Matthew 6:13 - Wik-Mungkan

¹³ Nint weekān nganang oony way alantaman, aꞌ kalān nganang woyan way anpalan ngan yipam way keꞌ yumpān. Yey, piipa, anman kan.’ ”

Matthew 6:13 Iomraidhean Croise

Matthew 26:41

Aꞌ nil Jesus.an thaw ngul thant, “Niiy aak thath-thathāna. Meeꞌ-wuthanamān God.anta, niiy keꞌ yipam ngeeyān oony wayana, way keꞌ yipam yumpān. Puth niiyan kaangk min iiy-iiyāna, puth thaaꞌ-puyan kan-ngul eenchaniy aꞌ way ngul iiy-iiyaniyweya.”

Matthew 28:20

Thaaꞌ-aath-aathān thanang wik min anangan ngeey-ngeeyayna aꞌ ngangkangam piꞌ-piꞌayn ngul wik anangan ngayan waaꞌ-waaꞌang niiyantana. Aꞌ ngay niiyantang angman ngul iiy-iiyānga, aak imanaman ngula, aꞌ aak-aakanakaman aak inan minchowana.”

Matthew 5:37

Yaa, niiy anman thawān, ‘Eeꞌa’ or ‘Yaꞌa,’ anman kan. Wik wiy anangan puth oony way piꞌan alantaman. Too wantān thanang.

Matthew 6:10

Ngan kaangk nint moom wuut piꞌan iiyān ngant pam wanch yotamantana, ngan yipam maꞌ nungkarang wunāna, maꞌ wiyantang yaꞌa. Ngan kaangk pam wanch maꞌmangkamangan wik nungkaraman ngeeyayn, aꞌ woyan min koochanam nungkaram anman wak-wakayn, keꞌ than ngaantiyongk al-alangan wik nungkaraman ngeeyantan aak in kenyan.

John 17:15

Piip-ang, ngay nungk keꞌam thawangan puy thechathān thanang pam wanch wiy way al-alantaman, yaꞌa, ngay inan nungk ep thawāng nint min-minam piꞌ-piꞌān thanang oony way piꞌan alantaman, nil keꞌ yipam wayathow thanang.

1 Corinthians 10:13

Niiy wiyiya nath ngaantam-ngeey-ngeeyān way yumpanakan. Puth niiy thonakam yaꞌa. Nathpalmana, in-inman pam wanch puk yotamangan ngaantam-ngeey-ngeeyantan way yumpanakan, way wiy-wiyam thakan yumpanakan. Puth inan thamp ngaantam-ngeeyāna: nil piip God.an piꞌan paththam, aꞌ nil kan-kanam minam ngul maꞌ-aath-aathow niiyangan keꞌ nil keenkanaman thaw. Niiywey nath ngaantam-ngeey-ngeeyin way yumpanakan-a, nil God.anganiya ngangk thayanathow niiyang, niiy yipam way anangan thaamp-thaampān thanang. Nil ngul maꞌ-aath-aathow niiyang niiy keꞌ yipam wayamān.

1 Corinthians 14:16

Niiy nath wik thaaꞌnganth wiy-wiyam Ngeen-Wiy Min God.antam alantaman waaꞌ-waaꞌin churchangana, God.an yipam thaaꞌ-kuump-kuumpān nunanga. Puth than pam wanch wiyangan nath wikan kum-kumiythanwey-a, an puth than want-wanttake “Eeꞌan” thawiythan e? An yaꞌa, “Eeꞌan” keꞌ thaw-thawiythan than puth wik anana keꞌ meeꞌmiyweya.

2 Corinthians 1:20

Aak keenkanaman-a, nil piip God.angan-a, maꞌ-yotam kaaꞌngak nil nhengk nungantaman kuchow Christ.an aak iikanak pekan. Aꞌ nil Christ wamp ngulan-a, an nil meenath ngampar ngul nil keꞌaman wik uuyam, yaꞌa. Yaa, ngamp thaaꞌ-kuumpāmp nunang aꞌ thawāmp, “Eeꞌa, an kan-kanama. Nil kuch nunang keꞌ nilaman kaaꞌngak.”

Galatians 1:4

Nil Christ.angan theetath nungamang yipam uthamow way ngamparamakana nil puth piip God.an thawanta nil uthamowana. Ngamp way anman kuyam yump-yumpampa, puth yimanang ngulana nil Christ.angana thayanathan ngampang minan iiyāmpa ngamp yipam keꞌ iiyāmp wayana keꞌ anangana thana way paththam iiy-iiyantan than puth keꞌaman yippak meeꞌmiy nunang God.ana.

