1 Corintios 13:2 - Dios Iwene

² Ja̧danö, otiwanö Dios yöawi̧ yötawobö chöwaisena, ja̧danö okobe jwiinö chöwaisena, jojodö wajwitji̧ jawabi chöwaisena. Ja̧danö, jwaikwöda Diosnö chösödena, okobe jwiinö juluwo̧ jö̧ba̧lö. Jau chömöledö, mö'ösa'iju pjolachibinö weto jö̧ba̧lö Diosnö chösödena, Diosma mö'ösa'iju pjolachibinö ja̧obö juluwo̧ jö̧ba̧lö. Jo̧kwaijayonö, ju'wedönö ösödakwabikwawökönö chö̧jitjö̧ma, mikwawö̧kö̧sa chömöledö.

1 Corintios 13:2 Iomraidhean Croise

Mateo 13:11

Jejenö atjebökwe, Jesúsma atadinobe: —Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwaijayonö ju'wedö jojodönö jejenö iyinokobetjö̧, wanedö yöbawöda yötawobe jobadönö.

Mateo 17:20

Atjebökwe: —Ökwödöma otiwanö Dios ujulu kwösödaduwokobetjö̧ waekwadöja. Isabenö yötawaduwakwö, atebi̧danö ja̧obö isabenö juluwo̧ Diosma jö̧ba̧lö isabenö Dios ujulu kwösödaduwitjö̧ma, kwösödaduwi̧ ja'yuwijayonö, wanedö yötawa, mostazasade ja'yuwi̧danö kwösödaduwi̧ ja'yuwijayonö, jwaikwöda Dios yöawi̧ ösödö weköbaduwenama baibakobe. Ja̧danö, wanedö yötawa, bi'o mö'ösa'o weköbaduwena, yaikwö pjolachibi jö̧ba̧lö, ja̧danö pjolachibena. Jau chömöledö, isabenö atebi̧danö ja̧obö juluwo̧ Diosma jö̧ba̧lö otiwanö Dios ujulu kwösödaduwitjö̧ma, okobe jwiinö ja̧köbaduwobö kwujuluwaduwena— jö̧ba̧lö yöawinobe Jesúsma.

Mateo 21:19

Ja̧danö, mana ö'öbösowi higos towi edö, towinö wa̧ji̧ ukwotö jö̧ba̧lö towi jo̧bekwö i̧'yinobe. Jo̧kwaijayonö, ichibö, sule öjiyada jo̧wi, wa̧ji̧ jwiowida öbadekwajinobe. Jejenö öwa̧jö jwiiökwe, Jesúsma yöa̧linobe: —Towi sulabowija. La'akatjöda wa̧jökakwowija— jö̧ba̧lö. Ja̧danö, jejenö yöawenama, jowi higos towima juluwanö kököbachibö woinobe.

Mateo 21:21

Atjebökwe, Jesúsma atadinobe: —Isabenö yötawaduwakwö chömöledö, Diosma isabenö atebi̧danö ja̧akwo̧ jö̧ba̧lö Dios ujulu ösödö, waekwena jö̧ba̧lö omukwatökönö Diosnö akebaduwitjö̧ma, towi kököbachibö woobö ja̧taja̧danö ja̧köbaduwena chömöledö, jo̧kwaijayonö ja̧damaökö. Jau chömöledö, jwaikwöda Dios ujulu ösödö bi'o mösa'o, Pjolachibö ojwe okwa babibi, jö̧ba̧lö weköbaduwitjö̧ma, weköbaduwaja̧danö baibakobe.

Hechos 13:1

Ja̧danö, Antioquíanö ju̧kwadöma, Jesúsnö ösödadötjö bakwamu jojodöma Dios iwene yöbawöbi, Jesúsnö ösödadönö ba̧ja̧dadöbi ju̧kwiabijadötö. Jobadöma bidö: Bakwo̧ma Bernabé. Jelo̧ma Simón. Jo̧bama ju'wi imi, Negro, mikwo̧. Jelo̧ma Cirenetjö ichina Lucio mikwo̧. Jelo̧ma Menahem mikwo̧, tjemu baiyo̧ma la'aka luwo̧ Herodeskwö ja̧nö bötjachina. Jelo̧ma Saulo.

