Ɛfesɔ̀ 1:4 - WƆŊ FƐ̀Ì EBÒ SÌÀŊ DAYÀA

⁴ Wèè paŋ wo Dayà wa bànè e ɗuunyaŋ lɛɛ̀, wò wi wa kpɛ̀ɛ̀yɛ̀ tàeɗùù gɔu wèè eiŋ nɔ̀ŋ anyunùuŋ esàɓù e nɔ̀ŋ wilɛ̀ ke gbòò anyuùŋ hààwè Jisɛ̀ Kulaì nyaŋ sùà, wèè kɛ̀ eiŋ nɔ̀ŋ anyùùŋ nɛɛmaŋ gò kùwìè è tɔ̀mɛ kò fɛɛ̀ fenìuŋ. Esàɓù e mànauŋ nɛ̀ sùà,

Ɛfesɔ̀ 1:4 Iomraidhean Croise

Maafiù 24:22

Kɛɛ wò Dayà naŋ wa kɛ̀ɛ̀ maŋ ɗɔɔ bi diɛŋ. Sèè wò go miŋ wa weè kɛ̀ɛ̀ diɛŋ, wo nyùùŋ gbiŋ fè weè jàà kàìŋ. Kɛɛ wèè esàɓù anyunùuŋ nyàŋ wò naŋ wa tàeɗùù nyaŋ wò naŋ wa kɛ̀ɛ̀ maŋ ɗɔɔ màŋ diɛŋ.

Maafiù 24:24

Esaɓù aŋ wɛ̀ijì tòa yèè aŋ kulaì tòa do nàŋ hnè nyààŋ nyiŋ nàŋ yaà wo Kulaìɔ yèè aŋ kèèlà Dayà nyaŋ. Àŋ do nàŋ hnè aŋ nyɛ̀nɛ̀ŋ maŋ kèè mèè e kìlà aŋ tɔ̀ɔ̀ maŋ tɔ̀ɔ̀màŋsèì keì wèè kàìsa aŋ zuwò aŋ nyùùŋ nyaŋ wo Dayà naŋ tàeɗùù nyaŋ, sèè àŋ ɓɛnɛ̀ŋ.

Maafiù 24:31

Kpeiŋ àŋ do nàŋ fùɔ̀ŋ e pòtanàŋ gbeeɛ̀, kɛ̀ wò tùàŋ aŋ màikàuŋ nyàŋ e yìwìà ko àìjɛnɛ̀ŋ koɓɛ̀ maŋ zɔ̀nù tiinàŋ maŋ e ɗuunyaàŋ wèè aŋ gbonogbònò aŋ nyuùŋ tàèɗùùim nyàŋ ko tɔ̀ɔ̀tù e ɗuunyaàŋ e hàì ko dìaì.”

Maafiù 25:34

Kpeiŋ kɛ̀ miàim wo Kanaà kà wòò anyùùŋ nyaŋ wɔŋ kùàŋ jìka miɔ̀ŋ mìàŋ, ‘Hnàaìŋ, nyɛ̀iŋ nyàŋ wo Dèda miɔ̀ŋ naŋ haayà nyaŋ! Hnàaìŋ niŋ ɓemè e Kànà Dayàa naŋ wa nɔ̀ŋ bàne niŋ weèiŋ lɛ paŋgàà e ɗuunyaàŋ naŋ wa nɔ̀ŋ bàne niŋ lɛ̀.

Jɔ̀ɔŋ 10:16

Kòò mìŋ kuwa aŋ ɓaawaa joo bà àŋ yè nyaŋ fè wɔ̀ŋ gɔ̀ɔ̀ŋ àŋ ɓaawaa nyɛɛ̀ŋ kò sùà nyaŋ. Mìŋ kuwa ka nyiŋ hìàŋ koɓɛ̀ guùŋ nyiŋ pɛɛ, yèè àŋ do nàŋ kòmò ke miè miɛ̀ŋ. Kpeiŋ àŋ do nàŋ nɔ̀ŋ ke gbòò maŋ ɗòlònɛ̀ŋ aŋ ɓààwàà guùŋ.

