1 Juan 2:13 - Dios Iwene

¹³ Ja̧danö, ökwödöma kwo̧'wo̧ luwo̧duwinö kwöda̧peachaduwobe chö̧ja̧wo̧dö. Ja̧danö, ökwödö da̧peachadönö yötawa, Isabenö ökwödöma Jesús, la'akatjöda ji̧nanö waisadöja, jö̧ba̧lö. Ja̧danö, ökwödö möayedö tjujuluwi̧danö kwo̧'wo̧ luwo̧duwi okwanö kwujuluwaduwobe chö̧ja̧wo̧dö. Ja̧danö, ökwödö möayedö tjujuluwi̧danö juluwadönö yötawa, Sulabo̧ Awetjanö juluwinadöja, jö̧ba̧lö. Isabenö böjanö wȩyudö yötawa chi̧tji̧mu, Dabe'do Diosnö waisadöja, jö̧ba̧lö.

1 Juan 2:13 Iomraidhean Croise

Proverbios 20:29

Ja̧danö, ju'wibi yötawa: Jojodöma möayedönö edö ösödö omukwatadö, juluwadö, jö̧ba̧lö. Jao, tjujuluwobetjö̧, otiwa, jö̧ba̧lö, tjo̧mukwatobe. Ja̧danö, ju'wibi yötawa: Jojodöma damönö, tjöwö'ye dewadönö edö ösödö, Isabenö jweinö omukwatadö, jö̧ba̧lö.

Mateo 11:27

Jojodönö yöawinobe Jesúsma: —Chömöledö, chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö waisadöma, sule ötjö Dios itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe.

Mateo 13:19

—Ödebiya mananö meaja̧ ödebiya badekwachi̧ma, Dios la'aka luwo̧ ö̧jakwa̧ wene tja̧ja̧kwijayonö otiwanö a̧ja̧kwöködönö badekwachobe. Ja̧ wene tja̧ja̧kwenama, inesö sulabo̧ma ichö ja̧ wene jobadötjö 'döebobedanö ichejekwa, tjomajadenö pokwapji jö̧ba̧lö.

Mateo 13:38

Ja̧danö, öbatjo badekwachi̧ma, böjȩ badekwachobe, ja̧danö otiwade ödebiya badekwachi̧ma, webö yöbawo̧ Dios ömöledönö badekwachobe. Ja̧danö, sula'wo jawasa'ye badekwachi̧ma, inesö sulabo̧ Awetja ömöledönö badekwachobe,

Mateo 5:37

Jau chömöledö, ju'wi jaye wanedö yöbawökönö, jweinö ja̧köbaduwakwa̧da yökawaduwo. Jau, ja̧takwo̧sa jö̧ba̧lö yökawitjö̧ma, yökawaja̧danö ja̧bi, ja̧danö ja̧tökakwo̧sa jö̧ba̧lö yökawitjö̧ma, ja̧bökönuwi. Jau chömöledö, ju'wi jaye wanedö yöbawö junawama, Diostjöma ichökö ji̧. Awetjatjö ichi̧— jö̧ba̧lö yöawinobe Jesúsma.

Lucas 10:22

Ikenama Jesúsma yöawinobe: —Chömöledö, Chabe'doma okobe jwiinö ötjönö iyajabe, la'aka luwo̧ batibanö. Ötjönö Dios itji̧nö isabenö waiso̧ma bakwo̧da chömöledö, Chabe'do Diosda, ja̧danö Chabe'do Diosnö isabenö waiso̧ma sule ötjö Dios Itji̧da, ja̧danö ötjöda chösödi̧danö chi̧sebawö̧da— jö̧ba̧lö yöawinobe Jesúsma.

Juan 14:7

Ötjönö kwöwaisachibinaduwatjö̧ma ötjö Chabe'donöbi kwöwaisaduwena. Babema kwöwaisaduwobe Diosnöma, ötjönö kwedaduwobetjö̧— yöawinobe Jesúsma.