Romanos 11:25

Jau chömöledö, biya̧ wene yötawaduwakwö, jojodö ajayinö wajwitjina wenema, Aaa, waisadösa, jö̧ba̧lö kwomukwataduwapji jö̧ba̧lö. Israel jojodötjö, ba̧jekwadö tjuu 'dibadö ja̧nö Diosnö tjöpöjödijayonö, ba̧kwȩlöjatebödama tjöpöjödökena, ju'winö tjösödakwedö chömöledö. Ja̧danö, Israel jojodöböködötjö, Diosnö tjösödakwedö tjuju̧kwobe. Jobadö Israel jojodöböködötjö tjösödakwedö okobe deinö tjösödenanö baibanö, tjöpöjödakwedö Israel jojodöma.

Romanos 15:14

Chömöledö, chedemi kwömöledöduwinö ida̧ökö otiwanö ösödadöja, ja̧danö chedemi ida̧ökö waisadöja ökwödönö yötawaja̧ma. Ja̧danö, chedemi ida̧ökö waisadöja biya̧ jawa ju'wedönöbi yökawaduwo jö̧ba̧lö.

Romanos 16:25

Jau chömöledö, Diosnö dösödaduwo, Ökwöma juluwo̧ja, jö̧ba̧lö. Jo̧bada juluwo̧ ökwödönö ujulu iyo jö̧ba̧lö, jwaikwöda Jesucristonö ösödö kwö̧jaduwobö. Jejenö yötawobe, otiwa jawa wene yötawenama. Otiwa jawa wenema biya̧ chömöledö, Jesucristo jawa wene. Ja̧ wenema ajayinö jojodö wajwitjina wene chömöledö,

1 Corintios 11:4

Ja̧danö, jejenöobetjö̧, baikwö yötawa: Ju'wedö Cristonö ösödadökwö ko̧ko̧kwö tjö̧bajenama, bakwo̧ iteda uu muchekwö Diosnö aebitjö̧bi, ja̧danö iteda uu muchekwö Dios iwene yöawitjö̧bi, iteda uluwo̧ Cristonö sulabenö tjomukwatobö ja̧bo̧ ichejekwa.

1 Corintios 12:28

Ja̧danö, okobe deinö iteda ömöledö, Cristo iteba'obedönö otidö ujuninobe Diosma, baikwö yötawa: Abönö Jesús webawedönö ujuninobe, ikenama Dios yöawi̧ yöbawadönö ujuninobe, ikenama Jesúsnö ösödadönö ba̧ja̧dadönö ujuninobe, ikenama jojodö edajitjökö jawa ja̧badönö ujuninobe. Ikenama jojodö tjö'wöchi̧ otidö lobadönöbi, ja̧danö jojodönö pjabatadönöbi, ja̧danö luwedö baibanö otidadönöbi, ja̧danö ju'wedö tjiwenenö yöba̧ladönöbi ujuninobe.

1 Corintios 13:1

Ötjöma okobe deinö jojodö tjiwenebi, ángelesdö tjiwenebi okobe jwiinö tjiwenetenia otiwanö yöta̧lena. Jo̧kwaijayonö jejenö tjiwenetenia yöta̧lijayonö, ju'wedönö ösödakwabikwawökönö ja̧nö chö̧jitjö̧ma, chö̧ji̧ma mikwawökena chömöledö. Ja̧danö wanedö yötawa, yötawi̧ okwa jawa jwiobetjö̧, sule campanadanö, 'dii̧ jawatjö kwatji̧ ökwöi̧danö chichejekwena chömöledö.

