1 Corintios 3:16 - Dios Iwene

¹⁶ Jau chömöledö, ökwödöma kwöwaisaduwa, ökwödöma Dios ejubedöja jö̧ba̧lö. Ja̧danö, Dios O̧'wo̧ Luwo̧ kwo̧'wo̧ luwo̧duwinö ö̧jobe jö̧ba̧lö waisadöja.

1 Corintios 3:16 Iomraidhean Croise

Juan 14:17

Jo̧bama Dios O̧'wo̧ Luwo̧, jweinöda yöbawo̧. Ja̧danö, jo̧bama otiwanö öba̧ja̧da̧lakwo̧ ökwödönöma, otiwanö kwöwaisachibaduwobö. Diosnö öpöjödadöma jo̧ba pjaati̧ma tjemökakwedö, tjomajade okwanö wajwitjökweobetjö̧. Jo̧kwaijayonö ida̧ökö ökwödöma kwöwaisaduwökwe babema ökwödökwö ö̧jobetjö̧. Ju'wi möle ökwödö kwo̧'wo̧ luwo̧duwi okwa tebachibö ö̧jakwo̧, ba̧kwȩlö̧jatebö ö̧jobö— yöawinobe Jesúsma öba̧ja̧di̧ waisachadönöma.

Romanos 6:16

Baikwö wanedö yötawa: Bakwo̧, Weköbi̧da ja̧bö chö̧jo, kwömöayo̧ baibanö, jö̧ba̧lö, jwaikwöda uluwo̧ wei̧ ja̧bö ö̧jitjö̧ma, uluwo̧ ömöayo̧da ö̧jena, ¿jö̧tö? Ja̧danö, suli̧ ömöayedödanöbedöbi tjuju̧kwobe, ja̧danö Dios ömöayedöbi tjuju̧kwobe. Suli̧ ömöayedödanöbedöma, wotjakwedö, sulabenö ja̧awa mikwawi̧ma wobaledaobetjö̧. Jo̧kwaijayonö, Dios ömöayedöbi tjuju̧kwobe. Jobadönöma, Bidöma sulabe jwibadö, jö̧ba̧lö jö̧a̧lakwo̧ Diosma.

Romanos 6:3

Kwöwaisaduwa chömöledö, Diosma ja̧inobe ökwödönöma, Cristo Jesúskwö bakobe badibanö, ¿jö̧tö? Ökwödönöma Jesúskwö aninobe chömöledö, ja̧danö Jesúskwö aninobetjö̧, Jesúskwö da̧jobe chömöledö. Ja̧danö, bakobe Jesúskwö da̧jobetjö̧, Jesús woinenama, ökwödöbi wodijatö chömöledö.

Romanos 8:11

Jau chömöledö, Diosma Cristo Jesúsnö woawatjö tjeachajinö ja̧inobe. Ja̧danö, jo̧ba, Cristonö yemidanö tjeachajinö ja̧bina O̧'wo̧ Luwo̧da ökwödö kwo̧'wo̧ luwo̧duwinö ö̧jobe babema, ökwödönö ja̧kwawa iyö. Ja̧danö, kwo̧'wo̧ luwo̧duwinö ja̧nö, ja̧kwawa iyobetjö̧, kwiteba'oduwi ja̧kwawa jawabi iyobe ichejekwa. Jau, Cristo iteba'o woawatjö tjeachajinö ja̧inadanö, ökwödö kwiteba'oduwibi woawatjö tjeachajinö ja̧obedanö jo̧be chömöledö.

Romanos 8:9

Jo̧kwaijayonö, jejenöböködöja ökwödöma. Ökwödöma suli̧ ömöayedödanöböködöja, Dios O̧'wo̧ Luwo̧ ömöayedödanöbedöja, kwo̧'wo̧ luwo̧duwinö ö̧jobetjö̧. Jau chömöledö, Dios O̧'wo̧ Luwo̧ma, okobe deinö Cristo ömöledö tjo̧'wo̧ luwo̧nö jo̧ chömöledö. Ja̧danö, Dios O̧'wo̧ Luwo̧ma bakwo̧ o̧'wo̧ luwo̧nö deitjö̧ma, Cristo ömöledöso̧bö̧kö̧ jo̧bama.

1 Corintios 3:17

Chömöledö, ökwödöma Dios eju, Dios 'da̧batö ujuninejubedöja. Ja̧danö, ökwödönö suli̧ waedadönö söbebö loakwo̧ Diosma, jo̧ba ejubedönö suli̧ tjöwaedobetjö̧.

