1 Corintios 15:2 - Dios Iwene

² Ja̧danö, ja̧ wene 'diinö do̧ba̧lö kwösödaduwobetjö̧, ji̧badöja chömöledö. Jau chömöledö, otiwa jawa yödawi̧ wene jweinö laebitjö̧ma, isabenö ji̧badöja.

1 Corintios 15:2 Iomraidhean Croise

Proverbios 23:23

Chitji̧, kwö̧jima baikwö kwö̧jo: Omöna yötjawi̧ jawa a̧ja̧kwökönö isabenö ji̧ jawa yötjawi̧ma ösödö kwomajadenö kwanawo. Ja̧danö, jweinö omukwatö ja̧kwawa yötjawi̧ ösödö kwomajadenö kwanawo. Ja̧danö, jwebebö yötjawi̧ ösödö kwomajadönö kwanawo, jobekwöda chö̧jobö jo̧be jö̧ba̧lö. Ja̧danö, di̧ya sulojobö jö̧ba̧lö, di̧ya otiwojobö jö̧ba̧lö waisakwawama ösödö kwomajadenö kwanawo. Jobekwö omukwatö kwö̧jo chitji̧, ja̧ waisakwawa la'akatjöda kakatiboko.

Proverbios 3:1

Baikwö laebobe Salomón iteda itji̧nö möayo̧nö jwebebö yöawinama: Chitji̧ yötawakwö: Ötjö jwebebö yötawi̧ma kwo̧’wo̧ jwikiboko. Ja̧danö, weti̧ma kwomajadenö kwanawo, jwiinö mikwawobe jö̧ba̧lö.

Proverbios 4:13

Ja̧danö, yemidanö yötawakwö chitji̧: Ötjö jwebebö yötawi̧ma a̧ja̧kwö kwö̧jo. Ja̧ yötawi̧ma, 'diinö do̧tja̧li̧danö do̧ka̧lo, kabatibökönö. Kwo̧'wo̧ jwibibökönö ba̧kwȩlö̧jatebö kwomukato ja̧ yötawi̧ma, otiwanö kwö̧jobö öbibö yötawobetjö̧.

Lucas 8:13

Ja̧danö inakoena meaja̧ ödebiyama baikwö badekwachobe, Dios iwene tja̧ja̧kwenama, tjo̧'wo̧ ösöwachibanö tja̧ja̧kwobe, otiwa jawa wene jö̧ba̧lö. Jo̧kwaijayonö, bö'dia jwibadödanö tjichejekwobe, tjomajade okwanö söibokobetjö̧, ja̧danö lekwema ösödöködö. Usula tjemawenama, juluwanö kabatibadö, tjösödi̧ la'aka jawa jwiobetjö̧.

Hechos 2:47

Kabatökönö, Diosma otiwanö jo̧, jö̧ba̧lö, ju̧kwiabijadötö. Ju'wedö jobe ju̧kwadöma tjo̧'wo̧ ösödinö edijadötö jobadönöma. Ju'wi möle jwiinö Duluwo̧ma ju'wedönöbi, ju'wedönö tjö̧jibinö pjaatawö̧ batjibanö pjabatijetö.

Hechos 8:13

Ja̧danö, Simónbi, mea boawa jojoma Jesúsnö ösödijetö, Chö̧jibinö pjabato̧, jö̧ba̧lö. Jo̧banöbi ojwenö bu̧datijetö Felipema. Ikenama Simónma Felipe ökömanö kabatökönö kwebachiabijetö. Felipe otidobe edö, Dios ujulunö i̧sebö otidobe edö, Simónma, ¡Ayö! Isabenö bitema Dios ujulu i̧sebö otido̧, jö̧ba̧lö, omukwatijetö.