Jɔ̀ɔŋ 15:16

Nyɛ̀iŋ nàŋ gòim wa tàeɗùù. Miàŋ naiŋ wa tàeɗùù wèè naŋ hìàŋ anyùùŋ koɓɛ̀ guùŋ aŋ yè nyaŋ do nàŋ jèè kpèè miɛ̀ŋ sùà yèè wèè naŋ ka naŋ gbòà ke mìè Dayà koɓɛ̀ anyùùŋ nyaŋ gbiŋ e ɗuunyaàŋ yèè naŋ mànàŋ aŋ dàwi nyiŋ nyàŋ wèè julɔfɔ. Yèè sèè nìŋ nyɛnɛŋ tɛɛ̀, wo Dèda miɔ̀ŋ doiŋ nàŋ kìɛ̀ŋ e nɛ̀ɛŋ gbiŋ nìŋ douŋ nàŋ dawè weè niŋ lɛ̀ e deè mɛ̀ diɛŋ.

Jɔ̀ɔŋ 17:24

“Dèda, mìŋ zoolà wèè anyùùŋ nyaŋ gbiŋ mùŋ naim kiɛ̀ŋ nyaŋ aŋ nɔ̀ŋ koɓɛ̀i mìŋ do nàŋ nɔ̀ŋ lɛ. Kpeiŋ kɛ̀ àŋ do nàŋ yɛ̀mɛ̀ e dɛ̀ɛ̀kɛɛ̀ mùŋ naim kiɛ̀ŋ lɛ, esaɓù kɛ̀ mùŋ naim wa mɔ̀nɔ̀ŋ paŋgàà e ɗuunyaàŋ naŋ wa nɔ̀ŋ bàne niŋ.

Nyɛ̀nɛ̀ŋ 13:48

Ke miè gbìaŋ yɛɛ̀ naŋ wa fɔ̀ɔ̀yɛ̀ anyùùŋ nyaŋ fè àŋ Juùù nyaŋ maŋ jii, yèè àŋ naŋ tɛ̀nɛ̀ŋ ke mìè Dayàa. Kpeiŋ anyùùŋ nyaŋ gbiŋ naŋ wa nɔ̀ŋ ke ɗuù tà nyàŋ wèè wɔŋ nyiiŋ gèe gò jùàa naŋ gbìɛ̀ŋ e hààwe nyiŋ nɛ̀ wo Kanaà Jisɛ̀ sùà.

Nyɛ̀nɛ̀ŋ 15:18

Tɛɛ̀ mìŋ naŋ wa nyɛ̀nɛ̀ŋ anyunùim nyàŋ aŋ nyìmàŋ e teenga gɔuo sùà.’ ”

Nyɛ̀nɛ̀ŋ 18:10

Kòò mìŋ yààùm maŋjɛ̀wɛ, wo nyùùŋ gbiŋ naàum gbùwò kè gùuŋ wèè woum nɛɛmùŋ, esaɓù anyùùŋ nyaŋ zimgbe nyiŋ ko jawa gbee àŋ yaà anyunùim.”

Luùm 8:33

Ɓòò naŋ ɓɛ̀nɛ̀ŋ gbùwà anyùùŋ nyaŋ wo Dayà naŋ tàeɗùù nyaŋ e keì ɗì? Wo Dayà wuŋ bi naŋ nyiŋ tàeɗùù, yèè wuŋ nàŋ juuyà maŋ jùumù nyiŋ màŋ hakɛ̀.

1 Kɔliìŋ 1:8

E kìlà wò doiŋ nàŋ yɛ̀mɛ̀ diɛŋ wo nyɛ̀nɛ̀ŋ naŋ nyìngà sùà e jèèsùà naŋ hàì ko dìaì, e wèè e tɔ̀mɛ goiŋ nàŋ nɔ̀ŋ kè ɗɔ̀ɔ̀ è hnàŋ Kanaà Jisɛ̀ Kulaìɛ diɛŋ.