1 Corintios 3:9

Jau chömöledö, ötjöbi, Apolosbi bakobe Dios wei̧ otidö batjo otikwa jojodödanö ichejekwadösa. Ja̧danö, ökwödö Corintio jojodöma Dios öbatjodanö ichejekwadöja chömöledö. Ja̧danö ju'wi wanedö yötawa chömöledö: Ökwödöma Dios ejudanö ichejekwadöja.

1 Corintios 5:6

Chömöledö, ökwödö Aaa otiwadösa jö̧ba̧lö kwomukwataduwi̧ma otiwökö, sula. Baikwö wanedö yötawa: Ökwödöma pan otikwa waisadöja. Pan tjotidakwedöma, sule ja'yubeda ye'yeachi̧ jawa anadö, okobe jwiinö pansa'be ye'yeachobö, ¿jö̧tö? Ja'yubeda tjanijayonö, okobe jwiinö 'dukwibö ye'yeachibobe, ¿jö̧tö?

1 Corintios 6:16

Kwöwaisaduwa chömöledö, bakwo̧ putasujunö ja̧bö bakobe baibitjö̧ma, jobujukwö bakwa'o baibanö jo̧ jö̧ba̧lö kwöwaisaduwobe, ¿jö̧tö? Dios iwenema öwaetjöda ja̧ wene yöawobe chömöledö, baikwö laebobe Dios iwene: Du̧ju̧taja tjö̧jijayonö, bakobe babibö bakwa'oda batjibakwedö, jö̧ba̧lö laebobe.

1 Corintios 6:19

Jau chömöledö, kwöwaisaduwa, kwiteba'oduwima Dios O̧'wo̧ Luwo̧ eju baibina'o, ja̧danö jo̧ba Dios ökwödönö iyinökwema ökwödökwö jo̧. Jau chömöledö, ökwödöma kwö̧jaduwi̧ luwedöböködöja, Diosda kwö̧jaduwi̧ Luwo̧ma chömöledö,

1 Corintios 6:9

Kwöwaisaduwa chömöledö, Diosma sulabedönö weökakobe, jo̧bakwö ja̧nö luwedö baibanö yötjawobö. Jau chömöledö, isabenö yötawaduwakwö, sulabenö alewö ja̧badöbi, ja̧danö o̧'wo̧ jawa ösödadöbi, ja̧danö tji̧lȩkwa̧muböködökwö ja̧badöbi, ja̧danö ömadö ömadökwö ja̧badöbi,

1 Corintios 9:13

Jau chömöledö, kwöwaisaduwa, Dios weinejutjö otidadöma, Dios weinejutjö tju̧kwa kwakwawa emadö, ¿jö̧tö? Ja̧danö, ajikwakwawedönö kwabö juwö Diosnö iyö otidadöma, jobadö ajikwakwawedö tjitebiyatjö kwadö, ¿jö̧tö?

1 Corintios 9:24

Chömöledö, baikwö wanedö yötawa, carrera ö'öbakwawadönö wanedö yötawa: Carrera ö'öbakwawadöma, ba̧jekwadö ö'ötjakwawobe, abönö ichibo̧ jawa tjemo jö̧ba̧lö, ¿jö̧tö? Jau chömöledö, abönö ichibo̧da emijayonö, okobe deinö ö'ötjakwawobe. Ja̧danö, kwo̧'wo̧ luwo̧ jawa baikwö wanedö yötawa: Jo̧ba abönö ichibo̧ ö'öakwawi̧danö ö'öbakwawaduwi, Dios ökwödönö iyakwa̧ kwemaduwo jö̧ba̧lö.

2 Corintios 6:16

Diosnö ösödakwawejutjö, Diosböködö o̧'wo̧ jawa tjösödobö ¿Diosma weenaji̧? Kwöwaisaduwa chömöledö, jejenömaökö, ¿jö̧tö? Jau chömöledö, isabenö Cristonö öpöjödadökwö bakibaduwoko, ökwödö Cristonö ösödadöda 'yaba̧lo̧ Dios ejubedö dö̧jobetjö̧. Jau chömöledö, isabenö Dios eju babibinadösa, Dios iwene laebi̧danö. Baikwö laebobe Dios iwene chömöledö Dios yöawinama: Ötjöma ötjö chömöledö tjo̧'wo̧ luwo̧nö chö̧jakwo̧sa, ja̧danö jobadö tjö'da̧de kwetachocha, ja̧danö ötjöma jobadö tjuluwo̧ Dios chö̧jakwo̧sa, ja̧danö jobadöma ötjö chömöledö tjö̧jakwedö, jö̧ba̧lö laebobe.

