧lö, yöbawö chiwȩyuda. Jo̧kwaijayonö sulabenö ja̧köbaduwena biya̧ yötawi̧ kwomukwataduwo. Jesucristoma Dios öba a'o jo̧. Jo̧bama jwiinö otiwo̧. Ja̧danö, jo̧bama ökwödönö pjabatö te'ada̧lo̧. Ja̧danö chö̧ja̧wo̧dö, sulabenö ja̧denama Jesucristoma Diosnö aebobe ja̧ sulabenö ja̧daja̧ma söbebö loobö. Ja̧danö, Jesucristoma Diosnö aebiökwe sulabenö ja̧köbaduwi̧ma söbebö loobe.

1 Juan 3:5

Ja̧danö kwöwaisaduwa, Cristoma böjȩkwö ichinobe jojodö tjusula tjumusidi̧, Dios jojodönö lȩebobö tjumusidi̧ma imidawobö, jö̧ba̧lö. Jejenö Cristoma imidawinobe jojodö tjusuli̧ma, Dios söbebö loobö. Jau chö̧ja̧wo̧dö, Cristoma suli̧ jwibo̧obetjö̧ jo̧bada jojodö tjumusidi̧ midawinama.

1 Juan 3:7

Chi̧tji̧mu, yötawaduwakwö. Isabenö bakwo̧ Dios wei̧ a̧ja̧kwö jo̧ma, sulabenö ja̧bökönö jo̧. Jo̧bama Cristo sulabenö ja̧bökönö ö̧jinadanö sulabenö ja̧bökönö jo̧. Jo̧kwaijayonö ju'wedö jelobekwö omukwatö yötjawobe. Jobadöma ökwödönö sulabenö ja̧köbaduwobö ötjibotö jö̧ba̧lö yötjawobe. Chö̧ja̧wo̧dö, jobadö yötjawi̧ma kwa̧ja̧kwaduwoko. Jobadö jelobekwö omukwatö yötjawi̧ a̧ja̧kwökönö otiwanö ja̧bö kwi̧'yaduwo chö̧ja̧wo̧dö.

1 Juan 4:7

Chösödawö̧, isabenö dö̧ja̧wo̧dökwö ösödabikwawö dö̧jaduwo. Ja̧danö, ösödabikwawö dö̧jobö dujuluma ¿detjö ichobeda? Diostjöda ichobe chö̧ja̧wo̧dö, iteda i̧tji̧munö pjaati̧ma. Ja̧danö, ösödabikwawö dö̧ji̧ma di̧sekwobe, Ökwödöma Dios i̧tji̧mu babibinadösa, jö̧ba̧lö. Ja̧danö, dö̧ja̧wo̧dökwö ösödabikwawö dö̧ji̧ma di̧sekwobe, Diosnö waisadösa, ja̧danö, jo̧bakwö dötewinö 'ya̧dösa, jö̧ba̧lö.

1 Juan 5:1

Chö̧ja̧wo̧dö, Jesúsnö ösödadöma, Jesúsma Dios weinökwe dö̧jibinö pjabato̧, jö̧ba̧lö, Dios i̧tji̧mu babibinadö. Diosma jobadönö tjo̧'wo̧ luwo̧nö 'yayi̧ ja̧kwawa iyawö̧. Ja̧danö, Dios i̧tji̧muma Diosnö ile nibebö ju̧kwadö. Ja̧danö, Diosnö isabenö ile nibebö tjuju̧kwobetjö̧ Dios ju'wedö tji̧tji̧mu̧nöbi ile nibebö tjö̧jobe.

1 Juan 5:18

Chö̧ja̧wo̧dö döwaisa. Dios i̧tji̧mu babibinadöma suli̧ jawa ja̧bö 'yö̧ködö. Ja̧danö, Dios Itji̧ Jesúsma jobadö Dios i̧tji̧mu babibinadönö Awetjatjö tjöbeba̧lö te'ada̧lo̧, Awetjama jobadönö jelobekwö tjomukwatobö öibökönö.

1 Juan 5:4

Ja̧danö chö̧ja̧wo̧dö döwaisa, böjȩnö ju̧kwadö sulabedö, Diosnö öpöjödadöma tjuju̧kwobe ökwödönö jelobekwö domukwatobö ötjibotö jö̧ba̧lö. Jo̧kwaijayonö ökwödöma jweinö jö̧ba̧ladösa, Jesúsnö ösödadösa, Jesúsma Dios Itji̧, jö̧ba̧lö. Jo̧kwaobetjö̧ ökwödö Dios i̧tji̧mu babibinadöma Dios ujulunö böjȩnö sulabedönö juluwadösa, jobadö wetji̧ a̧ja̧kwökönö. Jau chö̧ja̧wo̧dö, böjȩnö sulabedönö juluwadö ju̧kwadösa, Dios wei̧da a̧ja̧kwö ja̧nö.

3 Juan 1:11

Gayo, chöjawo̧ chösödökwe, yötawakwö. Suli̧ jawa ja̧badö tjö̧ji̧danö kwö̧joko. Otiwi̧ jawa ja̧badö tjö̧ji̧danöda kwö̧jo. Otiwi̧ jawa ja̧bö ja̧döma tji̧sekwobe, Ökwödöma Dios i̧tji̧mu babibinadösa, jö̧ba̧lö. Jo̧kwaijayonö suli̧ jawa ja̧bö ja̧döma wainö tji̧sekwobe, Ökwödöma Diosnö wajwibadösa, jö̧ba̧lö. Gayo, otiwi̧ ja̧wa ja̧bö kwö̧jo, dö̧ja̧wo̧dönö pjabatö.