Juan 14:9

Jejenö jö̧a̧liökwe: —Felipe ¿ötjönö wajwiköbiji̧?— jö̧a̧linobe Jesúsma Felipenöma—. Ökwödökwö lekwe möle chö̧jijayonö ina kwöwaisachibaduwokobe ötjönöma. ¿Tajawedö yöka̧laduwa, Dabe'donö i̧sebi dedo, jö̧ba̧lö? Yötawaduwakwö. Ötjönö edo̧ma Dabe'do Diosnöbi edobe.

Juan 16:3

Jobadöma Dabe'do Diosnöbi, ötjönöbi wajwitjobetjö̧ jejenö inia tjököbaduwinö ja̧tjakobe.

Juan 16:33

Ja̧danö, babe yötawaja̧ma kwo̧'wo̧ luwo̧duwi tjo̧bekwökönö kwö̧jaduwobö yötawajabe. Chömöledö, böjȩnö ja̧nö usula kwemawaduwakobe. Jo̧kwaijayonö, kwo̧'wo̧duwi̧ ösöwanö kwö̧jaduwo, ötjöma böjȩnö jawa okobe jwiinö chujuluwobetjö̧— yöawinobe Jesúsma öba̧ja̧di̧ waisachadönöma.

Juan 17:21

Chabe'do, ökwönö ateba okobe deinö böjȩnö ju̧kwadö ötjönö ösödadöma bakwaibedödanö batjibobö, bakwainö omukwatö. Ötjökwö, ökwökwö bakwainö omukwatadösa. Ja̧danö, bakwaibedösa ökwödöma. Ötjöma ökwödanö bakwainö jo̧sa. Ja̧danö, ökwöma ötjödanö bakwainö jo̧ja. Ja̧danö, jobadöbi, bakwaibedödanö batjibobö pjakato. Jejenö bakwaibedödanö tjö̧jitjö̧ma böjȩ jojodö tjomukwatakobe, Isabenö Diosma weinobe Jesúsnö, jö̧ba̧lö— aebinobe—.

Juan 17:3

Ja̧danö, ba̧kwȩlö̧jatebö ja̧kwawa juna̧ladöma, ökwönö waisö, Diosma Isabenö Jo̧, jö̧ba̧lö, ösödadö. Ja̧danö, ba̧kwȩlö̧jatebö ja̧kwawa juna̧ladöma ötjö, Jesucristonöbi waisö ösödadö, ökwö weköbinökwenöma— aebinobe—.

Juan 8:19

Jejenö jö̧a̧liawö̧: —¿Kwabe'doma daida?— atjebiökwe: —Ökwödöma yelösöda ötjönöbi, Chabe'donöbi wajwibadöja. Ötjönö kwöwaisaduwitjö̧ma Chabe'donöbi kwöwaisaduwena— jö̧a̧linobe Jesúsma,

1 Timoteo 5:1

Timoteo, ömadö damöbedönö labinö yöbawö lȩkeba, wainö ökwöda kwabe'donö yökawi̧danö yökawodönö jobadönöma, dösölö̧jinö yöba̧lö tjo̧'omanö. Ja̧danö, ömadö ina damöböködönö kwöjawo̧nö kwöba̧ja̧di̧danö kwöba̧ja̧dodönö.

Tito 2:6

Ja̧danö, ömadö ina möayedödanö ja̧dönöbi ba̧ja̧di, tjösödi̧ jawama ja̧tjokobö, biya̧ma otiwanö ja̧awa jö̧ba̧lö tjöwaisi̧da ja̧bö tjö̧jobö.

