1 Juan 2:16 - Dios Iwene

¹⁶ Ja̧danö ¿taji tji̧sekwobeda böjȩ jawa sulabenö tjösödi̧ma? Biya̧ chö̧ja̧wo̧dö: Jojodö tjiteba'o sulabe wei̧ tjösödi̧ma. Ja̧danö, ju'wibi. Böjȩ jawa edö, ju'wi jawabi, ju'wi jawabi, Chujuna̧lo, jö̧ba̧lö. Ja̧danö ju'wi jawabi, böjȩ jawa sulabe tjösödi̧ tji̧sebi̧ma biya̧: Baikwö jö̧ba̧lo̧, Editjö, luwo̧sa. Ötjöma jojodö tjuluwo̧sa, ja̧danö teabi, kwakwawabi, baladabi juna̧lo̧sa, jö̧ba̧lö, yelösöda jo̧bama böjȩ jawa sulabe tjösödi̧ma i̧sebo̧. Chö̧ja̧wo̧dö, jejenö böjȩ jawa ösödö tjö̧ji̧ma Dabe'do Diostjö ichokobe. Jojodötjö, Diosnö öpöjödadötjöda ichobe, ja̧ böjȩ jawa tjösödi̧ma.

1 Juan 2:16 Iomraidhean Croise

Génesis 3:6

Ja̧danö, isujuma jowinö wa̧ji̧ma jedemi kwakwawanöbi otiwijetö. Jowibi jedemi jwiinö otiwijetö. Waisakwawabi otiwioko ösödinö edijotö. Jo̧kwaioko jowinö wa̧ji̧ma 'döbebö kwijotö. Kwaja̧ju jilekwenö iyijotö. Ja̧danö, jo̧babi kwijetö.

Génesis 6:2

Ja̧danö, ja̧ mölema baikwö baledijetö: Mölejȩnö ju̧kwadö ángelesdötjö sulabedö ángelesdöma böjȩnö ju̧kwadö ya̧dönö tjedemi, jwiinö otiwadö jö̧ba̧lö, tji̧lȩkwa̧munö tjemotö jö̧ba̧lö ösödijadötö. Jejenö tjösödobetjö̧ jobadö sulabedö ángelesdöma böjȩnö ju̧kwadö ya̧dönö emijadötö, jobadötjö bakwo̧nökwena tjösödokokwena.

Diosnö ösödo̧ Job mikwo̧ usula emawina jawa 31:1

Tupakwö yöa̧linobe Jobma: —Isabenö Dios wei̧ a̧ja̧kwö jo̧sa, baikwö wanedö yöta̧la: Ötjökwö, chöbajalekwö sulabenö edökönö chö̧jakwa̧ yöbawö chujunijatö, –La'akatjöda chilekwobökuju möayujunö chedökakwo̧sa, Aaa, isunö chö̧jowe, jö̧ba̧löma. Dios lȩebapji jö̧ba̧lö, la'akatjöda chilekwobököjunö ösödi̧nö chedökakwo̧sa, –jö̧ba̧lö jobekwö yöbawö chujunijatö ötjödada.

Proverbios 27:20

Ja̧danö, ju'wibi yötawa, wanedö: Wobinadö tjuju̧kwemima ju'wedönöbi ju'wedönö isakwi̧danö ba̧kwȩlö̧jatebö isakwobe, wobaduwi baikwö kwichaduwo ökwödökwö pjabacha̧lö, jö̧ba̧lö. La'akatjöda isakwobö kaatibokobe, tjo̧wi̧ta ju'wedö tjichobö chisakwökö, jö̧ba̧lö. Ja̧ ji̧danö ökwödö jojodöma nöinö tea demotö jö̧ba̧lö isakwadösa. Ba̧kwȩlö̧jatebö ju'wi jawabi ju'wi jawa demotö jö̧ba̧lö omukwatadösa. Ba̧kwȩlö̧jatebö domajadenö ju'wi jawabi ju'wi jawa demotö jö̧ba̧lö domukwatobe. La'akatjöda, tjo̧wi̧ta chujuna̧la jö̧ba̧lö domukwatokobe.

