Raquelma, ötjöwe, tjemu debujusa, ja̧danö Jacob i̧tji̧munö 'yatebökakwujusa, jö̧ba̧lö ö'wiawinö edijotö jöpöo Leanöma ji̧tji̧mu ö'wejemu luwanö 'yajebioko. Jo̧kwaobetjö̧ Jacobnö jö̧ba̧lijotö: —Chilekwe ötjökwö kwö̧jo metu'wo batibobö, kwi̧tji̧munö 'yatebinö. Isabenö tjemu debujuchitjö̧ma debö chi̧'yena— jö̧ba̧lijotö.
1 Corintios 13:4 - Dios Iwene4 Jojodönö ösödabikwawö ja̧kwawama baikwö yötawa chömöledö: Jojodönö ösödabikwawö ja̧kwawama, o̧'wo̧ 'dibachibö lȩlö̧jinö ja̧bö ji̧. Ja̧danö, ö'wiabinöma edökönö ji̧, ja̧danö otiwo̧sa jö̧ba̧löma omukwatökönö ji̧. Faic an caibideil |
1 Corintios 13:4
53 Iomraidhean Croise
Ja̧danö, ju'wibi yötawa, wanedö: Ojwe tjöekwemi ojwiyo ja'yubeda ebawobe. Ja̧danö, jemi dadö tju̧tumökötjö̧ma ojwiyoma nöinö ebawibö pjolachaibakobe ¿jö̧tö̧? Te'ada̧lökönö jemima dadö tju̧tumobö jo̧be. Isabenö yötawa: Ja̧ tju̧tumi̧danö jojodöma jamatö jwöjwötjakwawena te'ada̧lökönö katjatakwawobö jo̧be jwiinö tjölakwabikwawapji jö̧ba̧lö. Isabenö, ojwe pjolachibapji jö̧ba̧lö juluwanö tju̧tumi̧danö jojodöma jamatö jwöjwötjakwawena juluwanö katjatakwawobö jo̧be, jwiinö tjölakwabikwawapji jö̧ba̧lö.
Ja̧danö, ju'wibi yötawa, wanedö: Bakwo̧ma ömöledöso̧kwö wene ujuna̧lakwawobe, ömöledöso̧ma jo̧banö sulabenö ja̧ajobetjö̧. Ja̧danö, sulabenö ja̧ajökwema ömöledöso̧ sulabenö ja̧aja̧ jawa 'do̧beba̧lö loitjö̧ma ömöledöso̧kwö otiwanö ösödö tjö̧jena, wene jwiinö. Jobekwö baledokobe ömöledöso̧ ja̧aja̧ma 'do̧beba̧lö loökötjö̧ma. Ömöledöso̧ sulabenö ja̧aja̧ jawa ba̧kwȩlö̧jatebö omukwatö, ja̧danö ömöledöso̧nö ba̧kwȩlö̧jatebö jwöjwöbakwawö yöa̧litjö̧ma jwiinö öpöjödena, bajaliyanö ökwötjö 'da̧bachiböda chö̧jobe, jö̧ba̧lö.
Ja̧danö, ju'wibi yötawa wanedö: Bakwo̧ ö̧jobe ömöledönö ba̧kwȩlö̧jatebö ösödabikwawö pjabato̧ma. Isabenö, jo̧ba ösödabikwawi̧ma la'akatjöda balewachökakobe. Ba̧kwȩlö̧jatebö pjaatakwo̧. Jojodöma jo̧banö nöinö tjösödökwe, bite otiwanö omukwati̧ma balewachö̧kö̧, jö̧ba̧lö. Ja̧danö, ju'wibi wanedö yötawa, du̧ju̧tajanö wanedö jawa: Bakwo̧ balada jwibo̧ma ö̧jobe. Ja̧danö jelo̧, lȩekwa yöbawo̧nö omöna yöbawo̧ ö̧jobe. Ja̧danö, ¿dite ö̧ji̧ mikwawobeda? Balada, jwibo̧ ö̧jobökö̧, omöna yöbawo̧ ö̧jobökö̧? Isabenö yötawa: Jwibo̧ ö̧ji̧danö ö̧ji̧ma mikwawobe. Omöna yöbawo̧ ö̧ji̧tjö̧ bajalekwönönö mikwawobe jwibo̧ ö̧ji̧ma, jwiijayonö.