1 Juan 1:1

Chömöledö, Jesústjö chö̧ja̧wo̧dö dokwa. Ötjö Juan ökwödönö chiwȩyuda. Ja̧danö, ökwödönö yöbawö chiwȩyuda, Dios Iwene Jo̧, jö̧ba̧lö, ötjabökwenö, do̧'wo̧ luwo̧nö ba̧kwȩlö̧jatebö dö̧jobö pjabato̧nöma. Chö̧ja̧wo̧dö, jo̧ba Dios Iwene Jo̧, jö̧ba̧lö, ötjabökwema Jesucristoda. Ja̧danö, jo̧bama la'akatjöda ji̧na, böjȩ ina Dios otidapjii. Ja̧danö, Diosma jo̧banö böjȩkwö ichobö weinobe jojo babibö öbötjachobö. Ja̧danö, jojo babibö bötjachajo̧ma böjȩnö ju̧kwadökwö ö̧jinobe. Chö̧ja̧wo̧dö ökwödöma, ötjö, ju'wedö chömöledöbi jo̧bakwö kwebachiadijatö böjȩnö. Ja̧danö, jo̧ba yöawobe a̧ja̧kwiadijatö. Döbajalenöbi ediadijatö jo̧banöma. Chö̧ja̧wo̧dö, jo̧bakwö ja̧nö ö̧ji̧ma eda̧liadijatö. Dömamunöbi mabiadijatö jo̧banö, Dios weinökwenöma. Chö̧ja̧wo̧dö, jo̧bakwö dö̧jinobetjö̧ jweinö yöbawadösa jo̧banöma. Ja̧danö, ökwödönö kwöwaisaduwobö yödawobe, Jo̧ba dedinökwe Jesucristoma Dioskwö la'akatjöda ji̧nabi, bemi tupakwö ba̧kwȩlö̧jatebö ö̧jakwo̧bi, jö̧ba̧lö.

1 Juan 2:1

Chö̧ja̧wo̧dö chösödawö̧, böjanö yötawi̧ma, Sulabenö ja̧böma kwö̧jaduwoko, jö̧ba̧lö, yöbawö chiwȩyuda. Jo̧kwaijayonö sulabenö ja̧köbaduwena biya̧ yötawi̧ kwomukwataduwo. Jesucristoma Dios öba a'o jo̧. Jo̧bama jwiinö otiwo̧. Ja̧danö, jo̧bama ökwödönö pjabatö te'ada̧lo̧. Ja̧danö chö̧ja̧wo̧dö, sulabenö ja̧denama Jesucristoma Diosnö aebobe ja̧ sulabenö ja̧daja̧ma söbebö loobö. Ja̧danö, Jesucristoma Diosnö aebiökwe sulabenö ja̧köbaduwi̧ma söbebö loobe.

1 Juan 2:12

Chö̧ja̧wo̧dö, chi̧tji̧mu ötabiwö̧, ökwödönö yötawa, Sulabenö ja̧köbaduwi̧ma Dios söbebö loinawö̧ja, jö̧ba̧lö. Isabenö chö̧ja̧wo̧dö, Jesús kwumusidaduwi̧ midawö ö'wö baibiökwe Diosma sulabe ja̧köbaduwi̧ma söbebö loinobe.

1 Juan 2:14

Ja̧danö böjanö yötawa ökwödö kwo̧'wo̧ luwo̧duwi okwanö da̧peachadönö, Isabenö ökwödöma Jesús, la'akatjöda ji̧nanö waisadöja, jö̧ba̧lö. Ja̧danö, böjanö yötawa ökwödö möayedö tjujuluwi̧danö kwo̧'wo̧ luwo̧duwi okwanö juluwadönö, Juluwadöja, jö̧ba̧lö. Ja̧danö yötawa, Dios yöawi̧ kwo̧'wo̧ luwo̧duwi okwanö ösödö 'ya̧döja, jö̧ba̧lö, böjanö wȩyudö. Ja̧danö, ökwödö juluwadönö yötawa, Sulabo̧ Awetjanö juluwinadöja, jö̧ba̧lö. Jau chi̧tji̧mu, ökwödönö yöbawö pjabatö chiwȩyuda böjama, tupakwö kwujuluwachibaduwobö.