Proverbios 6:25

¡A̧ja̧kwitjö chitji̧! Jobujuma jwiinö otiwuju jö̧jijayonö kwomajade okwanö kwomukwatoko, chösödoko, jö̧ba̧lö. Ja̧danö, jöbajalenö i̧sekwö obuju ökwönö, ötjökwö kwö̧jo jö̧ba̧lö. Jobekwö ji̧sekwijayonö kwomajade okwanö kwomukwatoko, Chösödoko, jö̧ba̧lö. Chitji̧ kwosodoko jobujunöma.

Daniel 4:30

Ja̧danö, edö, yöa̧linobe itedada, isabenö biya̧ inesö otiwobe comunidad Babiloniama, ötjöda otiwanö chotidajabe, yöbawö weti̧ comunidad baibanö. Ötjöda chujulunö otiwanö chotidajabe, chujulu otiwanö öwawobö, okobe deinö edö ötjönö tjöwaisobö, Nabucodonosorma isabenö jwiinö juluwo̧ jö̧ba̧lö, yöa̧linobe Nabucodonosorma itedada.

Mateo 4:8

Jemi ikenama Awetjama Jesúsnö öbibö i̧'yinobe mö'ösa'o jwiinö möa'o wa̧pekwa'obe, ja̧danö okobe deinö tjitebotenia i̧sebinobe, ja̧danö tjitebokwena otiwanö tjö̧ji̧ i̧sebinobe.

Mateo 5:28

Jo̧kwaijayonö babema jemi bajalekwönönö baikwö yötawaduwakwö ötjöma chömöledö: Sule kwi̧lȩkwa̧muböködökwö kwö̧jitjö̧damaökö, bakwo̧ ilekwobökujunö edö, Aaa, isujunö chö̧jowe, jö̧ba̧lö omukwatitjö̧ma, omajadenö ilekwobökujunö ida̧ökö ö̧jajabe.

Lucas 4:5

Jemi ikenama, Awetjama jo̧banö mö öbibö juluwanö i̧sebinobe, okobe deinö tjitebotenia i̧sebinobe,

Romanos 13:14

Wainö ja̧bö kwö̧jaduwo chömöledö. Baikwö wanedö yötawa: Duluwo̧ Jesucristo jawa 'dukawaduwo chömöledö, ja̧danö Dios ösödi̧ jawada ja̧köbaduwobö kwisakwaduwo. Ja̧danö, sulabenö dösödi̧ jawama, böjȩ jojodö sulabenö dösödi̧ jawa ja̧köbaduwoböma kwisakwaduwoko chömöledö.

1 Corintios 10:6

Chömöledö, jobadönö baledinama, ökwödönö wanedö i̧sekwa baibanö baledinobe, ökwödö jobadö sulabe jawa tjösödinadanö ökwödöbi dösödapji jö̧ba̧lö,

Gálatas 5:17

Jau chömöledö, ökwödö böjȩ jojodö dösödi̧ma, Dios O̧'wo̧ Luwo̧ma ösödi̧maökö, ja̧danö Dios O̧'wo̧ Luwo̧ ösödi̧ma, böjȩ jojodö dösödi̧maökö. Jo̧kwajabetjö̧, ökwödö Jesúsnö ösödadönö baikwö yötawa chömöledö: Ajayinö dösödina jawa ina dösödobetjö̧, domajadenö ölakwabikwawobedanö ji̧, ja̧ jawa do̧'wo̧ luwo̧nö ja̧nö Dios O̧'wo̧ Luwo̧ öpöjödobetjö̧. Jau chömöledö, ajayinö dösödi̧kwö Dios O̧'wo̧ Luwo̧ ölakwabikwawobedanö ichejekwa, sulabenö dösödi̧ jawa ja̧dapji jö̧ba̧lö.