Romanos 1:16

Jau chömöledö, tabada̧lökönö yöbawo̧sa otiwa jawa wenema, jo̧kwajabetjö̧ isabenö ökwödönöbi yötawobö jö̧ta̧la. Jau chömöledö, tabada̧lökönö yöbawo̧sa. ¿Tajawedö chötabada̧lobö chömöledö? Ja̧ weneda inesö mikwawi̧ wene, ju'wima jwiobe yelösöda, jojodö tjö̧jibobö chömöledö. Okobe deinö ja̧ otiwa jawa wene ösödadönöma, tjö̧jibinö ja̧akwo̧ Diosma, abönö a̧ja̧kwinadö judío jojodönöbi, judío jojodöböködönöbi. Ja̧danö, ja̧ weneda ji̧kwa weneobetjö̧, tabada̧lökönö yöbawo̧sa ötjöma chömöledö. Jau, ja̧ wene isabenö juluwi̧ ji̧.

Romanos 11:22

Jau chömöledö, Dios ja̧i̧ kwomukwataduwo, Diosma lȩbeböbi lȩbebo̧, ja̧danö lȩlö̧jinö edöbi lȩlö̧jinö edo̧. Mebinadö Israel jojodönöma, lȩbebo̧ Diosma, jo̧kwaijayonö ökwödö Israel jojodöböködönöma lȩlö̧jinö edo̧. Jo̧kwajabetjö̧, ökwödö Israel jojodöböködöma Dios yöawi̧ kwösödaduwo ina ökwödönö lȩlö̧jinö edobö, ja̧danö ökwödönöbi tjebö loapji jö̧ba̧lö.

1 Corintios 1:18

Jau chömöledö, Dios lȩebi̧tjö tjemakwedöma, Cristo towisa'onö woina wenema tjöpöjödobe, waisakwawa jwii̧ wene jö̧ba̧lö. Jo̧kwaijayonö ökwödö Dios lȩebi̧tjö ji̧badöma Cristo towisa'onö midawö woina wene dösöda, Dios ujulu ji̧ wene jö̧ba̧lö.

1 Corintios 1:21

Jau chömöledö, Diosma iteda waisanö omukwati̧ma i̧sebobe, baikwö yötawa. Böjȩ jojodö idöda waisanö tjomukwati̧ omukwatö Diosnö tjöwaisachibinokobe, ¿jö̧tö? Ja̧danö, böjȩ jojodö tjedemi, yödawi̧ wene Jesús midawö woina wenema waisakwawa jwii̧ wene jo̧be, ¿jö̧tö? Jo̧kwaijayonö Diosma waisanö omukwatö, ja̧ Jesús midawö woina wene ösödadönöda dö̧jibinö ja̧bo̧ chömöledö.

1 Corintios 11:2

Chömöledö, ökwödöma otiwanö kwomukwataduwobe ötjö ja̧bö chö̧jinama, ja̧danö ökwödönö wetina jawama otiwanö ja̧bö kwö̧jaduwobe, baikwö ja̧bö kwö̧jaduwo jö̧ba̧lö ökwödönö wetina jawama. Ja̧danö, jejenöobetjö̧, otiwa jö̧ba̧lö yötawaduwakwö chömöledö.

1 Corintios 15:14

Ja̧danö, Cristo tjeachajinökötjö̧ma, mikwa jwii̧ weneda yödawobe, ja̧danö mikwa jwii̧ weneda kwösödaduwobe chömöledö.

2 Corintios 2:15

Jau chömöledö, Diosma ökwödönö ujuninobe ökwödönötjö böjȩ jojodö ja̧kwawa wene tjöwaiso jö̧ba̧lö. Ja̧danö wanedö yötawa: Ökwödö Cristo jawa wene yöbawadöma, Cristo Diosnö iyawa söinö omewi̧ iyawadanö ichejekwadösa, ja̧danö wanedö yötawa: Cristo jawa wene yödawenama, ja̧ söinö omewi̧ 'dö̧batadö böjȩ jojodöma, tjö̧jibakwedötjöbi, Dios lȩebakwawö̧tjöbi.