1 Juan 3:12

Damötjö ji̧na Caín iteda öjawo̧nö o̧'wo̧ sulinö edinadanö kwedaduwoko chö̧ja̧wo̧dö. Jo̧ba öjawo̧nö kwabö lobinama Awetjakwö dötewinö 'yi̧na. Ja̧danö, abebö cha̧ja̧kwaduwakwö. ¿Tajawedö kwabö loinada Caínma öjawo̧nöma? Biya̧ chö̧ja̧wo̧dö: Caínma sulabenö ja̧bö ö̧jinobe, Dios wei̧ma a̧ja̧kwökönö. Ja̧danö, Caín öjawo̧ma otiwanö, Dios wei̧ a̧ja̧kwö ö̧jiökwe o̧'wo̧ sulinö edö kwabö loinobe Caínma öjawo̧nöma.

1 Juan 4:4

Chi̧tji̧mu, isabenö ökwödöma Dios i̧tji̧mubedöja. Ja̧danö, ökwödökwö dötewinö jo̧ma Diosda. Ja̧danö, Diosma jwiinö juluwo̧. Böjȩnö ju̧kwadötjö Diosnö öpöjödadö tjuluwo̧ Awetjatjö o̧penönö juluwo̧ Diosma. Chi̧tji̧mu, Diosma ökwödönö pjaatobetjö̧ omöna yöbawadö yötjawi̧ma kwöpöjödinaduwobe, Jweinö yöbawöködö, jö̧ba̧lö. Jejenö kwöpöjödaduwobetjö̧ jobadönö kwujuluwinaduwobe.

1 Juan 5:18

Chö̧ja̧wo̧dö döwaisa. Dios i̧tji̧mu babibinadöma suli̧ jawa ja̧bö 'yö̧ködö. Ja̧danö, Dios Itji̧ Jesúsma jobadö Dios i̧tji̧mu babibinadönö Awetjatjö tjöbeba̧lö te'ada̧lo̧, Awetjama jobadönö jelobekwö tjomukwatobö öibökönö.

1 Juan 5:20

Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.

Apocalipsis 12:11

Dios ömöledö babibinadö wobinadöma Awetja weelö ji̧binadö, Obeja Itji̧danö Jo̧ ökwösobutjö tjidichawobetjö̧. Ja̧danö, Dios iwene yötjawinobetjö̧ Awetjanö juluwinadö. Jobadöma tjo̧'wo̧ 'dibachibö ja̧nö yöbawinadö, jobadönö kwabö lotjenabi.

Apocalipsis 2:7

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia ju̧kwadönö. Biya̧ yöawobe Dios O̧'wo̧ Luwo̧ma: Ju'winö, sulabetjö juluwinadöma ötjö chö̧jobekwö tjichibakwedönö otiwanö wetakwo̧sa towi wa̧ji̧tjö, ja̧kwawa iyawowi wa̧ji̧tjö, 'Döbebö kwaduwi, jö̧ba̧lö. Jau, jobadönö wetakwo̧sa, Dios jwiinö otiwi̧ batjo junawowi wa̧ji̧tjö, 'Döbebö kwaduwi, jö̧ba̧lö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe jelemutjö du̧ju̧tajanö si̧li̧'i̧dönö ömamu öwaisobekwöchobesamunö do̧ba̧lö jo̧ma, jelemutjö do'do̧latajanö la̧pa̧la̧yu̧bi̧ya junawa o'di̧ju, orotjö otikwa o'di̧ju, 'da̧denö kwebachö jo̧ ökwödönöma— jejenö jö̧ba̧lö weijatö chedökwema ötjönöma, iteda yöawi̧ wȩyudö wetobö Éfeso jojodötjö itenö ösödadönö te'ada̧lakwawa jojonö, ite'ada̧lawö̧nö yöawobö.