Gálatas 5:24

Baikwö yötawa chömöledö: Cristo Jesús ömöledöma ajayinö tjösödina kabatibö, tjiteba'o wame luwo̧nöbi, jo̧ba sulabenö ösödi̧bi, towisa'onö bȩtjinobe ichejekwa, ö'wöchinö ja̧bö.

Efesios 2:3

Jau chömöledö, ajayinöma Diosnö öpöjödadö ja̧tji̧danö ökwödöbi okobe deinö sulabenö ja̧bö ju̧kwiadinobe, Diosnö öpöjödö, domajade okwanö sulabe wei̧da ja̧bö. Ökwödö sulabe dösödi̧da, sulabe domukwati̧da ja̧bö ju̧kwiadinobe. Jo̧kwaobetjö̧ ökwödöma Diostjö 'da̧bachibö ja̧döma Dios lȩebi̧tjö lȩebakwawö̧da ji̧nadösa, chömöledö, okobe deinö Diostjö 'da̧bachibö böjȩnö ju̧kwadödanö.

Tito 2:12

Ja̧danö, ja̧ Dios mikwa jwiinö otiwa jawa iyi̧ma ökwödönö ba̧ja̧dobe Diosnö öpöjödö ja̧kwawama kadatibobö, ja̧danö böjȩ jojodö sulabe dösödi̧ jawa ja̧bökönö kabatibö ja̧dobö. Ja̧danö, tupakwö ba̧ja̧dobe ökwödönö, Dios mikwa jwiinö otiwa jawa iyi̧ma, obökönö dö̧jobö, ja̧danö sulabenö ja̧bökönö dö̧jobö, ja̧danö Diosnö ösödö dö̧jobö ina böjȩnö dö̧jayi.

Tito 3:3

Ökwödö Jesúsnö ösödadöma, ina Jesúsnö dösödakwa̧ abönö böjȩ jojodö ja̧bö tjö̧ji̧danö ja̧bö dö̧jijatö Tito. Ja̧danö, wajwibadö ja̧nö, Dios wei̧ a̧ja̧kwökönö ja̧nö, omöna yöa̧lakwawa ösödö ja̧nö dö̧jijatö ajayinöma. Jejenö dö̧jenama, sulabe jawa dösödinama ökwödönö juluwinobedanö ichejekwa. Jau Tito, okobe jwiinö sulabe jawa dösödinama ökwödönö juluwinobedanö ichejekwa. Ja̧danö, ökwödönö juluwinobetjö̧, otiwanö ja̧bö dö̧joböma jwidinobe. Ja̧danö, jwaikwöda sulabenö dösödi̧ jawada ja̧bö dö̧jijatö. Ja̧danö, jejenö ja̧nö, kabatökönö sulabenö ja̧bö, ö'wiabinö edö dö̧jijatö. Ja̧danö, ju'wedönö öpöjödadö, ja̧danö ju'wedö tjöpöjödawö̧ dö̧jijatö ajayima.

Santiago 3:15

Isabenö bakwo̧ ju'wedönö o̧'wo̧ luwo̧nö sulabenö edö, ja̧danö, ö'wiawö edö, ja̧danö, iteda ösödi̧da omukwatö, Ötjödasa, jö̧ba̧lö, omukwato̧ma Dios öibökökwe. Jo̧bama Awetjada öibökwe, jelobekwö sulabenö omukwatinö öibökwema. Waisanö omukwatö̧kö̧. Ja̧danö, böjȩ jawa ösödadö tjomukwati̧da omukwato̧, Diosnö wajwibadö tjomukwati̧danö.

Santiago 4:16

Jo̧kwaijayonö ökwödöma Diosnö omukwatökönö ökwödöda yöka̧laduwobe kwi̧'yaduwakwa̧bi, kwotidaduwakwa̧bi. Jejenö yöka̧laduwi̧ma otiwökö. Sulabenö kwomukwataduwobe chö̧ja̧wo̧dö, jejenö yöka̧laduwena.

