James 2:5 - Wik-Mungkan

⁵ Ngurp ngatharam niiyalang, niiy wik ngatharam inan ngeeyāna: pam wanch yotangana piip God.antan ngangk theeꞌin-a, than anangan-a, maꞌmangkiy yaꞌa. Kanaka than maꞌmangkiy yaꞌwey aak in pekan-a, puth nil piip God.ang miꞌ thanang puk nungantakam iiy-iiyayn aꞌ putha than ngangkangam piꞌ-piꞌayn nunang. Nil wik inan kaaꞌngak thant pam wanch than weeꞌ-weeꞌanangan kaangk wuntan nungant. Nil ngul minam piꞌow thananga aꞌ puth than ngangk aak umpuyam wun-wunayn nungantang aak ing kenyana.

James 2:5 Iomraidhean Croise

Matthew 11:5

pam wanch meeꞌ koꞌanch anangana koyam meeꞌ min iiy-iiyantan; pam wanch kunpan wunin-a, minam ngul iiy-iiyantan; pam wanch peꞌan wenchathiyana, kempana min ngul ween thant, pam wanch kon wal weenthan iiy-iiyin-a, an yaꞌ-ngul, puth kon minang ngul ngeey-ngeeyantan; pam wanch uthaminan-a, an man-yetham ngul iiy-iiyantan, ngay mulaman ekathang thanang, aꞌ putha ngayana wik min piip God.antam anangan waaꞌ-waaꞌang thant al-alantan, pam wanch wukal keꞌanangan-a, pam wanch kaangk-keꞌanangan-a, puth pam wanch ngangk way thampan iiy-iiyantanweya.

Matthew 25:34

“Ngul anpalana, ngay pam wanch maꞌ malangan than-thantana thawāng thant, ‘Awey! Niiy pal iiyāna! Nil piip ngatharamanga ngangk min yumpan niiyanga. Aak keenkanamana, nil aak inan yump-a, nil God.angana wik yump nilaman maꞌ nungantangan piꞌ-piꞌow niiyanga aꞌ puth-a, aak nungantamak kalow niiyangana. Puth inpal ngulana, niiyan maꞌ nungantang ngul wun-wunāna.

Matthew 5:3

“Niiy wiyiya niiyantakaman meeꞌmiy niiy min yaꞌa, niiy puth niiyamana min keꞌ iiyina. Yaa, an puth niiyaniya ngangk minangam ngul iiy-iiyānweya. Nil puth God.angan ngul kalow niiyang aak nungantamakan, angman wunān nungantanga.

Mark 7:14

Aꞌ nil Jesus.angana pam wanch yot anangana ump thanang nungantangan thinth wampayn, aꞌ nilan thaw thant ngul, “Niiy wik inangan ngeeyāna! kuchekangan piꞌāna!

Luke 12:21

Aꞌ nil Jesus.an thaw thant, “Wik kath inaniy yimanangan wunan a! Niiy weeꞌ-weeꞌanangan yuk way min yot yal-yalmathaniy niiyantakaman-a, an niiy keꞌ pam maꞌmangkiy yimanangan iiy-iiyaniy, puth niiy wiyant yuk way min keꞌam theeꞌ-theeꞌaniy, yaꞌa, aꞌ niiy God.an kon-ngath-ngathaniy nunang. An puth meeꞌ God.antangan min yaꞌa.”

Luke 12:32

“Niiyiya pam koꞌalam thonakama, yotwey yaꞌa. Niiy puth keꞌ winynyang moꞌāna, puth ngul-ngulana God.angan ngul miꞌow niiyang yipam moom iiy-iiyān nungantang.

Luke 16:22

“Anpalana, nil pam Lazarus.an utham ngul aꞌ than ngaantiyongk al-alangana kalin nunang Abraham.antang yipam wun-wunow aak ing kenyan. Amanamaniya nil pam maꞌmangkiyan ngul utham aꞌ than kaampin nunang ngul.

Luke 16:25

Nil puth Abraham.an kan-ngul thaw nungant, ‘Nint inan ngaantam-ngeeyāna: nint earthangan yippak wun-wunan-a, nint way min min-miniy yot piꞌ-piꞌana. Puth nil Lazarus.antana aak way thak wamp-wamp nunganta, nil may minh keꞌananga, aꞌ way min keꞌananga wun-wunweya. Yaa, nil inan ngangk min-minangam ngul wun-wunana, puth nintaniya ep thaaꞌ-eench-eenchangan ngula.

