ԱՌԱՋԻՆ ԹԵՍԱՂՈՆԻԿԵՑԻՍ 2:16 - Western Armenian New Translation - Armenian Catholicosate of Cilicia - New Testament

¹⁶ Եւ ամբողջացնելու համար այն մեղքերը, որ միշտ ալ գործած են, ուզեցին արգիլել՝ որ մենք հեթանոսներուն չխօսինք փրկութեան մասին։ Բայց Աստուծոյ ամբողջական բարկութիւնը հասած է արդէն իրենց վրայ։

Արեւմտահայերէն Նոր Կտակարան հարմարցուած․ 2017

¹⁶ Մեզի կ’արգիլեն հեթանոսներուն խօսիլ՝ անոնց փրկութեանը համար, որպէս զի իրենց մեղքերուն չափը լեցնեն ամէն ատեն եւ բարկութիւնը անոնց վրայ հասեր է մինչեւ վերջանալը։

Western Armenian Bible 1853

¹⁶ Մեզի կ’արգիլեն հեթանոսներուն խօսիլ՝ անոնց փրկութեանը համար, որպէս զի իրենց մեղքերուն չափը լեցնեն ամէն ատեն եւ բարկութիւնը անոնց վրայ հասեր է մինչեւ վերջանալը։

ԱՌԱՋԻՆ ԹԵՍԱՂՈՆԻԿԵՑԻՍ 2:16 Iomraidhean Croise

ՄԱՏԹԷՈՍ 12:45

Ապա կ՚երթայ եւ կը բերէ իրմէ աւելի չար եօթը այլ ոգիներ, որոնց հետ ներս մտնելով՝ կը բնակի հոն, որով այդ մարդուն վերջը իր նախկին վիճակէն աւելի գէշ կ՚ըլայ։ Գիտցէ՛ք, որ նոյնը պիտի պատահի նաեւ այս չար սերունդին։

ՄԱՏԹԷՈՍ 23:32

Գացէք ամբողջացուցէ՛ք ձեր հայրերուն կիսատ ձգած գործը։

ՄԱՏԹԷՈՍ 24:14

Արքայութեան Աւետարանը պիտի քարոզուի ամբողջ աշխարհի մէջ՝ իբրեւ վկայութիւն բոլոր ժողովուրդներուն. եւ ապա պիտի գայ վախճանը։

ՄԱՏԹԷՈՍ 24:6

Դուք պիտի լսէք պատերազմներու ձայները եւ պատերազմներու լուրերը. զգո՛յշ եղէք, մի՛ խռովիք, որովհետեւ պէտք է որ ատոնք պատահին։ Բայց ասիկա չի՛ նշանակեր թէ աշխարհի վախճանն է։

ՄԱՏԹԷՈՍ 3:12

Հեծանոցը իր ձեռքին, ան պիտի մաքրէ իր կալը, ցորենը հաւաքէ շտեմարանին մէջ, իսկ յարդը այրէ անշէջ կրակով։

ՄԱՐԿՈՍ 16:16

Ով որ հաւատայ եւ մկրտուի՝ պիտի փրկուի, իսկ ով որ չհաւատայ՝ պիտի դատապարտուի։

ԳՈՐԾՔ ԱՌԱՔԵԼՈՑ 13:45

Երբ Հրեաներ ամբոխը տեսան՝ նախանձով լեցուեցան, եւ հայհոյալից արտայայտութիւններով կ՚ընդդիմախօսէին Պօղոսի խօսքերուն։

ԳՈՐԾՔ ԱՌԱՔԵԼՈՑ 13:50

Բայց Հրեաներ գրգռեցին կարգ մը ազնուատոհմիկ, բարեպաշտ կիներ, ինչպէս նաեւ քաղաքին մեծամեծները, եւ Պօղոսի ու Բառնաբասի դէմ հալածանք հանելով՝ զանոնք իրենց սահմաններէն դուրս դրին։

ԳՈՐԾՔ ԱՌԱՔԵԼՈՑ 14:19

Մինչ անոնք կը շրջէին եւ կ՚ուսուցանէին, Անտիոքէն եւ Իկոնիոնէն Հրեաներ եկան։ Երբ առաքեալները համարձակօրէն վիճիլ սկսան, Հրեաներ խաբէութեամբ համոզեցին բազմութիւնը, որ անոնցմէ հեռու մնան, ըսելով. –Այս մարդոց ըսածները բնաւ ճշմարիտ չեն, այլ ամբողջութեամբ սուտ։ Եւ Պօղոսը քարկոծելով՝ քաշեցին քաղաքէն դուրս հանեցին, զայն մեռած համարելով։

ԳՈՐԾՔ ԱՌԱՔԵԼՈՑ 14:2

Բայց անոնց քարոզութիւնը չընդունող Հրեաները հեթանոսներու միտքը պղտորեցին եւ հաւատացող եղբայրներուն դէմ գրգռեցին զանոնք։

ԳՈՐԾՔ ԱՌԱՔԵԼՈՑ 14:5

Երբ որ հեթանոսներ ու Հրեաներ իրենց իշխաններով միասին ոտքի ելան՝ առաքեալները խոշտանգելու եւ քարկոծելու համար,

ԳՈՐԾՔ ԱՌԱՔԵԼՈՑ 17:13

Բայց երբ Թեսաղոնիկէի Հրեաները իմացան թէ Պօղոս Բերիայի մէջ եւս Աստուծոյ խօսքը քարոզեց, հոն ալ եկան՝ ժողովուրդը գրգռելու եւ խռովութիւն ստեղծելու համար։