1 Timoteo 3:15

Ja̧danö, chi̧'yobö chomukwati̧ waekwitjö̧ma, böja kwialusöja chiwȩyudobetjö̧, Dios ömöledö otiwanö ja̧bö tjö̧ji̧ma kwöwaisena. Jau Timoteo, ökwödö Jesúsnö ösödadöma Dios ömöledöbedösa, ja̧danö isabenö wene te'ada̧ladösa, ju'wedö sulabenö yötja̧lapji jö̧ba̧lö.

2 Timoteo 1:14

Ja̧danö, do̧'wo̧ luwo̧nö jo̧, Dios O̧'wo̧ Luwo̧ ökwönö otiwa jawa iyina a̧'dȩlanö te'ada̧lö kwö̧jo Timoteo.

Hebreos 3:6

Jo̧kwaijayonö Cristoma ömöayo̧nötjö o̧penönö inesö jo̧. Isabenö, jo̧bama Dios Itji̧. Ja̧danö, jo̧bama Dios i̧tji̧mu babibinadö tjuluwo̧. Ja̧danö, jobadönö otiwanö te'ada̧lo̧. Wanedö yötawa: Ökwödö, okobe deinö Cristonö ösödadöma o̧dodanö, Dios otidinejudanö döwanekwachobe. Ja̧danö Cristo, Dios Itji̧ma, Dios otidineju la'aka luwo̧danö jo̧, ökwödö Duluwo̧. Isabenö chömöledö, ökwödöma Dios otidinejuda wanekwachadösa yebabökönö jwaikwöda di̧'yitjö̧ma, Diosnö do̧'wo̧ wana̧lö. Jau chömöledö, ökwödöma Dios otidinejuda wanekwachadösa jwaikwöda Diosnö do̧'wo̧ wana̧lö di̧'yitjö̧ma, do̧'wo̧ luwo̧nö ösöwö, Cristoma dö̧jibinö pjaatinobetjö̧ Dios i̧tji̧mu babibinadösa, ja̧danö Dioskwö ba̧kwȩlö̧jatebö dö̧jakwedösa, jö̧ba̧lö.

Santiago 4:4

Chö̧ja̧wo̧dö, kwo̧'wo̧ luwo̧duwi jawa omukwatökönö böjȩ jawa kwösödaduwi̧da omukwatö kwöwanekwachaduwobe bakwuju jilekwenö omukwatökönö, jelo̧nö alewujudanö. Diosnö dösöda, jö̧ba̧lö, yöka̧laduwijayonö böjȩ jawabi jwiinö kwösödaduwobe. ¿Kwöwaisaduwököji̧? Bakwo̧ böjȩ jawa, Dios öpöjödi̧ jawa ösödo̧ma Diosnöbi ösödö̧kö̧ ¿jö̧tö? Böjȩ jawa ösödo̧ma Dios öpöjojo babibo̧ chö̧ja̧wo̧dö.

1 Juan 4:12

Chö̧ja̧wo̧dö, Diosma edawö̧kö̧. Bakwo̧bi deobe Diosnö edo̧ma. Edawö̧kö̧jayonö ökwödöma dö̧ja̧wo̧dönö ile nibebö dö̧jenama di̧sekwobe, Diosnöma edö ja̧dösa, jö̧ba̧lö. Jau chö̧ja̧wo̧dö, Dioskwö ja̧nö, jo̧banö edö dö̧jobedanö jo̧be, jo̧ba ile nibebö ö̧ji̧danö dö̧jobetjö̧. Ja̧danö chö̧ja̧wo̧dö, dö̧ja̧wo̧dönö ile nibebö dö̧jena Diosma ökwödökwö dötewinö i̧'yobe. Jejenö Dioskwö 'ya̧nö ökwödö do̧'wo̧ luwo̧nö pjabatö öibobe Diosma, dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, Diosma jejenö ösödo̧, jo̧ba ökwödönö ile niebi̧danö ökwödöma dö̧ja̧wo̧dönö ile nibebö dö̧jobö.