Josué 7:21

Jerico jojodönö dujuluwenama, dujuluwajawö̧ tjiteatjö chedijatö, kamijido̧ babilonia nijitjö otikwa̧do̧ jwiinö otiwa̧do̧ wamesa̧do̧ma, ja̧danö ju'wibi plata ö̧pi̧ya doscientos ö̧pi̧ya chedijatö, ja̧danö ju'wibi orotjö cincuenta ö̧piyadanö ömöka'o chedijatö. Jejenö edajo̧, ötjöda chemotö jö̧ba̧lö chösödijatö, ja̧danö emajo̧, cheju i̧sȩdo̧tjö otikweju okwa sobö o̧tjö chotojijatö. Jau Josue, ja̧ chemina jawama, babe cheju okwa, niji okwa jo̧be, ja̧danö ju'wi jawa teebe, plata ö̧pi̧ya bo̧be, —jö̧ba̧lö atadinobe Acanma.

1 Pedro 1:14

Ja̧danö, Kwabe'do Dios wei̧ ja̧bö ja̧nö, ajayinö kwösödinaduwa ja̧böma kwö̧jaduwoko chömöledö, ina wajwibadö kwö̧jaduwayi kwösödinaduwama.

1 Pedro 2:11

Chösödawö̧ chömöledö, ökwödöma isabenö kwiteboduwi mölejȩbetjö ödö ja̧nö, lekwema böjȩnö jö̧ködöja. Jo̧kwajabetjö̧ ökwödönö budekwödanö atebaduwakwö, böjȩ jojodö sulabenö tjösödi̧ jawa ja̧bökönö kwö̧jaduwobö. Ja̧ sulabenö kwösödaduwi̧ jawama baikwö wanedö yötawa, kwo̧'wo̧ luwo̧duwinö ölakwabikwawobedanö ichejekwa, jo̧kwaijayonö ja̧ jawa ja̧bökönö kwö̧jaduwo.

2 Pedro 2:10

Ja̧danö chömöledö, ida̧ökö i̧sebinadanö isabenö ökwödönö sulabenö yöbawadönö lȩebobö waiso̧. Jau chömöledö, jobadöma sulabenö 'da̧'da̧akwawa ösödö jwaikwöda sulabenö ja̧bö tjuju̧kwobe, ja̧danö Dios wei̧ öpöjödö tjuju̧kwobe, jo̧kwaijayonö Dios lȩebi̧tjö dötjibajökakwedö. Jau chömöledö, damötjö ji̧nadö jojodönö lȩebinadanö, ökwödönö sulabenö yöbawadönöbi ite'ada̧lobö waiso̧ Diosma chömöledö, lȩebakwa̧tjö dötjibapji jö̧ba̧lö. Jau chömöledö, jobadö sulabenö yöbawadöma, tjujuluwököjayonö, Aaa, juluwadösa, jö̧ba̧lö omukwatö, yebabökönö sulabenö yöba̧ladö ángelesdö juluwadönöma, idö ángelesdöma sulabedö jö̧ba̧lö.

2 Pedro 2:18

Ja̧danö ju'wibi yötawa jobadö tjo̧'wo̧ jwibadö sulabenö yöbawadönö chömöledö. Jobadöma labinö waisadösa yöba̧lö, iya̧nö Dios iwene a̧ja̧kwö sulabenö ja̧bö ja̧kwawatjö ji̧bajadönö yötjawobe, böjȩ jojodö sulabenö tjösödi̧ma otiwa jö̧ba̧lö, ja̧danö jobadönö ötjibobedanö ichejekwa, 'daliwanö tjö̧libobö. Jejenö sulabenö ötjibobe jojodönö chömöledö, jo̧kwajabetjö̧ Diosma isabenö jobadönö lȩebakobe.