ԱՌԱՋԻՆ ՏԻՄՈԹԷՈՍ 4:3 - Western Armenian New Translation - Armenian Catholicosate of Cilicia - New Testament

³ Մարդիկ՝ որոնք ամուսնութիւնը կ՚արգիլեն եւ կը հրահանգեն հեռու մնալ կարգ մը ուտելիքներէ. մինչդեռ Աստուած այդ ուտելիքները ստեղծեց՝ որպէսզի հաւատացեալ եւ ճշմարտութեան ճանաչումին հասած մարդիկ շնորհակալութեամբ վայելեն զանոնք։

Արեւմտահայերէն Նոր Կտակարան հարմարցուած․ 2017

³ որոնք ամուսնանալէ պիտի արգիլեն ու ետ պիտի պահեն այն կերակուրներէն՝ որոնք Աստուած ստեղծեր է որպէս զի հաւատացեալները եւ ճշմարտութիւնը ճանչցողները գոհութեամբ վայելեն։

Western Armenian Bible 1853

³ Որոնք ամուսնանալէ պիտի արգիլեն ու ետ պիտի պահեն այն կերակուրներէն՝ որոնք Աստուած ստեղծեր է որպէս զի հաւատացեալները եւ ճշմարտութիւնը ճանչցողները գոհութեամբ վայելեն։

ԱՌԱՋԻՆ ՏԻՄՈԹԷՈՍ 4:3 Iomraidhean Croise

ՄԱՏԹԷՈՍ 14:19

Եւ հրամայեց որ ժողովուրդը նստեցնեն խոտին վրայ։ Ապա առաւ հինգ հացը եւ երկու ձուկը, աչքերը երկինք բարձրացուց, օրհնեց, կտրեց հացերը եւ տուաւ աշակերտներուն, որոնք բաժնեցին ժողովուրդին։

ՄԱՏԹԷՈՍ 15:11

Բերնէն մտածը չէ՛ որ կը պղծէ մարդը, այլ ինչ որ դուրս կ՚ելլէ բերնէն՝ ա՛յն է որ կը պղծէ մարդը։

ՄԱՏԹԷՈՍ 15:36

Ապա առաւ եօթը հացը եւ ձուկերը, շնորհակալութիւն յայտնեց Աստուծոյ, կտրեց եւ աշակերտներուն տուաւ, ու ասոնք ալ բաժնեցին ժողովուրդին։

ՂՈԻԿԱՍ 24:30

Երբ անոնց հետ սեղան բազմեցաւ, առաւ հացը, օրհնեց, կտրեց եւ անոնց տուաւ։

ՅՈՎՀԱՆՆՈԻ 6:23

Յետոյ Տիբերիայէն ուրիշ նաւակներ ալ եկան հոն, ուր Յիսուս Աստուծոյ գոհութիւն տալով բազմացուցած էր հացը եւ տուած ժողովուրդին, որպէսզի ուտեն։

ԳՈՐԾՔ ԱՌԱՔԵԼՈՑ 27:35

Ասիկա ըսելէ ետք՝ հաց առաւ, բոլորին ներկայութեան շնորհակալութիւն յայտնեց Աստուծոյ, եւ զայն կտրելով՝ սկսաւ ուտել։

ՀՌՈՎՄԱՅԵՑԻՍ 14:17

Որովհետեւ Աստուծոյ արքայութիւնը կերակուր կամ ըմպելիք չէ, այլ՝ արդարութիւն, խաղաղութիւն եւ խնդութիւն, Սուրբ Հոգիէն տրուած։

ՀՌՈՎՄԱՅԵՑԻՍ 14:3

Ամէն ինչ ուտողը թող չարհամարհէ չուտողը, իսկ չուտողը թող չքննադատէ ուտողը, որովհետեւ Աստուած զայն ընդուներ է։

