1 Peter 5:2 - Wik-Mungkan

² Niiy wuut manth-thayan il-ilanganiya piꞌ-piꞌān thanang Christians wiy anangan maꞌ niiyantangan wun-wuntan, keꞌ eench-eenchāna, ngangk minangam piꞌ-piꞌān thanang, keꞌ ngaantam-ngeey-ngeeyān wukal uw-uwānana.

1 Peter 5:2 Iomraidhean Croise

Luke 12:32

“Niiyiya pam koꞌalam thonakama, yotwey yaꞌa. Niiy puth keꞌ winynyang moꞌāna, puth ngul-ngulana God.angan ngul miꞌow niiyang yipam moom iiy-iiyān nungantang.

Acts 20:29

Ngay inan kan meeꞌmiya, ngay kan-ngulan iiyāng-a, than pam wayanang anangan wampayn niiyant. Thananiya keꞌ minh kulliy yimanangan wampayn niiyant yipam mulathayn niiyangan. Thanan yipam wayathayn pam wanch God.antam anangana wik nungantaman keꞌ yipam ngeeyayn.

Acts 21:13

Nil puth Paul.an wik inangan thawwey thant, “Niiy yotam inangan ngeenam peey-peeyaniy ngatharam aꞌ ngangk wayan yump-yumpaniy ngayanganiy e? Than pam al-alangan makwey kathayn ngayanga aꞌ ngay nath aak Jerusalem.ang yaakaꞌ uthamāng nungantam peeyanang Lord Jesus.antaman. Ngul ngay anpalan ngangk way wun-wuniy ngatharakam ey? An yaꞌa! Ngay kaangk puth uthamāng nungantam peeyanangana.”

Romans 1:15

Ngayan puth kaangk wampāng niiyant aak Rome.angana, wik min God.antaman waaꞌ-waaꞌāng niiyant thampa.

1 Corinthians 9:7

Niiy kan in ngeeyāna: than soldiers nath kul piꞌanakan iiy-iiyantan-a, than wukal thanttakam kal-kalantan mayakanwey ey? An yaꞌa! than wukalan uw-uwantan pam piꞌ-piꞌanam al-alantamana. Aꞌ than pamangan maywey kaamp-kaampiythan-a, an than may mungk-mungkiythan garden thanttam anpalana! Aꞌ than pamangan nath minh cows piꞌ-piꞌiythanwey-a, an than may thuut minh al-alantaman mungk-mungkiythana!

1 Timothy 3:3

Nil ngak way mungkanan-a, keꞌ iiy-iiyow; aꞌ nil kulakan keꞌ wenk-wenkow; puth pam maal iiy-iiyow, kul-thinthamak iiy-iiyow, kul keꞌ uwow thant wiyantan, aꞌ putha wukal-weenthana keꞌ iiy-iiyow thampa.

1 Timothy 3:8

Ngay kan pam wiy anangan waaꞌāng nungka, thanan maꞌ-aath-aathantan niiyang churchangan, deaconsan waaꞌ-waaꞌantan thanang. Nil weeꞌ-nath kaangk deaconan iiy-iiyow-a, nil pam koyꞌ iiy-iiyow, aꞌ nil pam min anman iiy-iiyowa, aꞌ nil ngak way mungkanan keꞌ iiy-iiyow, aꞌ wukal-weenthan keꞌ iiy-iiyow thamp.

Titus 1:11

Nint puth thawān thant than keꞌ-ngul thaaꞌ-aath-aathayn thanangan wik way-way thampang anangan. Than nath wik way-wayan waaꞌantan-a, aꞌ wik uuyamantanan-a, than pam wanch puk wiy anangan thamp wayathantan thanang. Than yaan thaaꞌ-aath-aathantan than yipam wukal yalmathayn pam wanch ngangk min al-alantamana.

Titus 1:7

Nil God.angan work inan theeꞌ thant pam wanch al-alantan churchan piꞌ-piꞌayn, puth thananiya minam anman iiy-iiyayn, than wiyangan keꞌ yipmam waaꞌayn thanang. Puth thananiya kuchek thayan keꞌ iiyayn aꞌ keꞌ ulp-ulpanang iiyayn puth man kul erkaman keꞌ wampow thant. Aꞌ kuchek keꞌ wayamow thant ngak way anpalan. Than kulak keꞌ wenkayn pam wanch thon-thonantan. Aꞌ than puth keꞌ yangkan weenayn wukalakana.

Titus 2:14

Nil Jesus.angan theetath nungamang uthamowan ngampar. Keꞌ ngampan uthamimpa, puth yaꞌa, nil utham ngampar. Nil ngangk pachath ngampang chaapar nungantamangan wayan yumpampa, ngampan kan-kanam ngul iiyāmpa pam wanch nungantamaniya. Nil maꞌ-aathan ngampangan min yumpanakana.

Titus 3:1

Aꞌ putham kon-aathān thanang pam wanch anangan than yipmam wik ngeeyayn moom thanttam al-alantaman, pam piꞌ-piꞌan al-alantaman. Aꞌ thawān thant min anman ngaantam-ngeeyayna aꞌ min yumpayn, aꞌ maꞌ-aathayn wiy anangan pam wancha.

Philemon 1:14

Puth ngay kaangk keꞌa thaachāng nintangan maꞌ-aathān ngayanganwey. Nint kaangk nathwey maꞌ-aathān ngayangan-a, an nintam ngaantam-ngeeyān kuchek nungkaramangana. Ngay keꞌ piꞌing nunang Onesimus.an aak inganiya. Nintan thawin nil aak ingmanan wuniy-a, an ep piꞌingana.

Hebrews 12:15

Niiyiya pam wanch Christians.angan min-minam piꞌwuna niiy yipam keꞌ wantān nunang piip God.an, puth niiy weeꞌ-weeꞌanangan wantān nunangwey-a, nilan keꞌ maꞌ-āathow niiyang. Niiy maꞌ-aath-aathwun niiy yipam wayan keꞌ yump-yumpān, aꞌ putha wik thaaꞌ poch-pochaman keꞌ thawān, aꞌ putha niiy kul kath anangan keꞌ ngangk niiyantamangan piꞌ-piꞌān. Puth niiy yotaman way paththam ngul weenan.

2 Peter 2:3

Than teachers inanganiya waya wukal-weenthiya. Thanan wik kuchek thanttam anpalan ngaantam-ngeeyantan, than wik wayanang anangan waaꞌayn niiyant niiy yipam wukal theeꞌān thant. Puth nil God.ana keꞌam weep wunan, yaꞌa, nil thathan thanang. Puth nilan aak keenkan thaw nil um nungantangan thanathow thanang aꞌ amanamaniya nil kuchow thanang ngul aak nungantam anpalana.