Jobekwö isabenö baledakobe chömöledö, jo̧kwajabetjö̧ bö̧jȩ jojodönö omukwatö kwö̧jaduwi̧ma kabatibö, Dios ösödi̧ jawada omukwatö kwö̧jaduwo. Jau chömöledö, bö̧jȩ jojodöma Dios öba a'otjö isabenö mikwawöködö, bö̧jȩ jojodöma sule tjo̧'wo emöda ju̧kwadö, juluwöködö bö̧jȩ jojodöma, jo̧kwajabetjö̧ Diosnöda omukwatö kwö̧jaduwo.
1 Corintios 4:6 - Dios Iwene6 Chömöledö, biya̧ yötawaja̧ jawama, ökwödönö pjabatö yötawajabe. Ja̧danö, ötjönö Apolosnö wanedö yötawajabe, ökwödönö a̧ja̧kwö, ökwödöbi kwöwaisachibaduwobö Dios iwene laebi̧danö kwomukwataduwobö, ja̧danö bakwo̧nö jelo̧nötjö o̧penönö kwomukwataduwapji jö̧ba̧lö, ja̧danö ju'wedönö kwöpöjödaduwapji jö̧ba̧lö, sulabedö jö̧ba̧lö. Faic an caibideil |
1 Corintios 4:6
35 Iomraidhean Croise
Jau chömöledö, Diosma otiwa jawa iyö, ötjönö weinobe ökwödönö yötawobö. Jejenö weinobetjö̧, ökwödönö bakwo̧nökwena weta, Omukwatökönaduwi, ökwödöma otiwadösa, jö̧ba̧lö. Jau chömöledö, Diosda ökwödönö bakwo̧nökwena pjabatinama, Jesúsnö kwösödaduwobö, ¿jö̧tö? Jo̧kwajabetjö̧ otiwo̧sa jö̧ba̧löma kwomukwataduwa chömöledö, bakwo̧nökwena, Dios pjaatinökwesa, jö̧ba̧lö kwomukwataduwo.
Baikwö yöta̧la ölakwabikwawö yöka̧laduwi̧ma, okobe deinö wainökwena yöba̧ladöja chömöledö. Ökwödötjö ju'wedöma yötja̧lobe: Aaa, ötjöma Pablo ömöayo̧sa jö̧ba̧lö. Ja̧danö ju'wedöma: Aaa, ötjöma Apolos ömöayo̧sa jö̧ba̧lö. Ja̧danö ju'wedöma: Aaa, ötjöma Pedro ömöayo̧sa jö̧ba̧lö. Ja̧danö ju'wedöma: Aaa, ötjöma Cristo ömöayo̧sa jö̧ba̧lö.
Ja̧danö, ju'wedö tjösödawö̧ o̧'wo̧ jawa iyawa kwakwawa yötawa. Isabenö, ökwödötjö ju'wedö yökawaduwi̧danö, ökwödöma isabenö wene jawa waisadösa chömöledö. Ja̧danö, baikwö yötawa: Nöinö döwaisi̧ma, Aaa, waisadösa jö̧ba̧lö domukwatobö ja̧obe ichejekwa, jo̧kwaijayonö dömöledö Jesúsnö ösödadönö tjo̧'wo̧ luwo̧nö tjöda̧peachobö pjaatokobe. Jo̧kwaijayonö dömöledö Jesúsnö ösödadönö ösödabikwawö dö̧jitjö̧ma, jobadönö döda̧pedena.
Jau chömöledö, jo̧da yötawaja̧danö, Cristo ömöayo̧sa jö̧ba̧lö omukwatadöma ökwödönöbi bakwainö tjomukwatobö jo̧be, ökwödöbi Cristo ömöayedösa jö̧ba̧lö, bajalekwönönö otiwadösa jö̧ba̧lö badedö edökönö. Jau chömöledö, ökwödö Cristo ömöayedöma ju'wedö jojodönö badedö dedoböma jwiobe. Ja̧danö chömöledö, jojodönö badedö dedoböma jwiobetjö̧, ökwödöma idö otiwadösa jö̧ba̧lö omukwatadönö badedö dedoböma omukwatöködösa, jobadötjö bajalekwönönö otiwadösa yöda̧loböma. Jo̧kwaijayonö ju'wedö ökwödönö yöbawadöma jejenö sulabenö badedö edadö chömöledö. Jau chömöledö, jobadöma jojodönö badedö omukwatö, jelo̧nötjö o̧penönö otiwo̧sa, ja̧danö jelo̧nötjö bajalekwönönö otiwanö otido̧sa jö̧ba̧lö badedö yötja̧lobe, ja̧danö jejenö yötja̧lenama, wajwibö tjomukwatobe chömöledö, sule jojodönöda badedö tjomukwatobetjö̧.