1 Corintios 13:3

Ja̧danö, okobe jwiinö chujuna̧li̧ma a̧'dȩlökönö iyö lotena jwibadönö pjabatö, ja̧danö chiteba'o Diosnö juwö iyawa'o baibanö chiyawena, jo̧kwaijayonö ju'wedönö ösödakwabikwawökönö jejenö ja̧titjö̧ma, ja̧ti̧ma mikwawokobe ötjönöma chömöledö.

1 Corintios 13:8

Jau chömöledö, jojodönö ösödabikwawö ja̧kwawama 'dö̧ibökakobe, böjȩnö ja̧nöbi, mölejȩnö ja̧nöbi dömöledönö ösödabikwawö dö̧jakobetjö̧. Jo̧kwaijayonö jejenömaökö ju'wi jaye ja̧bö dö̧jo jö̧ba̧lö Dios ökwödönö iyi̧ jawama chömöledö. Dios yöawi̧ yöawakwawama 'dö̧ibakobe, ja̧danö ju'wedö tjiwenenö yöawakwawabi 'dö̧ibakobe, ja̧danö waisakwawabi 'dö̧ibakobe chömöledö, böjȩnö dö̧jayida ja̧bö dö̧jobö Dios ja̧ iyobetjö̧.

1 Corintios 14:29

Ja̧danö, Dios yöawi̧ yöbawadöma bakwo̧nökwena yötjawo, du̧ju̧tajaena, wa̧medukwaena bakwo̧nökwena yötjawena. Ja̧danö yöbawo̧ yöawonö, ju'wedöma tja̧ja̧kwo, jweinö yöawojobö jö̧ba̧lö.

1 Corintios 14:39

Jau chömöledö, Dios yöawi̧ yökawaduwoböma jwiinö kwösödaduwo, ja̧danö ju'wedö tjiwenenö yöa̧lakwawa öpöjödökönaduwi, yöba̧lökönaduwi jö̧ba̧lö.

1 Corintios 14:4

Ju'wedö tjiwenenö yöba̧lo̧ma, iteda o̧'wo̧ luwo̧nö da̧pedö yöba̧lo̧ ichejekwa, jo̧kwaijayonö tjöwaisi̧ tjiwenenö Dios yöawi̧ yöbawo̧ma okobe deinö Jesúsnö ösödadönö pjabato̧ chömöledö.

1 Corintios 15:51

Ja̧danö, baikwö yötawaduwakwö ajayinö jojodö wajwitjina jawa chömöledö. Ökwödö Jesúsnö ösödadötjö ju'wedöma böjȩtjö wodökena chömöledö, jo̧kwaijayonö okobe deinö döbalewachinö ja̧akwo̧ Diosma.

1 Corintios 16:22

Duluwo̧nö ösödö̧kö̧ma, Dios lȩebakwo̧ jo̧bama. Duluwo̧ Jesúsnö ateba, Chuluwo̧ juluwanö ökwödönö emö kwicho jö̧ba̧lö.

1 Corintios 4:1

Chömöledö, ötjö Pablonöbi Apolosnöbi baikwö kwomukwataduwo, Cristo ömöayedö jö̧ba̧lö. Jau chömöledö, Cristoma ökwödönö iteda ömöayedönö ujuninobe Dios jawa jojodö ajayinö wajwitjina jawa wene te'ada̧ladö badibanö, ju'wedönö okwa jawa labebö lobö yödawo jö̧ba̧lö.

1 Corintios 7:19

Jau chömöledö, bakwo̧ ötade bajalesado̧ 'wibekwo̧ ö̧jitjö̧böbi, 'wibekwö̧kö̧ ö̧jitjö̧böbi, bakweminö 'ya̧, tjötade bajalesado̧ 'wibekwö loawama mikwawokobetjö̧. Jau chömöledö, Dios wei̧ a̧ja̧kwö ja̧awada mikwawi̧ma, tjötade bajalesado̧ 'wiekwamaökö.