Luke 22:29

Piip ngatharamangana moom piꞌan yumpanya, an yimanangana ngay moom piꞌan yump-yumpāng niiyang thampa.

Luke 6:20

Nil Jesus.angan thath-thath thanang ngurp nungantam anangan, aꞌ thaw thant, “Niiy wiy inanganiya wukal keꞌanangan iiy-iiyaniya. Yaa, an puth niiyaniya ngangk minangam ngul iiy-iiyānweya, nil puth God.angan ngul min-minam piꞌ-piꞌow niiyang, maꞌ nungantangana.

John 7:48

Ngul pam piꞌ-piꞌanam ngamparam al-alangan wik nungantaman ngeey-ngeeyantan ey? Ngul ngan Pharisees il-ilangan ngeeyān nunang ey? An yaꞌa! Ngan keꞌ wik ngeeyin nungantaman a!

Acts 7:2

Aꞌ nil Stephen.an thaw, “Kuunch ngatharama niiyalang aꞌ puth piip ngatharam niiyalang, niiy ngeeyān wik ngatharamana. Nil God.an-a, min paththam aꞌ piꞌan paththam, nilan wamp nungant wuut mangk ngamparam Abraham.antana, aak Mesopotamia.angana nil keꞌan yippak aak Haran.akan iiya.

Romans 8:17

Eeꞌa, ngamp puk nungantam ngul iiy-iiyanampa, an ngampiya ngul uwāmp way min min-miniy anangan nil God.angan theeꞌow Jesus Christ.antan aꞌ ngampar thamp puk nungantamakana. Than pam wanch anangan way-wayam paththam iiy-iiyin nungant Jesus Christ.antan aak ingana. Than ngampar thamp way iiy-iiyantan puth ngamp Christians iiy-iiyanampa. Amanamana, ngamp aak minang God.antamang wun-wunāmp karpam nungantang Jesus.antanga.

1 Corinthians 2:9

Puth than keenkanamana wik God.antam inangan waaꞌin lat ngench thayanangan: “Than weeꞌ-weeꞌanangan God.antan kan-kanaman kaangk paththaman wuntan nungantan-a, nil minam paththam ngul iiy-iiyow thanta. Ngamp kaꞌathaman keꞌaman yippak thiichamp nunang God.an nil want-wanttakan min-minaman iiy-iiyow ngampar, aꞌ keꞌam ngeeyamp yippak, keꞌam thathamp thaka, aꞌ keꞌam yippak ngaantam-ngeeyamp. An puth nilam God.angan nathpalman ngaantam-ngeey nungantakamana nil minan iiy-iiyow ngamparana.”

2 Corinthians 4:15

Ngan puth work thaꞌiy iiy-iiyanan, aꞌ than wiyanganiya way yump-yumpin nganta, an puth kana, than makam way yumpin ngant, puth nganan kaangk niiyan monkan-wakān nunang Christ.ana. Than yotangaman monkan-wakiythan nunang Christ.an-a, an puth yotamana thankyou thawiythan nungant God.antan, aꞌ putha thaaꞌ-kuumpiythan nunang nil puth wuut piꞌan paththam aꞌ putha min-minam paththam iiy-iiyan thanta.

2 Corinthians 6:10

Wiyiya ngan ngangk way iiy-iiyanan, puth an-aniyangan thamp ngan ngangk minangam iiy-iiyanan. Nganiya wukal many thonakam piꞌ-piꞌananwey, aꞌ puth-a, yuk way min koꞌalam anman piꞌ-piꞌananwey, nganwey maꞌmangkiy yaꞌa, puth nil Ngeen-Wiy Min God.antam alangan ep keꞌ maꞌmangkiy yumpan nganang yimanangan, yuk way min yaꞌa, in nil-nil iniya. Aꞌ nganiya maꞌ-yotam ngangk min yump-yumpanan thanang pam wanch wiy anangan puth ngan wik God.antaman waaꞌ-waaꞌanan thant.

2 Corinthians 8:9

Puth niiy kan meeꞌmiy nil Lord Jesus Christ.an ngangk minangam paththam iiy-iiyan ngampar. Nil maꞌmangkiy iiy-iiy aak heavenangan wun-wuna, puth nil aak earth iikanakan uk-a, an nil keꞌ pam maꞌmangkiy yaꞌ-ngul ween. Puth anpalana, nil God.an ngangk minangam iiy-iiyan ngampar aꞌ kalow ngampang aak umpuyam yipam wunāmp nungantang.