Jo̧kwaijayonö jelo̧ otidina jawama yöba̧löködösa chömöledö, sule isabenö dotidina jawada yöda̧lobe, otiwanö dotidinobe jö̧ba̧lö. Jau chömöledö, isabenö otiwanö ökwödökwö dotidinobe, ja̧danö tupakwö Dios yöawi̧ ösödö kwöda̧peachaduwobö dösöda chömöledö, jemi tupakwöbi kwöda̧peachaduwobö nöinö ökwödökwö otiwanö dotidakobetjö̧.
Chömöledö, Cristo ömöayo̧ chö̧ji̧ma isabenö öwawobe, kwöwaisaduwobö, ¿jö̧tö? Jejenö öwaetjöda öwawijayonö, ökwödötjö jelo̧ omukwatena, Aaa, Pabloma Cristo ömöayo̧bö̧kö̧, ötjödasa Cristo ömöayo̧ma jö̧ba̧lö. Jejenö omukwatoböma jwia chömöledö, ötjö Pablobi isabenö Cristo ömöayo̧sa, ja̧danö Cristo ömöayo̧sa jö̧ba̧lö omukwato̧ma, ötjönöbi jweinö omukwatobö jo̧be, isabenö Pablobi Cristo ömöayo̧ jö̧ba̧lö.
Jau chömöledö, isabenö Evadanöbedöja, baikwö yötawa: Okobe jwiinö ju'wedö ökwödönö yötjawi̧ma öpöjödökönö a̧ja̧kwadöja. Ja̧danö, yödawinökwe Jesúsnö jelo̧ wainö yöawitjö̧böbi, sulabenö a̧ja̧kwö ösödadöja. Ja̧danö, Dios O̧'wo̧ Luwo̧nö yödawinökwenö jelo̧ wainö yöawitjö̧böbi, sulabenö a̧ja̧kwö ösödadöja. Ja̧danö, otiwa jawa wene yödawina wene jelo̧ balewö lobö wainö yöawitjö̧böbi sulabenö a̧ja̧kwö ösödadöja chömöledö. Jau chömöledö, okobe deinö jobadö sulabenö yöbawadönö öpöjödöködöja, jo̧kwajabetjö̧ ökwödönö omukwatö yetabobe, Eva omöna yöa̧lakwawa jösödinadanö ökwödöbi omöna yöa̧lakwawa kwösödaduwena jö̧ba̧lö.
Chömöledö, ökwödötjö ju'wedö tjomukwatena, Aaa, okobe jwiinö böja Pablo iwȩyudi̧ma, sule jo̧banö otiwanö domukwatobö iwȩyudajena. Jo̧kwadabo̧ ö̧jijayonö, jo̧banö otiwanö domukwatobö iwȩyudajena, jo̧kwadabo̧ ö̧ji̧ döwaisachibapji jö̧ba̧lö tjomukwatena. Jejenö tjomukwatijayonö, ja̧maökö chömöledö. Cristoma isabenö ötjönö 'da̧batö ujuninobe ökwödönö pjatatobö chömöledö, ja̧danö Cristo yötawobö wei̧danö Dios öba a'otjö ja̧nö ökwödönö yötawajabe chömöledö. Ja̧danö ju'wibi yötawa chömöledö, okobe jwiinö yötawi̧ma, ötjönö otiwanö kwomukwataduwoböma yötawokobe, sule kwujuluwachibaduwobö yötawobe chösödawö̧ chömöledö.
Jau chömöledö, kwujuluwaduwachibanö yöbawö chiwȩyudobe ökwödönö yetabobetjö̧, ayö, chömöledö Corintio jojodönö tjo̧'wo̧ luwo̧nö me'dawadö ja̧nö sulabenö ja̧bö tjö̧jena jö̧ba̧lö. Jau chömöledö, ökwödönö yetabi, kwiteboduwibe chichibenama, ökwödönö chedapji jö̧ba̧lö chöpöjödinö sulabenö ja̧badönö, ja̧danö jejenö sulabenö ja̧köbaduwitjö̧, kwöpöjödaduwinö ökwödönö lȩtebapji jö̧ba̧lö. Jau chömöledö, yetabi, jobe chichibenama, jwöjwöbakwawö kwö̧jaduwena jö̧ba̧lö, ja̧danö ö'wiabinö kwedaduwena jö̧ba̧lö, ja̧danö dameakwabinö kwö̧jaduwena jö̧ba̧lö, ja̧danö a̧'dȩlanö kwö̧jaduwena jö̧ba̧lö, ja̧danö sulabenö ju'wedönö yöka̧laduwena jö̧ba̧lö, ja̧danö ju'wedö tjoma'apekwö yöka̧laduwena jö̧ba̧lö, ja̧danö Aaa, otiwadösa jö̧ba̧lö kwomukwataduwena jö̧ba̧lö, ja̧danö jaliwanö ja̧bö kwö̧jaduwena jö̧ba̧lö yetabobe chömöledö.
