1 Corintios 3:12 - Dios Iwene

^12-13 Jau chömöledö, ja̧ la'aka wamenöda tjotidobe otidadöma, ja̧danö o̧do tjotidi̧ma öwawakobe, otiwanö tjotidinojobö, sulabenö tjotidinojobö jö̧ba̧lö. Baikwö wanedö yötawa: O̧do otidadöma ju'wi jayetjö tjotidobe, ju'wedö orotjö, ja̧danö ju'wedö platatjö, ja̧danö ju'wedö nöinö mikwawi̧ inawiyatjö, ja̧danö ju'wedö towi ötebiyatjö, ja̧danö ju'wedö ö̧'iyatjö, ja̧danö ju'wedö meje'yetjö tjotidobe. Ja̧danö, Jesús ichakwa̧ möle badekwachenama, o̧do tjotidinejuma ökwölanö ujuwakobe Diosma, tjotidina otiwojobö jö̧ba̧lö i̧sebö.

1 Corintios 3:12 Iomraidhean Croise

Éxodo 5:12

Jo̧kwaobetjö̧ Israel jojodöma okobe jwiinö Egiptonö isakwö isa'ye jwiinö woina'yeda e'dijadötö. Belö tjiyina'ye balewö jwiinö woina'yeda e'dö e'ewö ȩwa̧jijadötö, blokekwö pjabatö tjotidakwa̧'yema.

Proverbios 16:16

Ja̧danö, ju'wibi yötawa: Chömöledö döwaisa, oroma nöinö mikwawi̧ jawa ¿jö̧tö̧? Isabenö yötawa: Oro mikwawi̧tjö bajalekwönönö mikwawobe jweinö omukwatö kwö̧jaduwi̧ma. Ja̧danö, döwaisa, platabi nöinö mikwawi̧ jawa ¿jö̧tö̧? Isabenö yötawa: Kwöwaisaduwi̧ma di̧ya sulojobö jö̧ba̧lö, di̧ya otiwojobö jö̧ba̧lö jwiinö mikwawobe, plata mikwawi̧tjö̧ bajalekwönönö.

Proverbios 30:6

Ja̧danö, ju'wibi yötawa: Dios yöawinama ju'wikwöma pjakata̧loko. Jobekwö Dios yöawinakwö ju'wi jawakwö pjakata̧litjö̧ma Diosma jwebebö lȩebakwo̧ ökwönöma, jojodö ökwönö tjöwaisachibakobetjö̧, omöna yöba̧lo̧, jö̧ba̧lö.

Proverbios 8:10

Ina yöbawuju: —Wanedö yötawa: Dötölataja jawatjö kwemaduwobö jo̧be, ötjö jwebebö yötawi̧tjö̧kö̧, ja̧danö platatjö̧kö̧ ¿di̧atjö̧ kwemaduwakwa̧jö̧? jö̧ba̧lö. Yötawaduwakwö: ¡Jwebebö yötawi̧tjöda kwemaduwo! Ja̧danö, ju'wi jawabi ju'wi jawa kwöwaisi̧tjö̧kö̧, ja̧danö orotjökö̧ ¿di̧atjö̧ kwemaduwakwa̧jö̧? Yötawaduwakwö: ¡Ju'wi jawabi ju'wi jawa kwöwaisi̧tjö kwemaduwo!

Isaías 60:17

Isabenö otiwanö chiyakwawö̧ja, baikwö wanedö yöta̧la: Bronce chiyo jö̧ta̧linemi, oroda chiyocha, ja̧danö 'dii jawa chiyo jö̧ta̧linemi, platada chiyocha. Towi ötebiya chiyo jö̧ta̧linemi, bronceda chiyocha, ja̧danö inawiya chiyo jö̧ta̧linemi, 'dii jawada chiyocha. Jwiinö otiwanö wene jwiinö kwö̧jaduwobetjö̧, wene jwiinö ja̧kwawama la'aka kwuluwedödanö ichejekwakobe, ja̧danö otiwanö ja̧bö ja̧kwawama, inesö la'aka kwuluwo̧duwidanö ichejekwakobe.