ԳՈՐԾՔ ԱՌԱՔԵԼՈՑ 19:9

Սակայն երբ անոնցմէ ոմանք սկսան յամառօրէն հակաճառել եւ բազմութեան դիմաց վարկաբեկել Տիրոջ վարդապետութիւնը, Պօղոս ժողովարանէն քաշուեցաւ եւ Տիրոջ աշակերտածներն ալ միասին տարաւ, եւ ամէն օր կը խօսէր անոնց, Տիրան անունով մէկու մը դպրոցին մէջ։

ԳՈՐԾՔ ԱՌԱՔԵԼՈՑ 21:21

Բայց քու մասիդ իմացեր են, որ հեթանոսներուն մէջ ապրող բոլոր Հրեաներուն կը սորվեցնես՝ որ Մովսէսի Օրէնքը թողուն. այսինքն կ՚ըսես՝ որ իրենց տղաքը չթլփատեն եւ իրենց սովորութիւնները չպահեն։

ԳՈՐԾՔ ԱՌԱՔԵԼՈՑ 23:12

Յաջորդ առաւօտ, կարգ մը Հրեաներ իրարու քով եկան եւ իրենք զիրենք նզովքի տակ դնելով՝ երդում ըրին չուտել ու չխմել՝ մինչեւ չսպաննեն Պօղոսը։

ԳՈՐԾՔ ԱՌԱՔԵԼՈՑ 24:9

Հրեաները միաբերան հաստատեցին, ըսելով. –Ըսածները բոլորը ճիշդ են։

ԳՈՐԾՔ ԱՌԱՔԵԼՈՑ 25:2

Աւագ քահանաներն ու Հրեայ մեծամեծները Պօղոսի դէմ իրենց ամբաստանութիւնները ներկայացուցին անոր,

ԳՈՐԾՔ ԱՌԱՔԵԼՈՑ 25:7

Երբ Պօղոս հասաւ, Երուսաղէմէն եկած Հրեաները անոր շուրջը կեցան եւ զայն կ՚ամբաստանէին բազմաթիւ ծանր յանցանքներով, որոնք սակայն չէին յաջողեր ապացուցանել։

ԳՈՐԾՔ ԱՌԱՔԵԼՈՑ 4:12

Միայն անո՛վ կրնաք փրկուիլ։ Աշխարհի մէջ միակն է անիկա, որ Աստուած մարդոց տուաւ, որպէսզի անոր անունով կարենանք փրկուիլ։

ԳՈՐԾՔ ԱՌԱՔԵԼՈՑ 9:23

Ժամանակ մը ետք, Դամասկոսի Հրեաները որոշեցին Սօղոսը սպաննել։

ԱՌԱՋԻՆ ԿՈՐՆԹԱՑԻՍ 10:33

Ճիշդ այնպէս՝ ինչպէս ես կը փորձեմ բոլորն ալ սիրաշահիլ։ Ո՛չ թէ իմ անձիս օգուտը կը փնտռեմ, այլ՝ բոլորինը, որպէսզի փրկուին։

ԳԱՂԱՏԱՑԻՍ 5:11

Գալով ինծի, եղբայրնե՛ր, եթէ ես ալ տակաւին թլփատուիլ կը քարոզեմ, ինչպէս ոմանք կ՚ըսեն, ալ ինչո՞ւ կը հալածուիմ. չէ՞ որ այդ պարագային խաչի վրայ Քրիստոսի մահը կը դադրի գայթակղութիւն ըլլալէ։

ԵՓԵՍԱՑԻՍ 3:13

Ուստի կ՚աղաչեմ որ չընկճուիք, տեսնելով այն նեղութիւնները որ ես ձեզի համար յանձն առած եմ, եւ որոնք ձեր փառքն են։

ԵՓԵՍԱՑԻՍ 3:8

Այո՛, ինծի՝ որ Աստուծոյ ժողովուրդին մէջ յետիններուն յետինն եմ՝ Աստուած այս շնորհքը տուաւ, որպէսզի բոլոր ազգերուն աւետիս տամ՝ թէ ի՛նչպիսի աներեւակայելի գանձ մըն է Քրիստոս,

ԱՌԱՋԻՆ ԹԵՍԱՂՈՆԻԿԵՑԻՍ 1:10

եւ թէ ի՛նչպէս կը սպասէք որ երկինքէն վերստին գայ Աստուծոյ Որդին, Յիսուսը, որ Աստուած մեռելներէն յարուցանեց, եւ որ մեզ պիտի փրկէ գալիք բարկութենէն։

ԵՐԿՐՈՐԴ ԹԵՍԱՂՈՆԻԿԵՑԻՍ 2:10

եւ ամէն տեսակի չար խաբեբայութեամբ պիտի հրապուրէ անոնք՝ որ կորուստի ճամբուն մէջ են։ Քանի որ անոնք չսիրեցին եւ չընդունեցին ճշմարտութիւնը որ զիրենք պիտի փրկէր,

ԱՌԱՋԻՆ ՏԻՄՈԹԷՈՍ 2:4

որ կ՚ուզէ որ բոլոր մարդիկը փրկուին եւ հասնին ճշմարտութեան ճանաչումին,

ԵԲՐԱՅԵՑԻՍ 6:8

Իսկ այն հողը որ փուշ եւ տատասկ կը բուսցնէ՝ անպէտ է եւ անէծքի ենթակայ, եւ սահմանուած է այրուելու։

ՅԱՅՏՆՈՒԹԻՒՆ 22:11

Ամբարիշտը կրկին թող իր ամբարշտութիւնը ընէ, գէշ մարդը՝ իր գէշութիւնը, ով որ արդար է՝ թող արդարութիւն ընէ, եւ սուրբը՝ իր սրբութիւնը պահէ։