1 Juan 2:27 - Dios Iwene

²⁷ Jo̧kwaijayonö jelo̧ ökwödönö ba̧ja̧do̧ma ö̧jobe, Dios O̧'wo̧ Luwo̧, Cristo kwo̧'wo̧ luwo̧duwinö ö̧jobö iyinökwema. Ja̧danö, jo̧ba öba̧ja̧di̧ma jwiinö isabenö ji̧ yöawakwawa. Omönama jwiobe yelösöda jo̧ba Dios O̧'wo̧ Luwo̧ öba̧ja̧di̧ma. Jo̧kwaobetjö̧ jelobekwö omukwatö yöbawadö ökwödönö tjöba̧ja̧dobö jwiobe chö̧ja̧wo̧dö. Ja̧danö yötawaduwakwö, Dios O̧'wo̧ Luwo̧ öba̧ja̧di̧ma, biya̧: Cristokwö dötewinö kwi̧'yaduwo, chö̧ja̧wo̧dö.

1 Juan 2:27 Iomraidhean Croise

Proverbios 28:5

Ja̧danö, ju'wibi yötawa: Sulabenö omukwatadöma jojodökwö otiwanö tjö̧joböma wajwibadö, jweinöda yöba̧lö. Jo̧kwaijayonö Dios wei̧ tja̧ja̧kwobö ösödadöma jojodökwö otiwanö tjö̧joböma jwiinö waisadö. Otiwanö, jweinöda yöba̧lö ju̧kwadö.

Mateo 13:11

Jejenö atjebökwe, Jesúsma atadinobe: —Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwaijayonö ju'wedö jojodönö jejenö iyinokobetjö̧, wanedö yöbawöda yötawobe jobadönö.

Juan 14:16

Ja̧danö, ökwödö ötjönö ösödadönöma, Chabe'donö atebocha jelo̧ Pjabato̧nö weobö, ötjö chȩwa̧jabe okobe balekwo̧nö. Jo̧ba pjabato̧ma ökwödökwö ba̧kwȩlö̧jatebö ö̧jakwo̧.

Juan 14:17

Jo̧bama Dios O̧'wo̧ Luwo̧, jweinöda yöbawo̧. Ja̧danö, jo̧bama otiwanö öba̧ja̧da̧lakwo̧ ökwödönöma, otiwanö kwöwaisachibaduwobö. Diosnö öpöjödadöma jo̧ba pjaati̧ma tjemökakwedö, tjomajade okwanö wajwitjökweobetjö̧. Jo̧kwaijayonö ida̧ökö ökwödöma kwöwaisaduwökwe babema ökwödökwö ö̧jobetjö̧. Ju'wi möle ökwödö kwo̧'wo̧ luwo̧duwi okwa tebachibö ö̧jakwo̧, ba̧kwȩlö̧jatebö ö̧jobö— yöawinobe Jesúsma öba̧ja̧di̧ waisachadönöma.

Juan 14:26

Ja̧danö, chȩwa̧jabe okobema Dabe'do Dios, ötjö Chabe'doma ökwödönö weakobe jelo̧nö, ötjönö balekwo̧nö, Pjabato̧nöma. Jo̧bama Dios O̧'wo̧ Luwo̧. Ökwödönö okobe jwiinö öba̧ja̧da̧lakwo̧. Jo̧bama ötjö chöba̧ja̧dinabi kwomukwataduwobö pjaatakwo̧— yöawinobe Jesúsma—.

Juan 16:13

Jo̧kwaijayonö Dios O̧'wo̧ Luwo̧, otiwanöda yöbawo̧ma ichena jo̧bada öibakwo̧ ökwödönöma, otiwanö kwöwaisachibaduwobö kwo̧'wo̧ luwo̧duwinö. Dios O̧'wo̧ Luwo̧ma, Iteda iwene yöawökakwo̧, Chabe'do iwene a̧ja̧kwakwawada yöawakwo̧. Baledakwa̧bi öwaitjöda yöa̧lakwo̧.

Juan 4:14

Jo̧kwaijayonö ötjö chiyobu owo̧ma yemidanöma ojwiyo owoböma o̧ti̧lö̧jökökwe, jo̧ba o̧'wo̧ luwo̧ okwanö ojwese'dodanö okwobetjö̧, ba̧kwȩlö̧jatebö ja̧kwawa okwe'dodanö— yöawinobe Jesúsma.

Juan 6:45

Damötjö Dios yöawi̧ yöbawadö tjiwȩyudinobe, Diosma okobe deinö jojodönöma ba̧ja̧do̧, jö̧ba̧lö. Jo̧kwaobetjö̧ yötawaduwakwö. Dabe'do Dios iwene a̧ja̧kwö waisachibadöma ötjönö ösödö tjichibakwedö.

1 Corintios 2:12

Ja̧danö, do̧'wo̧ luwo̧nö jo̧ Dios ökwödönö iyinökwema böjȩ jojo o̧'wo̧ luwo̧maökö, Diosma iteda O̧'wo̧ Luwo̧nöda ökwödönö iyinobe. Ja̧danö, Diosma iteda O̧'wo̧ Luwo̧nö ökwödönö iyinobetjö̧, Dios ökwödönö iyi̧ jawa döwaisobö jo̧be.

1 Corintios 2:13

Ja̧danö, biya̧ yödawi̧ wenema, böjȩ jojodö waisadö tjöba̧ja̧di̧ jawa yödawokobe, Dios O̧'wo̧ Luwo̧ öba̧ja̧di̧ jawada yödawobe. Ja̧danö, tjo̧'wo̧ luwo̧ jawa labebö lobö yödawobe Dios O̧'wo̧ Luwo̧nö juna̧ladönö.