Hechos 20:30

Ina yöbawijetö: —A̧ja̧kwaduwitjö, ju'wibi yötawa. Ökwödöda jojodötjöbi ju'wedöma omöna yötjawakobe idöda tjomukwati̧da. Omöna yötjawakobe Jesúsnö ösödadönö, Dios iwene, jweinö tja̧ja̧kwina wene kabatibö idöda omöna tjomukwati̧danö tjomukwatobö. Jejenö jobadö omöna yöbawadöma ökwödö kwite'ada̧laduwawö̧nö ökwödötjöma 'dötjebobö omöna yötjawakobe.

Romanos 16:17

Chömöledö, ökwödönö budekwö ateba, te'ada̧lakwawönö kwuju̧kwaduwo chömöledö. Suli̧ waedadöma tjuju̧kwobe, jojodö idöda tjömöledökwö tjölakwabikwawo jö̧ba̧lö isakwadö. Ja̧danö, jobadöma Jesúsnö ösödadönö omöna yöba̧ladö, Duluwo̧ weökö jawa tjomukwato jö̧ba̧lö. Jau chömöledö, isabenö wene kwa̧ja̧kwinaduwa wene laebi̧danöma omukwatöködö jobadöma, ja̧danö jobadötjö 'da̧bachibö kwuju̧kwaduwo chömöledö.

1 Corintios 3:11

Wanedö yötawa: Dios eju o̧do la'akadanö jo̧ma bakwo̧da, Jesucristoda. Ja̧danö, Dios eju otidadöma ja̧ la'aka wamenöda tjotidobö jo̧be, ju'wi la'aka tjödoböma jwia chömöledö.

2 Corintios 2:17

Ju'wedö sulabenö yöbawö tjotidi̧danö dotiditjö̧ma, waekwena chömöledö. Jobadö sulabenö yöbawadöma idöda balada tjemotö jö̧ba̧lö yötjawobe chömöledö, jo̧kwaijayonö jejenöma yöbawöködösa ökwödöma. Jau chömöledö, jojodö wetjököwö̧sa, Ökwödöma Diosda weawö̧sa, Cristoda ömöayedösa, ja̧danö jo̧bada öba a'otjö jweinö obökönö yöbawadösa. Ja̧danö chömöledö, jejenö wei̧danö yödawiökwe, Diosma otiwanö pjabato̧, ja̧danö ökwödönötjö böjȩ bakwameachibanö jojodönö pjaatobe.

2 Corintios 4:2

Jau chömöledö, jojodönö yödawobe, jo̧kwaijayonö sulabenö yöbawadö yötja̧li̧danöma yödawokobe. Ökwödö yöbawö dö̧ji̧ma, okobe jwiinö tabatjö ju̧kwawa̧lakwawa ja̧awa döpöjöda, jejenö ja̧doko jö̧ba̧lö. Jau chömöledö, yödawi̧ tjösödo jö̧ba̧löma omöna yödawokobe, ja̧danö Dios iwene jweinö laebi̧tjö balewö lobö wainöma yödawokobe. Jau chömöledö, jejenö yöbawökönö, Dios öba a'otjö ja̧nö, isabenö wene jweinö laebi̧danö yöbawadösa, yödawi̧ a̧ja̧kwajadö tjomajadenö omukwatö, isabenö wene yöbawadö jö̧ba̧lö tjöwaisakobetjö̧.

Colosenses 2:8

Tjöbeba̧lakwawönö kwö̧jaduwo chömöledö, mikwa jwii̧ böjȩ waisakwawa jawa omöna yöba̧ladö yötjawi̧ a̧ja̧kwökönö, ökwödönö tjujuluwapji jö̧ba̧lö. Jobadö yötjawi̧ma, jojodö tja'dödö yötjawi̧ jawada, ja̧danö böjȩ a̧wȩtjö̧ yötjawi̧ jawada yötjawobe. Jobadö yötjawi̧ma Cristotjö ichökö ji̧ chömöledö, jo̧kwajabetjö̧ jobadö yötjawi̧ma a̧ja̧kwökönaduwi.

