Matthew 23:5 - Wik-Mungkan

⁵ Puth thananiya kaangk pam wanch wiyangana thanang anman thath-thathayna, aꞌ ngaantam-ngeeyayn thanang than keꞌ pam min yimanangana, puth yaꞌa, than min yaꞌa. Thananiya wik God.antaman lat piꞌanang umpantan aꞌ yuk box manyang thenchantan ngul, aꞌ kuuyang kathantan, box manyana, aꞌ ngul-ngangkang thanttamangan kathantan ngul, puth maꞌ punthang thakan, than yipam pam wanch wiyangan thath-thathayn thananga. Aꞌ putha ngook min ongk thamp ngoonchantan, fringe thampweya, yipam pam wanch yotangana thathayn thanang.

Matthew 23:5 Iomraidhean Croise

Matthew 9:20

Nil wanch thonam angmana, nil wewmangan want-want nunang kaap twelve.akamana. Nilan puth koy-koyyuw iiy Jesus.antang, aꞌ thaw nungantakaman, “Ngay ngook nungantam inan maꞌang mamānga, ngay yipam miyal ngul weenānga.” Aꞌ nil ngook nungantaman mam ngul.

Luke 16:15

Nil puth Jesus.an thaw ngul thant, “Niiy thaw-thawaniy thant pam wiy al-alantan niiy keꞌ pam min paththam iiy-iiyaniya, an yaꞌa, nil puth piip God.angan ngangk niiyantaman kan thath-thathana. Than pam wanchangan nath thaaꞌ-kuump-kuumpiythan niiyangan-a, puth niiy meeꞌ God.antangan min keꞌam iiy-iiyaniya, yaꞌa.

Luke 20:47

Than yuk way min wukalongk al-alantaman maay-maayantan aꞌ kenth-kenthantan thanang aawuch thanttam anpalan, yipam than ngul wunayn. Aꞌ putha thanana yaam anman meeꞌ-wuth-wuthanamantan pam wanchangan yipam ngeey-ngeeyayn thananga. Nil God.angan kan-kanam paththam ngul wayathow thananga.”

John 12:43

Than pam piꞌ-piꞌanam Jews.antam al-alangan puth kaangk than pam wanch wiyangan min waaꞌayn thanang, than puth keꞌam ngaantam-ngeeyin nil God.angan nath min waaꞌow thanang, nath yaꞌa.

John 5:44

Niiy puth niiyantakaman ep thaaꞌ-kuumpwuniya. Niiy puth kaangk keꞌ nil God.angan thaaꞌ-kuumpow niiyang ey? nilan God thonam anman thonakama! Niiy wanttak thayanathwuniya niiy kaangk keꞌ God.an ngangkangan piꞌ-piꞌāna?

John 7:18

Nil pam weeꞌangan wik nungantam anangan thaaꞌ-aath-aathow thanang-a, an nilana kaangk than yipam wiyangan thaaꞌ-kuumpayn nunang. Puth nil weeꞌangweya kaangka pam wanch wiyangana pam thonanganana thaaꞌ-kuumpayn-a, nilan kuch nunang ukow aak iikanakan-a, an nil pam koyꞌa aꞌ man-thonam iiyow, keꞌ wik uuyamow thakan, yaꞌa!

Philippians 1:15

Wiyangana ngangk pal pekkuwaman wik Jesus Christ.antaman waaꞌ-waaꞌantan, thanan puth kaangk piip God.ana ngangk min yumpayn nunang, aꞌ puth ngayang thamp. Than puth meeꞌmiy nil God.angan work inan theeꞌ ngatha, wikan engkanathāng Jesus.antaman, puth than kaangk ngathar, aꞌ putha than kaangk wik min Jesus.antaman waaꞌ-waaꞌayn thama. Puth pam wanch wiy anangana, meeꞌ-wuntan ngathara. Than wik min Jesus.antaman waaꞌ-waaꞌantan-a, than thawantan keꞌ than ngaantam-ngeeyantan nunang Jesus.an, puth yaꞌa, than thanttakam anman ngaantam-ngeey-ngeeyantan, an puth thanana piꞌan yumpwuntana. An than keꞌ ngangk way yumpiythan ngayang, aak inan jailangan wunanga, aꞌ kuchek way thaman yumpiythan ngayang.

Philippians 2:3

Niiyana niiyantakaman thonakam keꞌ ngaantam-ngeey-ngeeyāna, aꞌ niiyan piꞌan keꞌ yumpwun niiyantakam. Niiy keꞌ ngaantam-ngeeyān keꞌ niiy minan iiy-iiyaniya, aꞌ puth wiy anangan keꞌ yaꞌana. Niiyiya putha pam wanch wiy anangan minam ngaantam-ngeeyin thananga,

2 Thessalonians 2:4

Aꞌ yuk ngeen-wiy anangana pam wanchangan thaaꞌ-kuump-kuumpantan-a, an nil thaampow thanang. Nil nungamangan keꞌ wuut piꞌan yimanangan waaꞌow, nil God-a, aꞌ puth-a, oony way anangan-a, keꞌ yaꞌa. Aꞌ nil pek ngoonchow aawuch God.antamangan aꞌ angman nyiinow aꞌ nil thaaꞌ-kuumpow nungantakaman aꞌ nil keꞌ God waaꞌow nungantakam.