Gàla 5:13

Wùìyaim nyaŋ, àŋ naiŋ wa tàeɗùù wèè naŋ nɔ̀ŋ e bìlɛiŋ e yìwìà e ɗo dìì. Ɓɔ̀ nìŋ toomò è bìlɛiŋ bi e nɔ̀ŋ kè kàfaì wèè naŋ nyɛ̀nɛ̀ŋ è yèɛ nìŋ manaŋ lɛ̀. Tòòmoìŋ niŋ e nɔ̀ŋ keì sìàŋ maŋ kpùnaiŋ màŋ sùà wèè naŋ kìɛ̀ŋ aŋ dàwi e mànaŋ.

Gàla 5:22

Wo Jìnàŋ Nɛɛmaàŋ kiɛ̀ŋ wì e mànaŋ, e zɔlɔ̀, ke jii fàa, ke jii tɔumtɔ̀ùm, e keì sìàŋ, e tɛ̀ɛ̀tɛ̀ɛ̀, e hààwe,

Gàla 5:6

Sèè è naiŋ wèè nɔ̀ŋ anyùùŋ guùŋ wo Jisɛ̀ Kulaì sùà, e tɛɛ gòòno bà gbiŋ fè weè ɓɛ̀nɛ̀ŋ nɔ̀ŋ e fèèmàŋ anyuùŋ jàà kpùa, yaà anyuùŋ gò jàà kpùa nyàŋ. Kɛɛ e kɛnɛɛ̀ tɛɛ̀ gbiŋ sùà, e hààwe tòòmò sùà nàŋ nyɛnɛŋ wèè naŋ mànaŋ anyùùŋ joo.

Ɛfesɔ̀ 2:10

Wo Dayà manaŋ wèè eiŋ nyɛ̀nɛ̀ŋ maŋ keì sìàŋ, yèè eiŋ nɔ̀ŋ maŋ nyiiŋ gèe wi màŋ sùà e ɗewe kiiɛ̀ wò manaŋ lɛ̀ e teenga gbiŋ. Esaɓùɛ lɛɛ̀ wò naŋ tùɔ̀ŋ wo Jisɛ̀ Kulaì wèè wo wi nyɛ̀nɛ̀ŋ màànààŋ è yààìŋ aŋ bàwibà Jisɛ̀ Kulaì sùà lɛ, wò naŋ wi banè wèè eiŋ kùwìè wɔŋ nyììŋ gèe maŋ kpèè siaŋ, maŋ yè maŋ wò naŋ naàŋ banè tɛ wèè eiŋ miŋ nyɛ̀nɛ̀ŋ maŋ.

Ɛfesɔ̀ 3:17

Mìŋ humo Dayà wèè wo Jisɛ̀ Kulaì nɔ̀ŋ maŋ jiiiŋ màŋ sùà esàɓù e hààweiŋ nɛ̀. E kìlà mìŋ humo Dayà wèè naŋ kɛ̀ɛ̀nɛ̀ŋ e gulòiŋ nɛ̀ yèè ko tɔɔtuiŋ niìŋ e mànaŋ sùà.

Ɛfesɔ̀ 4:2

Dèèyeìŋ nyɛ̀iŋ bi e teenga gbiŋ sùà, niŋ kuwìè maŋ jii tɔumtɔ̀ùm, yèè niŋ nɔ̀ŋ anyuùŋ kùwìè e ɓɛ̀ɛ̀jàa. Tɔ̀ɔìŋ e mànaiŋ nɛ̀ ke jii siaŋ diɛŋ koɓɛ̀ aŋ wùìyaiŋ nyàŋ e hààweɛ̀ sùà.

Ɛfesɔ̀ 5:2

E mànaŋ kuwìè gààŋ maŋ nyiiiŋ màŋ diɛŋ, màànààŋ Jisɛ̀ Kulaì naŋ wi mɔ̀nɔ̀ŋ, yèè wò naŋ fè wɔŋ nyiiuŋ nɔɔ̀ŋ wèè wɔŋ nɔ̀ŋ e nɛ̀ŋ saaà e yèɛ naŋ fɔ̀ɔ̀yɛ̀ Dayà jii lɛ̀.

