ՅԱՅՏՆՈՒԹԻՒՆ 12:4 - Western Armenian New Translation - Armenian Catholicosate of Cilicia - New Testament

⁴ Իր պոչով կը քաշէր կը տանէր երկինքի աստղերուն մէկ երրորդ մասը, որ նետեց երկրի վրայ։ Անիկա ծնանելու մօտ եղող կնոջ դիմաց կանգնեցաւ, որպէսզի երբ կինը զաւակը ծնի՝ կլլէ զայն։

Արեւմտահայերէն Նոր Կտակարան հարմարցուած․ 2017

⁴ Անոր պոչը երկնքի աստղերուն երրորդ մասը կը քաշէր ու զանոնք երկրի վրայ ձգեց եւ վիշապը կեցաւ այն կնոջ առջեւ, որ ծնանելու վրայ էր, որպէս զի երբ ծնանի, անոր զաւակը կլլէ։

Western Armenian Bible 1853

⁴ Անոր պոչը երկնքի աստղերուն երրորդ մասը կը քաշէր ու զանոնք երկրի վրայ ձգեց եւ վիշապը կեցաւ այն կնոջ առջեւ, որ ծնանելու վրայ էր, որպէս զի երբ ծնանի, անոր զաւակը կլլէ։

ՅԱՅՏՆՈՒԹԻՒՆ 12:4 Iomraidhean Croise

ՅՈՎՀԱՆՆՈԻ 8:44

Դուք ձեր հօր՝ Սատանային զաւակներն էք եւ անոր ցանկութիւնները կատարել կ՚ուզէք։ Անիկա սկիզբէն մարդասպան էր եւ ճշմարտութեան կողմնակից չէ եղած բնաւ, որովհետեւ անոր մէջ ճշմարտութիւն չկայ։ Երբ սուտ խօսի՝ իր նկարագիրը ցոյց կու տայ, քանի որ ստախօս մըն է եւ սուտին հայրը։

ԱՌԱՋԻՆ ՊԵՏՐՈՍԻ 5:8

Արթուն եւ պատրաստ եղէք, որովհետեւ ձեր թշնամին՝ Սատանան առիւծի պէս մռնչելով կը շրջի եւ կլլելու համար մէկը կը փնտռէ։

ՅԱՅՏՆՈՒԹԻՒՆ 12:7

Եւ պատերազմ տեղի ունեցաւ երկինքի մէջ։ Միքայէլ եւ իր հրեշտակները կռուեցան վիշապին դէմ, որ իր կարգին իր հրեշտակներով կը պատերազմէր։

ՅԱՅՏՆՈՒԹԻՒՆ 12:9

Մեծ վիշապը, այն առաջին օձը, որ Բանսարկու եւ Սատանայ կը կոչուի եւ որ ամբողջ աշխարհը մոլորեցուց, երկիր ձգուեցաւ։ Անոր հրեշտակներն ալ միասին վար ձգուեցան։

ՅԱՅՏՆՈՒԹԻՒՆ 13:2

Գազանը որ տեսայ՝ յովազի կը նմանէր, ոտքերը՝ արջի ոտքերուն, բերանը՝ առիւծի բերանին։ Վիշապը անոր տուաւ իր զօրութիւնը, իր գահը եւ մեծ իշխանութիւնը։

ՅԱՅՏՆՈՒԹԻՒՆ 13:4

եւ երկրպագեց վիշապին, որ իր իշխանութիւնը տուած էր գազանին, ու երկրպագեց նաեւ գազանին, ըսելով. «Ո՞վ կայ նման այս գազանին, ո՞վ կրնայ կռուիլ անոր դէմ»։

ՅԱՅՏՆՈՒԹԻՒՆ 16:13

Եւ տեսայ որ վիշապին բերանէն, գազանին բերանէն եւ սուտ մարգարէին բերանէն գորտերու նմանող անմաքուր երեք ոգիներ կ՚ելլէին։

ՅԱՅՏՆՈՒԹԻՒՆ 17:18

Եւ այն կինը որ տեսար՝ մեծ քաղաքն է, որ երկրի թագաւորներուն վրայ կը թագաւորէ։

ՅԱՅՏՆՈՒԹԻՒՆ 20:2

Անիկա բռնեց վիշապը, այն առաջին օձը, որ Բանսարկուն եւ Սատանան է, եւ հազար տարուան համար շղթայեց զայն։

ՅԱՅՏՆՈՒԹԻՒՆ 8:10

Երրորդ հրեշտակն ալ փողը հնչեցուց։ Մեծ աստղ մը, որ ջահի մը նման կը բորբոքէր, երկինքէն ինկաւ գետերուն եւ աղբիւրներուն մէկ երրորդ մասին վրայ։

ՅԱՅՏՆՈՒԹԻՒՆ 8:11

Աստղին անունը Դառնութիւն էր։ Ջուրերուն մէկ երրորդը լեղի դարձաւ եւ մարդոցմէ շատեր մեռան դառն ջուրէն։

ՅԱՅՏՆՈՒԹԻՒՆ 8:12

Յետոյ չորրորդ հրեշտակը փողահարեց եւ արեւուն մէկ երրորդ մասը զարնուեցաւ, ինչպէս նաեւ՝ լուսինին մէկ երրորդը եւ աստղերուն մէկ երրորդը, եւ անոնց մէկ երրորդ մասը մթագնելով՝ ցերեկին, ինչպէս նաեւ գիշերուան մէկ երրորդ մասը խաւարեցաւ։

ՅԱՅՏՆՈՒԹԻՒՆ 8:7

Առաջին հրեշտակը հնչեցուց փողը, եւ արիւնով խառնուած կարկուտ ու կրակ տեղաց երկրի վրայ եւ այրեց երկրին մէկ երրորդ մասը, ինչպէս նաեւ այրեց ծառերուն մէկ երրորդը եւ բոլոր դալար խոտերը։

ՅԱՅՏՆՈՒԹԻՒՆ 8:8

Ապա փողահարեց երկրորդ հրեշտակը, եւ ահա հսկայ լերան նմանող կրակէ զանգուած մը ծով ինկաւ, եւ ծովուն մէկ երրորդ մասը արիւն դարձաւ.

ՅԱՅՏՆՈՒԹԻՒՆ 8:9

ծովային կենդանիներուն մէկ երրորդը սատկեցաւ եւ նաւերուն մէկ երրորդը ընկղմեցաւ։

ՅԱՅՏՆՈՒԹԻՒՆ 9:10

Անոնց պոչերը կը նմանէին կարիճի պոչերուն, որոնց ծայրը խայթոց կայ եւ որոնց միջոցաւ իշխանութիւն ունէին մարդիկը հինգ ամիս պատուհասելու։

ՅԱՅՏՆՈՒԹԻՒՆ 9:19

քանի ձիերուն զօրութիւնը իրենց բերանին մէջ էր, ինչպէս նաեւ՝ իրենց պոչերուն։ Անոնց պոչերը օձերու կը նմանէին եւ ունէին գլուխներ, որոնցմով կը պատուհասէին։