2 Corintios 6:1

Jejenö laebobe otiwa jawa wenema chömöledö, ja̧danö Dioskwö bakobe otidö, budekwödanö abebadösa jojodönö, Dios mikwa jwiinö otiwanö iyö pjaati̧ma kwöpöjödaduwa jö̧ba̧lö. Jau chömöledö, Dios iwene damötjö tjiwȩyudinadanö jo̧be, baikwö laebobe Dios iwene: Ökwödönö pjatatakwa̧ möle baibenama, ökwödönö cha̧ja̧kwijatö, ja̧danö kwö̧jibaduwinö pjatatakwa̧ möle baibenama, ökwödönö pjatatijatö, jö̧ba̧lö laebobe Dios iwene. Jejenö laebobe Dios iwene chömöledö, ja̧danö Dioskwö bakobe otidö yödawobe: Dios ökwödönö pjaatakwa̧ möle jö̧ba̧lö badekwachi̧ma, babe möleda badekwachobe, ja̧danö kwö̧jibaduwinö pjaatakwa̧ möle badekwachi̧ma babe möleda badekwachobe, jo̧kwajabetjö̧ Dios iyi̧ öpöjödökönö, Cristonö kwösödaduwo jö̧ba̧lö yödawobe jojodönö.

Gálatas 3:4

Ökwödönö baledina jawatjö kwöwaisachibinaduwökiji̧ chömöledö? Chedemi kwöwaisachibaduwo jö̧ka̧linaduwena.

Efesios 2:8

Isabenö chömöledö, Diosma lȩlö̧jino edobetjö̧, Jesúsnö kwösödaduwenama, Jesúsma dö̧jibanö pjabato̧, jö̧ba̧lö, ökwödöma ji̧bakwawanö kwö̧jibinaduwobe. Chömöledö ji̧bakwawanö kwö̧jibaduwoböma ¿ökwödöda ja̧köbakwawinaduwaji̧, kwujuluduwinö? Jejenöma ja̧awakwawinöködöja. Ja'yubebi ji̧bakwawanö kwö̧jibaduwobö ja̧köbakwawaduwoböma jwiobe. Diosda mikwa jwiinö otiwa jawa iyö kwö̧jibaduwinö pjaatinobe chömöledö, otiwanö ja̧bö kwö̧jaduwököjayonö.

Colosenses 1:23

Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.

2 Tesalonicenses 2:15

Jo̧kwajabetjö̧, pjolachibökönö kwö̧jaduwo chömöledö, yödawina wene isabenö wene do̧ba̧lö, yöbawö yödawina wenebi, wȩyudö yödawina wenebi.

2 Timoteo 1:9

Jau Timoteo, Diosda ökwödönö dö̧jibinö pjabatinama, jo̧bada iteda ömöledö badibobö jwöbinama, jo̧kwajabetjö̧ usula emawö jwaikwöda otiwa jawa wene yöbawö kwö̧jo iteda ujulunö. Ja̧ Dios ökwödönö pjaatinama, otiwanö ja̧bö dö̧jiökwema pjaatinokobe, itedada la'akatjöda jejenö omukwatö ujuninobetjö̧ jejenö pjaatinobe. La'akatjöda Diosma omukwatö ujuninobe, Cristo Jesúsnötjö otiwa jawa mikwa jwiinö ökwödönö iyobö.

Hebreos 10:23

Chö̧ja̧wo̧dö ökwödöma, Diosnö do̧'wo̧ wana̧lö ja̧dösa, jö̧ba̧lö yöda̧lobe. Ja̧danö, Dios jö̧a̧li̧danö isabenö badekwachakobe, jö̧ba̧lö, omukwatö ju̧kwadösa. Jejenö omukwatö jo̧banö do̧'wo̧ wana̧lö jwaikwöda di̧'yaduwo, jo̧ba jö̧a̧li̧danö badekwachakwa̧ te'ada̧lö. Isabenö, jwaikwöda do̧'wo̧ wana̧lö di̧'yobö jo̧be, Diosma isabenö jö̧a̧li̧danö ja̧bo̧obetjö̧.