Ɛfesɔ̀ 5:27

Wò naŋ yɛi nyɛ̀nɛ̀ŋ wèè wo kɛɛnɛ̀ŋ ke gbòò anyuùŋ hààwe nyàŋ e jòòwo yèè e nɛɛmaŋ sùà, wèè ɓɔ̀ kè kuwìè lè fee ɔ̀ɔ̀ è tɔ̀mɛ bà gbiŋ.

Fèle 2:15

wèè kɛ̀ nìŋ naŋ ɓɛ̀nɛ̀ŋ nɔ̀ŋ aŋ jɔ̀à gò kɛ̀ɛ̀nɛ̀ŋ tɔ̀mɛ nyàŋ, aŋ yè nyaŋ e keì gò jeè nyaŋ wèè wo Dayà. Nìŋ joà anyùùŋ e tɛɛ e ɗuunyaàŋ aŋ yè nyaŋ naŋ dìè kàaɓì yaà maŋ keì naanààŋ. Kàmeìŋ ɗewe niŋ mɛ̀ɛ̀ŋ mààŋ e gbòlòùŋ maŋ ɗu ke nyiliɛ̀,

Kòlo 1:22

kɛɛ esàɓù e fà ke kpùnàŋ wo Jɔ̀àfelaauŋ nɔɔ̀ŋ, wo Dayà wòiŋ nyɛ̀nɛ̀ŋ nàŋ nɔ̀ŋ anyuùŋ mɔ̀ɔ̀nɔuŋ, wèè wo nyɛ̀nɛ̀iŋ niŋ nɔ̀ŋ nɛɛmaŋ, niŋ zɛ̀nɛŋ, e kìlà ɓɔ̀ niŋ kɛɛnɛ̀ŋ tɔ̀mɛ kò fɛɛ̀fenùuŋ.

Kòlo 2:2

Mìŋ nyɛnɛŋ tɛɛ̀ wèè ka nyiŋ kiɛ̀ŋ ke jii nyingè e kìlà ka nyiŋ jàànè koɓɛ̀ guùŋ e mànaŋ sùà, wo Dayà do nyiŋ nàŋ kìɛ̀ŋ e kpùùmaŋ gbee wèè aŋ nyìmàŋ kɛ̀ kiìŋ e nɛ̀ŋ nyìmaŋ kɛnɛ hiàŋ. E ɗewe lɛɛ̀ sùà, àŋ do nàŋ nyìmè ke gbùnù Dayàa. Ke gbùnu bi zà nàŋ yaà wo Jisɛ̀ Kulaì wuŋ bi.

Kòlo 3:12

Nyɛ̀iŋ nàŋ yaà anyùùŋ nɛɛmaŋ nyàŋ. Wo Dayà mànàìŋ yèè wòiŋ tàeɗùù wèè naŋ nɔ̀ŋ anyunùuŋ. Weètii, nìŋ kuwa naŋ kùwìè ke nyowo, ke jiio sùà wèè naŋ nyɛ̀nɛ̀ŋ e keì sìàŋ, naŋ dèèyè nyɛ̀iŋ bi, naŋ kùwìè ɓɛ̀ɛ̀jàa yaà maŋ jii tɔumtɔ̀ùm.

1Tɛsè 3:12

Tɔ̀ wo Kanaà nyɛ̀nɛ̀ŋ e mànaàŋ e fèemàiŋ nɛ̀ yèè e wèè anyùùŋ nyaŋ gbiŋ e dɛɛ̀ sùà, e nɔ̀ŋ màànààŋ e mànaàŋ maŋ jii wi màŋ sùà weèiŋ è naŋ dɛɛ̀ lɛ.

1Tɛsè 4:7

Wo Dayà gò wi wa nyààŋ wèè eiŋ nɔ̀ŋ è ninaŋ sùà, sɔɔ̀ wɔŋ nyììŋ nɛɛmaŋ sùà.