Ephesians 1:18

niiyan yipmam kan-kanam meeꞌmiy nunang God.an. Aꞌ ngay meeꞌ-wuthanamang nungant niiy yipam meeꞌmiy nil kan-kanam kalow ngampang aak nungantamak, nil puth kan waaꞌ ngampang puk nungantaman. Ngay God.ant thamp thawang yipmam niiy meeꞌmiy aak nungantaman min ngul wunow ngampara. Nil piip God.ana min-minam paththam ngul iiy-iiyow ngampara, keꞌ nil keenkanaman kaaꞌngak nil minaman iiyow pam wanch nungantamaka.

Ephesians 3:8

Niiy nath ngaantam-ngeeyaniy ngayang keꞌ pam piꞌan God.antaman, puth yaꞌa, ngay pam keꞌ niiy yimanangana, pam piꞌan yaꞌa. Nungkway ngay pam piꞌan yaꞌ-a, nil God.angan work min inan waaꞌar, aak thon-thonakan iiy-iiyāng, wik min Christ.antaman waaꞌ-waaꞌāng niiyant Jews yaꞌ al-alantana. Nil puth Christ.an kan-kanam paththam kaangk wunan ngampar, nil keꞌ eenchiy, anman ngulakam kan-kanam paththam kaangk wunan ngampar.

1 Thessalonians 2:12

Puth nganan ngangk thay-thayanathan niiyang aꞌ anman thaaꞌ-aath-aathan niiyang, niiyan woyan min anman wak-wakān keꞌ nilam God.angan kaangk niiy wanttakan iiyān. Nil God.angan nungantak ump niiyang nilan yipam maꞌ nungantang piꞌow niiyang aꞌ puth niiy yipam thathān nil min paththam keꞌ nganth yimanangan park-parkan ngampar yotamantan.

2 Thessalonians 1:5

Inan meenathan ngampar nil God.an anman min paththam iiy-iiyana. Niiyan anman monkan-wakaniy nunang God.ana, keꞌ-paal than pam wanchang thaaꞌ-thengkathantan niiyang aꞌ kulakan wenkantan niiyant. Puth nil God.an kan-kanam min paththama aꞌ nil ngul thathow niiyang pam wanch min paththaman aꞌ nil kalow niiyang aak nungantangan wunān aak umpuyamana. Nil maꞌ nungantangan ngul piꞌ-piꞌow niiyanga.

1 Timothy 6:18

Aꞌ thawān thant thampa, maꞌ-yotam anman min iiy-iiyayn pam wanch wiyantan, aꞌ thaaꞌpin iiy-iiyayn, way min thakan theeꞌ-theeꞌayn thant, wiy al-alantan.

2 Timothy 4:18

Nil ngul kaaꞌ-piichanathow ngayang Lord.anga way yot anpalan aꞌ kalow ngayang minam aak nungantamakan in kenyana, nilan aak wun-wunan moom piꞌan paththamana. Puth ngampaniya keꞌ-ngoongkam anman thaaꞌ-kuump-kuumpāmp nunang, puth nilaniya min aꞌ wuut piꞌan paththama.

2 Timothy 4:8

Puth nanpalana nil Christ.angan yuk min paththama in kenyan piꞌ-piꞌan ngathar. Nil ngulan theeꞌowar aak an-aniyangan nil pam wanch um nungantangan than-thanathow, puth anpalan ngay minaman iiy-iiyang meeꞌ nungantangana. Nil min-min mep-mepow ngampang pam wanch yotamana, aꞌ min iiy-iiyow ngampar yotamant ngamp aakan thath-thathanamp nungantan nil palaman wampowa, an ngatharakam thonakam yaꞌa, puth pam wanch nungantam yotamantana.

Hebrews 11:26

Nil Moses alangana yimanangan ngaantam-ngeey, “Way min aak in punchanana an min meeꞌ ngatharangana keꞌam wunana yaꞌa. Ngayaniya pam wanch God.antam al-alantangan iiy-iiyāng -- in min paththam. Than pam wanch aak in punchanangan natha thaaꞌ-thengkathiythan ngayang putha piik-piikiythan ngayang, keꞌ than pam wanchangan ngul piikayn nunanga putha thaaꞌ-thengkathayn nunang pam anan nil God.angan kuchowan. Puth kana, than mak way yump-yumpayn ngatha, nil God.an min ngul iiyow ngathar aak min nungantamang ang kenyan.”