1 Corintios 8:4

Ja̧danö, baikwö yötawa ju'wedö tjösödawö̧ o̧'wo̧ jawa iyawa kwakwawa jawama, ja̧ kwakwawa dukwojobö dukwokojobö jö̧ba̧lö. Ökwödöma döwaisobe, o̧'wo̧ jawama, Diosbö̧kö̧ jö̧ba̧lö. Ja̧danö, Diosma bakwo̧da, jelo̧ma deobe jö̧ba̧lö döwaisobe chömöledö.

2 Corintios 12:11

Chömöledö, isabenö bakwo̧ wame jawa omukwato̧ yöa̧li̧danö yöta̧lajabe chömöledö, jo̧kwaijayonö jejenö yöta̧li̧ma ökwödöda jejenö yöta̧lobö ja̧binadöja chömöledö. Jau chömöledö, ötjöma Jesús ömöayo̧ otiwo̧sa jö̧ba̧lö yötawokonö, ökwödöda yöka̧laduwo jö̧ka̧linaduwobe, Pabloma ju'wedö inesö Jesús webawedödanö bakwainö jo̧, jobadötjö ja'yubebi baikwönönö bö̧kö̧ jö̧ba̧lö yöka̧laduwo jö̧ka̧linaduwobe. Jau chömöledö, ötjöma mikwawö̧kö̧chijayonö, ju'wedö Jesús webawedödanö bakwainö bo̧sa, baikwö yötawa:

Gálatas 5:16

Baikwö yötawaduwakwö chömöledö: Dios O̧'wo̧ Luwo̧ yöawi̧danö ja̧bö kwö̧jaduwo, sulabenö kwösödaduwi̧ jawa ja̧bökönö.

Gálatas 5:22

Jo̧kwaijayonö Dios O̧'wo̧ Luwo̧ do̧'wo̧ luwo̧nö otidi̧ma wainö ji̧ chömöledö. Baikwö yötawa: Dios O̧'wo̧ Luwo̧ otidi̧ma chömöledö, biya̧: ösödabikwawi̧bi, tjo̧'wo̧ ösöwi̧bi, tjo̧'wo̧ luwo̧nö wene jwiinö ja̧kwawabi, tjo̧'wo̧ 'dibachibö ja̧kwawabi, jojodönö dösölö̧jinö ja̧danö otiwanö ja̧awabi, jö̧tja̧li̧danö ja̧awabi,

Efesios 3:4

Ja̧danö, böjanö chiwȩyudaja̧ eda̧lö kwöwaisachibaduwakobe, Aaa, Pabloma Dios ajayinö tojö junö omukwatina waiso̧, jö̧ba̧lö.

Efesios 6:19

Chömöledö, ötjönöbi akebaduwo Diosnöma, ötjönö öba̧ja̧da̧lo, iteda iwene yötawena otiwanö yötawakobetjö̧. Akebaduwotjö yebabökönö yötawakobetjö̧, jojodö otiwanö tjöwaisachibobö Dios iwene, otiwa jawa wene, ajayinö tojö ujunina wenema.

Colosenses 1:26

Jau chömöledö, Dios la'akatjöda tojö ujunina wene yötawobe. Ajayima Diosma ja̧ wene tojö ujuninobe chömöledö, jo̧kwaijayonö babema iteda ömöledönö i̧sebinobe.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

1 Juan 4:8

Chö̧ja̧wo̧dö, Diosma jojodönö ile nibeböda jo̧. Jo̧kwaobetjö̧ Diosnö waisadö, jo̧bakwö dötewinö 'ya̧döma, Diosma jojodönö ile nibeböda jo̧, jö̧ba̧lö, tjö̧ja̧wo̧dökwö ösödabikwawö ju̧kwadö. Jo̧kwaijayonö bakwo̧, ö̧ja̧wo̧dönö ösödökönö jo̧ma Diosnö wajwibo̧. ¿Dakwö öwaisena Diosnö ö̧ja̧wo̧dönö ösödökönö ö̧jitjö̧ma? Diosnö öwaisitjö̧ma, Diosma jojodönö ile nibeböda jo̧, jö̧ba̧lö, ö̧ja̧wo̧dönö ösödö ö̧jena.