Chömöledö, isabenö nöinö i̧sebinobe Diosma ötjönöma, jo̧kwajabetjö̧, Aaa, Dios otiwanö i̧sebinökwesa yöta̧litjö̧ma, isabenö weneda yöta̧lena. Jau chömöledö, jejenö yöta̧li̧ a̧ja̧kwö, ju'wedö tjomukwatena, Aaa, wame jawa omukwatadö tji̧'wi̧dinö tjedina jawa omöna yötja̧li̧danö, Pablobi omöna yöba̧lo̧ jö̧ba̧lö. Jo̧kwaijayonö ja̧maökö chömöledö. Isabenö Dios otiwanö i̧sebinökwesa chömöledö, jo̧kwajabetjö̧ jejenö yöta̧lobö chösöditjö̧ma omöna yöta̧lökena, isabenö weneda yöta̧lena chömöledö. Jo̧kwaijayonö jejenö yöba̧lö̧kö̧sa, jojodö ötjönö omukwatö, Aaa, Pabloma inesö Dios i̧sebinökweobetjö̧, da̧ja̧kwonö jö̧ba̧lö tjomukwatapji jö̧ba̧lö. Jau chömöledö, Diosma isabenö otiwanö i̧sebinökwesa ötjönöma, jo̧kwaijayonö ja̧ wene jojodö tjomukwatoböma chöpöjöda. Jau chömöledö ja̧ jawa omukwatökönö, sule tjöba a'otjö chi̧sebi̧ jawada, ja̧danö jobadönö yötawi̧ jawada tjomukwatobö chösöda, Cristo ömöayo̧ chö̧jojobö jö̧ba̧lö. Jau chömöledö, Diosma isabenö nöinö ötjönö i̧sebinobe jojodö ajayinö wajwitjina jawama, ja̧danö ja̧tjö Aaa, otiwo̧sa jö̧ba̧lö chomukwatapji jö̧ba̧lö, ju'wibi nii̧ jawa iyinobe, chiteba'onö ba̧ja̧sö'idanö. Jau chömöledö, Awetjama usula chemawinö ja̧obö ösödinobe, ja̧danö jejenö ösödiökwe, Awetja usula chemawinö ja̧obö weinobe Diosma, ötjöma Aaa, Dios otiwanö i̧sebökwechobetjö̧, otiwo̧sa jö̧ba̧lö chomukwatapji jö̧ba̧lö.
Jejenö omukwatö, usula demawijayonö kabatibökönö jwaikwöda yöbawö dö̧jobe chömöledö. Jau chömöledö, okobe jwiinö usula demawi̧ma, ökwödönö pjadatotö jö̧ba̧lö usula demawobe, tupakwönönö ba̧jekwadö jojodönö Dios mikwa jwiinö otiwanö iyenama, otiwanö iyo̧ja jö̧ba̧lö ba̧jekwadö Diosnö tjösödakobetjö̧, ja̧danö okobe deinö Diosnö otiwanö tjomukwatakobetjö̧.
Ja̧danö ju'wedöma yötja̧lena, Aaa, chi̧'wi̧di̧danö chedajabe, usulasedö mikwawöködö tjö̧ji̧danö dö̧jitjö̧ma otiwena, ja̧danö ángelesdönö dösöditjö̧ma otiwena, jö̧ba̧lö yötja̧lena. Jejenö ja̧böködöma sulabedö jö̧ba̧lö yötja̧lena, jo̧kwaijayonö jejenö yöba̧ladö wetji̧ma a̧ja̧kwökönaduwi. Jobadöma böjȩ jojodö tjomukwati̧da omukwatö, Otiwadösa, jö̧ba̧lö tjomukwatobe chömöledö,
Ja̧danö, Dios iwene pje'datakwawokobetjö̧, usula chemawijayonö, Dios ösödawö̧ ömöledö batjibakwedönö omukwatö, öpöjödachibökönö usula chemawobe. Jau Timoteo, öpöjödachibökönö usula chemawobe, cho̧'wo̧ 'dibachibö usula chemawi̧tjö jobadöbi Cristo Jesúsnö ösödö tjö̧jibakobetjö̧, ja̧danö jo̧bakwö mölejȩbetjö ba̧kwȩlö̧jatebö tjö̧jakobetjö̧.
Sanasan