1 Corintios 4:11 - Dios Iwene

¹¹ Chömöledö, ökwödö Jesús webawedöma babebi ina a̧wi̧chi̧ tjöbö dö̧jobe, ja̧danö o̧ti̧tjö tjöbö usula demawobe. Ja̧danö, kamijido̧ sulabado̧ kȩachado̧ 'dubawadö dö̧jobe, ja̧danö jojodö kwakwatjawö̧ dö̧jobe usula emawö. Ja̧danö, jelobebi, jelobebi kwebachö dö̧jobe,

1 Corintios 4:11 Iomraidhean Croise

Diosnö ösödo̧ Job mikwo̧ usula emawina jawa 22:6

Kwömöledö ökwönö tjumusidököjayonö, tjitea 'döbebö emo̧ja, –Kwumusidi kwimidenada tjetatocha, –jö̧ba̧lö, ja̧danö jwibadö tjö̧ka̧misi 'dökebajabe, tja̧do jwibadö batjibanö.

Mateo 8:20

Jejenö yöa̧lökwe, Jesúsma atadinobe: —Chömöledöso̧, ötjöma cheju jwibo̧sa. Yo̧lo̧ko̧döma laju sobö tjabakwemi juna̧ladö, ja̧danö pji̧yu̧ma, tja'di̧ju juna̧ladö. Jobadö tjabakwemi tjujuna̧li̧danöma chujuna̧lökö chömöledöso̧. Ötjö jojo baibanö jeminökwema chabakwemi jwibo̧sa. ¿Isabenö chökömanö kwichobö jö̧ka̧liji̧, kwabakwemi jwibo̧ bakibanö?— jö̧ba̧lö atadinobe.

Hechos 14:19

Ju'wi möle ju'wedö judío jojodöma, Antioquíanö ju̧kwadöbi, Iconionö ju̧kwadöbi Pablo Bernabé tjuju̧kwobekwö 'yi̧jadötö, Listrabe. Jobe ichibö jobadöma tjo̧'wo̧ sulinö eda̧lö yöba̧lijadötö jobe ju̧kwadönöma, Pablonö tjölabobö. Jejenö yötja̧liawö̧ jojodöma jwiinö labijadötö Pablonö. Ja̧danö, labijidöma Pablonö inawiya ikwawijadötö, ö'wöchinö. Ikenama, tjo̧wi̧ ö'wö baibajabe, jö̧ba̧lö, tötöbö lobijadötö Pablonöma comunidad ö'öböbe.

Hechos 16:23

Ja̧danö, lekwe, Pablonö Silasnö labinö kwakwabijadötö. Ikenama kwakwabö kabatiböma ka̧lena ba̧kwawejube tje'ewobö webijadötö. Jobe ichibö jeju okwa ba̧jadönö te'ada̧lakwawa jojonö webijadötö, jobadönö tjöbeba̧löjönö ite'ada̧lobö.

Hechos 23:2

Jejenö yöawiökwe bakwo̧, jojodötjö Diostjö ö'weje la'aka pjabato̧ öpöjödijetö. Öpöjödobetjö̧ webijetö Pablo ipjeanö ja̧dönöma Pablonö aanö metjobö.

Romanos 8:35

Jau chömöledö, Cristoma jwiinö ile niebobe ökwödönöma. Ja̧danö, Cristo jejenö ile niebobetjö̧ ¿ökwödönö 'da̧batö loawa jawa jo̧beji̧ chömöledö? Wene baibitjö̧ma, ¿'da̧bachibö dö̧jenaji̧? Inia tjöditjö̧ma, ¿'da̧bachibö dö̧jenaji̧? Ju'wedö usula demawinö ja̧tjitjö̧ma, ¿'da̧bachibö dö̧jenaji̧? A̧wi̧chi̧ tjöditjö̧ma, ¿'da̧bachibö dö̧jenaji̧? Balada jwibö, usula jojodö jwödachitjö̧ma, ¿'da̧bachibö dö̧jenaji̧? Labi̧ baledi̧ jawa ökwödönö baleditjö̧ma, ¿'da̧bachibö dö̧jenaji̧? Woditjö̧ma, ¿'da̧bachibö dö̧jenaji̧? Ja̧maökö chömöledö. Okobe jwiinö yöta̧laja̧ baledonöbi, ina jwiinö ile niebobe Jesúsma, ökwödönöma chömöledö.

1 Corintios 9:4

Isabenö ötjöma yöbawö chotidobetjö̧, ja̧ chotidi̧ mikwa kwakwawabi, owawabi chemobö jo̧be, chotidawa mikwa jö̧ba̧lö.

2 Corintios 11:20

Jau chömöledö, bakwo̧ ökwödönö jo̧ba ömöayedödanö bakibaduwanö ja̧itjö̧bi, jo̧banö ösödadöja, ja̧danö kwujuna̧laduwi̧ önaukwitjö̧bi jo̧banö ösödadöja, ja̧danö bakwo̧ ökwödönötjö iteda emotö jö̧ba̧lö ja̧itjö̧bi, jo̧banö ösödadöja, ja̧danö bakwo̧ Aaa, ökwödönötjö bajalekwönönö jo̧sa jö̧ba̧lö omukwatitjö̧bi, jo̧banö ösödadöja, ja̧danö bakwo̧ ökwödönö sulabedöja jö̧ba̧lö sulabenö yöawitjö̧bi, jo̧banö ösödadöja.

2 Corintios 4:8

Jau chömöledö, ökwödö inesö mikwawi̧ wene yöbawadöma isabenö juluwöködösa, isabenö dujuluwitjö̧ma, usula demawoko jö̧da̧lena, ¿jö̧tö? Jo̧kwaijayonö kabatökönö usula emawadösa chömöledö. Ökwödö yöbawadönö baikwö wanedö yötawa: Döpöjojodö usula demawinö ja̧tji̧ma ökwödönö tjösawö dodotjobedanö ichejekwa, jo̧kwaijayonö doböma lotjokobe ökwödönöma. Ja̧danö ju'wikwenama dakwö ja̧dakwa̧jö jö̧ba̧lö wajwidijayonö, ayö, ökwödöwe jö̧ba̧löma kadatibokobe.

Filipenses 4:12

Jau chömöledö, jwibö ja̧kwawabi, nöinö juna̧lö ja̧kwawabi chöwaisa, ja̧danö ida̧ökö chöwaisachibinobe, chomeawitjö̧bi, a̧wi̧chi̧ tötitjö̧bi cho̧'wo̧ ösöwanö chö̧jo jö̧ba̧lö, ja̧danö nöinö juna̧lo̧ chö̧jitjö̧bi, jwibo̧ chö̧jitjö̧bi cho̧'wo̧ ösöwanö chö̧jo jö̧ba̧lö chöwaisachibinobe chömöledö.

2 Timoteo 3:11

Ja̧danö, ötjönö sulabenö ja̧tji̧ kwedajabe, ja̧danö usula chemawi̧ kwedajabe, ¿jö̧tö? Jau Timoteo, Antioquíatjöbi, Iconiotjöbi, Listratjöbi ötjönö sulabenö ja̧tjina kwedijatö, isabenö usula chemawinö jwiinö sulabenö ja̧tjinobe ötjönö, ¿jö̧tö? Ja̧danö, ju'wibi kwedijatö Timoteo, okobe jwiinö ja̧tjö chö̧jibinö pjaatinobe Duluwo̧ma, ¿jö̧tö?