1 Timoteo 6:3

Ju'wedöma yötawaja̧danöma yöbawöködö, ja̧danö Duluwo̧ Jesucristo yöawi̧ öpöjödadö, ja̧danö Cristonö ösödadö ja̧bö tjö̧jo jö̧ba̧lö döba̧ja̧di̧ wene öpöjödadö.

2 Timoteo 2:20

Baikwö wanedö yötawakwö Timoteo: O̧do otiwejutjö nöinö dȩja̧pi̧ya jo̧be, ¿jö̧tö? Orotjö ja̧danö platatjö otikwa ö̧pi̧ya jo̧be, ja̧danö ju'wibi towisötetjö, ja̧danö letiatjö otikwa ö̧pi̧yabi jo̧be, ¿jö̧tö? Ja̧danö, ja̧ dȩja̧pi̧yatjö, orotjö, ja̧danö platatjö otikwaö̧pi̧yama, wainö ji̧ ö̧pi̧ya jo̧be, ja̧danö sule otiwa jawa anawaö̧pi̧ya, ¿jö̧tö? Jo̧kwaijayonö towisötetjö, ja̧danö letiatjö otikwaö̧pi̧yama mikwawökö ö̧pi̧ya jo̧be, ja̧danö suli̧ jawa anawa öpi̧ya, ¿jö̧tö?

2 Timoteo 3:13

Jau Timoteo, sulabedöbi, Jesúsnö ösödadösa jö̧ba̧lö omöna yöba̧ladöbi ida̧ökö sulabenö ja̧tjobe babema, jo̧kwaijayonö 'dö̧ibaji̧ mölema jemi bajalekwönönö jwiinö sulabenö ja̧tjakobe, jojodönö omöna yöba̧löbi, omöna yöa̧lakwawa ösödöbi.

2 Timoteo 3:7

Jau Timoteo, jobadöma tjösödi̧ jawa tjisakwobetjö̧, ba̧kwȩlö̧jatebö ju'wi omöna yöawakwawabi, ju'wi omöna yöawakwawabi tja̧ja̧kwobe. Jo̧kwajabetjö̧ nöinö omöna yöawakwawa tja̧ja̧kwobetjö̧, isabenö waisakwawa tjöwaisobö jwibadö, ja̧danö juluwanö 'daliwanö tjö̧libobe.

2 Timoteo 4:3

Jau Timoteo, isabenö kwo̧'wo̧ 'dibachibö yökawobö ja̧kobe, baikwö yötawa: Ja'yubenö lekwajabetjö jojodöma otiwanö ba̧ja̧dakwawa tja̧ja̧kwobö tjöpöjödachibakobe, tjo̧wi̧ta, da̧ja̧kwökö jö̧ba̧lö. Ja̧danö, jejenö öpöjödö, idöda tjösödi̧da yöbawadönö tjisakwakobe, tjösödi̧ jawada yöbawadönöma.

Hebreos 13:9

Isabenö, chömöledö ajayinö Jesúsnö, bakwo̧danö yöbawinadö yötjawina kwomukwataduwo. Babe mölema ju'wedö ba̧jekwadö jelobekwö omukwatö yötjawi̧ma jo̧be, ju'wi jawabi, ju'wi jawabi. Ja̧danö, jelobekwö omukwatö yötjawobe, Moisésnö weina a̧ja̧kwö dö̧jobö jo̧be, dukwobö wei̧ma, jö̧ba̧lö. Ja̧danö, Moisésnö weina kwukwaduwobö a̧ja̧kwö kwö̧jaduwitjö̧ma juluwachibanö kwi̧'yaduwena kwo̧'wo̧ luwo̧duwinö, jö̧ba̧lö, jelobekwö omukwatö yötjawobe. Chömöledö, kwakwawamaökö ökwödönö do̧'wo̧ luwo̧nö juluwachibanö kwi̧'yaduwoböma, Dios jawada. Diosma ökwödönö pjabatö lȩlö̧jino edobetjö̧ do̧'wo̧ luwo̧nö juluwachibanö di̧'yobe. Chömöledö ju'wedö jelobe omukwatö yötjawi̧ma öpöjödaduwi. Ajayinö yöbawinadö Jesúsnö isabenö ji̧ yötjawinada omukwatö kwuju̧kwaduwo.