1 Thessalonians 1:10

Puth yimanang ngulana niiyan nhengk God.antamakan kuup-kuupaniy, Jesus.anta, nil aak inpal kenyan-a, palam ngul ukow. Nil piip-kunchang God alangan kaꞌathaman mulaman ekath nunanga. Puth nil God.an man kul ngul wampow thant pam wanchant wayan yump-yumpantan. Nil puth Jesus.angan ngul kaaꞌ-piichanathow ngampang, nil piip God.ana keꞌ-ngul yipam man kul wampow ngamparan.

2 Thessalonians 3:3

Nil Lord.an moom ngamparam yotamantama nil anman iiy-iiyan niiyantangan. Nil ngul thayanaman piꞌow niiyang, aꞌ nil ngul minaman piꞌow niiyang, niiy oony way alantaman yipam wik keꞌ ngeeyāna.

1 Timothy 1:17

Ngamp God.an ngaantam-ngeey-ngeeyāmpana! Nil puth maꞌmangkamana maꞌ nilam piꞌ-piꞌan; nil moom piꞌan paththam wun-wunan, nathpalmana, in-inmana, puth ngulakam wun-wunow a! Nil keꞌ uthamiy, yaꞌa, nil aak umpuyam yaamakam wun-wunow. Ngamp keꞌ thathimpana, meeꞌ ngamparam il-ilangan yaꞌa, nil aak yaꞌ yimanangan iiy-iiyana. Nil God thonam anman a! Thon yaꞌa! Ngamp yotangam thaaꞌ-kuump-kuumpāmp nunang, inpalman-a, ngulakam a! Yey, kan-kanama!

Hebrews 11:36

Puth wiyiya than pam wanch anangan than kaangk keꞌan Goda, thananiya thaaꞌ-thengkathin thanangwey aꞌ piikin thanang pam wanch God.antam anangan yuk whipang thak piik-piikin thanang putha wiyiya jailang thenchin thanang aꞌ maꞌa thaꞌ chainang kathin thanang wallang angman.

1 Peter 5:8

Oony way piꞌan ngul wamp niiyant maꞌ-pil-wayathiy niiyang. Puth nil pal-puy thath-thathana, wenk-wenkana, nil yipam mamow niiyang nungantang yipam iiy-iiyān keꞌ minh kulliy yimanangan mayak wenk-wenkan. Yaa, niiyana kon kenyangk wun-wunāna aꞌ meeꞌ weꞌ-weꞌar thamp iiy-iiyāna.

2 Peter 2:9

Yaa, putha ngamp anpalana ngamp meeꞌmiy ngul nil God.angan maꞌ thayanang piꞌ-piꞌan ngampang pam wanch anangan wik nunangan ngeey-ngeeyanampa. Aak way nath wampow ngamparwey-a, an nil ngul kaaꞌ-piichanathow ngampang keꞌ nilan Noah.ang pul Lot.angan kaaꞌ-piichanath. Puth than pam wanch anangana wayan iiy-iiyantan-a, nil piip God.angan way-wayathow thanang, aꞌ putha um nungantangan thanathow thanang, aꞌ aak wayak ngul kuchow thanang aak nungantam anpalan.

1 John 3:8

Nil puth weeꞌangan wayan yump-yumpiy-a, an nil oony way piꞌan ngangkangana piꞌ-piꞌan nunang, nil puth oony piꞌan Satan.an-a, nathpalman keenkanam anpalman way anman yump-yumpana. Nil puth nhengk God.antaman aak iikanakan uk, yipam wayathow work nungantaman oony way piꞌan alantamana.

Revelation 1:18

Ngay man-yetham anman iiy-iiyānga! Ngay mul kan wunangana, puth yimanangana ngay man-yetham aak umpuyam ngul wun-wunang! Ngay moom piꞌan thanttam pam wanch al-alantaman kanaman mul wunin. Ngay ilangan thanang pam wanch way anangan aak wayakan kuchang thanang.

Revelation 19:1

Aꞌ anpalaniy-a, ngay wik ngeeyangan keꞌ pam wanch puk thaaꞌ-wantanam yimanangan aak in keny heavenangan thaw-thawin. Thanan othamayanan thaw-thawina, “Ngamp God.an thaaꞌ-kuumpāmp nunanga! Nil ilangan kaaꞌ-piichanathan ngampanga! Nilam thonam thayan paththam aꞌ putha min-minam paththam thampa!