Hebreos 2:1

Isabenö chömöledö, döwaisa. Ökwödöma Dios Itji̧ yöawinatjöda da̧ja̧kwijatö Dios yöawina ökwödönöma. Jau, Dios Itji̧, jwiinö inesö jo̧, ángelesdönötjöbi o̧penönö inesö jo̧ yöawinatjöda da̧ja̧kwijatö Dios yöawinama. Ja̧danö, Dios yöawina jejenö da̧ja̧kwobetjö̧ Dios Itji̧ yöawina tjöbeba̧lö̧jönö omukwatö di̧'yobö jo̧be chömöledö. Isabenö, tjöbeba̧lö̧jönö omukwatö di̧'yobö jo̧be, Ökwödöma Dios Itji̧ otiwa jawa wene, dö̧jibinö pjabatö yöawina wene ösödadösa, jö̧ba̧lö. Chömöledö, ja̧ Dios Itji̧ yöawina dösödi̧ma do̧'wo̧ luwo̧ okwanö do̧tjati̧danö do̧batö di̧'yaduwo jö̧ta̧la. Isabenö chömöledö, Dios Itji̧ yöawina do̧'wo̧ luwo̧ okwa do̧batö di̧'yaduwo, jo̧batjö 'da̧bachibö jelobekwö omukwatö di̧'yapji jö̧ba̧lö, jo̧ba yöawina öpöjödö.

Hebreos 3:14

Isabenö chömöledö, kwö̧ja̧wo̧dönö pjakataduwo ökwödö ökobe deinö jwaikwöda kwi̧'yaduwobö Cristonö ösödö. Jejenö kwi̧'yaduwena Cristokwö dötewi̧danö dötewinö kwi̧'yaduwakobe. Chömöledö, Cristonö ösödö jwaikwöda kwi̧'yaduwena, ajayinö do̧batö kweminaduwena kwösödaduwi̧danö ösödö, isabenö Cristokwö dötewinö kwi̧'yaduwobe, jo̧bakwö bakobe kwö̧jaduwi̧danö. Jo̧kwaijayonö, Cristonö ösödö jwaikwöda kwi̧'yaduwökötjö̧ma da'dödöminenö baledinadanö baledena ökwödönöma. Jo̧kwaobetjö̧ chömöledö 'diinö do̧kataduwi̧danö Cristonö kwösödaduwi̧ma 'diinö do̧batö kwi̧'yaduwo, Ökwödöma tupakwö Cristokwö 'ya̧dösa, dö̧jibinö pjabato̧kwö, jö̧ba̧lö. Chömöledö, jejenö do̧'wo̧ luwo̧nö jemi tupakwö jwaikwöda Cristokwö dötewinö 'ya̧dösa, jo̧bakwö bakobe ja̧nö.

Hebreos 3:6

Jo̧kwaijayonö Cristoma ömöayo̧nötjö o̧penönö inesö jo̧. Isabenö, jo̧bama Dios Itji̧. Ja̧danö, jo̧bama Dios i̧tji̧mu babibinadö tjuluwo̧. Ja̧danö, jobadönö otiwanö te'ada̧lo̧. Wanedö yötawa: Ökwödö, okobe deinö Cristonö ösödadöma o̧dodanö, Dios otidinejudanö döwanekwachobe. Ja̧danö Cristo, Dios Itji̧ma, Dios otidineju la'aka luwo̧danö jo̧, ökwödö Duluwo̧. Isabenö chömöledö, ökwödöma Dios otidinejuda wanekwachadösa yebabökönö jwaikwöda di̧'yitjö̧ma, Diosnö do̧'wo̧ wana̧lö. Jau chömöledö, ökwödöma Dios otidinejuda wanekwachadösa jwaikwöda Diosnö do̧'wo̧ wana̧lö di̧'yitjö̧ma, do̧'wo̧ luwo̧nö ösöwö, Cristoma dö̧jibinö pjaatinobetjö̧ Dios i̧tji̧mu babibinadösa, ja̧danö Dioskwö ba̧kwȩlö̧jatebö dö̧jakwedösa, jö̧ba̧lö.

Hebreos 4:14

Jo̧kwaobetjö̧ chömöledö, jwaikwöda di̧'yaduwo, domajadenö 'diinö do̧tjati̧danö, Ökwödöma Jesúsnö ösödadösa, dö̧jibinö pjabato̧nö, jö̧ba̧lö. Jejenö di̧'yobö jo̧be chömöledö, Jesúsda Diostjö jojodötjö ö'weje la'aka pjabato̧ baibanö ö̧jobetjö̧. Jo̧ba mölejȩbekwö kabekwachajinama Dios öba a'o jo̧.