Jobadönöma baikwö yötawa: Okobe jwiinö Dios öpöjödi̧ jawada ja̧badö, ju'wedö tjitea ö'wiabinö omukwatadö, okobe jwiinö jojodö sulabenö ja̧tji̧bi ja̧bö ju̧kwadö. Ju'wedö tjitea ösödö, ö'wö 'yaabinö kwabö lobadö, ölakwabikwawabi jö̧ba̧ladö, omöna yöba̧ladö, ju'wedönö sulabenö ja̧tjotö jö̧ba̧lö omukwatadö. Ja̧danö, tjoma'apekwönö yöba̧lakwawadö,
Ja̧danö, sule möle jawada ja̧bö dö̧jobö jo̧be chömöledö, Dios ösödi̧ jawada, Dios öpöjödi̧ jawamaökö. Owa̧lö, 'dukwachawö̧ baibanöma kwö̧jaduwoko, ja̧danö kwi̧lȩkwa̧muböködökwö sulabenö alewö kwö̧jaduwoko. Böjȩ jojodö sulabenö tjalewi̧danöma, kwalewaduwoko, ja̧danö sulabenö tjösödi̧danöma kwösödaduwoko. Ö'wiabinö edöma dameakwabinöma kwö̧jaduwoko, ja̧danö kwölakwabikwawaduwoko chömöledö.
böjȩ jojodö ja̧bö tjö̧ji̧danö ina ja̧bö kwö̧jaduwobetjö̧. Jau chömöledö, ju'wedö kwömöledö Jesúsnö ösödadönö ö'wiabinö edö kwö̧jaduwena, ja̧danö jobadökwö ölakwabikwawö kwö̧jaduwenama, kwi̧sebaduwobe, Dösödi̧ jawada ja̧bö ju̧kwadösa, jö̧ba̧lö, ¿jö̧tö? Ja̧danö, Ju'wedö böjȩ jojodö ja̧bö tjö̧ji̧danö ja̧bö ju̧kwadösa, jö̧ba̧lö kwi̧sebaduwobe, ¿jö̧tö?
Chömöledö, biya̧ yötawaja̧ jawama, ökwödönö pjabatö yötawajabe. Ja̧danö, ötjönö Apolosnö wanedö yötawajabe, ökwödönö a̧ja̧kwö, ökwödöbi kwöwaisachibaduwobö Dios iwene laebi̧danö kwomukwataduwobö, ja̧danö bakwo̧nö jelo̧nötjö o̧penönö kwomukwataduwapji jö̧ba̧lö, ja̧danö ju'wedönö kwöpöjödaduwapji jö̧ba̧lö, sulabedö jö̧ba̧lö.
Ja̧danö, ju'wedö tjösödawö̧ o̧'wo̧ jawa iyawa kwakwawa yötawa. Isabenö, ökwödötjö ju'wedö yökawaduwi̧danö, ökwödöma isabenö wene jawa waisadösa chömöledö. Ja̧danö, baikwö yötawa: Nöinö döwaisi̧ma, Aaa, waisadösa jö̧ba̧lö domukwatobö ja̧obe ichejekwa, jo̧kwaijayonö dömöledö Jesúsnö ösödadönö tjo̧'wo̧ luwo̧nö tjöda̧peachobö pjaatokobe. Jo̧kwaijayonö dömöledö Jesúsnö ösödadönö ösödabikwawö dö̧jitjö̧ma, jobadönö döda̧pedena.
Jau chömöledö, kwujuluwaduwachibanö yöbawö chiwȩyudobe ökwödönö yetabobetjö̧, ayö, chömöledö Corintio jojodönö tjo̧'wo̧ luwo̧nö me'dawadö ja̧nö sulabenö ja̧bö tjö̧jena jö̧ba̧lö. Jau chömöledö, ökwödönö yetabi, kwiteboduwibe chichibenama, ökwödönö chedapji jö̧ba̧lö chöpöjödinö sulabenö ja̧badönö, ja̧danö jejenö sulabenö ja̧köbaduwitjö̧, kwöpöjödaduwinö ökwödönö lȩtebapji jö̧ba̧lö. Jau chömöledö, yetabi, jobe chichibenama, jwöjwöbakwawö kwö̧jaduwena jö̧ba̧lö, ja̧danö ö'wiabinö kwedaduwena jö̧ba̧lö, ja̧danö dameakwabinö kwö̧jaduwena jö̧ba̧lö, ja̧danö a̧'dȩlanö kwö̧jaduwena jö̧ba̧lö, ja̧danö sulabenö ju'wedönö yöka̧laduwena jö̧ba̧lö, ja̧danö ju'wedö tjoma'apekwö yöka̧laduwena jö̧ba̧lö, ja̧danö Aaa, otiwadösa jö̧ba̧lö kwomukwataduwena jö̧ba̧lö, ja̧danö jaliwanö ja̧bö kwö̧jaduwena jö̧ba̧lö yetabobe chömöledö.