1 Pedro 1:7

ja̧ usula kwemawaduwi̧ baledibö isabenö Dios yöawi̧ kwösödaduwi̧ wenema otiwanö öwawakobetjö̧. Jau chömöledö, isabenö usula kwemawaduwobö jo̧be. Baikwö wanedö yötawa: Oro ökwölanö lödebö tjotidökötjö̧ma, bakwainö otiwi̧ma öwawökena, ¿jö̧tö? Sule ökwölanö lödebö tjotidaja̧ ikenada otiwanö öwawobe oro otiwi̧ma, ¿jö̧tö? Ökwödö Dios yöawi̧ kwösödaduwi̧bi ja̧danö chömöledö. Usula emawökönö kwö̧jaduwitjö̧ma, otiwanö Dios yöawi̧ kwösödaduwijayonö, kwösödaduwi̧ma otiwanö öwawökena, sule usula emawö kwöbaledaduwajenada otiwanö öwawena otiwanö kwösödaduwi̧ wenema. Jo̧kwajabetjö̧ isabenö usula kwemawaduwobö otiwobe chömöledö. Jau chömöledö, oroma mikwawijayonö, ja'yubeda mikwawobe, oroma tupakwö jwiakobetjö̧. Jo̧kwaijayonö ökwödö Dios yöawi̧ kwösödaduwi̧ma orotjö bajalekwönönö mikwawi̧ chömöledö, jo̧kwajabetjö̧ orotjö bajalekwönönö isabenö kwösödaduwi̧ wene otiwanö öwawobö jo̧be. Jau chömöledö, babe usula kwemawaduwi̧ma, ökwöladanö ichejekwa, bakwainö otiwanö kwösödaduwi̧ wenema öwawobö, ja̧danö ja̧ jawa usula emawö kwöbaledaduwenama, isabenö Dios yöawi̧ kwösödaduwi̧ wenema öwawakobe chömöledö. Ja̧danö chömöledö, jejenö öwawobetjö̧, 'dö̧ibaji̧ möle Jesucristo ichenama, Diosma otiwanö ösödadöja jö̧ba̧lö yöawakobe, ja̧danö dejatinö ujulu ökwödönö iyakobe, ja̧danö ökwödönö otiwanö omukwatakobe chömöledö. Jejenö jo̧be chömöledö, jo̧kwajabetjö̧ babe usula kwemawaduwijayonö, yayonö kwo̧'wo̧ ösöwachibanö ja̧döja, otiwa jö̧ba̧lö.

Apocalipsis 2:14

Chömöledö, otiwanö kwö̧jaduwijayonö ja'yubeda jo̧be, chöpöjödi̧ma. Ökwödötjö ju'wedöma jelobekwöda omukwatö ja̧köbaduwobe. Ja̧ omukwatö ja̧köbaduwi̧ma yelösöda chöpöjöda, biya̧: Chedemi ina kwösödaduwobe damötjö ji̧na, Balaammine omukwatina, jo̧ba omukwatö ö̧jinadanö omukwatö ja̧nö. Damötjö Balaamminema weinobe la'aka luwo̧ Balacminenö Israel jojodönöma jelobekwö öibobö, sulabenö ja̧tjobö. Jejenö weökwe, Balacminema, Israel jojodönö, tjo̧'wo̧ jawa tjiyaja̧ kwakwawa tjukwoböbi, tji̧lȩkwa̧muböködökwö tjö̧joböbi, jelobekwö omukwatö ja̧tjobö öibinobe. Ökwödötjö ju'wedöma ina jo̧ba Balaammine sulabenö omukwatö ja̧inadanö omukwatö ja̧köbaduwobe.

Apocalipsis 21:18

Jemi tjöekwemima inawiyatjö tjöekwemi, nöinö mikwawi̧ jawa öwiyatjö, jaspe mikwi̧tjö. Ja̧danö, 'yayi̧ Jerusalén comunidadma orotjö otikwemi, isa̧yu̧ salöi̧danö bakwai̧ orotjö.

Apocalipsis 3:18

Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.