2Time 1:9

Wò naŋ wi joeyè, yèè wò naŋ wi nyààŋ wèè e nɔ̀ŋ anyùùŋ nɛɛmauŋ nyàŋ e fè wèè èsàɓù kè nyɛ̀nɛŋ wiɛ̀, kɛɛ è yaà esàɓù e ɗèwè wuŋ biɛ̀ yaà e tɛ̀ɛ̀tɛ̀ɛ̀uŋ nɛ̀. Wò naŋ wi kìɛ̀ŋ e tɛ̀ɛ̀tɛ̀ɛ̀ lɛɛ̀ e yìwìà wo Jisɛ̀ Kulaì sùà paŋ ngàà e ɗuunyaàŋ naŋ wa nɔ̀ŋ bàne niŋ,

2Time 2:10

weètii mìŋ kɔ̀à maŋ keì nyìnga mɛɛ̀ŋ dìì, wèè esàɓù anyùùŋ Dayà nyaŋ wò naŋ tàeɗùù nyaŋ, wèè kɛ̀ nyiiŋ pɛɛ aŋ yɛmɛ̀ e jòèyeɛ̀ naŋ hnè esàɓù Jisɛ̀ Kulaì sùà lɛ, yèè e hìàŋ e jòòwo gò jùà.

2Time 2:19

Kɛɛ e kpèe nyìngàà sùàa wo Dayà naŋ heè lɛ, e fè ɓɛ̀nɛ̀ŋ mɛ̀ɛ̀mɛɛŋ, yèè e kpèe bi diɛŋ wò naŋ sìngìè maŋ fee mɛɛ̀ŋ, “Wo Kanaà Jisɛ̀ Kulaì nyìmàŋ anyùùŋ nyaŋ wò kanaŋ nyàŋ” yèè “Anyùùŋ nyaŋ woà nyààŋ àŋ yaà wèè wo Kanaà Jisɛ̀ Kulaì nyaŋ, sɔ̀ɔ̀ aŋ kɛ̀ɛ̀ maŋ kpèè naanààŋ nyɛ̀nɛŋ màŋjɛ̀wɛ.”

Jìiiŋ 2:5

Nyɛ̀iŋ nààŋ wùìyaim nyàŋ, jàaìŋ maŋ nùŋ dìì! Anyuùŋ pɔ̀ɔ nyàŋ e ɗuunyaŋ lɛɛ̀ nyiŋ wo Dayà naŋ tàeɗùù wèè aŋ nɔ̀ŋ aŋ nyuùŋ bàne nyàŋ e hààweɛ̀ sùà. Yèè àŋ do nàŋ kɛ̀ɛ̀nɛ̀ŋ e kànà Dayàa e yèɛ wò naŋ wa ɓèmè ɗààhiì wèè wo fè aŋ nyùùŋ nyaŋ mànaùŋ nyaŋ.

1Pììlɛ 1:2

Wo Dayà Dèda wiɔ̀ wa ɗewè gɔu wèè woiŋ tàeɗùù naŋ nɔ̀ŋ anyunùuŋ, yèè wo Jinàuŋ nɔɔ̀ŋ wòiŋ nyɛ̀nɛ̀ŋ naŋ nɔ̀ŋ anyùùŋ nɛɛmaŋ, wèè naŋ jɔ̀ɔ̀lɔ̀ wo Jisɛ̀ Kulaì dìì, yèè maŋ sɛnìuŋ màŋ nyɛ̀nɛ̀ŋ nàŋ zɛ̀nɛ̀ŋ. Tɔ̀ wo Dayà kiɛ̀iŋ e tɛ̀ɛ̀tɛ̀ɛ̀ yaà ke jii fàa dìa sùà.

1Pììlɛ 1:20

Wo Dayà nauŋ wa tàeɗùù paŋgàà wò naŋ tɔ̀ɔ̀tù e ɗuunyaàŋ bàne, yèè wò naŋ dàànè ebòuŋ maŋ ɗɔɔ dìàmaŋ mɛɛ̀ŋ sùà, esaɓùiŋ nɛ̀ sùà.