Jejenö usula demawijayonö, sulabenö ja̧bökönö dö̧jobe, ja̧danö ju'wibi Dios iyi̧ waisakwawa di̧sebobe, ja̧danö ju'wibi do̧'wo̧ 'dibachibö dösölö̧jinö ja̧bö dö̧jobe chömöledö, isabenö Dios ömöayedösa jö̧ba̧lö. Ja̧danö ju'wibi, Dios O̧'wo̧ Luwo̧ do̧'wo̧ luwo̧nö ö̧ji̧ma i̧sebobe Dios ömöayedö dö̧ji̧ma, ja̧danö ju'wibi isabenö jojodönö ösödabikwawö ja̧nö di̧sebobe, isabenö Dios ömöayedösa jö̧ba̧lö.
Ja̧danö, chömöledö, baikwö ja̧bö ju̧kwaduwi: Ökwödödadama kwomukwataduwa, Aaa, ötjöma ju'wedötjö o̧penönö jo̧sa, jö̧ba̧löma. Chömöledö, otiwanö omukwatö, jojodökwö ösödabikwawö ju̧kwaduwi. Ju'wibi yötawa. Kwösödaduwökö jawa baledenama kwo̧'wo̧ luwo̧duwinö tjöbeba̧lakwawö kwuju̧kwaduwo chömöledö, kwo̧'wo̧ luwo̧duwinö suli̧ teachibökönö. Ju'wedö ökwödö kwöpöjödaduwi̧ jawa ja̧tjenabi, jobadönö kwösödaduwo, kwo̧'wo̧ luwo̧duwinö sulabenö omukwatökönö.
Ja̧danö ju'wedöma yötja̧lena, Aaa, chi̧'wi̧di̧danö chedajabe, usulasedö mikwawöködö tjö̧ji̧danö dö̧jitjö̧ma otiwena, ja̧danö ángelesdönö dösöditjö̧ma otiwena, jö̧ba̧lö yötja̧lena. Jejenö ja̧böködöma sulabedö jö̧ba̧lö yötja̧lena, jo̧kwaijayonö jejenö yöba̧ladö wetji̧ma a̧ja̧kwökönaduwi. Jobadöma böjȩ jojodö tjomukwati̧da omukwatö, Otiwadösa, jö̧ba̧lö tjomukwatobe chömöledö,
Ökwödöma Dios ömöledöbedöja chömöledö, jo̧bama ökwödönö ösödö omudawö ujuninobe, iteda ömöledö bakibaduwanö. Jo̧kwajabetjö̧ wanedö yötawa: Lȩlö̧jinö edawabi, otiwanö pjabatö ja̧awabi, ju'wedönötjö o̧penönö jö̧kö̧sa jö̧ba̧lö omukwatakwawabi, dösölö̧jinö ja̧awabi, tjo̧'wo̧ 'dibachibö me'dawachibökönö ja̧awabi kamijido̧ 'dutjawi̧danö 'dukawaduwo chömöledö.
Ja̧danö, tupakwö wedaduwakwö chömöledö, 'dö̧wekwachibadönöma kwöba̧ja̧daduwo, 'dö̧wekwachibökönö tjö̧jo jö̧ba̧lö. Ja̧danö yebabinö ju̧kwadönöma tjujuluwachibanö pjakataduwo. Ja̧danö me'dawadönöbi pjakataduwo. Jobadö okobe deinö pjabatö kwö̧jaduwenama, kwo̧'wo̧duwi 'dibachibö kwö̧jaduwo chömöledö, jobadönö öpöjödökönö.