2 Corintios 1:21

Jau chömöledö, Diosma isabenö okobe jwiinö jö̧a̧li̧danö ja̧bo̧. Cristonö dösödiökwe, yöbawö ujuninadanö Diosma ökwödönö ujuninobe, Cristokwö dötewadö dö̧jobö, ötjönöbi, ökwödö Corintio jojodönöbi, ja̧danö jo̧bada ökwödönö 'da̧batö ujuninobe iteda ömöledö badibanö.

Efesios 4:21

Ökwödöma Jesús jawa, isabenö yötjawi̧ wene a̧ja̧kwinadöja. Jo̧banö isabenö yötjawi̧ tjöba̧ja̧dinawö̧ja.

Colosenses 2:6

Cristo Jesúsnö kwösödinaduwobe chömöledö, Duluwo̧ jö̧ba̧lö, jo̧kwajabetjö̧ jo̧bakwö dötewanö kwö̧jaduwobö jo̧be.

1 Tesalonicenses 2:13

Ja̧danö, ju'wibi yötawaduwakwö chömöledö. Ökwödönö Dios iwene yödawenama, Aaa, jojodö yötjawi̧ jö̧ba̧löma kwöpöjödinaduwokobe, Dios iwene jö̧ba̧lö kwösödinaduwobe chömöledö. Ja̧danö, jejenö kwösödinaduwobetjö̧, Diosnö kabatökönö ösödö adebobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, yödawina wenema isabenö Dios iwene, ja̧danö ja̧ wenetjö Diosma ina ökwödö Jesúsnö ösödadönö kwöbalewachibaduwanö ja̧bo̧.

1 Tesalonicenses 4:9

Chömöledö, Diosma ida̧ökö ökwödönö öba̧ja̧dobe, kwömöledöduwi Jesúsnö ösödadönö ösödabikwawö kwö̧jaduwobö. Ja̧danö, jo̧ba öba̧ja̧di̧danö isabenö okobe deinö kwömöledöduwi kwiteboduwi Macedonia nijinö ju̧kwadönö ösödadöja. Jo̧kwajabetjö̧, Aaa, ja̧ jawa ba̧ja̧dö chiwȩyudo jö̧ba̧löma chomukwatökö chömöledö, ida̧ökö jejenö ja̧bö kwö̧jaduwobetjö̧. Jo̧kwaijayonö, yayonö ökwödönö budekwödanö wedobe chömöledö, jemi tupakwönönö ösödabikwawö kwö̧jaduwo jö̧ba̧lö.

1 Timoteo 2:7

Ja̧danö, Diosma okobe deinö tjö̧jibobö ösödo̧obetjö̧, ötjönö weinobe, Jesús webawo̧ batibanö, ja̧danö judío jojodöböködönö yöbawo̧ batibanö. Ja̧danö, ötjönö weinobe judío jojodöböködönö isabenö wene yötawobö, Jesús jawa isabenö wene yötawobö weinobe. Ja̧ yötawi̧, judío jojodöböködönö yötawobö weinobe jö̧ba̧lö yötawi̧ma, jweinö yötawa, omöna yöta̧lökö.

1 Pedro 1:23

bakwo̧da i̧tji̧muköbaduwobetjö̧. Jau chömöledö, Dios iwenema yaba̧lö ji̧, ja̧danö 'dö̧ibajökö ji̧, ja̧danö ja̧ wene ösödö, 'yayinö kwöbötjachinaduwobe chömöledö. Ja̧danö chömöledö, 'yayinö kwöbötjachinaduwenama, woba jojodö tji̧tji̧mu baibanöma kwöbötjachinaduwokobe, wobö̧kö̧ jo̧ Dios i̧tji̧muda bötjachinadöja.

1 Juan 2:28

Jo̧kwaobetjö chi̧tji̧mu chösödawö̧, ökwödönö yemidanö yötawa. Jwaikwöda tupakwö kwi̧'yaduwo Cristokwö dötewinö. Jejenö kwi̧'yaduwo, Cristo yemidanö ichenama yöka̧laduwakobetjö̧, Chuluwo̧ ökwökwö dötewinö 'ya̧dösa, jö̧ba̧lö. Jejenö Cristokwö dötewinö kwi̧'yaduwobetjö̧ ju'winö jo̧banö kwedaduwena taba jwiinö kwedaduwakwedöja, yemidanö böjȩkwö ichenama.

1 Juan 3:24

Ja̧ Dios dötölataja jawa wei̧ a̧ja̧kwo̧ma Dioskwö dötewinö 'yo̧. Ja̧danö, Diosma jo̧bakwö ö̧jobe. Ja̧danö chö̧ja̧wo̧dö, Dios O̧'wo̧ Luwo̧, do̧'wo̧ luwo̧ okwanö ö̧jobö Dios weinökwema döwaisachibanö pjabato̧, Diosma ökwödökwö jo̧, jö̧ba̧lö. Jau chö̧ja̧wo̧dö, Diosma iteda wei̧ a̧ja̧kwadökwö jo̧, jo̧bakwö dötewinö 'ya̧dökwö.

2 Juan 1:2

Jau chö̧ja̧wo̧dö, Dios isabenö ji̧ iwenema do̧'wo̧ luwo̧nö jo̧betjö̧ ökwödönö öbibö pjaatobe dö̧ja̧wo̧dönö ile nidebobö. Babebi ba̧kwȩlö̧jateböbi ja̧ Dios isabenö ji̧ iwenema do̧'wo̧ luwo̧nö jo̧be, ökwödönö pjabatö.