James 1:12

Aak wayan wampow ngampar-a, ngamp anman monkan-wak-wakāmp nunang piip God.ana, puth anpalaniya ngampaniya ngangk minangam ngul iiy-iiyāmp aꞌ anpalaniy-a, ngangk aak umpuyam wunāmp God.antangana. Nil God.angan wik inan kaaꞌngak pam wanch thant al-alantan than kaangkan wuntan nungant.

James 1:16

Ayyang, ngurp ngatharam niiyalang, niiy way-wayan keꞌ ngaantam-ngeeyān, nil piip God.angana keꞌam thaachan ngampangan way yumpanakana, an yaꞌa!

James 1:19

Ngurp ngatharam niiyalang, niiy kan wik inan ngeeyāna: ngampiya, wik God.antaman erkam paththam ngeeyāmp. Ngamp keꞌan nath ngeeyimp-a, an ngamp wiyan keꞌ thaaꞌ-aathimp thanang. Ngampaman wik ngeeyimp-a, an ep ngamp wik waaꞌimp thant wiyantan. Aꞌ ngamparaniy-a, man kul erkaman keꞌ wampow.

James 1:9

Ngamp wiyiy pam wanch God.an ngangkangan piꞌ-piꞌanamp nunang-a, maꞌmangkiy yaꞌa, puth wukal keꞌanangwey, puth kana, ngampiya ngangk minangam iiy-iiyāmp, puth nungkway ngamp wukal keꞌanangwey-a, nil God.angan ep ngampanga piꞌan thath-thathan.

1 Peter 1:4

Aꞌ ngamp meeꞌmiy nil God.angan minam piꞌ-piꞌow ngampang, aꞌ puth yota ngul theeꞌ-theeꞌow ngampar nilan in kenyan piꞌ-piꞌan pam wanch nungantamakana. Yotam in kenyana an kan-kanam min a! Keꞌ way-wayamantan, yaꞌa, minam anman wun-wuntan aak umpuyama.

2 Peter 1:11

Aꞌ puth anpalaniy-a, nil moom piꞌan ngamparamang Christ.angan ngangk minangam ngoonchathow ngampang aak nungantamangana, ngamp angman wun-wunāmp ngula, nil puth kaꞌathangaman kan kaaꞌ-piichanath ngampang. Aak anganiya nil min-min piꞌ-piꞌow ngampang aak umpuyangam.

Revelation 2:9

Ngay meeꞌmiy than pam wanch wiyangan way yumpin niiyant. Aꞌ ngay meeꞌmiy niiy wukal many tham, yuk way min koꞌalama, uuy yaꞌa, puth niiyana keꞌ than pam wanch maꞌmangkiy anangan paththam, yuk way min yotan piꞌantan, puth niiyan pam wanch God.antama. Ngay meeꞌmiy than pam wanch nal-nalangana wik way-way tham waaꞌantan niiyang -- than pam wanch nanangan Jews.an waaꞌwuntan, puth thanan woyan God.antaman keꞌam wakantan, than maꞌ oony way alantangan iiyantan!

Revelation 21:7

Nil weeꞌ-nathweya woyan ngatharam anman wak-wakiy putha keꞌan wantiy ngayangan-a, ngayaniy-a, min anman iiy-iiyāng nungant, ngayiya God nungantam iiyānga, niliya puk ngatharam iiyow.

Revelation 3:18

Puth ngay inan waaꞌāng niiyant: pal wampān ngathar aꞌ ngay niiyang thaaꞌ-aathāng wik God.antamana niiyan yipam kan-kanam thiichān woyan min nungantamana. An keꞌ niiyan yuk gold min paththaman piiyān ngatharamana. Aꞌ wampān ngathar, aꞌ engkān ngathar, ngayang yipam way niiyantaman kon-ngathowanya -- an keꞌ niiy ngook pach yimanangan piiyān niiyantakam yipam kangow niiyang, ngul-nyaaꞌama. Aꞌ pal wampān aꞌ wik ngatharaman min-minakam ngeeyān. An keꞌ niiy opar yimanang piiyān meeꞌakana niiyan yipam aak min-min putham ngulan thathān.