ՀՌՈՎՄԱՅԵՑԻՍ 14:6

Կը բաւէ որ թէ՛ յատուկ օր մը փնտռողը եւ թէ՛ օրերու միջեւ խտրութիւն չդնողը երկուքն ալ Տէրը պատուել կը խորհին։ Նոյնպէս ալ, թէ՛ ամէն ինչ ուտողը Տէրը կը պատուէ եւ թէ՛ չուտողը, երբ երկուքն ալ Աստուծոյ գոհութիւն կը յայտնեն։

ԱՌԱՋԻՆ ԿՈՐՆԹԱՑԻՍ 6:13

Կերակուրը ստամոքսին համար եղած է եւ ստամոքսը՝ կերակուրին. սակայն Աստուած թէ՛ մէկը եւ թէ՛ միւսը պիտի խափանէ։ Բայց նոյնը չէ մարմինին պարագան։ Մարմինը պոռնկութեան համար չէ, այլ՝ Տիրոջ համար, եւ Տէրը՝ մարմինին։

ԱՌԱՋԻՆ ԿՈՐՆԹԱՑԻՍ 7:28

Եթէ ամուսնանաս՝ մեղք գործած չես ըլլար. կամ ոեւէ ամուրի կին եթէ ամուսնանայ՝ մեղք գործած չ՚ըլլար։ Բայց անշուշտ ամուսնական կեանքին յատուկ նեղութիւններ պիտի ունենան, որոնցմէ զերծ պիտի ուզէի տեսնել ձեզ։

ԱՌԱՋԻՆ ԿՈՐՆԹԱՑԻՍ 8:8

Բայց կերակուրը չէ որ մեզ Աստուծոյ ներկայութեան կը բերէ։ Ո՛չ ուտելով բան մը կը շահինք, ո՛չ ալ չուտելով բան մը կը կորսնցնենք։

ԿՈՂՈՍԱՑԻՍ 2:16

Կարեւորութիւն մի՛ տաք անոնց՝ որոնք ձեզ կը քննադատեն, թէ ինչո՛ւ չէք պահեր ուտելու եւ խմելու, տօնակատարութեանց, ամսամուտերու եւ Շաբաթ օրերու վերաբերող կանոնները.

ԿՈՂՈՍԱՑԻՍ 3:17

Եւ ինչ որ ալ ընէք, խօսքով թէ գործով, միշտ Տէր Յիսուսի անունով ըրէք, անոր միջոցաւ գոհութիւն յայտնելով Հօր Աստուծոյ։

ԱՌԱՋԻՆ ՏԻՄՈԹԷՈՍ 2:4

որ կ՚ուզէ որ բոլոր մարդիկը փրկուին եւ հասնին ճշմարտութեան ճանաչումին,

ԱՌԱՋԻՆ ՏԻՄՈԹԷՈՍ 4:4

Արդարեւ, Աստուծոյ բոլոր ստեղծածները բարի են եւ անոնց մէջ խոտելի բան չկայ, մանաւանդ զանոնք շնորհակալութեամբ ընդունողին համար.

ԱՌԱՋԻՆ ՏԻՄՈԹԷՈՍ 5:14

Հետեւաբար, կ՚ուզեմ որ երիտասարդ այրիները ամուսնանան, զաւակներ ծնանին, տուն պահեն, եւ ոեւիցէ առիթ չտան որ Հակառակորդը չարախօսէ.

ԵԲՐԱՅԵՑԻՍ 13:4

Բոլորդ ալ պատուեցէ՛ք ամուսնութիւնը եւ ամուսնական կապը սուրբ պահեցէք, որովհետեւ Աստուած կը դատապարտէ շնացողներն ու պոռնկութիւն ընողները։

ԵԲՐԱՅԵՑԻՍ 13:9

Տեսակ–տեսակ օտարոտի ուսուցումներէ մի՛ տարուիք։ Լաւ է որ սիրտը Աստուծոյ շնորհքով ամրապնդուի, քան՝ ուտելիքներու եւ չուտելիքներու վերաբերող կանոններով, որոնց հետեւողները ոեւէ բանով չօգտուեցան։