Jobadö wainö yöbawadöma, Aaa, waisadösa, jö̧ba̧lö tjomukwatijayonö, wajwibadö jobadöma. Ja̧danö, sulabe jawa tjösödoko jö̧tja̧li̧ jawama ösödadö. Baikwö ösödadö jobadö wainö yöbawadöma, ölakwabikwawa jawa ösödadö, ja̧danö jwöjwötjakwawobö ösödadö jojodö yötja̧li̧ma, biya̧ma baikwö jö̧ba̧lö laebobe, baikwö jö̧ba̧lö laebobe jö̧ba̧lö. Jejenö ölakwabikwawö jwöjwötjakwawobetjö̧, ju'wedö isabenö wene wajwibadö, tjomukwati̧ bakwainö sulabenö omukwatadöma ö'wiabinö tjedobe jojodönöma. Ja̧danö, jojodönö jwöjwötjakwawobe, ja̧danö ju'wedönö sulabenö yötja̧lobe. Ja̧danö, jojodö ja̧tji̧ tjedököjayonö, ju'wedönö sulabenö tjomukwatobe sulabenö ja̧badö jö̧ba̧lö. Ja̧danö, kabatökönö ölakwabikwawö jwöjwötjakwawobe jobadö bakwainö sulabeda omukwatadöma. Ja̧danö, ju'wibi tjomukwatobe, Aaa, Diosnö ösödakwawama, nöinö böjȩ jawa juna̧ladö badibobö ji̧, jö̧ba̧lö.
Dios iwene yökawo jö̧ba̧lö. Ja̧danö ja̧ yökawo jö̧ta̧laja̧ma, sule wene jwienadamaökö, wene jwienabi, wene jȩnabi yayonö yökawobö jo̧be. Jau Timoteo, ba̧kwȩlö̧jatebö kwo̧'wo̧ 'dibachibö ja̧nö, otiwanö kwöba̧ja̧dobö jo̧be jojodönö. Baikwö yötawa: Jwekebobö baibenama, jwekebobö jo̧be, ja̧danö lȩkebobö baibenama, lȩkebobö jo̧be, ja̧danö tjujuluwachibanö yökawobö baibenama, tjujuluwachibanö yökawobö jo̧be.
Ökwödö Jesúsnö ösödadöma, ina Jesúsnö dösödakwa̧ abönö böjȩ jojodö ja̧bö tjö̧ji̧danö ja̧bö dö̧jijatö Tito. Ja̧danö, wajwibadö ja̧nö, Dios wei̧ a̧ja̧kwökönö ja̧nö, omöna yöa̧lakwawa ösödö ja̧nö dö̧jijatö ajayinöma. Jejenö dö̧jenama, sulabe jawa dösödinama ökwödönö juluwinobedanö ichejekwa. Jau Tito, okobe jwiinö sulabe jawa dösödinama ökwödönö juluwinobedanö ichejekwa. Ja̧danö, ökwödönö juluwinobetjö̧, otiwanö ja̧bö dö̧joböma jwidinobe. Ja̧danö, jwaikwöda sulabenö dösödi̧ jawada ja̧bö dö̧jijatö. Ja̧danö, jejenö ja̧nö, kabatökönö sulabenö ja̧bö, ö'wiabinö edö dö̧jijatö. Ja̧danö, ju'wedönö öpöjödadö, ja̧danö ju'wedö tjöpöjödawö̧ dö̧jijatö ajayima.
Ja̧danö chö̧ja̧wo̧dö, omukwataduwi Dios iteda iwenetjö yöawi̧ma, biya̧: Dios O̧'wo̧ Luwo̧, do̧'wo̧ luwo̧nö tebachibö ö̧jobö weinökwema, ö'wiabinö a̧'dȩlobe ökwödönöma. Jo̧bama böjȩ jawa dösödi̧ junibö Diosnö ösödö dö̧jobö ösödo̧ chö̧ja̧wo̧dö. Jejenö laebobe Dios iwenetjö. Ja̧danö, ja̧ Dios iwenetjö yöawi̧ma ¿omöna yöawobeji̧? Omöna yöawokobe. Chö̧ja̧wo̧dö, Dios O̧'wo̧ Luwo̧ma böjȩ jawa dösödi̧ junibö Diosnöda ösödö dö̧jobö ösödo̧.
Ja̧danö inesö mikwawi̧ ja̧bö kwö̧jaduwobö yötawaduwakwö chömöledö, jwaikwöda kwömöledö Jesúsnö ösödadönö ösödabikwawö kwö̧jaduwo jö̧ba̧lö. Ja̧ma, ju'wi jayetjö bajalekwönönö inesö mikwawi̧ chömöledö, jejenö ösödabikwawö kwö̧jaduwitjö̧ma, kwömöledö sulabenö ja̧tjaja̧ omukwatökönö jobadönö ösödö kwö̧jaduwakobetjö̧.
Sanasan