Santiago 2:14

Chö̧ja̧wo̧dö, bakwo̧, Ötjöma Jesúsnö cho̧'wo̧ wana̧lo̧sa, jö̧ba̧lö, yöa̧lijayonö usula emawadönö lȩlö̧jino edökönö, jobadönö pjabatökönö ö̧jitjö̧ma ¿dakwö mikwawobö jo̧ba Jesúsnö o̧'wo̧ wana̧lö ö̧ji̧ma? Mikwawokobe, ja̧ o̧'wo̧ öwana̧li̧ma i̧sekwökönö, usula emawadönö pjabatökönö ö̧jobetjö̧. Chö̧ja̧wo̧dö jo̧bama ¿Dios lȩebi̧tjöma ö̧jibakwa̧ji̧ 'dö̧ibaji̧ mölema? Ö̧jibökakwo̧. Diosma jo̧banö lȩbebö yöawakobe, Kwo̧'wo̧ kwöwana̧li̧ma kwi̧sekwinokobe, jö̧ba̧lö.

Santiago 2:17

Isabenö chö̧ja̧wo̧dö, jejenö bakwo̧ jwibo̧nö pjabatö̧kö̧ma, Jesúsnö cho̧'wo̧ wana̧lo̧sa, jö̧ba̧lö, yöa̧lijayonö jö̧ba o̧'wo̧ wana̧lö ö̧ji̧ma mikwawokobe, böjȩnö ja̧nö i̧sekwokobetjö̧. Wanedö yötawa, ö'wö babibajo̧nö wanedöma: Bakwo̧ ida̧ökö ö'wö babibajo̧ma ¿jojodönö pjaatobeji̧? Pjaatokobe. Jejenö bakwo̧, Jesúsnö o̧'wo̧ öwana̧li̧ i̧sebö̧kö̧ma. Jo̧bama ö'wö babibajo̧danö jo̧, jojodönö pjaatokobetjö̧. Chö̧ja̧wo̧dö otiwanö kwo̧'wo̧ wana̧ladöja Jesúsnöma. Jo̧kwaijayonö ja̧ kwo̧'wo̧ kwöwana̧laduwi̧ kwi̧sekwaduwobö jo̧be. Jau chö̧ja̧wo̧dö, kwo̧'wo̧ kwöwana̧laduwi̧ma kwi̧sekwaduwo usula emawadönö lȩlö̧jino edö pjabatö.

Santiago 2:26

Chö̧ja̧wo̧dö ökwödö Jesúsnö do̧'wo̧ wana̧lö dö̧jijayonö jojodönö pjabatö di̧sekwökötjö̧ma ¿dakwö mikwawobö do̧'wo̧ döwana̧li̧ma, böjȩnö dö̧jena? Mikwawokobe. Wanedö yötawaduwakwö: Bakwo̧ ida̧ökö ö'wö baibena, o̧'wo̧ luwo̧ma jo̧batjö̧ma laebobe. Iteba'oda bi̧bo̧. Ja̧danö, o̧'wo̧ luwo̧ ȩwa̧jabe okobema iteba'oma ¿dakwö mikwawobö? Mikwawokobe. Chö̧ja̧wo̧dö jejenö jo̧be, bakwo̧, Jesúsnö cho̧'wo̧ wana̧lo̧sa, jö̧ba̧lö, yöa̧lijayonö o̧'wo̧ öwana̧li̧ma i̧sekwokobe, usula emawadönö pjabatökönö. Jo̧bama usula emawadönö pjabatökönö, o̧'wo̧ öwana̧li̧ i̧sekwokobetjö̧ o̧'wo̧ öwana̧li̧ma mikwawokobe böjȩnö ö̧jena. Jo̧bama ö'wö babibinadanö jo̧. Jau chö̧ja̧wo̧dö. Jo̧bama, ö'wö babibajo̧ omukwati̧ i̧sekwobö jwii̧danö jo̧ba jö̧a̧li̧ma i̧sekwokobe Jesúsnö o̧'wo̧ wana̧lö ö̧ji̧ma. Chö̧ja̧wo̧dö do̧'wo̧ wana̧lö dö̧ji̧kwö, do̧'wo̧ döwana̧li̧ di̧sekwi̧kwö bakobe dötewinö dö̧jobö jo̧be.