Revelation 19:4

Aꞌ than pam wuut manth-thayan twenty-four anangana puth pam four keꞌ minh anangan-a, thaniya aakang keekin aꞌ thaaꞌ-kuumpin nunang God.an, nil anman chair wuut piꞌanangan nyiin-nyiina. Aꞌ thanan thawin, “Yey, kan-kanama! Ngamp thaaꞌ-kuumpāmp nunang Goda!”

Revelation 2:10

Aak wayan ngul wampow niiyanta, puth niiyan keꞌ winynyang moꞌān. In ngeeyāna! Nil oony way alangan ngul thaachow thanang pam wayanang al-alangan mamayn niiyang wiy anangan aꞌ aawuch thaaꞌ-ngathanam angan thenchayn niiyangwey kinch ten aakanakaman wun-wunān. Nil oony way alangan paathow niiyang, niiy yipam eenchān ngul woyan min ngatharam anpalana. Puth niiyana kan-kanama monkan-wakān ngayangana, ngayang anman ngaantam-ngeey-ngeeyān. Nungkway than keꞌ niiyangan mulathaynwey-a, niiy anman ngayang monkan-wak-wakāna! Niiy yimanangwey iiy-iiyanan-a, niiyana man-yetham anman iiy-iiyān aak ngatharamanganiya aꞌ ngayana min paththam iiyāng niiyant.

Revelation 21:4

Nil meeꞌ kam ngul eꞌathow meeꞌ thanttam anpalana. Aꞌ pam wanch puk manyiy keꞌ-ngul uthamayn yaꞌa, thananiya keꞌ-ngul ngangk wayan iiyayn an yaꞌ-ngul, aꞌ thanana keꞌ-ngul peeyayn yaꞌa, aꞌ putha thanang keꞌ-ngul weechow aꞌ keꞌ-ngul thaaꞌ-eenchayn thamp, puth kaꞌathaman aak wun-a, an yaꞌ-ngul kanam minch.”

Revelation 3:10

Ngay kaꞌathaman thawangan niiyant niiy anman monkan-wak-wakān ngayanga, aꞌ keꞌ eenchān ngatharaman, aꞌ anpalaniy-a, niiy ngayangan keꞌam wantan, aꞌ niiy wik anangan ngeeyana -- aꞌ ngayana thamp niiyang ngul maꞌangam piꞌ-piꞌāng niiyang. Aak wayan ngul wampowa pam wanch yotamantan aak umyompanamantan. Ngayan ngul thathāng pam wanch weeꞌ-weeꞌanangan kan-kanaman monkan-wak-wakantananya. Aak an-aniyangan-a, ngayana ngul maꞌ keeꞌ-enchāng niiyanta, niiyan keꞌ yipam woyan wayan wakāna.

Revelation 3:14

Aꞌ anpal ngul.ana, nilan ngathar thaw wik inangan Ngeen-Wiy Min God.antaman latang umpān ngaantiyongk alantan church aak Laodicea.an piꞌ-piꞌana, nil yipam waaꞌow thant pam wanch al-alantan: “Ngay inan wik kuchang niiyanta. Ngay ep wik God.antaman kan-kanam paththaman waaꞌ-waaꞌangan niiyant, wik thonangan yaꞌa, puth wik anman. Aꞌ aak in umyompanamana ngan piip God.ang yumpan aꞌ yuk way min maꞌmangkaman thampa.

Revelation 5:13

Anpalaniya, ngay yotam anangan ngeeyangan thanang aakan path-pathin, than pam wanch maꞌmangkaman aꞌ minh thaka, aꞌ minh ngaꞌ thakan aak heavenang-a, aak ingana aꞌ puth aak pal pekamana, aꞌ puth ngak thompangana. Than yotamangan aak path-pathin: “Ngamp nunang anman thaaꞌ-kuump-kuumpāmpan, pam nilan chair piꞌanangan nyiin-nyiinan. Aꞌ puth pam anan keꞌ lamb anan thaaꞌ-kuump-kuumpāmpan. Ngampana min anman waaꞌ-waaꞌāmp pulangan! Ngampan puth anman min paththam waaꞌāmp pulang! Puth pulan min paththam aꞌ pam karangk aꞌ pam piꞌan thamp.”