1Pììlɛ 2:9

Kɛɛ nyɛ̀iŋ nàŋ yaà anyuùŋ tàeɗùù Dayà nyaŋ, aŋ sìèfèìŋ e zòòlò Kanaà, wɔŋ fùɔ̀ŋ nɛɛmaàŋ, anyùùŋ Dayà nyaŋ wuŋ bi naŋ tàeɗùù, wèè aŋ daanè ebò maŋ kpèè sìàŋ Dayà maŋ wò nyɛnɛŋ màŋ, wo yèɔ naiŋ nyààŋ wò naiŋ gè ke nyìwì sùà, yèè wò naiŋ hnìɛ̀ŋ e gbòlòùŋ gbèè wuŋ bi sùà lɛ.

2Pììlɛ 3:14

E wèètii nyɛ̀iŋ nààŋ wùìyaim nyàŋ, nààŋ nìŋ yaà fùlìè ke ɗɔɔ bi, nyɛ̀nɛìŋ e yèɛ gbiŋ nìŋ naŋ ɓɛnɛ̀ŋ lɛ wèè niŋ zɛ̀nɛ̀ŋ, yèè e tɔ̀mɛ ɓɔ̀ è nɔ̀iŋ fɛ̀ɛ̀fèìŋ Dayà, e kìlà naŋ nɔ̀ŋ jii fàa sùà koɓɛ̀ Dayài.

1Jɔ̀ɔŋ 4:16

Yèè yàwi bi èiŋ nyìmàŋ e kìlà èiŋ hààwè e mànaàŋ wo Dayà kuwa weè wilɛ̀. Wo Dayà nàŋ yaà e mànaŋ, yèè aŋ yè nyaŋ nɔ̀ŋ e mànaŋ sùà nyaŋ, àŋ yaà wo Dayà sùà yèè wo Dayà yaà nyiìŋ sùà.

Maŋ kèì nyɛɛnɛŋ 13:8

Anyùùŋ nyaŋ gbiŋ e ɗuunyaàŋ douŋ nàŋ zoolò, eɓìèmàŋjɛ̀wɛ̀ aŋ yè nyaŋ maŋ deè nyiŋ màŋ yaà sìnga miŋ wɔŋ fɛ̀ì anyuùŋ gè nyiiŋ nyàŋ sùà paŋgàà e ɗuunyaàŋ naŋ wa nɔ̀ŋ bàne niŋ lɛ̀. Anyùùŋ bi àŋ yaà aŋ bà nyiŋ bà wèè wo Ɓaawaaà àŋ naŋ wa jìwè wɔ.

Maŋ kèì nyɛɛnɛŋ 17:8

Wo yilì kùùno wii yaà wa wɔŋ nyiiŋ gèeɔ̀ sùà e tèèngà guùŋ bà, kɛɛ wo fè ɓɛìŋ. È joo tòloò wèè wo fòlà ko golo zutùùiŋ e dììɛ dìì wèè auŋ pɔɔpɔ̀ɔ̀. Anyùùŋ nyaŋ gbiŋ yaà e ɗuunyaàŋ aŋ yè nyaŋ kòò àŋ sìngè maŋ deè nyiŋ màŋ wɔ̀ŋ fɛ̀ì ànyuùŋ gè nyiiŋ nyàŋ sùà paŋgàà wo Dayà naŋ wa bànè e ɗuunyaàŋ nyaŋ, è do nyiŋ nàŋ foonò sèè àŋ yɛmɛ̀ wa nàwèè wo yilì kùùnoɔ̀. Wo yàà wa wɔŋ nyiiŋ gèeɔ̀ sùà e tèèngà guùŋ. Sààmɛ tiŋ, wo fè ɓɛìŋ wɔ̀ŋ nyiiŋ gèeɔ̀ sùà, kɛɛ wò do ɓɛìŋ nàŋ fòlò ke fòolà.”